« ក្រុមព្រះ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ក្រុមព្រះ
ការជឿទៅលើព្រះជាព្រះវរបិតា ទៅលើព្រះរាជបុត្រារបស់ទ្រង់គឺព្រះយេស៊ូវគ្រីស្ទ និងទៅលើព្រះវិញ្ញាណបរិសុទ្ធ ។
នៅពេលដែលមនុស្សនិយាយថា « ខ្ញុំជឿលើព្រះ » តើពួកគេមានន័យយ៉ាងណា ? ពួកគេអាចសំដៅទៅលើរឿងផ្សេងៗជាច្រើន ។
ក្នុងនាមជាពួកបរិសុទ្ធថ្ងៃចុងក្រោយ « យើងខ្ញុំជឿដល់ព្រះ គឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់ គឺព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ » ( មាត្រានៃសេចក្ដីជំនឿ ១:១ ) ។ យើងហៅសេចក្ដីថ្លែងការណ៍នេះថាជាមាត្រានៃសេចក្ដីជំនឿទីមួយរបស់យើង—យើងហៅបែបនេះព្រោះការយល់ដឹងអំពីព្រះដ៏ទេវភាពទាំងបីអង្គនេះគឺជាជំហានដំបូងនៅក្នុងការយល់ដឹងថាយើងជានរណា ហេតុអ្វីបានជាមានយើង ហើយតើយើងអាចក្លាយទៅជាអ្វី ។
តើអ្វីទៅជាក្រុមព្រះ ?
ក្រុមព្រះមានទេវបីអង្គគឺ ៖ ព្រះវរបិតាសួគ៌ ព្រះយេស៊ូវគ្រីស្ទ និងព្រះវិញ្ញាណបរិសុទ្ធ ។ ទោះបីជាអង្គដាច់ដោយឡែកពីគ្នាក៏ដោយ ក៏ពួកទ្រង់ធ្វើការជាមួយគ្នាដោយសាមគ្គីភាពដ៏ល្អឥតខ្ចោះ ដើម្បីប្រទានពរ និងលើកតម្កើងបុត្រាបុត្រីរបស់ព្រះវរបិតាសួគ៌ ។
ទិដ្ឋភាពទូទៅនៃប្រធានបទ ៖ ក្រុមព្រះ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះជាព្រះវរបិតា, ព្រះយេស៊ូវគ្រីស្ទ, ព្រះវិញ្ញាណបរិសុទ្ធ
ផ្នែកទី ១
របៀបដែលក្រុមព្រះត្រូវបានអធិប្បាយក្នុងព្រះគម្ពីរ
ព្រះជាព្រះវរបិតា ព្រះយេស៊ូគ្រីស្ទ និងព្រះវិញ្ញាណបរិសុទ្ធសព្វព្រះទ័យចង់ឲ្យបងប្អូនស្គាល់អំពីទ្រង់ទាំងបី ។ ពួកទ្រង់មិនចង់នៅឆ្ងាយ ឬនៅអាថ៌កំបាំងទេ ។ ពួកទ្រង់បានបង្ហាញនូវសេចក្ដីពិតដ៏សំខាន់ៗជាច្រើនតាមរយៈព្រះគម្ពីរ និងការបង្រៀនរបស់ពួកព្យាការីថ្ងៃចុងក្រោយ ដើម្បីជួយបងប្អូនឲ្យស្គាល់ពួកទ្រង់ឲ្យកាន់តែប្រសើរឡើង ។ មិនត្រឹមតែប៉ុណ្ណោះ ព្រះទ្រង់អញ្ជើញយើងឲ្យទៅជិតទ្រង់ដោយផ្ទាល់ ហើយស្គាល់ទ្រង់តាមរយៈបទពិសោធន៍ផ្ទាល់ខ្លួនជាមួយនឹងទ្រង់ ។ កាលព្រះយេស៊ូវបានមានបន្ទូលនៅក្នុងការអធិស្ឋានមួយទៅកាន់ព្រះវរបិតាជំនួសឲ្យអ្នកដើរតាមទ្រង់ថា « នេះជាជីវិតដ៏អស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង » ( យ៉ូហាន ១៧:៣ ) ។
ការណ៍ទាំងឡាយដែលត្រូវពិចារណា
-
ចូរព្យាយាមស្វែងរកវគ្គបទគម្ពីរដែលលើកឡើងអំពីសមាជិកនៃក្រុមព្រះ—ឧទាហរណ៍ ម៉ាថាយ ៣:១៦–១៧; ១៧:៥; យ៉ូហាន ៥:១៩; ១៤:៦–១០, ២៦; កិច្ចការ ៧:៥៥–៥៦; នីហ្វៃទី៣ ១១:១០–១១, ២៥–២៧, ៣៥–៣៦ ។ តើវគ្គបទគម្ពីរបែបនេះបង្ហាញអ្វីខ្លះអំពីសមាជិកនៃក្រុមព្រះ ? តើបងប្អូនរៀនអ្វីខ្លះអំពីទំនាក់ទំនងរបស់អង្គទាំងបី ?
