« អំណោយទាននៃព្រះវិញ្ញាណបរិសុទ្ធ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
អំណោយទាននៃព្រះវិញ្ញាណបរិសុទ្ធ
ការមានសមាជិកនៃក្រុមព្រះធ្វើជាដៃគូដ៏ខ្ជាប់ខ្ជួន
តើបងប្អូនធ្លាប់គិតអំពីពរជ័យដែលបងប្អូនបានទទួលក្នុងគ្រប់វិធីតាមរយៈអំណោយនៃព្រះវិញ្ញាណបរិសុទ្ធដែរឬទេ ? បុត្រាបុត្រីរបស់ព្រះទាំងអស់អាចមានបទពិសោធន៍នឹងឥទ្ធិពលនៃព្រះវិញ្ញាណបរិសុទ្ធ ដែលនាំពួកគេទៅកាន់ព្រះយេស៊ូវគ្រីស្ទ និងដំណឹងល្អរបស់ទ្រង់ ។ ប៉ុន្តែ អំណោយទាន នៃព្រះវិញ្ញាណបរិសុទ្ធត្រូវបានបម្រុងទុកសម្រាប់អស់អ្នកទាំងឡាយដែលមានសេចក្ដីជំនឿលើព្រះយេស៊ូវគ្រីស្ទ ហើយប្រែចិត្ត សូមធ្វើសេចក្ដីសញ្ញាជាមួយនឹងព្រះយេស៊ូវគ្រីស្ទតាមរយៈពិធីបុណ្យជ្រមុជទឹក ។ អំណោយទាននេះជាការសន្យាដែលបងប្អូនអាចរីករាយនឹងការធ្វើជាដៃគូដ៏ខ្ជាប់ខ្ជួននៃព្រះវិញ្ញាណបរិសុទ្ធ—ដែលជាសមាជិកនៃក្រុមព្រះ ។ វាមិនមែនជាអំណោយទានធម្មតាៗនោះទេ—វាមិនអាចមើលឃើញទេ—ប៉ុន្តែវាមានអំណាចដែលមិនអាចបដិសេធបាននៅពេលដែលបងប្អូនជ្រើសរើសដើម្បីទទួលទ្រង់តាមរយៈការរស់នៅដ៏សុចរិត ។ អ្នកទាំងឡាយដែលទទួលអំណោយទាននៃព្រះវិញ្ញាណបរិសុទ្ធត្រូវបានសម្អាតពីអំពើបាប ទទួលបានវិវរណៈផ្ទាល់ខ្លួន និងរីករាយនឹងពរជ័យដែលស្គាល់ថាជា « អំណោយទាននៃវិញ្ញាណ » ។
ផ្នែកទី ១
« ទទួលព្រះវិញ្ញាណបរិសុទ្ធ »
ខណៈដែលនរណាម្នាក់កំពុងត្រូវបានបញ្ជាក់ថាជាសមាជិកនៃសាសនាចក្រ នោះគាត់ត្រូវបានគេប្រាប់ឲ្យ « ទទួលព្រះវិញ្ញាណបរិសុទ្ធចុះ » ។ អំណោយទាននៃព្រះវិញ្ញាណបរិសុទ្ធមិនត្រូវបានបង្ខំឲ្យនរណាម្នាក់ទទួលឡើយ ។ វាក្លាយទៅជាទំនួលខុសត្រូវរបស់សមាជិកក្នុងការអញ្ជើញព្រះវិញ្ញាណបរិសុទ្ធឲ្យគង់នៅជាមួយនឹងពួកគេ ( សូមមើល គោលលទ្ធិ និងសេចក្តីសញ្ញា ៨៨:៣៣ ) ។ អែលឌើរ ដេវីឌ អេ បែដណា បានមានប្រសាសន៍ថា « នៅពេលយើងទទួលពិធីបរិសុទ្ធនេះ យើងម្នាក់ៗទទួលយកការទទួលខុសត្រូវដ៏ពិសិដ្ឋ និងបន្ដឥតដាច់មួយ ដើម្បីមានបំណង ដើម្បីស្វែងរក ដើម្បីប្រព្រឹត្ត និង ដើម្បីរស់នៅតាមរបៀបដែលនឹងធ្វើឲ្យយើងបាន ‹ ទទួលព្រះវិញ្ញាណបរិសុទ្ធ › ព្រមទាំង អំណោយទានខាងវិញ្ញាណនានា » ។
ព្រះយេស៊ូវបានពន្យល់ដល់ នីកូដេម—ដែលជាអ្នកគ្រប់គ្រងរបស់ពួកសាសន៍យូដា—ថា « បើមិនបានកើតអំពីទឹក ហើយអំពីព្រះវិញ្ញាណ នោះគ្មានអ្នកណាអាចនឹងចូលទៅក្នុងនគរព្រះបានទេ » ( យ៉ូហាន ៣:៥ ) ។ ដូច្នេះក្រៅពីការជ្រមុជទឹកដោយទឹក នោះព្រះអម្ចាស់សព្វព្រះទ័យចង់ឲ្យបងប្អូន « កើតពីព្រះវិញ្ញាណ » ( ខទី ៦ ) ។ ការណ៍នេះកើតឡើងនៅពេលបងប្អូនទទួលអំណោយទាននៃព្រះវិញ្ញាណបរិសុទ្ធ ហើយមានបទពិសោធន៍ទទួល « បុណ្យជ្រមុជដោយភ្លើង និងព្រះវិញ្ញាណបរិសុទ្ធ » ( សូមមើល នីហ្វៃទី២ ៣១:១៣–១៤ ) ។ ភ្លើងជានិមិត្តសញ្ញានៃការសម្អាត ។ អំណាចនៃការញែកជាបរិសុទ្ធនេះនាំមកនូវការផ្តាច់បាប ( សូមមើល នីហ្វៃទី២ ៣១:១៧; នីហ្វៃទី៣ ១២:១–២ ) ។ បន្ទាប់ពីបុណ្យជ្រមុជទឹក សមាជិកសាសនាចក្រអាចនឹងមានបទពិសោធន៍នៃការជ្រមុជទឹកដោយភ្លើងបន្តិចម្តងៗ ( សូមមើល នីហ្វៃទី៣ ៩:២០ ) ឬដោយផ្ទាល់ ( សូមមើល ម៉ូសាយ ៤:២–៣ ) ។
ការណ៍ទាំងឡាយដែលត្រូវពិចារណា
-
នៅពេលព្រះយេស៊ូវគ្រីស្ទដែលមានព្រះជន្មរស់ឡើងវិញបានធ្វើការបម្រើទៅដល់ប្រជាជននៅអឌ្ឍគោលខាងលិច ទ្រង់បានប្រទានអំណាចដល់ពួកសិស្សទាំងដប់ពីរនាក់នូវអំណាចដើម្បីប្រគល់ព្រះវិញ្ញាណបរិសុទ្ធ ( សូមមើល នីហ្វៃទី៣ ១៨:៣៦–៣៧ ) ។ ហើយប្រជាជននេះបានរៀនអំពីអំណោយទាននេះ ហើយ « ពួកគេបានអធិស្ឋានសូមនូវអ្វីៗ ដែលគេចង់បានបំផុត ហើយពួកគេមានប្រាថ្នាសូមឲ្យព្រះវិញ្ញាណបរិសុទ្ធបានប្រទានដល់ពួកគេ » ( នីហ្វៃទី៣ ១៩:៩ ) ។ តើបងប្អូននឹងរៀបរាប់ពីអារម្មណ៍របស់បងប្អូនអំពីអំណោយទាននៃព្រះវិញ្ញាណបរិសុទ្ធដោយរបៀបណា ?
-
ព្យាការី យ៉ូសែប ស្ម៊ីធ បានបង្រៀនថា « ពិធីបុណ្យជ្រមុជដោយទឹកបើគ្មានពិធីបុណ្យជ្រមុជដោយភ្លើងទេ វាពុំមានន័យអ្វីឡើយ ពិធីទាំងពីរនេះគឺជាទំនាក់ទំនងដ៏ចាំបាច់ និងពុំអាចផ្ដាច់បានឡើយ » ។ ដើម្បីជួយបងប្អូនឲ្យយល់កាន់តែច្បាស់អំពីអត្ថន័យនៃ « បុណ្យជ្រមុជដោយភ្លើង និងដោយព្រះវិញ្ញាណបរិសុទ្ធ » សូមមើល « The Baptism of Fire » ( នាទីទី ១:៤១ ) ។ ដោយផ្អែកលើមតិយោបល់របស់អែលឌើរ ដេវីឌ អេ បែដណា នៅក្នុងវីដេអូនេះ តើបងប្អូននឹងពន្យល់អំពីអត្ថន័យនៃ « បុណ្យជ្រមុជដោយភ្លើង » យ៉ាងដូចម្ដេច ?
