មគ្គុទ្ទេសក៍សិក្សាដំណឹងល្អ
ជីវិតដ៏នៅអស់កល្បជានិច្ច
ដើម្បីរស់នៅជាមួយព្រះ ហើយប្រែក្លាយដូចទ្រង់
បងប្អូនមានសក្តានុពល និងជោគវាសនាដ៏ទេវភាពក្នុងនាមជាបុត្រាបុត្រីរបស់ព្រះមាតាព្រះបិតាសួគ៌ ។ នៅពេលបងប្អូនស្គាល់អត្តសញ្ញាណដ៏អស់កល្បជានិច្ចរបស់បងប្អូន នោះបងប្អូនអាចមើលឃើញថាព្រះមានព្រះទ័យចង់ឲ្យបងប្អូនត្រៀមខ្លួនសម្រាប់ជីវិតនៅពេលខាងមុខ ។ ដោយសារព្រះយេស៊ូវគ្រីស្ទបានយកឈ្នះលើសេចក្ដីស្លាប់ នោះយើងម្នាក់ៗនឹងរស់ឡើងវិញ ហើយទទួលបានភាពអមតៈនៅក្នុងជីវិតបន្ទាប់ ។ ប៉ុន្តែព្រះវរបិតាសួគ៌មានអ្វីជាច្រើនជាងនេះទៅទៀតសម្រាប់អស់អ្នកដែលព្យាយាមធ្វើតាមព្រះយេស៊ូវគ្រីស្ទ ប្រែចិត្តជឿ ហើយធ្វើសេចក្ដីសញ្ញាជាមួយនឹងទ្រង់ ។ ព្រះជាព្រះវរបិតាអាចធ្វើឲ្យបុត្ររបស់ទ្រង់ប្រែក្លាយដូចជាទ្រង់ ហើយរស់នៅម្ដងទៀតក្នុងទីវត្តមានរបស់ទ្រង់ ( សូមមើល ម៉ូសាយ ២:៤១ ) ។ នេះគឺជាអ្វីដែលព្រះគម្ពីរហៅថា « ភាពតម្កើងឡើង » និង « ជីវិតដ៏អស់កល្បជានិច្ច » ។ ជីវិតដ៏អស់កល្បជានិច្ចគឺជាអំណោយដ៏ធំធេងបំផុតរបស់ព្រះ ហើយជាគោលបំណងតែមួយគត់នៃផែនការនៃសេចក្ដីសង្រ្គោះ ( សូមមើល គោលលទ្ធិ និងសេចក្តីសញ្ញា ១៤:៧ ) ។ គ្រប់យ៉ាងដែលព្រះធ្វើគឺដើម្បីរៀបចំបុត្ររបស់ទ្រង់ឲ្យទទួលបានជីវិតដ៏នៅអស់កល្បជានិច្ច ( សូមមើល ម៉ូសេ ១:៣៩ ) ។
ផ្នែកទី ១
ផែនការរបស់ព្រះនឹងជួយបងប្អូនឲ្យទទួលបាននូវភាពតម្កើងឡើង និងជីវិតអស់កល្បជានិច្ច
តើបងប្អូនធ្លាប់មានអារម្មណ៍ថាបងប្អូនប្រហែលជាមិនមានលក្ខណៈសម្បត្តិគ្រប់គ្រាន់សម្រាប់ភាពតម្កើងឡើងដែរឬទេ ? យើងទាំងអស់គ្នានៅឆ្ងាយពីភាពល្អឥតខ្ចោះនៅក្នុងការខិតខំរបស់យើងដើម្បីធ្វើតាមព្រះយេស៊ូវគ្រីស្ទ ។ ប៉ុន្តែព្រះវរបិតាសួគ៌ទ្រង់បានជ្រាបដឹងថាបទពិសោធន៍នៃជីវិតរមែងស្លាប់របស់យើងនឹងមានទាំងឧបសគ្គ និងការបាក់ទឹកចិត្ត ។ នៅក្នងព្រះគម្ពីរសញ្ញាថ្មីបានបង្រៀនថា « ដ្បិតព្រះទ្រង់ស្រឡាញ់មនុស្សលោកដល់ម៉្លេះ បានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ »( យ៉ូហាន ៣:១៦ ) . យើងអាចទុកចិត្តថាផែនការរបស់ព្រះវរបិតាសួគ៌សម្រាប់សេចក្ដីសង្គ្រោះ និងការប្រោសលោះរបស់យើងពិតជាបានផល ព្រោះទ្រង់បានបញ្ជូនព្រះយេស៊ូវគ្រីស្ទឲ្យក្លាយជាព្រះអង្គសង្រ្គោះ និងព្រះប្រោសលោះរបស់យើង ។ យើងមិនអាចទទួលបានអំណោយនៃជីវិតដ៏អស់កល្បជានិច្ចដោយខ្លួនឯងបានឡើយ ។ យើងត្រូវការព្រះយេស៊ូវគ្រីស្ទ ហើយតាមរយៈសេចក្ដីជំនឿរបស់យើងលើទ្រង់ ការប្រែចិត្តជឿ និងការខិតខំប្រឹងប្រែងដើម្បីធ្វើ និងរក្សាសេចក្ដីសញ្ញា នោះយើងរៀបចំខ្លួនរបស់យើងដើម្បីទទួលបានភាពតម្កើងឡើង ( សូមមើល គោលលទ្ធិ និងសេចក្ដីសញ្ញា ៥៩:២៣; ម៉ូសេ ៦:៥៩–៦០ ) ។
ក្នុងនាមជាបុត្រាបុត្រីរបស់ព្រះ យើងមានសមត្ថភាព និងឱកាសដើម្បីរីកចម្រើន ហើយប្រែក្លាយដូចជាទ្រង់ ( សូមមើល ម៉ាថាយ ៥:៤៨; ពេត្រុស ទី២ ១:២–៤; យ៉ូហាន ទី១ ៣:១–២ ) ។ ព្រះវរបិតាសួគ៌សន្យាថាថ្ងៃណាមួយយើងអាចក្លាយទៅជា « អ្នកគ្រងមរតកនៃព្រះជាមួយនឹងព្រះគ្រីស្ទ » ( រ៉ូម ៨:១៧ ) ហើយទទួលនូវគ្រប់អ្វីៗទាំងអស់ដែលព្រះជាព្រះវរបិតាមាន ( សូមមើល គោលលទ្ធិ និងសេចក្តីសញ្ញា ៨៤:៣៦–៣៨ ) ។ អំណោយនៃជីវិតដ៏អស់កល្បជានិច្ចរួមមានពរជ័យនៃការរស់នៅក្នុងទីវត្តមានរបស់ព្រះ និងការបន្តជាក្រុមគ្រួសារ ( សូមមើល គោលលទ្ធិ និងសេចក្តីសញ្ញា ១៣១:១–៤ ) ។
ការណ៍ទាំងឡាយដែលត្រូវពិចារណា
-
ស្តាប់ ឬអានទំនុកបទ « ពួកបរិសុទ្ធឆ្ពោះទៅមុខ » ។ សូមកត់ត្រាអារម្មណ៍របស់បងប្អូននៅពេលបងប្អូនស្តាប់ ឬអាន ។ តើជីវិតដ៏អស់កល្បជានិច្ចហាក់អាចសម្រេចបានជាងបងប្អូនបានគិតដែរឬទេ ? សូមអាន នីហ្វៃទី២ ៣១:២០ ។ តើវាមានន័យយ៉ាងណាក្នុងការឈានទៅមុខជាមួយនឹង « ការភ្លឺថ្លានៃសេចក្ដីសង្ឃឹមដ៏ឥតខ្ចោះ » ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមធ្វើបញ្ជីអំពីកាលៈទេសៈដែលត្រូវពន្យារពេល ឬបង្អង់ ដែលបាននាំមកនូវលទ្ធផលដែលមិនគួរឲ្យប្រាថ្នាចង់បាន ។ សូមអាន អាលម៉ា ៣៤:៣២–៣៤ ជាមួយគ្នា ហើយពិភាក្សាអំពីសេចក្ដីពិតដែលជួយយើងឲ្យយល់អំពីមូលហេតុដែលយើងមិនគួរពន្យារពេល ឬបង្អង់ពេលនៃការប្រែចិត្តជឿរបស់យើង ។ ហេតុអ្វីជីវិតនេះគឺជាពេលដើម្បីរៀបចំខ្លួនសម្រាប់ជីវិតបន្ទាប់ ?
