ពេលដែលត្រូវទទួលពរជ័យអយ្យកោរបស់បងប្អូន

ដោយអែលឌើរ កាស្សូហ៊ីកូ យ៉ាម៉ាស្ស៊ីតា

នៃពួកចិតសិបនាក់

នៅពេលបងប្អូនទទួលពរជ័យ នោះបងប្អូននឹងដឹង ព្រមទាំងទទួលអារម្មណ៍ថាព្រះវរបិតា និង ព្រះយេស៊ូវគ្រីស្ទ ស្រឡាញ់បងប្អូននិងយកចិត្តទុកដាក់លើបងប្អូនម្នាក់ៗរៀងៗខ្លួនប៉ុនណា ។

កាលពីម្សិលមិញ មិត្តសម្លាញ់ខ្ញុំ អែលឌើរ រែនដល ឃេ បិនណ្ណិត បាននិយាយអំពីពរជ័យអយ្យកោ ។ នោះគឺជាសារលិខិតដ៏អស្ចារ្យ និងបំផុសគំនិតដល់យើងទាំងអស់គ្នា ។ បងប្អូនប្រុសស្រីជាទីស្រឡាញ់ តើខ្ញុំអាចនិយាយអំពីពរជ័យអយ្យកោផងដែរបានទេ ? លោកអយ្យកោ នៅពេលការស្នើសុំពរពីលោកអយ្យកោអាចកើនឡើង នោះខ្ញុំសូមអធិស្ឋានថា ព្រះអម្ចាស់នឹងប្រទានពរដល់បងប្អូន នៅពេលដែលបងប្អូនបន្តលើកតម្កើងដល់ការហៅរបស់បងប្អូន ។

នៅពេលខ្ញុំចូលរួមសន្និសីទស្តេកម្ដងៗ ខ្ញុំតែងជួបនឹងលោកអយ្យកោស្តេក និងភរិយាលោក ។ លោកអយ្យកោ សុភាពរាបសា ស្ដាប់បង្គាប់ និងជាអ្នកដឹកនាំដ៏ប្រពៃដែលត្រូវបានហៅពីព្រះ ។ ពួកលោកប្រាប់ខ្ញុំអំពីបទពិសោធន៍ខាងវិញ្ញាណដ៏អស្ចារ្យជាច្រើន ។ ខ្ញុំសួរពួកលោកអំពីអាយុអ្នកដែលទទួលពរជ័យដែលក្មេងជាងគេ និងចាស់ជាងគេ ។ កន្លងមក អ្នកក្មេងជាងគេគឺអាយុ ១១ ឆ្នាំ ហើយចាស់ជាងគេគឺអាយុ ៩៣ ឆ្នាំ ។

ខ្ញុំបានទទួលពរអយ្យកោរបស់ខ្ញុំកាលជាសមាជិកថ្មីក្នុងសាសនាចក្រ នៅអាយុ ១៩ ឆ្នាំ បន្ទាប់ពីខ្ញុំជ្រមុជទឹកបានពីរឆ្នាំ ។ លោកអយ្យកោខ្ញុំមានវ័យចំណាស់ខ្លាំងណាស់ ។ លោកបានចូលរួមសាសនាចក្រក្នុងឆ្នាំ ១៩១៦ ហើយលោកជាអ្នកត្រួសត្រាយផ្លូវម្នាក់របស់សាសនាចក្រក្នុងប្រទេសជប៉ុន ។ វាជាកិត្តិយសដ៏ថ្លៃថ្លា ដែលខ្ញុំបានទទួលពរជ័យអយ្យកោរបស់ខ្ញុំពីសិស្សដ៏ឧត្តមរបស់ព្រះអម្ចាស់ ។ ខ្ញុំពិបាកយល់ភាសាជប៉ុនរបស់លោកបន្តិច ប៉ុន្តែវាមានអំណាចខ្លាំងណាស់ ។