-
ព្រះបានបង្ហាញសេចក្ដីពិតដ៏សំខាន់អំពីក្រុមព្រះនៅក្នុងជំនាន់របស់យើងតាមរយៈព្យាការី យ៉ូសែប ស្ម៊ីធ ។ ឧទាហរណ៍មួយ សូមអាន យ៉ូសែប ស្ម៊ីធ—ប្រវត្តិ ១:១៣–១៧ ដោយមានសំណួរនេះនៅក្នុងចិត្តថា ៖ តើបទពិសោធន៍របស់ យ៉ូសែប បង្ហាញអ្វីខ្លះអំពីក្រុមព្រះ ?
-
បងប្អូនក៏អាចអាននូវអ្វីដែលព្យាការី យ៉ូសែប បានបង្រៀនអំពីព្រះវិញ្ញាណនៅក្នុង គោលលទ្ធិ និងសេចក្ដីសញ្ញា ១៣០:២២ ។ ការបង្រៀនទាំងនេះខុសគ្នាក្នុងរបៀបដ៏សំខាន់មួយពីអ្វីដែលគ្រីស្ទសាសនាបង្រៀនតាមបែបប្រពៃណី ។ សូមគិតអំពីមូលហេតុដែលសេចក្ដីពិតដូចនេះអំពីក្រុមព្រះមានសារៈសំខាន់ចំពោះបងប្អូន ។
សកម្មភាពសម្រាប់ការរៀនសូត្រជាមួយអ្នកដទៃ
-
បងប្អូនអាចអាន គោលលទ្ធិ និងសេចក្ដីសញ្ញា ១៣០:២២ ជាមួយអ្នកផ្សេងទៀត ហើយមើលរូបភាពនៃការនិមិត្តដំបូងរបស់ យ៉ូសែប ស្ម៊ីធ ។ ចូរនិយាយជាមួយគ្នាអំពីអ្វីដែលខគម្ពីរបង្រៀន និងអ្វីដែលមនុស្សគ្រប់គ្នាមើលឃើញនៅក្នុងរូបភាពនេះ ។ សូមផ្តោតការយកចិត្តទុកដាក់ទៅលើការពិតដែលថាព្រះវរបិតាសួគ៌ និងព្រះយេស៊ូវគ្រីស្ទមានរូបកាយដូចជាយើងផងដែរ—យើងត្រូវបានបង្កើតឡើងក្នុងរូបភាពរបស់ទ្រង់ទាំងទ្វេ !
ស្វែងយល់បន្ថែមទៀត
-
ដាល្លិន អេក អូក « The Godhead and the Plan of Salvation » Liahona ខែ ឧសភា ឆ្នាំ ២០១៧ ទំព័រ ១០០–១០៣
ផ្នែកទី ២
រួមគ្នាក្នុងការប្រទានពរដល់យើង
ទោះបីជាក្រុមព្រះមានសមាជិកបីអង្គផ្សេងគ្នាក៏ដោយ ក៏ពួកទ្រង់ជា « ព្រះតែមួយ » មានន័យថាពួកទ្រង់មានសាមគ្គីភាពយ៉ាងល្អឥតខ្ចោះក្នុងគោលបំណងតែមួយ ។ ហើយតើ « គោលបំណង » នោះជាអ្វីទៅ ? ព្រះអម្ចាស់បានមានព្រះបន្ទូលថា « នេះហើយជាកិច្ចការរបស់យើង និងសិរីល្អរបស់យើង—គឺដើម្បីនាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ និយាយម្យ៉ាងទៀតថាព្រះវរបិតាសួគ៌ ព្រះយេស៊ូវគ្រីស្ទ និងព្រះវិញ្ញាណបរិសុទ្ធធ្វើការរួមគ្នា ដើម្បីសម្រេចនូវផែនការនៃសេចក្ដីសង្គ្រោះ និងភាពតម្កើងឡើង ។ អង្គម្នាក់ៗមានតួនាទីជាក់លាក់នៅក្នុងការបំពេញផែនការនោះ ប៉ុន្តែគោលបំណងរបស់ពួកទ្រង់គឺដូចគ្នា—ដើម្បីជួយឲ្យបងប្អូនត្រឡប់មករស់នៅជាមួយនឹងព្រះម្ដងទៀត ។
