មគ្គុទ្ទេសក៍សិក្សាដំណឹងល្អ
ព្រះវិញ្ញាណបរិសុទ្ធ
ជាអ្នកនាំសារ និងសាក្សីអំពីព្រះវរបិតាសួគ៌ និងព្រះយេស៊ូវគ្រីស្ទរបស់យើង
តើបងប្អូនអាចគិតពីគ្រាដែលបងប្អូនបានដឹងថា ព្រះវរបិតាសួគ៌ទ្រង់ជ្រាបពីបងប្អូន ឬពេលដែលបងប្អូនមានអារម្មណ៍ថាមានអំណរគុណចំពោះដង្វាយធួនរបស់ព្រះយេស៊ូវគ្រីស្ទឬទេ ? ប្រហែលជាបងប្អូនចាំពីគ្រាមួយដែលបងប្អូនកំពុងស្តាប់ព្យាការីដែលនៅរស់ ហើយបងប្អូនបានដឹងថាអ្វីដែលលោកកំពុងបង្រៀនគឺពិត ។ ឬបងប្អូនអាចនឹកចាំពីការអានព្រះគម្ពីរ ហើយមានអារម្មណ៍ដ៏មានឥទ្ធិពលមួយមកលើបងប្អូន ។ ប្រហែលជាបងប្អូនបានស្គាល់នូវការបំផុសគំនិតដែលនាំឲ្យបងប្អូនជៀសវាងអ្វីដែលបណ្តាលឲ្យគ្រោះថ្នាក់ ឬមានអារម្មណ៍ថាមានសេចក្តីសុខសាន្ត ឬការលួងលោមក្នុងអំឡុងពេលដ៏លំបាកមួយ ។ ទាំងនេះគឺជាការបង្ហាញរបស់ព្រះវិញ្ញាណបរិសុទ្ធ ។ ព្រះឈោងមករកបុត្រាបុត្រីរបស់ទ្រង់ ហើយប្រាស្រ័យទាក់ទងនឹងពួកគេតាមរយៈឥទ្ធិពល និងព្រះចេស្តានៃព្រះវិញ្ញាណបរិសុទ្ធ ។ បងប្អូនបានទទួលអំណោយនៃព្រះវិញ្ញាណបរិសុទ្ធនៅពេលបងប្អូនទទួលបុណ្យជ្រមុជទឹកជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។ ព្រះវរបិតាសួគ៌ដ៏ជាទីស្រឡាញ់របស់បងប្អូនធ្វើឲ្យបងប្អូនរីករាយនឹងសេចក្ដីស្រឡាញ់ ការណែនាំ និងការដឹកនាំរបស់ទ្រង់—ហើយពេលខ្លះទ្រង់កែតម្រូវ—តាមរយៈអ្នកនាំសាររបស់ទ្រង់ គឺព្រះវិញ្ញាណបរិសុទ្ធ ។
ផ្នែកទី ១
ព្រះវិញ្ញាណបរិសុទ្ធអាចក្លាយជាពរជ័យដែលមិនអាចកាត់ថ្លៃបានរបស់បងប្អូន
នៅពេលបងប្អូនកាន់តែរៀនអំពីព្រះវិញ្ញាណបរិសុទ្ធ នោះបងប្អូនកាន់តែមានបំណងចង់ទទួល និងដកពិសោធន៍នូវការបើកសម្តែងរបស់ព្រះវិញ្ញាណបរិសុទ្ធ ។ ពួកសាសន៍នីហ្វៃនៅឯព្រះវិហារបរិសុទ្ធ នៅក្នុងដែនដីបរិបូរណ៍បានមានបំណងប្រាថ្នាចង់បានព្រះវិញ្ញាណបរិសុទ្ធ ( សូមមើល នីហ្វៃទី៣ ១៩:៨–៩ ) ។ មានជំហានមួយចំនួនដែលបងប្អូនអាចធ្វើដើម្បីបង្កើនបំណងប្រាថ្នារបស់បងប្អូន ដើម្បីទទួលអារម្មណ៍ពីព្រះវិញ្ញាណបរិសុទ្ធ ឬព្រះវិញ្ញាណរបស់ព្រះអម្ចាស់ ( សូមមើល