ស្វែងយល់បន្ថែមទៀត
-
រ័សុល អិម ណិលសុន « Salvation and Exaltation » Liahona, ខែ ឧសភា ឆ្នាំ ២០០៨ ទំព័រ ៧–១០
-
ជែហ្វ្រី អ័រ ហូឡិន « កុំខ្លាចឡើយ ៖ ឲ្យគ្រាន់តែជឿប៉ុណ្ណោះ! » លីអាហូណា ខែ ឧសភា ឆ្នាំ ២០២២ ទំព័រ ៣៤–៣៦
-
Teachings of Presidents of the Church: Harold B. Lee ( ឆ្នាំ ២០១១ ) ទំព័រ ១–៨
-
រែនដល ឃេ បិនណិ្ណត « Choose Eternal Life » Liahona ខែ វិច្ឆិកា ឆ្នាំ ២០១១ ទំព័រ ៩៨–១០០
-
Gospel Topics Essays « Becoming Like God » នៅលើបណ្ណាល័យដំណឹងល្អ
ផ្នែកទី ២
ព្រះបានរៀបចំនគរនៃសិរីល្អផ្សេងៗគ្នាសម្រាប់បុត្រាបុត្រីរបស់ទ្រង់
ព្រះយេស៊ូវបានបង្រៀនថាមានរង្វាន់ផ្សេងគ្នានៅក្នុងជីវិតបន្ទាប់ ៖ « នៅក្នុងដំណាក់នៃព្រះវរបិតាខ្ញុំ មានទីលំនៅជាច្រើន » ( សូមមើល យ៉ូហាន ១៤:២–៣ ) ។ ព្យាការី យ៉ូសែប ស្ម៊ីធ បានមើលឃើញការនិមិត្តមួយនៃកម្រិតទាំងបី ឬនគរនៃសិរីល្អនៅស្ថានសួគ៌ ( សូមមើល គោលលទ្ធិ និងសេចក្ដីសញ្ញា ៧៦:៥០–៩៨ ) ។ នគរទាំងនេះមាន នគរសេឡេស្ទាល ទេរេសទ្រាល និងទេឡេស្ទាល ។ នគរនីមួយៗទាំងនេះធ្វើឲ្យយើងអាចទទួលបានតាមរយៈដង្វាយធួនដ៏ធំធេងរបស់ព្រះយេស៊ូវគ្រីស្ទ ( សូមមើល គោលលទ្ធិ និងសេចក្តីសញ្ញា ៧៦:៤០–៤៣ ) ។ យ៉ូសែប បានដឹងថានគរដែលយើងនឹងទទួលបានជាមរតកនៅថ្ងៃណាមួយ គឺអាស្រ័យទៅលើកម្រិតដែលយើងជ្រើសរើសធ្វើតាមព្រះយេស៊ូវគ្រីស្ទ ។ នគរសេឡេស្ទាលគឺជាសិរីរុងរឿងខ្ពស់បំផុត និងជាកន្លែងដែលព្រះគង់នៅ ( សូមមើល គោលលទ្ធិ និងសេចក្តីសញ្ញា ៧៦:៦២ ) ។ ដំណឹងល្អរបស់ព្រះយេស៊ូវគ្រីស្ទគូសបង្ហាញផ្លូវមួយដែលបានរចនាឡើងដើម្បីជួយយើងឲ្យត្រៀមខ្លួន និងទទួលបានសិរីរុងរឿងនៃនគរសេឡេស្ទាល ។
ការណ៍ទាំងឡាយដែលត្រូវពិចារណា
-
នៅឆ្នាំ ១៨៣២ ព្យាការី យ៉ូសែប ស្ម៊ីធ និង ស៊ីឌនី រិកដុន បាននិមិត្តឃើញនគរនៃសិរីល្អ ( សូមមើល គោលលទ្ធិ និងសេចក្ដីសញ្ញា ៧៦:១១–២៤ ) ៖ នគរសេឡេស្ទាល ( សូមមើល ខទី ៥០–៧០, ៩២–៩៦ ), នគរទេរេសទ្រាល ( សូមមើល ខទី ៧១–៨០, ៩១, ៩៧ ) និង នគរទេឡេស្ទាល ( សូមមើល ខទី ៨១–៩០, ៩៨–១០៦, ១០៩–១១២ ) ។ តើយើងអាចរៀនអ្វីខ្លះអំពីព្រះវរបិតាសួគ៌ និងព្រះរាជបុត្រារបស់ទ្រង់ គឺព្រះយេស៊ូវគ្រីស្ទចេញពីការពិតដែលថាទ្រង់ទាំងទ្វេបានរៀបចំនគរនៃសិរីល្អផ្សេងៗគ្នា ?
សកម្មភាពសម្រាប់ការរៀនសូត្រជាមួយអ្នកដទៃ
សូមអញ្ជើញសមាជិកក្នុងក្រុមរបស់បងប្អូនឲ្យពិនិត្យមើលឡើងវិញនូវអត្ថបទសង្ខេប « Kingdoms of Glory » នៅក្នុង Topics and Questions ។ ចូរនិយាយគ្នាអំពីភាពខុសគ្នាមួយចំនួនរវាងនគរនីមួយៗ ។ តើបំណងប្រាថ្នា និងការខិតខំរបស់យើងដើម្បីធ្វើតាមព្រះយេស៊ូវគ្រីស្ទនៅក្នុងជីវិតនេះមានឥទ្ធិពលយ៉ាងដូចម្ដេចទៅលើរង្វាន់ដ៏អស់កល្បជានិច្ចរបស់យើង ?
ស្វែងយល់បន្ថែមទៀត
-
កូរិនថូស ទី១ ១៥:៤០–៤២; នីហ្វៃទី៣ ១៥:៩–១០; គោលលទ្ធិ និងសេចក្តីសញ្ញា ៥៩:២៣; ៨៨:១៥–២៨; ១៣៧
-
រ័សុល អិម ណិលសុន « Come, Follow Me » Liahona ខែ ឧសភា ឆ្នាំ ២០១៩ ទំព័រ ៨៨–៩១
-
Teachings of Presidents of the Church: Joseph Smith ( ឆ្នាំ ២០១១ ) ទំព័រ ២១៧–២២៥
-
ប្រធានបទប្រវត្តិសាសនាចក្រ « The Vision ( គ&ស ៧៦ ) នៅលើបណ្ណាល័យដំណឹងល្អ