« ជីវិតមុនជីវិតលើផែនដី » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ជីវិតមុនជីវិតលើផែនដី
ជីវិតរបស់យើងជាមួយនឹងព្រះមុនពេលយើងបានចាប់កំណើត
នៅពេលមួយ មនុស្សភាគច្រើននឹងឆ្ងល់ថា តើនឹងមានអ្វីកើតឡើងនៅពេលពួកគេស្លាប់ ។ ប៉ុន្ដែតើបងប្អូនធ្លាប់ឆ្ងល់ទេថា តើបងប្អូនមកពីណាមុនពេលកើត ហើយបើដូច្នេះតើបងប្អូនជានរណានៅពេលនោះ ?
យើងដឹងមកពីព្រះគម្ពីរថា មុនពេលយើងមកកាន់ផែនដី យើងបានរស់នៅជាមួយនឹងព្រះ ហើយថ្វាយបង្គំទ្រង់ជាព្រះវរបិតាដ៏អស់កល្បជានិច្ចរបស់យើង ។ យើងក៏បានទទួលការណែនាំ និងការរៀបចំខ្លួនសម្រាប់ជីវិតរមែងស្លាប់របស់យើង ហើយបានជ្រើសរើសធ្វើតាមផែនការរបស់ព្រះវរបិតាយើងសម្រាប់សេចក្ដីសង្គ្រោះរបស់យើង ។
ផែនការនៃសេចក្ដីសង្គ្រោះនេះរួមមានទាំងការមកកាន់ផែនដីរបស់យើងផងដែរ ។ ជាផ្នែកមួយនៃបទពិសោធន៍នៃជីវិតរមែងស្លាប់ យើងនឹងទទួលបានរូបកាយរមែងស្លាប់ ហើយវាំងនននឹងគ្របដណ្តប់លើការចងចាំនៃជីវិតមុនជីវិតលើផែនដីរបស់យើង ។ នៅទីនេះលើផែនដី យើងត្រូវតែអនុវត្តសិទ្ធជ្រើសរើសខាងសីលធម៌របស់យើង ឬសមត្ថភាពរបស់យើងដើម្បីជ្រើសរើស ។ នៅក្នុងការប្រជុំក្រុមប្រឹក្សាដ៏ធំមួយ ដែលបានធ្វើឡើងក្នុងអំឡុងពេលជីវិតមុនផែនដីរបស់យើង ព្រះវរបិតាសួគ៌បានជ្រើសរើសព្រះយេស៊ូវគ្រីស្ទដើម្បីបង់ថ្លៃសម្រាប់អំពើបាបរបស់យើង ហើយយកឈ្នះលើសេចក្ដីស្លាប់ ហើយព្រះយេស៊ូវបានទទួលយកតួនាទីនោះដោយស្ម័គ្រចិត្ត ។ យើងបានរៀនថាការរីកចម្រើនរបស់យើងដើម្បីក្លាយដូចជាព្រះវរបិតាសួគ៌របស់យើងនឹងតម្រូវឲ្យយើងដាក់សេចក្តីជំនឿរបស់យើងទៅលើព្រះយេស៊ូវគ្រីស្ទ និងគោរពតាមព្រះបញ្ញត្តិទាំងឡាយរបស់ព្រះ ។
ផ្នែកទី ១
យើងបានរស់នៅជាមួយនឹងព្រះមុនពេលយើងបានចាប់កំណើត
មុនពេលយើងកើតមក យើងមានរូបកាយវិញ្ញាណ ហើយរស់នៅជាមួយនឹងព្រះ ជាបុត្រា និងបុត្រីវិញ្ញាណដ៏ទេវភាពរបស់ព្រះមាតាបិតាសួគ៌ ( សូមមើល ម៉ូសេ ៣:៤–៥ ) ។ នៅទីនោះយើង « បានស្គាល់ និងថ្វាយបង្គំព្រះជាព្រះវរបិតាដ៏អស់កល្បជានិច្ច [ របស់យើង ] » ។ នេះគឺជាពេលនៃការរៀនសូត្រ និងការរៀបចំខ្លួន ហើយព្រះស្គាល់យើង ( សូមមើល យេរេមា ១:៥ ) ហើយបានជួយយើងឲ្យរៀបចំខ្លួនសម្រាប់ជីវិតរបស់យើងនៅលើផែនដីនេះ ( សូមមើល គោលលទ្ធិ និងសេចក្តីសញ្ញា ១៣៨:៥៦ ) ។
ការណ៍ទាំងឡាយដែលត្រូវពិចារណា
-
សេចក្ដីពិតដែលបានបង្រៀននៅក្នុង « ក្រុមគ្រួសារ ៖ ការប្រកាសដល់ពិភពលោក » ជួយយើងឲ្យយល់អំពីរបៀបដែលជីវិតមុនផែនដីរបស់យើងត្រូវគ្នាទៅនឹងផែនការរបស់ព្រះវរបិតាសួគ៌សម្រាប់សុភមង្គលរបស់យើង ។ សូមអានកថាខណ្ឌទាំងបីដំបូងនៃការប្រកាសនេះ សូមយកចិត្តទុកដាក់ជាពិសេសលើសេចក្ដីយោងទៅលើជីវិតមុនជីវិតលើផែនដីរបស់យើង ។ តើការយល់ដឹងរបស់បងប្អូនអំពីជីវិតមុនជីវិតលើផែនដីរបស់យើងអាចជួយបងប្អូននៅពេលបងប្អូនប្រឈមមុខនឹងឧបសគ្គនានាដោយរបៀបណា ? ហេតុអ្វីបងប្អូនគិតថាព្រះបានបង្ហាញសេចក្ដីពិតទាំងនេះអំពីជីវិតមុនជីវិតលើផែនដី ?