ស្វែងយល់បន្ថែមទៀត
-
ប៊យដ៍ ខេ ផាកកឺ « The Gift of the Holy Ghost: What Every Member Should Know » Ensign ខែ សីហា ឆ្នាំ ២០០៦ ទំព័រ ៤៦–៥២
-
ការបង្រៀនរបស់ប្រធាននៃសាសនាចក្រ ៖ យ៉ូសែប ស៊្មីធ ( ឆ្នាំ ២០០៧ ) ទំព័រ ៨៩–១០០
ផ្នែកទី ២
ព្រះវិញ្ញាណបរិសុទ្ធអាចក្លាយជាដៃគូដ៏ខ្ជាប់ខ្ជួនរបស់យើង
ប្រធាន ហិនរី ប៊ី អាវរិង បានមានប្រសាសន៍ថា ៖ « យើងត្រូវការដៃគូដ៏ខ្ជាប់ខ្ជួននៃព្រះវិញ្ញាណបរិសុទ្ធ ។ យើងមានប្រាថ្នាចង់បានទ្រង់ ប៉ុន្តែយោងតាមបទពិសោធន៍គឺវាពុំងាយក្នុងការថែរក្សាទេ ។ យើងម្នាក់ៗគិត និយាយ ហើយធ្វើរឿងផ្សេងៗនៅក្នុងជីវិតប្រចាំថ្ងៃរបស់ខ្លួនដែលអាចប៉ះពាល់ដល់ព្រះវិញ្ញាណ ។ ព្រះអម្ចាស់បានបង្រៀនយើងថា ព្រះវិញ្ញាណបរិសុទ្ធនឹងក្លាយជាដៃគូដ៏ខ្ជាប់ខ្ជួនរបស់យើងនៅពេលដែលដួងចិត្តរបស់យើងពោរពេញទៅដោយសេចក្ដីសប្បុរស ហើយនៅពេលដែលគុណធម៌តុបតែងគំនិតរបស់យើងដោយឥតឈប់ឈរ ( សូមមើល គ&ស ១២១:៤៥ ) » នៅពេលបងប្អូនព្យាយាមបង្កើតដៃគូជាមួយនឹងព្រះវិញ្ញាណបរិសុទ្ធ នោះបងប្អូននឹងយល់អំពីអ្វីដែលត្រូវផ្លាស់ប្ដូរនៅក្នុងជីវិតរបស់បងប្អូន ។
ការណ៍ទាំងឡាយដែលត្រូវពិចារណា
-
ការអធិស្ឋានសាក្រាម៉ង់គឺជាការរំឮកដ៏មានឥទ្ធិពលមួយថាព្រះវិញ្ញាណបរិសុទ្ធអាចនៅជាមួយយើងជានិច្ច ( សូមមើល គោលលទ្ធិ និងសេចក្តីសញ្ញា ២០:៧៧, ៧៩ ) ។ នៅពេលដែលបងប្អូនរៀបចំខ្លួនដោយមានភាពស័ក្តិសមដើម្បីទទួលទានសាក្រាម៉ង់ នោះបងប្អូនយាងភាពជាដៃគូនៃព្រះវិញ្ញាណហើយ ។ តើជីវិតរបស់បងប្អូនត្រូវបានប្រទានពរដោយការខិតខំដើម្បីមានភាពស័ក្តិសមនឹងវត្តមានដ៏ខ្ជាប់ខ្ជួនរបស់ទ្រង់យ៉ាងដូចម្ដេច ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមពិចារណាអាន និងនិយាយអំពីសេចក្តីថ្លែងការណ៍នេះរបស់ ប្រធាន ហ្គរដុន ប៊ី ហ៊ិងគ្លី ៖ « ខ្ញុំគិតថា មរមន បានដឹងយ៉ាងច្បាស់ពីបទពិសោធន៍ផ្ទាល់ខ្លួនរបស់លោកនូវសេចក្ដីពិតនៃពាក្យរបស់លោកដែលថា ‹ ព្រះដ៏ជាជំនួយ ដែលពោរពេញទៅដោយសេចក្ដីសង្ឃឹម និងសេចក្ដីស្រឡាញ់ដ៏ឥតខ្ចោះ រីឯសេចក្ដីស្រឡាញ់នេះស៊ូទ្រាំដោយសារសេចក្ដីព្យាយាមក្នុងការអធិស្ឋាន រហូតដល់ទីបំផុតមកដល់ នៅពេលដែលពួកបរិសុទ្ធទាំងអស់នឹងរស់នៅជាមួយនឹងព្រះ › ( មរ៉ូ. ៨:២៦ ) ។ ទោះបីជាពេលខ្លះយើងនៅតែម្នាក់ឯងខណៈដែលនៅក្នុងចំណោមមនុស្សក្នុងពិភពលោកនេះក៏ដោយ ក៏យើងមិនត្រូវឯកោទេ ព្រោះព្រះអម្ចាស់បានប្រទានឲ្យយើងនូវព្រះវិញ្ញាណបរិសុទ្ធដើម្បីធ្វើជាដៃគូរបស់យើងដើម្បីដើរជាមួយនឹងយើង » ។ បងប្អូនអាចពិភាក្សាអំពីមូលហេតុដែលព្យាការីមរមនត្រូវការពរជ័យដែលលោកបានរៀបរាប់ ។ តើព្រះវិញ្ញាណបរិសុទ្ធបានពង្រីកសេចក្ដីសុខសាន្ត និងជួយដល់បងប្អូននៅពេលណា ?
ស្វែងយល់បន្ថែមទៀត
-
នីហ្វៃទី៣ ២៧:២០; គោលលទ្ធិ និងសេចក្តីសញ្ញា ១៤:៨; ២០:៧៧, ៧៩; ១២១:៤៥–៤៦
-
ដេវីឌ អេ បែដណា « That We May Always Have His Spirit to Be with Us » Liahona ខែ មេសា ឆ្នាំ ២០០៦ ទំព័រ ២៨–៣១
-
ដាល្លិន អេក អូក « Always Have His Spirit » Ensign ខែ តុលា ឆ្នាំ ១៩៩៦ ទំព័រ ៥៩–៦១
-
ហ្គរដុន ប៊ី ហ៊ិងគ្លី « The Gift of the Holy Ghost » Liahona ខែ មករា ឆ្នាំ ២០០៥ ទំព័រ ៥-៧
ផ្នែកទី ៣
តើខ្ញុំអាចដឹងថាតើខ្ញុំកំពុងទទួលអារម្មណ៍ពីព្រះវិញ្ញាណបរិសុទ្ធដោយរបៀបណា ?
