« ពររបស់លោកអយ្យកោ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ពររបស់លោកអយ្យកោ
ការណែនាំផ្ទាល់ខ្លួន និងការបំផុសគំនិតមកពីព្រះវរបិតាសួគ៌
នៅក្នុងព្រះគម្ពីរមរមនព្យាការី លីហៃ បានរកឃើញដុំមូលមួយដែលធ្វើពីធាតុលង្ហិនដែលមានទ្រនិចពីរ ( សូមមើល នីហ្វៃទី១ ១៦:១០ ) ។ គ្រួសាររបស់លោកបានរកឃើញថាដុំមូល ឬត្រីវិស័យនេះដែលពួកគេហៅថា « លីអាហូណា » បានចង្អុលបង្ហាញពីកន្លែងដែលពួកគេត្រូវធ្វើដំណើរនៅក្នុងទីរហោស្ថាន ។ ដុំមូលនេះធ្វើការស្របតាមសេចក្តីជំនឿរបស់ពួកគេទៅលើព្រះ ( សូមមើល អាលម៉ា ៣៧:៣៨-៤០ ) ។ ពររបស់លោកអយ្យកោអាចដំណើរការសម្រាប់យើងដូចជាលីអាហូណាបានធ្វើសម្រាប់គ្រួសាររបស់លីហៃដែរ ។
ប្រធាន ថូម៉ាស អេស ម៉នសុន បានប្រកាសថា « ព្រះអម្ចាស់ដដែលនោះដែលបានប្រទានលីអាហូណាទៅឲ្យលីហៃ ក៏ប្រទានឲ្យបងប្អូន និងខ្ញុំនៅសព្វថ្ងៃនេះនូវអំណោយដ៏កម្រ និងមានតម្លៃមួយដើម្បីផ្តល់ការណែនាំដល់ជីវិតរបស់យើង ប្រាប់ពីគ្រោះថ្នាក់ដើម្បីសុវត្ថិភាពរបស់យើង និងគូសផែនទីសូម្បីជាផ្លូវដែលមានសុវត្ថិភាព—ពុំមែនទៅរកដែនដីសន្យានោះទេ ប៉ុន្តែទៅគេហដ្ឋាននៅស្ថានសួគ៌របស់យើងវិញ ។ អំណោយដែលខ្ញុំនិយាយដល់នេះត្រូវបានគេស្គាល់ថាជាពររបស់លោកអយ្យកោរបស់អ្នក » ។
ព្រះវរបិតាសួគ៌ផ្តល់នូវការណែនាំដ៏ទេវភាពដល់យើងតាមវិធីជាច្រើន—តាមរយៈការអធិស្ឋាន ព្រះគម្ពីរ ប្រសាសន៍របស់ព្យាការីនៅរស់ និងអំណោយនៃព្រះវិញ្ញាណបរិសុទ្ធ ។ ពររបស់លោកអយ្យកោរបស់អ្នកគឺជាឧបករណ៍ដ៏សំខាន់មួយទៀតដែលអាចផ្ដល់ឲ្យអ្នកនូវការណែនាំខាងវិញ្ញាណ ដំបូន្មាន និងការធានានៅពេលដែលអ្នកប្រឈមមុខទៅនឹងភាពមិនប្រាកដប្រជា និងឧបសគ្គក្នុងជីវិត ។
តើអ្វីទៅជាពររបស់លោកអយ្យកោ ?
ពររបស់លោកអយ្យកោគឺជាការប្រសិទ្ធពរបព្វជិតភាពផ្ទាល់ខ្លួនដែលទទួលបានមកពីលោកអយ្យកោដែលបានតែងតាំង និងអនុញ្ញាតដោយការដាក់ដៃលើ ។ ជាទូទៅពររបស់លោកអយ្យកោមាននូវការណែនាំ និងការបំផុសគំនិតផ្ទាល់ខ្លួន និងដំបូន្មានពីព្រះវរបិតាសួគ៌ ។ ពររបស់លោកអយ្យកោក៏រួមបញ្ចូលទាំងការប្រកាសអំពីពូជពង្សរបស់បុគ្គលម្នាក់នៅក្នុងវង្សអ៊ីស្រាអែលឬជាកូនចៅរបស់អ័ប្រាហាំផងដែរ ។ ពររបស់លោកអយ្យកោត្រូវបានកត់ត្រាដោយមានច្បាប់ចម្លងមួយដែលបានផ្តល់ទៅសមាជិក និងមួយច្បាប់ទៀតត្រូវបានរក្សាទុកក្នុងកំណត់ត្រារបស់សាសនាចក្រ ។ សមាជិកគ្រប់រូបនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ត្រូវបានលើកទឹកចិត្តឲ្យទទួលពររបស់លោកអយ្យកោ ។
ទិដ្ឋភាពទូទៅនៃប្រធានបទ ៖ ពររបស់លោកអយ្យកោ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ការប្រសិទ្ធពរបព្វជិតភាព, វិវរណៈផ្ទាល់ខ្លួន, សេចក្ដីសញ្ញាអ័ប្រាហាំ
ផ្នែកទី ១
តើអ្វីទៅជាពររបស់លោកអយ្យកោ ?
សមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយអាចទទួលបានការប្រសិទ្ធពរបព្វជិតភាពដោយការដាក់ដៃលើជាច្រើនដងក្នុងជីវិតរបស់ពួកគេ ។ សមាជិកអាចស្នើសុំការប្រសិទ្ធពរបព្វជិតភាពមកពីអ្នកកាន់បព្វជិតភាពម៉ិលគីស្សាដែកនៅពេលណាដែលពួកគេត្រូវការការព្យាបាល ឬប្រាថ្នាចង់បានការលួងលោម ប្រាជ្ញា និងការណែនាំមកពីព្រះ ។ ទោះជាយ៉ាងណាក៏ដោយ ពររបស់លោកអយ្យកោគឺខុសប្លែកពីការប្រសិទ្ធពរបព្វជិតភាពទាំងនេះ ។
លោកអយ្យកោកាន់នូវតំណែងបព្វជិតភាពពិសេសមួយ ហើយត្រូវបានញែកចេញដើម្បីប្រសិទ្ធពរដ៏ពិសេសទៅដល់សមាជិកដ៏សក្តិសមនៃសាសនាចក្រ ។ មនុស្សម្នាក់គួរតែរៀបចំខ្លួនខាងវិញ្ញាណ និងមានភាពចាស់ទុំគ្រប់គ្រាន់ដើម្បីយល់អំពីសារៈសំខាន់នៃពររបស់លោកអយ្យកោ របស់គាត់ទោះបីជាមិនមានតម្រូវការអាយុអប្បបរមា ឬអតិបរមាក៏ដោយ ។ ជាធម្មតាបុគ្គលម្នាក់ទទួលពររបស់លោកអយ្យកោតែម្តងគត់នៅក្នុងជីវិតរបស់គាត់ ។ ពររបស់លោកអយ្យកោត្រូវបានកត់ត្រា ចម្លង និងរក្សាទុកនៅក្នុងកំណត់ត្រាសាសនាចក្រ ។ ពររបស់លោកអយ្យកោគឺពិសិដ្ឋ ហើយមិនគួរអានជាសាធារណៈ ឬបកស្រាយដោយអ្នកដទៃឡើយ ។
រឿងទាំងឡាយដែលត្រូវពិចារណា
-
ដើម្បីយល់កាន់តែច្បាស់អំពីប្រវត្តិនៃការប្រសិទ្ធពរបព្វជិតភាពនៅក្នុងសាសនាចក្រ សូមពិនិត្យមើលឡើងវិញនូវប្រធានបទ « ពររបស់លោកអយ្យកោ » ដែលមាននៅក្នុងបណ្ណាល័យដំណឹងល្អ ។ តើអ្នករៀនអ្វីខ្លះអំពីពររបស់លោកអយ្យកោចេញពីអត្ថបទនេះ ? ហេតុអ្វីអ្នកគិតថាពររបស់លោកអយ្យកោតែងតែត្រូវបានថតចម្លង និងរក្សាទុកនៅក្នុងកំណត់ត្រាសាសនាចក្រ ? តើការណ៍នេះបង្រៀនអ្នកអំពីពររបស់លោកអយ្យកោដ៏អស្ចារ្យរបស់អ្នកផ្ទាល់ និងសារៈសំខាន់របស់វាយ៉ាងដូចម្ដេច ?