លោកអយ្យកោទាំងឡាយដែលខ្ញុំបានជួបប្រាប់ខ្ញុំថា សមាជិកភាគច្រើនទទួលពរជ័៧អយ្យកោរបស់ពួកគេ មុនពេលចេញបម្រើបេសកកម្ម ។ យុវជន យុវនារី ឪពុកម្ដាយ និងប៊ីស្សពជាទីស្រឡាញ់ ពរជ័យអយ្យកោគឺពុំមែនសម្រាប់តែការរៀបចំខ្លួនបម្រើបេសកកម្មប៉ុណ្ណោះនោះទេ ។ សមាជិកដែលបានជ្រមុជទឹក មានភាពស័ក្ដិសមអាចទទួលពរជ័យអយ្យកោបាន នៅពេលវេលាស័ក្ដិសមសម្រាប់ពួកគាត់ ។^១

សមាជិកមជ្ឈិមវ័យជាទីស្រឡាញ់ បងប្អូនមួយចំនួនមិនទាន់បានទទួលពរជ័យអយ្យកោនៅឡើយទេ ។ សូមចងចាំថា វាពុំមានកំណត់អាយុនោះទេ ។

ម្ដាយក្មេកខ្ញុំជាសមាជិកដ៏សកម្មម្នាក់ក្នុងសាសនាចក្រ ហើយបានបម្រើជាគ្រូបង្រៀនក្នុងថ្នាក់សមាគមសង្គ្រោះរហូតដល់គាត់ទទួលមរណភាពក្នុងវ័យ ៩១ ឆ្នាំ ។ ខ្ញុំសោកស្ដាយណាស់ពេលដឹងថា គាត់មិនបានទទួលពរជ័យអយ្យកោ ។ គាត់បានជួបនឹងការលំបាកជាច្រើនក្នុងជីវិត ហើយគាត់ពុំទទួលបានពរជ័យបព្វជិតភាពច្រើនទេ ព្រោះគាត់គ្មានអ្នកកាន់បព្វជិតភាពនៅក្នុងផ្ទះ ។ ពរជ័យអយ្យកោអាចផ្ដល់ការលួងលោមចិត្តដល់គាត់ពេលគាត់ត្រូវការវាខ្លាំងបំផុត ។

មជ្ឈិមវ័យទាំងឡាយអើយ បើបងប្អូនមិនទាន់បានទទួលពរជ័យអយ្យកោនៅឡើយទេ សូមកុំបារម្ភអី ! ពេលវេលាខាងវិញ្ញាណរបស់មនុស្សម្នាក់ៗគឺខុសៗគ្នា ។ បើបងប្អូនមានអាយុ ៣៥ ឆ្នាំ ឬ ៨៥ ឆ្នាំ ហើយមានបំណងប្រាថ្នាដើម្បីទទួលពរជ័យអយ្យកោ សូមនិយាយជាមួយប៊ីស្សពរបស់បងប្អូន ។

បងប្អូនសមាជិកថ្មីនៃសាសនាចក្រ តើបងប្អូនធ្លាប់ឮអំពីពរជ័យអយ្យកោដែរឬទេ ? ខ្ញុំមិនបានដឹងអំពីរឿងនេះទេ ពេលខ្ញុំចូលជាសមាជិកនៃសាសនាចក្រ ប៉ុន្តែប៊ីស្សពជាទីស្រឡាញ់ខ្ញុំបានប្រាប់ខ្ញុំអំពីពរជ័យអយ្យកោ ហើយបានលើកទឹកចិត្តខ្ញុំឲ្យរៀបចំខ្លួនដើម្បីទទួលពរជ័យរបស់ខ្ញុំ បន្ទាប់ពីខ្ញុំបានទទួលបុណ្យជ្រមុជទឹក ។ បងប្អូនសមាជិកថ្មីជាទីស្រឡាញ់ បងប្អូនក៏អាចទទួលពរជ័យអយ្យកោបានផងដែរ ។ ព្រះអម្ចាស់នឹងជួយបងប្អូនឲ្យរៀបចំខ្លួនសម្រាប់ឱកាសដ៏ពិសិដ្ឋនេះ ។