-
យើងមិនដឹងច្រើនអំពីជីវិតមុនជីវិតលើផែនដីរបស់យើងទេ ។ ទោះជាយ៉ាងណាក៏ដោយយើងដឹងថា « ពួកគេជាមួយនឹងពួកអ្នកផ្សេងទៀត … បានទទួលមេរៀនមុនដំបូងនានា នៅពិភពនៃពួកវិញ្ញាណ ហើយត្រូវបានរៀបចំឲ្យមកនៅពេលកំណត់នៃព្រះ » ( គោលលទ្ធិ និងសេចក្តីសញ្ញា ១៣៨:៥៦ ) ។ សូមពិចារណាពីអ្វីដែលបងប្អូនដឹងអំពីផែនការនៃសេចក្តីសង្រ្គោះ និងភាពតម្កើងឡើងរបស់ព្រះ និងដំណឹងល្អរបស់ព្រះយេស៊ូវគ្រីស្ទ តើយើងអាចរៀនមេរៀនអ្វីខ្លះក្នុងអំឡុងពេលនេះ ? សិក្សា គោលលទ្ធិ និងសេចក្តីសញ្ញា ១៣៨:៥៣–៥៧ សូមយកចិត្តទុកដាក់ជាពិសេសលើ ( ខទី ៥៦ ) ។ ប្រសិនបើបងប្អូនមានពររបស់លោកអយ្យកោរបស់បងប្អូន នោះការអានវាក៏អាចជួយបានផងដែរ ។ តើបងប្អូនអាចដឹងថាបងប្អូនបានរៀបចំខ្លួនសម្រាប់ជីវិតរមែងស្លាប់របស់បងប្អូនផ្តល់ឲ្យបងប្អូននូវទំនុកចិត្តក្នុងអំឡុងគ្រាលំបាកទាំងឡាយដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន រ័សុល អិម ណិលសុន បានរំឭកសមាជិកក្នុងសាសនាចក្រថា « តើបងប្អូនជានរណា ? ដំបូងហើយសំខាន់បំផុត បងប្អូនគឺជាកូនរបស់ព្រះ » ។ សូមអញ្ជើញមនុស្សគ្រប់គ្នាឲ្យចែកចាយពីមូលហេតុដែលអត្តសញ្ញាណរបស់ពួកគេក្នុងនាមជាកូនរបស់ព្រះគឺសំខាន់ចំពោះពួកគេ ។ បន្ទាប់មកអាន ហេព្រើរ ១២:៩; គោលលទ្ធិ និងសេចក្តីសញ្ញា ៧៦:២៤; កិច្ចការ ១៧:២៩; និង រ៉ូម ៨:១៦ ជាមួយគ្នា ។ តើបងប្អូនទទួលបានការយល់ដឹងអ្វីខ្លះចេញមកពីខគម្ពីរទាំងនេះ ? តើយើងរៀនអ្វីខ្លះមកពីខគម្ពីរទាំងនេះអំពីអត្ថន័យនៃការធ្វើជាកូនរបស់ព្រះ ? ចែកចាយគំនិតរបស់បងប្អូនជាមួយនឹងក្រុម ។
-
សូមគិតអំពីរឿងដែលអ្នកដទៃប្រាប់បងប្អូនអំពីកុមារភាពរបស់បងប្អូន ។ ទោះបីជាបងប្អូនមិនចាំកាលនៅជាទារក ឬជាកូនក្មេងក៏ដោយ អ្វីដែលបានកើតឡើងចំពោះបងប្អូននៅពេលនោះ នៅតែអាចមានផលប៉ះពាល់ដល់បងប្អូនពេញមួយជីវិតរបស់បងប្អូនបានដែរ ។ សូមអញ្ជើញមនុស្សក្នុងក្រុមឲ្យចែកចាយគំរូមួយចំនួន ។ ដូចដែលយើងមិនអាចចាំពីកុមារភាពរបស់យើង នោះយើងក៏មិនអាចចាំពីជីវិតមុនជីវិតលើផែនដីរបស់យើងផងដែរ ។ តើការណ៍នេះជះឥទ្ធិពលទៅលើរបៀបដែលយើងគិតអំពីជីវិតមុនជីវិតលើផែនដីរបស់យើងដោយរបៀបណា ?