ការណ៍ទាំងឡាយដែលត្រូវពិចារណា
-
វិធីមួយដើម្បីដឹងអំពីរបៀបដែលសមាជិកនៃក្រុមព្រះបានធ្វើការជាមួយគ្នា គឺសិក្សាអំពីព្រះបរមងារផ្សេងៗដែលពួកទ្រង់ម្នាក់ៗមាន ។ បងប្អូនអាចរាយចំណងជើងមួយចំនួនទាំងនេះដូចដែលបានរៀបរាប់នៅក្នុងព្រះគម្ពីរដូចនេះ ៖
-
ព្រះវរបិតាសួគ៌ ៖ ម៉ាឡាគី ២:១០; ហេព្រើរ ១២:៩; គោលលទ្ធិ និងសេចក្តីសញ្ញា ១២១:៣២
-
ព្រះយេស៊ូវគ្រីស្ទ ៖ យ៉ូហាន ១:២៩; ហេលេមិន ១៥:១៣; គោលលទ្ធិ និងសេចក្តីសញ្ញា ១១០:៤; ម៉ូសេ ៤:២
-
ព្រះវិញ្ញាណបរិសុទ្ធ ៖ យ៉ូហាន ១៤:២៦; ១៦:១៣; គោលលទ្ធិ និងសេចក្តីសញ្ញា ៧៦:៥៣
-
-
ទំនុកតម្កើង និងចម្រៀងកុមារជាច្រើនបង្រៀនអំពីតួនាទីផ្សេងៗគ្នារបស់សមាជិកនៃក្រុមព្រះ ។ តួនាទីមួយចំនួនបានរៀបរាប់ដូចខាងក្រោម ។ សូមពិចារណាអំពីការច្រៀង ឬការស្តាប់បទចម្រៀងមួយចំនួន ។ សូមកត់សម្គាល់នូវអ្វីដែលបងប្អូនរៀនអំពីរបៀបដែលសមាជិកនៃក្រុមព្រះបានធ្វើការជាមួយគ្នា ដើម្បីប្រទានពរដល់បងប្អូន ។
-
« ឱ! សូមនាំយើងព្រះយេហូវ៉ា » ( ទំនុកតម្កើង ល.រ. ៣៥ ) ។
-
« ក្ដីស្នេហ៍ព្រះអង្គ » ( ទំនុកតម្កើង ល.រ. ៥៩ ) ។
-
« ខ្ញុំដឹងព្រះបិតារស់ » ( នុកតម្កើង ល.រ. ១៨៩ ) ។
-
« ព្រះវិញ្ញាណបរិសុទ្ធ » ( សៀវភៅចម្រៀងកុមារ ទំព័រ ៥៦ ) ។
-
សកម្មភាពសម្រាប់ការរៀនសូត្រជាមួយអ្នកដទៃ
-
បងប្អូនអាចអធិប្បាយពីសាមគ្គីភាពរបស់ក្រុមព្រះប្រដូចនឹងកៅអីដែលមានជើងបី ជើងកាមេរ៉ាសម្រាប់ថត ឬអ្វីផ្សេងទៀតដែលអាចមានស្ថេរភាព និងដំណើរការបានព្រោះវាមានជើងបី ។ ឬបងប្អូនអាចពិចារណាអំពីរបៀបដែលសមាជិកនៃក្រុមមួយ ឬក្រុមតន្ត្រីធ្វើការជាមួយគ្នាដើម្បីសម្រេចគោលដៅតែមួយ ។ យើងអាចគិតថាពួកគេជាកៅអីមួយ ក្រុមមួយ ឬជាក្រុមតន្ត្រីមួយ—ដូចជាក្រុមព្រះ គឺជាព្រះតែមួយ—ដែលសមាជិកម្នាក់ៗបំពេញតួនាទីដាច់ដោយឡែកពីគ្នា និងធ្វើការជាមួយអ្នកដទៃក្នុងសាមគ្គីភាព ។
ស្វែងយល់បន្ថែមទៀត
-
កិច្ចការ ៧:៥៥–៥៦; កូរិនថូស ទី១ ៨:៦; អេភេសូរ ២:១៨; គោលលទ្ធិ និងសេចក្តីសញ្ញា ៧៦:២២–២៤
-
ជែហ្វ្រី អ័រ ហូឡិន « Knowing the Godhead » Ensign ខែ មករា ឆ្នាំ ២០១៦ ទំព័រ ៣២–៣៩