នីហ្វៃទី១ ១៣:៣៧; នីហ្វៃទី២ ៣១:១២–១៣; មរ៉ូណៃ ៧:៣១–៣២; ៨:២៦ ) ។ ដោយសារព្រះវិញ្ញាណបរិសុទ្ធត្រូវបានចាត់មកដល់បងប្អូនដើម្បីធ្វើទីបន្ទាល់ និងធ្វើជាសាក្សីអំពីព្រះជាព្រះវរបិតា និងព្រះយេស៊ូវគ្រីស្ទ ហើយបំផុសគំនិតបងប្អូនឲ្យធ្វើតាមទ្រង់ទាំងទ្វេដែលនោះគឺជាពរជ័យដ៏ថ្លៃថ្លាបំផុតមួយ ( សូមមើល នីហ្វៃទី២ ៣១:១៨ ) ។
ការណ៍ទាំងឡាយដែលត្រូវពិចារណា
-
បងប្អូនអាចមើលបទគម្ពីរមួយចំនួនដែលបញ្ជាក់អំពីវិធីជាច្រើនដែលព្រះវិញ្ញាណបរិសុទ្ធអាចនាំបងប្អូនឲ្យខិតទៅជិតព្រះ ។ ព្រះវិញ្ញាណបរិសុទ្ធ ៖
-
ធ្វើបន្ទាល់អំពីព្រះវរបិតា និងព្រះរាជបុត្រា ( សូមមើល យ៉ូហាន ១៥:២៦; នីហ្វៃទី៣ ១១:៣២, ៣៦ ) ។
-
ញែកជាបរិសុទ្ធ និងលាងជម្រះ៖ ( សូមមើល អាលម៉ា ១៣:១០–១២; នីហ្វៃទី៣ ២៧:១៩–២០; មរ៉ូណៃ ៦:៤ ) ។
-
បង្ហាញ និងបញ្ជាក់អំពីសេចក្ដីពិត ( សូមមើល នីហ្វៃទី២ ៣២:៤–៥; អាលម៉ា ៥:៤៦–៤៧; គោលលទ្ធិ និងសេចក្តីសញ្ញា ៨:២–៣ ) ។
-
លួងលោម ( សូមមើល យ៉ូហាន ១៤:១៦–១៧, ២៦; មរ៉ូណៃ ៨:២៦; គោលលទ្ធិ និងសេចក្តីសញ្ញា ៣៦:២ ) ។
-
ផ្តល់សច្ចាប័ន និងផ្សាភ្ជាប់ ជាព្រះវិញ្ញាណបរិសុទ្ធនៃសេចក្ដីសន្យា( សូមមើល អេភេសូរ ១:១៣–១៤; គោលលទ្ធិ និងសេចក្តីសញ្ញា ៨៨:៣–៤; ១៣២:៧ ) ។
-
-
ប្រធាន វិលហ្វូឌ វូឌដ្រុព្វ បានថ្លែងថា « ប្រសិនបើបងប្អូនមានព្រះវិញ្ញាណបរិសុទ្ធជាមួយនឹងបងប្អូន … នោះគ្មានអំណោយណាដែលធំជាងនេះទេ គ្មានពរជ័យណាដែលធំជាងនេះទេ គឺគ្មានទីបន្ទាល់ណាមួយដែលអស្ចារ្យជាងនេះដែលបានផ្ដល់ឲ្យមនុស្សណាម្នាក់នៅលើផែនដីនោះទេ » ។ វិធីដ៏សំខាន់មួយដែលបងប្អូនអាចស្វែងរកអារម្មណ៍ពីព្រះវិញ្ញាណបរិសុទ្ធកាន់តែខ្ជាប់ខ្ជួននោះគឺ នៅពេលដែលបងប្អូនទទួលទានសាក្រាម៉ង់ដោយភាពស័ក្តិសម ( សូមមើល គោលលទ្ធិ និងសេចក្តីសញ្ញា ២០:៧៧, ៧៩ ) ។ សូមពិចារណាធ្វើបញ្ជីនៃរបៀបដែលព្រះវិញ្ញាណបរិសុទ្ធបានក្លាយជាពរជ័យមួយដល់បងប្អូន ។ តើបងប្អូនអាចធ្វើអ្វីខ្លះដើម្បីរៀបចំខ្លួនទទួលបាននូវការបើកសម្តែងបន្ថែមពីព្រះវិញ្ញាណបរិសុទ្ធ ?