ស្វែងយល់បន្ថែមទៀត
-
ឌៀថើរ អេហ្វ អុជដូហ្វ « Your Wonderful Journey Home » Liahona ខែ ឧសភា ឆ្នាំ ២០១៣ ទំព័រ ១២៥–១២៩
-
នែល អេ ម៉ាកស្វែល « Premortality, a Glorious Reality » Ensign ខែ វិច្ឆិកា ឆ្នាំ ១៩៨៥ ទំព័រ ១៥–១៨
-
« ជំពូកទី ៦ ៖ ជីវិតមុនជីវិតលើផែនដីរបស់យើង » សៀវភៅសិក្សាគោលលិទ្ធនៃដំណឹងល្អសម្រាប់សិស្ស ( ឆ្នាំ ២០១០ ) ទំព័រ ១៣–១៥
ផ្នែកទី ២
ព្រះយេស៊ូវគ្រីស្ទត្រូវបានជ្រើសរើសក្នុងជីវិតមុនជីវិតលើផែនដី ដើម្បីធ្វើជាព្រះអង្គសង្រ្គោះរបស់យើង
នៅក្នុងជីវិតមុនជីវិតលើផែនដី ព្រះវរបិតាសួគ៌បានកោះប្រជុំក្រុមប្រឹក្សាដ៏ធំមួយដើម្បីបង្ហាញអំពីផែនការរបស់ទ្រង់សម្រាប់ការរីកចម្រើនដ៏អស់កល្បជានិច្ចរបស់យើង ។ យើងបានរៀនថាយើងនឹងមកកាន់ផែនដី ជាកន្លែងដែលយើងអាចអនុវត្តសិទ្ធជ្រើសរើសខាងសីលធម៌ ហើយក្លាយដូចជាព្រះ ( សូមមើល អ័ប្រាហាំ ៣:២៣–២៦ ) ។ ព្រះវរបិតាសួគ៌បានជ្រើសរើសព្រះយេស៊ូវគ្រីស្ទជាព្រះអង្គសង្គ្រោះ និងជាព្រះប្រោះលោះនៃពិភពលោក ហើយទ្រង់ព្រមទទួលយកតួនាទីនោះដោយស្មគ្រ័ចិត្ត ( សូមមើល ពេត្រុស ទី១ ១:១៩–២០ ) ។ ក្នុងនាមជាព្រះប្រោះលោះរបស់យើង ទ្រង់នឹងធ្វើឲ្យយើងអាចត្រឡប់ទៅកាន់វត្តមានរបស់ព្រះវិញដោយយកឈ្នះសេចក្តីស្លាប់ និងអំពើបាប ។
ទោះជាយ៉ាងណាក៏ដោយ លូស៊ីហ្វើ ( សាតាំង ) បានព្យាយាមបំផ្លាញសិទ្ធិជ្រើសរើសដែលព្រះបានប្រទានដល់បុត្រាបុត្រីរបស់ទ្រង់ ( សូមមើល ម៉ូសេ ៤:១–៣ ) ។ វាក៏ចង់ទទួលសិរីល្អរបស់ព្រះដែរ ( សូមមើល អេសាយ ១៤:១២–១៥; គោលលទ្ធិ និងសេចក្តីសញ្ញា ៧៦:២៥–២៩ ) ។ ការណ៍នេះបានបណ្តាលឲ្យមានការបែកបាក់ដ៏ធំមួយក្នុងចំណោមបុត្រាបុត្រីរបស់ព្រះ ( សូមមើល អ័ប្រាហាំ ៣:២៧–២៨; វិវរណៈ ១២:៧ ) ។ អស់អ្នកទាំងឡាយដែលដើរតាម លូស៊ីហ្វឺ ត្រូវបានបណ្តេញចេញពីស្ថានសួគ៌ជាមួយនឹង លូស៊ីហ្វឺ ( សូមមើល វិវរណៈ ១២:៨–៩; គោលលទ្ធិ និងសេចក្តីសញ្ញា ២៩:៣៦–៣៧ ) ។ អស់អ្នកទាំងអស់ដែលបានទទួលព្រះយេស៊ូវគ្រីស្ទជាព្រះអង្គសង្រ្គោះអាចរីកចម្រើន និងទទួលបានរូបកាយនៅលើផែនដី ។