តើបងប្អូនធ្លាប់ព្យាយាមប្រាស្រ័យទាក់ទងជាមួយនរណាម្នាក់ ដែលនិយាយភាសាដែលបងប្អូនមិនយល់ដែរឬទេ ? វាអាចមានអារម្មណ៍តានតឹងនៅពេលដែលនរណាម្នាក់និយាយថាពួកគេមានអារម្មណ៍ពីព្រះវិញ្ញាណ ប៉ុន្តែបងប្អូនមិនដឹងថាវាមានអារម្មណ៍បែបណាសម្រាប់ខ្លួនរបស់បងប្អូននោះទេ ។ ទោះជាយ៉ាងណាក៏ដោយវាមិនមែនជាអ្វីដែលត្រូវអៀនខ្មាស់ទេ ដោយសារយើងទាំងអស់គ្នាមានអារម្មណ៍ពីព្រះវិញ្ញាណតាមវិធីផ្សេងៗគ្នា ។ ការរៀនស្គាល់ និងយល់អំពីរបៀបដែលព្រះវិញ្ញាណបរិសុទ្ធទាក់ទងជាមួយនឹងបងប្អូនអាចត្រូវការពេលវេលា និងការខិតខំប្រឹងប្រែង ។ ព្យាការី អេលីយ៉ា បានដឹងថាព្រះវិញ្ញាណ អាចនឹងត្រូវបានប្រៀបប្រដូចទៅនឹង « សំឡេងតូចរហៀង » ( សូមមើល ពង្សាវតារក្សត្រ ទី១ ១៩:១១–១២ ) ។ ពេលខ្លះព្រះវិញ្ញាណបរិសុទ្ធត្រូវបានបង្ហាញតាមរយៈអារម្មណ៍នៃសេចក្ដីសង្ឃឹម និងអំណរ ( សូមមើល រ៉ូម ១៥:១៣ ) ។ ព្រះវិញ្ញាណបរិសុទ្ធគឺជាមធ្យោបាយដ៏សំខាន់មួយដែលយើងរៀនសេចក្ដីពិត ( សូមមើល យ៉ូហាន ១៤:២៦; មរ៉ូណៃ ១០:៥ ) ។
ការណ៍ទាំងឡាយដែលត្រូវពិចារណា
-
សូមទស្សនាវីដេអូ « Feeling the Holy Ghost: Power of the Holy Spirit » ( នាទីទី ៣:១៧ ) ដើម្បីមើលពីរបៀបដែលសមាជិកសាសនាចក្រមួយចំនួនមានអារម្មណ៍អំពីព្រះវិញ្ញាណ ។ តើព្រះវិញ្ញាណបរិសុទ្ធប្រាស្រ័យទាក់ទងជាមួយនឹងយើងតាមរបៀបណាខ្លះ ?
សកម្មភាពសម្រាប់ការរៀនសូត្រជាមួយអ្នកដទៃ
-
យ៉ូសែប ស្ម៊ីធ និង អូលីវើរ ខូវឌើរី បានបកប្រែព្រះគម្ពីរមរមននៅពេលដែលពួកលោកបានដឹងថាពេលខ្លះព្រះវិញ្ញាណបរិសុទ្ធអាចត្រូវបានស្គាល់តាមរយៈអារម្មណ៍ « ខ្មួលខ្មាញ់ » ( សូមមើល គោលលទ្ធិ និងសេចក្តីសញ្ញា ៩:៨–៩ ) ។ ចូរពិចារណាអាន គោលលទ្ធិ និងសេចក្តីសញ្ញា ៦:២២–២៣; ៨:១–២; ១១:១១–១៤ ហើយនិយាយជាមួយគ្នាអំពីវិធីទូទៅទាំងនេះដែលព្រះវិញ្ញាណបរិសុទ្ធទាក់ទងជាមួយនឹងយើង ។ ពិភាក្សាអំពីមូលហេតុដែលវាសំខាន់ក្នុងការចងចាំថា អារម្មណ៍ដែលកំពុងខ្មួលខ្មាញ់គឺមិនមែនជាវិធីតែមួយគត់ដែលបងប្អូនអាចមានអារម្មណ៍ពីព្រះវិញ្ញាណនោះទេ ។
ស្វែងយល់បន្ថែមទៀត
-
កាឡាទី ៥:២២–២៣; នីហ្វៃទី២ ៣២:៥, ៨; គោលលទ្ធិ និងសេចក្តីសញ្ញា ៨:១–២; ៩:៨–៩
-
ប្រកាសដំណឹងល្អរបស់យើង ៖មគ្គុទេសន៍ចំពោះការបម្រើជាអ្នកផ្សព្វផ្សាយសាសនា ( ឆ្នាំ ២០១៩ ) ទំព័រ ៩៥–១០៥
-
ប៊យ ឃេ. ផាកកឺ « The Candle of the Lord » Teaching Seminary: Preservice Reading ទំព័រ ៣២–៣៤ ។
-
រ៉ូណល អេ រ៉ាសបាន « I ‘Hear Him’ by Responding to Promptings » Inspiration ( blog ) ថ្ងៃទី ២១ ខែ តុលា ឆ្នាំ ២០២១ នៅលើគេហទំព័រ ChurchofJesusChrist.org ។
-
កម្រងវីដេអូ « Hear Him »