-
សូមអាន មាត្រានៃសេចក្ដីជំនឿ ១:៦ ។ យ៉ូសែប ស្ម៊ីធ បានបង្រៀនថាពាក្យ « គ្រូអធិប្បាយ » នៅក្នុងសាសនាចក្រនៃព្រះយេស៊ូវគ្រីស្ទ សំដៅទៅលើតំណែងបព្វជិតភាពដែលបានតែងតាំងដោយអយ្យកោ ។ សម្រាប់ព័ត៌មានបន្ថែមអំពីរឿងនេះ សូមពិចារណាអានសុន្ទរកថារបស់ប្រធាន ប៊យដ៍ ខេ ផាកកឺ « The Stake Patriarch » ។
សកម្មភាពសម្រាប់ការរៀនសូត្រជាមួយអ្នកដទៃ
-
ដំណើរការនៃការទទួលពររបស់លោកអយ្យកោប្រហែលជាមិនត្រូវបានស្គាល់ចំពោះសមាជិកក្រុមទាំងអស់នោះទេ ។ សូមអញ្ជើញពួកគេឲ្យសួរសំណួរអំពីពររបស់លោកអយ្យកោ និងរាយសំនួរសម្រាប់ក្រុមទាំងមូលដើម្បីចង់ដឹងថាតើពួកគេអាចឆ្លើយរួចឬអត់ ។ បន្ទាប់មកសូមពិនិត្យមើល ក្បួនខ្នាតទៅ ៖ ការបម្រើនៅក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ, ១៨.១៧ នៅក្នុងបណ្ណាល័យដំណឹងល្អ ដោយស្វែងរកចម្លើយចំពោះសំណួររបស់សមាជិកក្រុម ។ តើសកម្មភាពនេះបានបង្រៀនអ្នកអ្វីខ្លះអំពីពររបស់លោកអយ្យកោ ?
ស្វែងយល់បន្ថែមទៀត
-
ការបកប្រែរបស់ យ៉ូសែប ស្ម៊ីធ លោកុប្បត្តិ ៤៨:៥–១១ ( in the Bible appendix ); ការបកប្រែរបស់ យ៉ូសែប ស្ម៊ីធ លោកុប្បត្តិ ៥០:២៤–៣៧ ( in the Bible appendix );អេភេសូរ ៤:១១; នីហ្វៃទី២ ៤:១–១២; គោលលទ្ធិ និងសេចក្តីសញ្ញា ១០៧:៣៩, ៥៣, ៥៦
-
កាស្សូហីកូ យ៉ាម៉ាស្ស៊ីតា « ពេលដែលត្រូវទទួលពរជ័យអយ្យកោរបស់បងប្អូន » លីអាហូណា ឧសភា ២០២៣ ទំព័រ ៨៨-៩០
ផ្នែកទី ២
តើការប្រកាសអំពីពូជពង្សនៃពរលោកអយ្យកោគឺជាអ្វី ?
គ្រប់ពរជ័យពររបស់លោកអយ្យកោទាំងអស់មាននូវសេចក្តីប្រកាសអំពីពូជពង្ស ។ នៅពេលបុត្រាបុត្រីរបស់ព្រះបានជ្រមុជទឹក ហើយក្លាយជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះពួកគេទទួលមរតកនូវសេចក្ដីសន្យាដែលព្រះបានធ្វើចំពោះអ័ប្រាហាំ និងកូនចៅរបស់លោកប្រសិនបើពួកគេនៅតែសុចរិត ( សូមមើល អ័ប្រាហាំ ២:៩-១១ ) ។ ខណៈដែលបុគ្គលម្នាក់អាចដេញចុះមកតាមខ្សែស្រឡាយគ្រួសារច្រើនជាងមួយ ចេញពីវង្សអ៊ីស្រាអែល កុលសម្ព័ន្ធជាក់លាក់មួយជាធម្មតាត្រូវបានកំណត់អត្តសញ្ញាណដោយការបញ្ជាក់ថាបុគ្គលនោះមានទំនាក់ទំនងគ្រួសារជាមួយអ័ប្រាហាំ ។ មិនថាសេចក្ដីប្រកាសនេះមានន័យថាបុគ្គលម្នាក់នេះគឺជាកូនចៅផ្ទាល់ដោយឈាម ឬតាមរយៈការទទួលយកខាងវិញ្ញាណនោះមិនសំខាន់ទេ ( សូមមើល អ័ប្រាហាំ ២:១០ ) ។ សេចក្តីប្រកាសនៃពូជពង្សនេះបង្ហាញពីខ្សែស្រឡាយគ្រួសារដែលបុគ្គលម្នាក់ៗអាចទទួលមរតកនូវពរជ័យដែលបានសន្យារបស់អ័ប្រាហាំ ។ វាក៏រំឭកដល់បុគ្គលដ៏ស្មោះត្រង់ម្នាក់អំពីទំនួលខុសត្រូវខាងវិញ្ញាណដែលគាត់មានក្នុងនាមជាកូនចៅរបស់អ័ប្រាហាំផងដែរ ( សូមមើល អ័ប្រាហាំ ២:១១ ) ។