-
តើបងប្អូនធ្លាប់ឆ្ងល់ទេថា តើបងប្អូនបានឮសំឡេងព្រះវិញ្ញាណដែរឬទេ ? បងប្អូនអាចអានវគ្គបទព្រះគម្ពីរទាំងនេះ ដើម្បីពិនិត្យមើលវិធីដែលព្រះវិញ្ញាណបរិសុទ្ធអាចបើកសម្តែងដល់បងប្អូន ៖ ពង្សាវតារក្សត្រ ទី១ ១៩:១១–១២; លូកា ២៤:៣០–៣២; កាឡាទី ៥:២២–២៣; ហេលេមិន ៥:៣០; គោលលទ្ធិ និងសេចក្តីសញ្ញា ៦:២២–២៣; ៨:២–៣; ១១:១១–១៤ ។
សកម្មភាពសម្រាប់ការរៀនសូត្រជាមួយអ្នកដទៃ
-
ជីវិតរបស់ប្រធាន ឡូរែនសូ ស្នូ ត្រូវបានសង្គ្រោះដោយសារមិត្តភក្ដិរបស់លោកត្រូវបានដឹកនាំដោយព្រះវិញ្ញាណបរិសុទ្ធ ។ សូមអានដំណើររឿងដែលមាននៅក្នុង Teachings of Presidents of the Church: Lorenzo Snow ហើយពិភាក្សាអំពីមូលហេតុដែលមិត្តភក្តិរបស់លោកអាចស្គាល់ និងធ្វើតាមការបំផុសគំនិតពីព្រះវិញ្ញាណបរិសុទ្ធ ។ តើនៅពេលណាដែលបងប្អូនបានដកបទពិសោធន៍នូវការការពារ និងជំនួយ ដែលបានទំនាក់ទំនងតាមរយៈការបំផុសគំនិត និងអារម្មណ៍ពីព្រះវិញ្ញាណបរិសុទ្ធ ?
ស្វែងយល់បន្ថែមទៀត
-
ហ្គែរី អ៊ី ស្ទីវ៉ែនសុន « How Does the Holy Ghost Help You? » Liahona ខែ ឧសភា ឆ្នាំ ២០១៧ ទំព័រ ១១៧–១២០
-
ខេវិន អ័រ ដាន់ខិន « The Sacred Roles of the Holy Ghost » Ensign ខែ តុលា ឆ្នាំ ២០១៤ ទំព័រ ៦២–៦៥
ផ្នែកទី ២
ព្រះវិញ្ញាណបរិសុទ្ធអាចជួយដល់បងប្អូនឲ្យដឹងពីសេចក្ដីពិតនៃគ្រប់ការណ៍ទាំងអស់
ព្រះសព្វព្រះទ័យឲ្យបុត្រាបុត្រីរបស់ទ្រង់ទាំងអស់ រៀននូវសេចក្ដីពិតអំពីផែនការរបស់ទ្រង់សម្រាប់សុភមង្គល និងសេចក្ដីសង្គ្រោះរបស់ពួកគេ ។ ប្រធាន រ័សុល អិម ណិលសុន បានព្រមានថា មាសត្រូវខិតខំធ្វើការដើម្បី « ធ្វើឲ្យព្រំដែនការពិត និងមិនពិតមានសភាពព្រាល ។ ព័ត៌មានដ៏សន្ធឹកនៅចង្អុលដៃរបស់យើង ធ្វើឲ្យកាន់តែពិបាកដើម្បីកំណត់ថាការពិតជាអ្វី » ។ ព្រះសព្វព្រះទ័យឲ្យបងប្អូនយល់យ៉ាងច្បាស់អំពីសេចក្ដីពិត និងរបៀបដែលវាអាចជួយបងប្អូនឲ្យស្វែងរកអំណរ ហើយរៀបចំខ្លួនសម្រាប់ជីវិតដ៏អស់កល្បជានិច្ច ។ ព្រះវិញ្ញាណបរិសុទ្ធគឺជាអង្គនាំសាររបស់ព្រះអម្ចាស់ដើម្បីបង្រៀន និងផ្តល់ទីបន្ទាល់ដល់បងប្អូនអំពីសេចក្ដីពិត ។ ព្យាការី មរមន បានបង្រៀនថា « ដោយព្រះចេស្ដានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្ដីពិតនៃ គ្រប់ ការណ៍ទាំងអស់ » ( មរ៉ូណៃ ១០:៥ បានបន្ថែមការគូសបញ្ជាក់ ) ។
ការណ៍ទាំងឡាយដែលត្រូវពិចារណា
-
របៀបមួយដែលយើងរៀនសេចក្ដីពិតតាមរយៈព្រះវិញ្ញាណ គឺនៅពេលពួកព្យាការី និងសាវកមានប្រសាសន៍នៅក្រោមឥទ្ធិពលនៃព្រះវិញ្ញាណបរិសុទ្ធ ( សូមមើល គោលលទ្ធិ និងសេចក្តីសញ្ញា ៦៨:៣–៤ ) ។ ហេតុអ្វីក៏វាមានសារៈសំខាន់ក្នុងការស្តាប់ ហើយធ្វើតាមសារដែលប្រទានឲ្យដោយពួកព្យាការី និងសាវក ? ព្រះអម្ចាស់ក៏សន្យាថានឹងពង្រឹងពាក្យសម្តីរបស់បងប្អូនជាមួយនឹងព្រះវិញ្ញាណបរិសុទ្ធនៅពេលដែលបងប្អូនធ្វើកិច្ចការរបស់ព្រះអម្ចាស់ ( សូមមើល គោលលទ្ធិ និងសេចក្តីសញ្ញា ១០០:៥–៨ ) ។
-
នៅក្នុងសុន្ទរកថារបស់លោក « The Truth of All Things » អែលឌើរ ដាវីឌ អែហ្វ អ៊ីវីនស៍ បានចែកចាយនូវរបៀបសំខាន់ៗដែលបងប្អូនអាចស្វែងយល់អំពីសេចក្ដីពិតសម្រាប់ខ្លួនបងប្អូនបាន ។ តើបងប្អូនបានធ្វើតាមគំរូនេះសម្រាប់ការស្វែងរកសេចក្ដីពិតមកពីព្រះវិញ្ញាណបរិសុទ្ធនៅពេលណា ?
សកម្មភាពសម្រាប់ការរៀនសូត្រជាមួយអ្នកដទៃ
-
បងប្អូនអាចពិភាក្សាអំពីរបៀបដែលបងប្អូនបានទទួលឥទ្ធិពលតាមរយៈការស្ដាប់ ឬអានសារសន្និសីទទូទៅ ។ ប្រធាន រ័សុល អិម ណិលសុន បានសន្យាថា « ការផ្តល់ការងារបម្រើរបស់ព្រះវិញ្ញាណបរិសុទ្ធ » នឹង « ជួយបងប្អូនឲ្យស្តាប់ឮនូវអ្វីដែលព្រះអម្ចាស់ចង់ឲ្យបងប្អូនស្តាប់ឮ » ក្នុងអំឡុងពេលសន្និសីទទូទៅ ។ តើបងប្អូនអាចរៀបចំខ្លួនតាមរបៀបណាខ្លះ ដើម្បីរៀនពីព្រះវិញ្ញាណបរិសុទ្ធនៅពេលបងប្អូនស្តាប់ ឬសិក្សាសារលិខិតសន្និសីទទូទៅ ?
ស្វែងយល់បន្ថែមទៀត
-
ម៉ាទីអាស ហ៊ែលដ៍ « Seeking Knowledge by the Spirit » Liahona ខែ ឧសភា ឆ្នាំ ២០១៩ ទំព័រ ៣១–៣៣