ចូរយើងពិចារណាអំពីគោលបំណងពីរសម្រាប់ពរជ័យអយ្យកោ ៖

ពរជ័យអយ្យកោផ្តល់ការប្រឹក្សាផ្ទាល់ខ្លួនមកពីព្រះអម្ចាស់ទៅកាន់បងប្អូន ។^២
ពរជ័យអយ្យកោប្រាប់អំពីខ្សែស្រឡាយរបស់បងប្អូននៅក្នុងវង្សអ៊ីស្រាអែល ។

ពរជ័យអយ្យកោបងប្អូន ជាសារលិខិតមកពីព្រះវរបិតាសួគ៌ ហើយសេចក្ដីសន្យា និងការប្រឹក្សាដ៏បំផុសគំនិតនានាដែលមាននៅក្នុងនោះជួយដឹកនាំបងប្អូនពេញមួយជីវិត ។ ពរជ័យអយ្យកោមិនកំណត់ទិសដៅជីវិតឬឆ្លើយតបរាល់សំណួរទាំងអស់របស់បងប្អូននោះទេ ។ បើពរជ័យអយ្យកោមិនប្រាប់អំពីព្រឹត្តិការណ៍ជីវិតដ៏សំខាន់ទេ សូមកុំកាត់យល់ថា បងប្អូននឹងគ្មានឱកាសនោះឡើយ ។ ដូចគ្នានោះដែរ អ្វីៗដែលមានក្នុងពរជ័យអយ្យកោ គ្មានការធានាអះអាងថាវានឹងកើតឡើងក្នុងជីវិតរបស់បងប្អូននោះទេ ។ ពរជ័យអយ្យកោគឺអស់កល្ប ហើយបើបងប្អូនរស់នៅដោយភាពស័ក្ដិសម នោះសេចក្ដីសន្យានានាដែលមិនបានបំពេញក្នុងជីវិតនេះ នឹងកើតមាននៅក្នុងជីវិតខាងមុខ ។^៣

នៅពេលបងប្អូនទទួលការប្រាប់អំពីខ្សែស្រឡាយខ្លួន នោះបងប្អូននឹងដឹងថា បងប្អូននៅក្នុងវង្សអ៊ីស្រាអែល និងជាពូជនៃលោកអ័ប្រាហាំ ។^៤ ដើម្បីយល់ពីសារៈសំខាន់នៃការណ៍នេះ សូមផ្ដោតយកចិត្តទុកដាក់ទៅលើសេចក្ដីសន្យាដែលព្រះអម្ចាស់បានធ្វើជាមួយនឹងវង្សអ៊ីស្រាអែល តាមរយៈលោកអ័ប្រាហាំ ។

សេចក្ដីសន្យាទាំងនោះរួមមាន ៖

« ពូជពង្សរបស់លោកនឹងត្រូវចម្រើនច្រើនឡើង ( សូមមើល លោកុប្បត្តិ ១៧:៥–៦; អ័ប្រាហាំ ២:៩; ៣:១៤ ) ។
« ពូជរបស់លោក ឬកូនចៅរបស់លោកនឹងទទួលដំណឹងល្អ ហើយនឹងកាន់បព្វជិតភាព ( សូមមើល អ័ប្រាហាំ ២:៩ ) ។
« តាមរយៈការងារបម្រើនៃពូជរបស់លោក នោះ ‹ អស់ទាំងគ្រួសារនៅលើផែនដី [ នឹង ] បានពរ គឺដោយព្រះពរទាំងឡាយនៃដំណឹងល្អ ដែលជាព្រះពរទាំងឡាយខាងសេចក្ដីសង្គ្រោះ គឺខាងជីវិតដ៏នៅអស់កល្បជានិច្ច › ( អ័ប្រាហាំ ២:១១ )^៥

ក្នុងនាមជាសមាជិកនៃសាសនាចក្រ យើងទាំងអស់គ្នាគឺជាកូនចៅក្នុងសេចក្ដីសញ្ញា ។^៦ យើងទទួលបានពរជ័យនៃសេចក្ដីសញ្ញាអ័ប្រាហាំ នៅពេលយើងរស់នៅតាមក្រឹត្យវិន័យ និងពិធីបរិសុទ្ធទាំងឡាយនៃដំណឹងល្អ ។