រឿងទាំងឡាយដែលត្រូវពិចារណា
-
ហេតុអ្វីវាសំខាន់ដែលអ្នកជាផ្នែកមួយនៃគ្រួសាររបស់អ័ប្រាហាំ ? អែលឌើរ ដេវីដ អេ បែដណា បានបង្រៀនថា « ហេតុផលចម្បងមួយដែលយើងទទួលបានពររបស់លោកអយ្យកោគឺដើម្បីជួយយើងឲ្យយល់កាន់តែពេញលេញថា តើយើងជានរណាក្នុងនាមជាកូនចៅរបស់អ័ប្រាហាំ និងដើម្បីស្គាល់នូវការទទួលខុសត្រូវដែលដាក់មកលើយើង » ។ តើអ្នកមានទំនួលខុសត្រូវអ្វីខ្លះក្នុងនាមជាអ្នកទទួលមរតកនៃពរជ័យដែលបានសន្យាចំពោះអ័ប្រាហាំ ? តើអ្នករៀនអ្វីខ្លះមកពីពរលោកអយ្យកោរបស់អ្នកអំពីទេពកោសល្យរៀងៗខ្លួន និងអាកប្បកិរិយារបស់អ្នកដែលអាចជួយអ្នកស្ថាបនានគរនៃព្រះបាន ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមចែកចាយសេចក្ដីថ្លែងការណ៍ខាងក្រោមនេះជាមួយសមាជិកក្រុមរបស់អ្នក ។ ប្រធាន រ័សុល អិម ណិលសុន បានបង្រៀន « នៅសម័យរបស់យើង យើងមានអភ័យឯកសិទ្ធិដើម្បីទទួលពរលោកអយ្យកោ ហើយរៀនពីទំនាក់ទំនងរបស់យើងនឹងពួកអយ្យកោពីបុរាណ » ។ អ្នកអាចសួរសមាជិកក្រុមថា តើវាមានន័យយ៉ាងណាចំពោះពួកគេដើម្បីដឹងថាពួកគេជាប់ទាក់ទងទៅនឹងគ្រួសាររបស់អ័ប្រាហាំ និងអយ្យកោបុរាណផ្សេងទៀត ។
ស្វែងយល់បន្ថែមទៀត
-
រែនដល ឃេ បិនណ្ណិត « ពរជ័យអយ្យកោរបស់បងប្អូន—ជាការបំផុសគំនិតមកពីព្រះវរបិតាសួគ៌ » លីអាហូណា ឧសភា ២០២៣ ទំព័រ ៤២-៤៣
-
ជូលី ប៊ី ប៊េក « You Have a Noble Birthright » Liahona ឧសភា ឆ្នាំ ២០០៦ ទំព័រ ១០៦–១០៨
ផ្នែកទី ៣
ព្រះវរបិតាសួគ៌នឹងជួយអ្នកឲ្យមានអារម្មណ៍ពីសេចក្ដីស្រឡាញ់របស់ទ្រង់តាមរយៈពររបស់លោកអយ្យកោរបស់អ្នក
ពរលោកអយ្យកោគឺជាការបង្ហាញពីសេចក្តីស្រឡាញ់របស់ព្រះវរបិតាសួគ៌ចំពោះបុត្រាបុត្រីរបស់ទ្រង់ ។ វាជាភស្តុតាងដែលបញ្ជាក់ថាទ្រង់ស្គាល់យើងដោយផ្ទាល់ ។ នៅពេលអ្នកសិក្សាអំពីពររបស់លោកអយ្យកោរបស់អ្នកប្រកបដោយការអធិស្ឋាន នោះអ្នកនឹងដឹងថាព្រះវរបិតាសួគ៌របស់អ្នកគឺយកព្រះទ័យទុកដាក់ចំពោះអ្នក ហើយមានផែនការដ៏ទេវភាពមួយសម្រាប់សុភមង្គលរបស់អ្នក ។ ការទទួលពររបស់លោកអយ្យកោគឺជាអំណោយដ៏ថ្លៃថ្លាមួយ ។