ព្រះបានប្រទានដល់ពួកយើងនូវអំណោយនៃសិទ្ធិជ្រើសរើសខាងសីលធម៌ ។ សូមអាន នីហ្វៃទី២ ២:២៧–២៩ ដោយយកចិត្តទុកដាក់ទៅលើតួនាទីដែលសិទ្ធិជ្រើសរើសមានក្នុងជីវិតរបស់យើង ។ ហេតុអ្វីបានជាអំណោយនៃសិទ្ធិជ្រើសរើសនេះជាផ្នែកដ៏សំខាន់មួយនៃផែនការរបស់ព្រះវរបិតាសួគ៌ និងនៃបទពិសោធន៍ជីវិតរមែងស្លាប់របស់យើង ? តើការបណ្តេញចេញរបស់ លូស៊ីហ្វើ និងអ្នកដើរតាមរបស់វា បង្រៀនបងប្អូនអំពីសារៈសំខាន់នៃសិទ្ធិជ្រើសរើសនេះយ៉ាងដូចម្ដេច ?
ព្រះយេស៊ូវគ្រីស្ទបានតែងតាំងជាមុនដើម្បីធ្វើជាព្រះអង្គសង្គ្រោះរបស់យើង ។ តើបរមងារ « ព្រះអង្គសង្រ្គោះ » មានអត្ថន័យដូចម្តេច ? សូមអាន យ៉ូហាន ៣:១៧; កិច្ចការ ២:២១; ហេលេមិន ១៤:១៥; និង ម៉ូសេ ១:៦ ។ តើបងប្អូនរៀនអ្វីខ្លះចេញមកពីខគម្ពីរទាំងនេះអំពីតួនាទីរបស់ព្រះយេស៊ូវគ្រីស្ទ ?
សកម្មភាពសម្រាប់ការរៀនសូត្រជាមួយអ្នកដទៃ
ក្នុងអំឡុងពេលជីវិតមុនជីវិតលើផែនដី យើងបានស្គាល់ព្រះនិងព្រះយេស៊ូវគ្រីស្ទ ។ នៅក្នុងជីវិតរមែងស្លាប់ យើងគ្មានការចងចាំពីពេលនេះទេ ហើយត្រូវតែ « ដើរដោយជំនឿ មិនមែនដោយមើលឃើញទេ » ( កូរិនថូស ទី២ ៥:៧ ) ។ ប្រសិនបើបងប្អូនកំពុងបង្រៀនកុមារតូចៗ បងប្អូនអាចអញ្ជើញពួកគេឲ្យបិតភ្នែក ហើយដើរជុំវិញបន្ទប់ ដើម្បីជួយពួកគេឲ្យយល់ពីអត្ថន័យនេះ ។ សូមសិក្សាអំពីបទគម្ពីរមួយចំនួនដែលមានរាយនៅខាងក្រោមជាក្រុម « សេចក្តីជំនឿ » នៅក្នុងសេចក្ដីណែនាំដល់បទគម្ពីរទាំងឡាយ ។ បន្ទាប់មកសូមពិភាក្សាអំពីតួនាទីដែលសេចក្ដីជំនឿលើព្រះយេស៊ូវគ្រីស្ទមាននៅក្នុងដំណើររបស់យើងដើម្បីត្រឡប់ទៅដំណាក់ស្ថានសួគ៌របស់យើងវិញ ។
ស្វែងយល់បន្ថែមទៀត
-
ដាល្លិន អេក អូក « The Great Plan » Liahona ខែ ឧសភា ឆ្នាំ ២០២០ ទំព័រ ៩៣–៩៦
-
សេចក្ដីណែនាំដល់បទគម្ពីរទាំងឡាយ « ក្រុមប្រឹក្សានៅស្ថានសួគ៌ » នៅលើបណ្ណាល័យដំណឹងល្អ ។
-
សេចក្ដីណែនាំដល់បទគម្ពីរទាំងឡាយ « ព្រះអង្គសង្រ្គោះ » នៅលើបណ្ណាល័យដំណឹងល្អ ។