ការរៀបចំខ្លួនសម្រាប់ពរជ័យអយ្យកោនឹងជួយបងប្អូនឲ្យបង្កើនសេចក្ដីជំនឿទៅលើព្រះវរបិតាសួគ៌ និងព្រះយេស៊ូវគ្រីស្ទ ។ ហើយនៅពេលបងប្អូនទទួលបានពរជ័យអយ្យកោរបស់បងប្អូន ហើយអាន និងពិចារណាអំពីពរជ័យនោះ បងប្អូននឹងផ្ដោតទៅលើទ្រង់ទាំងទ្វេកាន់តែញឹកញាប់ជាងមុន ។

ប្រធាន ថូម៉ាស អេស ម៉នសុន បានពន្យល់ថា « ព្រះអម្ចាស់ដដែលនោះ ដែលបានប្រទានលីអាហូណាទៅឲ្យលីហៃ ក៏ប្រទានឲ្យបងប្អូន និងខ្ញុំនៅសព្វថ្ងៃនេះនូវអំណោយដ៏កម្រ និងមានតម្លៃមួយ ដើម្បីផ្តល់ការណែនាំដល់ជីវិតរបស់យើង ប្រាប់ពីគ្រោះថ្នាក់ ដើម្បីសុវត្ថិភាពរបស់យើង និងគូសផែនទី ជាផ្លូវដែលមានសុវត្ថិភាព—ពុំមែនទៅរកដែនដីសន្យានោះទេ ប៉ុន្តែទៅផ្ទះនៅស្ថានសួគ៌របស់យើងវិញ » ។^៧

ប៊ីស្សព ឪពុកម្ដាយ ប្រធានកូរ៉ុមអែលឌើរ និងប្រធានសមាគមសង្គ្រោះ អ្នកដឹកនាំបេសកកម្មវួដ បងប្អូនប្រុសស្រីដែលផ្ដល់ការងារបម្រើជាទីស្រឡាញ់ សូមលើកទឹកចិត្តយុវជន និងយុវនារី សមាជិកមជ្ឈិមវ័យ និងសមាជិកថ្មីទាំងឡាយដែលមិនទាន់បានទទួលពរជួយអយ្យកោរបស់ពួកគេ ឲ្យស្វែងរកការដឹកនាំរបស់ព្រះអម្ចាស់ និងជួយពួកគេឲ្យរៀបចំខ្លួនដើម្បីទទួលពរនោះ ។

ខ្ញុំអានពរជ័យអយ្យកោរបស់ខ្ញុំជាញឹកញាប់ និងប្រកបដោយការអធិស្ឋាន ហើយវាតែងតែផ្ដល់ឲ្យខ្ញុំនូវការលើកទឹកចិត្ត ។ ខ្ញុំដឹងនូវអ្វីដែលព្រះអម្ចាស់រំពឹងចង់បានពីខ្ញុំ ហើយវាជួយខ្ញុំឲ្យប្រែចិត្ត និងបន្ទាបខ្លួន ។ នៅពេលខ្ញុំអាន និងពិចារណាអំពីពរជ័យអយ្យកោ នោះខ្ញុំប្រាថ្នាចង់រស់នៅដោយភាពស័ក្ដិសមដើម្បីទទួលបានពរជ័យដែលបានសន្យាទាំងនោះ ។

វាដូចជាបទគម្ពីរដែលយើងបានអានច្រើនដងមានអត្ថន័យថ្មីៗសម្រាប់យើងនៅពេលក្រោយ នោះពរជ័យអយ្យកោរបស់យើងនឹងមានអត្ថន័យផ្សេងសម្រាប់យើងនៅពេលផ្សេងៗគ្នា ។ ពរជ័យអយ្យកោរបស់ខ្ញុំពេលនេះមានអត្ថន័យផ្សេងខុសពីពេលដែលខ្ញុំមានអាយុ ៣០ ឆ្នាំ និងពេលខ្ញុំមានអាយុ ៥០ ឆ្នាំ ។ ពាក្យពេចន៍ទាំងនោះមិនផ្លាស់ប្ដូរទេ ប៉ុន្តែយើងយល់វាក្នុងរបៀបផ្សេង ។