ពររបស់លោកអយ្យកោអាចមានការព្រមាន ការទូន្មាន និងសេចក្ដីសន្យាពិសេសចំពោះអ្នក ។ ពរជ័យដ៏បំផុសគំនិតនេះអាចត្រូវបានចាត់ទុកថាជាព្រះគម្ពីរផ្ទាល់ខ្លួនសម្រាប់អ្នកដែលទទួលវា ហើយអាចជួយអ្នកឲ្យយល់ពីសក្តានុពល និងលទ្ធភាពរបស់អ្នក ។ វាក៏អាចផ្តល់នូវភាពសុខសាន្ត និងសេចក្តីសង្ឃឹមនៅពេលមានការលំបាក និងភាពមិនប្រាកដប្រជាផងដែរ ។ ហើយខណៈដែលពររបស់លោកអយ្យកោមិនបានលម្អិតពីអ្វីៗដែលនឹងកើតឡើងទាំងអស់នៅក្នុងជីវិតរបស់អ្នកក្តី ក៏វាជាមគ្គុទ្ទេសក៍ដ៏មានប្រយោជន៍មួយដើម្បីជួយអ្នកស្វែងរកគោលបំណង និងមានអារម្មណ៍នៃសេចក្ដីស្រឡាញ់របស់ព្រះ ។ ពរជ័យ និងសេចក្តីសន្យាទាំងអស់នៅក្នុងពររបស់អយ្យកោគឺមានល័ក្ខខ័ណ្ឌដោយផ្អែកលើភាពស្មោះត្រង់របស់យើង ( សូមមើល គោលលទ្ធិ និងសេចក្តីសញ្ញា ១៣០:២០-២១ ) ។ ដោយសារពរលោកអយ្យកោគឺសម្រាប់ការរស់នៅដ៏អស់កល្បជានិច្ចរបស់យើង នោះពរជ័យមួយចំនួនដែលយើងបានសន្យាប្រហែលជាមិនបានបំពេញទាល់តែក្រោយពីជីវិតរមែងស្លាប់នេះ ។
រឿងទាំងឡាយដែលត្រូវពិចារណា
-
ប្រធាន រ័សុល អិម ណិលសុន បានបង្រៀនថា ៖ « តើអ្នកមើលឃើញសារៈសំខាន់នៃពរលោកអយ្យកោរបស់អ្នកដែរឬទេ ? … វាមានតម្លៃណាស់ ។ វាគឺជាព្រះគម្ពីរផ្ទាល់ខ្លួនសម្រាប់អ្នក ។ វាប្រកាសពូជពង្សពិសេសរបស់អ្នក ។ វារំឭកអ្នកពីទំនាក់ទំនងរបស់អ្នកជាមួយអតីតកាល ។ ហើយវានឹងជួយអ្នកឲ្យដឹងពីសក្តានុពលនាពេលអនាគតរបស់អ្នក ។ តាមពិតអ្នកអាចដាក់ការអះអាងទៅលើព្រះអម្ចាស់ដើម្បីបំពេញនូវពរជ័យទាំងនោះតាមរយៈភាពស្មោះត្រង់របស់អ្នកបាន » ។ តើអ្នកមានអារម្មណ៍យ៉ាងណានៅពេលអ្នកពិចារណាអំពីការបង្រៀនទាំងនេះ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមរំឭកសមាជិកក្រុមថាពេលខ្លះវាអាចពិបាកដឹងអំពីរបៀបបកប្រែពររបស់លោកអយ្យកោរបស់អ្នក ។ វគ្គ ឬឃ្លាមួយចំនួនដែលអាចមានអត្ថន័យដែលមានសក្តានុពលជាច្រើន ។ ប្រធាន ដាល្លិន អេក អូក បានឲ្យដំបូន្មានថា ៖ « [ ពររបស់លោកអយ្យកោ ] គឺត្រូវបានផ្ដល់ឲ្យក្រោមការបំផុសគំនិតមកពីព្រះវិញ្ញាណបរិសុទ្ធ និងគួរតែត្រូវបានអាន និងបកស្រាយនៅក្រោមឥទ្ធិពលរបស់ព្រះវិញ្ញាណដដែលនោះ » ។ តើអ្នកអាចអញ្ជើញព្រះវិញ្ញាណបរិសុទ្ធបានយ៉ាងដូចម្ដេចពេលអ្នកអាន និងបកប្រែពររបស់លោកអយ្យកោរបស់អ្នក ? តើការយល់ដឹងរបស់អ្នកអំពីវគ្គបទគម្ពីរនៅក្នុងពរលោកអយ្យកោរបស់អ្នក អាចផ្លាស់ប្ដូរពេញមួយជីវិតរបស់អ្នកដោយរបៀបណា ?
ស្វែងយល់បន្ថែមទៀត
-
ថូម៉ាស អេស ម៉នសុន « Your Patriarchal Blessing: A Liahona of Light » Ensign ខែ វិច្ឆិកា ឆ្នាំ ១៩៨៦ ទំព័រ ៦៥–៦៧
ធនធានផ្សេងទៀតអំពីពររបស់លោកអយ្យកោ