ប្រធាន ដាល្លិន អេក អូក បានប្រកាសថា ពរជ័យអយ្យកោ « គឺត្រូវបានផ្ដល់ឲ្យក្រោមការបំផុសគំនិតពីព្រះវិញ្ញាណបរិសុទ្ធ និងគួរតែត្រូវបានអាន និងបកស្រាយនៅក្រោមឥទ្ធិពលរបស់ព្រះវិញ្ញាណដដែលនោះ ។ អត្ថន័យ និងសារៈសំខាន់នៃពរជ័យអយ្យកោនឹងត្រូវបានបង្រៀនដោយអំណាចនៃព្រះវិញ្ញាណដូចដែលបានបំផុសគំនិត [ ដល់ពរជ័យនោះ ] មួយបន្ទាត់ម្ដងៗទៅតាមពេលវេលា » ។^៨

បងប្អូនប្រុសស្រី ខ្ញុំសូមថ្លែងទីបន្ទាល់ថា ព្រះវរបិតាសួគ៌ និងបុត្រាដ៏ស្ងួនភ្ងា ដែលជាព្រះរាជបុត្រាបង្កើតតែមួយរបស់ទ្រង់ គឺព្រះយេស៊ូវគ្រីស្ទមានព្រះជន្មរស់ ។ ទ្រង់ទាំងទ្វេស្រឡាញ់យើង ។ ពរជ័យអយ្យកោគឺជាអំណោយដ៏ពិសិដ្ឋមកពីទ្រង់ទាំងទ្វេ ។ នៅពេលបងប្អូនទទួលពរជ័យ នោះបងប្អូននឹងដឹង ព្រមទាំងទទួលអារម្មណ៍ថា ទ្រង់ទាំងទ្វេស្រឡាញ់បងប្អូន និងយកចិត្តទុកដាក់លើបងប្អូនម្នាក់ៗរៀងៗខ្លួនប៉ុនណា ។

ព្រះគម្ពីរមរមនគឺជាសក្ខីបទមួយទៀតអំពីព្រះយេស៊ូវគ្រីស្ទ ។ ហើយខ្ញុំមានអំណរគុណដែលត្រូវបានដឹកនាំដោយព្យាការីដែលនៅរស់ គឺប្រធាន រ័សុល អិម ណិលសុន ។

ខ្ញុំមានអំណរគុណយ៉ាងខ្លាំងចំពោះព្រះអង្គសង្គ្រោះយើង គឺព្រះយេស៊ូវគ្រីស្ទ ។ នៅថ្ងៃអាទិត្យបុណ្យអ៊ីស្ទើរនេះ ខ្ញុំនឹងផ្ដោតទៅលើទ្រង់ និងការមានព្រះជន្មរស់ឡើងវិញរបស់ទ្រង់ ហើយថ្វាយបង្គំទ្រង់ និងថ្វាយអំណរគុណសម្រាប់ពលិកម្មរបស់ទ្រង់ ។ ខ្ញុំដឹងថា ទ្រង់បានរងទុក្ខដ៏ក្រៃលែង ព្រោះទ្រង់ស្រឡាញ់យើងខ្លាំង ។ ខ្ញុំដឹងថា ទ្រង់បានមានព្រះជន្មរស់ឡើងវិញ ព្រោះតែសេចក្ដីស្រឡាញ់ដែលទ្រង់មានសម្រាប់យើង ។ ទ្រង់ពិតជាមានមែន ។ ខ្ញុំសូមថ្លែងទីបន្ទាល់យ៉ាងដូច្នេះ នៅក្នុងព្រះនាមនៃព្រះយេស៊ូវគ្រីស្ទ អាម៉ែន ៕