« វិវរណៈ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
វិវរណៈ
ទទួលការណែនាំផ្ទាល់ខ្លួនជារៀងរាល់ថ្ងៃមកពីព្រះវរបិតាសួគ៌ជាទីស្រឡាញ់
សំណួរ និងភាពមិនប្រាកដប្រជាគឺជាផ្នែកធម្មតានៃជីវិត ។ អង្គដែលអ្នកបែរទៅរកសម្រាប់ចម្លើយ និងការធានាអះអាងជាថ្មីគឺមានសារៈសំខាន់ខ្លាំងណាស់ ។ សំណាងល្អដែលព្រះទ្រង់គង់នៅទីនោះដើម្បីជួយក្នុងការស្វែងរកចម្លើយ និងការយល់ដឹងរបស់អ្នក ។ អ្នកអាចទុកចិត្តលើការសន្យាថា « តែបើ … អ្នករាល់គ្នាណាមួយខ្វះប្រាជ្ញា » អ្នកអាចទូលសូមដល់ព្រះ ដែល « ទ្រង់ប្រទានដល់ [ អ្នក ] » ( យ៉ាកុប ១:៥ ) ។
ព្រះមានបន្ទូលទៅកាន់បុត្រាបុត្រីរបស់ទ្រង់ដោយផ្ទាល់ជាមួយនឹងវិវរណៈផ្ទាល់ខ្លួនតាមរយៈព្រះវិញ្ញាណបរិសុទ្ធ ។ ទ្រង់បានប្រទានព្យាការី និងមនុស្សផ្សេងទៀត និងធនធានដទៃទៀតដើម្បីដឹកនាំយើងឆ្លងកាត់ឧបសគ្គ និងបទពិសោធន៍ទាំងឡាយនៃជីវិតនេះ ។ ចំណុចមួយក្នុងចំណោមចំណុចដ៏សំខាន់បំផុតគឺការប្រាស្រ័យទាក់ទងដែលបានសន្យា ដែលអាចមានចំពោះយើងមកពីព្រះតាមរយៈព្រះវិញ្ញាណបរិសុទ្ធ ។
តើអ្វីជាវិវរណៈ ?
វិវរណៈគឺជាការណែនាំដ៏ទេវភាព និងជាការប្រាស្រ័យទាក់ទងទៅនឹងព្រះវរបិតាសួគ៌ជាទីស្រឡាញ់របស់យើង ដែលប្រទានដល់បុត្រាបុត្រីរបស់ទ្រង់ ។ ជាញឹកញាប់វាមានបទពិសោធន៍ដូចជាអារម្មណ៍ ឬគំនិតស្ងប់ស្ងាត់ដែលបានពិពណ៌នាថាជា « សំឡេងតូចរហៀង » របស់ព្រះវិញ្ញាណបរិសុទ្ធ ( គោលលទ្ធិ និងសេចក្តីសញ្ញា ៨៥:៦ ) ។ យើងបង្កើនសមត្ថភាពរបស់យើងដើម្បីទទួល និងស្គាល់វិវរណៈផ្ទាល់ខ្លួននៅពេលយើងបែរទៅរកព្រះដោយការអធិស្ឋាន សិក្សាព្រះគម្ពីរបរិសុទ្ធ ហើយព្យាយាមគោរពតាមបញ្ញត្តិរបស់ព្រះ ។ ព្រះអម្ចាស់ដឹកនាំសាសនាចក្ររបស់ទ្រង់តាមរយៈវិវរណៈដែលទ្រង់ប្រទានដល់អ្នកបម្រើដែលមានសិទ្ធិអនុញ្ញាតរបស់ទ្រង់ ។ បន្ថែមពីនេះទៀត យើងម្នាក់ៗអាចទទួលវិវរណៈផ្ទាល់ខ្លួន ដើម្បីជួយយើងទៅតាមតម្រូវការជាក់លាក់ ការទទួលខុសត្រូវ និងសំណួរផ្សេងៗ ។
ទិដ្ឋភាពទូទៅនៃប្រធានបទ ៖ វិវរណៈ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ អំណោយនៃព្រះវិញ្ញាណបរិសុទ្ធ, ការអធិស្ឋាន, ព្រះគម្ពីរ, ការស្វែងរកសេចក្ដីពិត និងចៀសវាងពីការបោកបញ្ឆោត
ផ្នែកទី ១
ព្រះអាចប្រាស្រ័យទាក់ទងជាមួយនឹងអ្នកតាមរយៈវិវរណៈផ្ទាល់ខ្លួន
ព្រះស្រឡាញ់អ្នក ហើយជ្រាបយ៉ាងច្បាស់ពីឧបសគ្គ និងការសាកល្បងដែលអ្នកប្រឈមមុខ ទ្រង់មិនចោលអ្នកឲ្យនៅកំព្រាទេ ( សូមមើល យ៉ូហាន ១៤:១៨ ) ។ អ្នកអាចចាប់ផ្តើមជំហានសំខាន់ៗក្នុងការរៀបចំខ្លួនរបស់អ្នកដើម្បីទទួល និងស្គាល់វិវរណៈផ្ទាល់ខ្លួន ។ ការរៀបចំខ្លួនខាងវិញ្ញាណរួមមាន ការសិក្សាព្រះគម្ពីរ ការថ្វាយបង្គំនៅថ្ងៃឈប់សម្រាក និងនៅក្នុងដំណាក់របស់ព្រះអម្ចាស់ ការប្រែចិត្តជារៀងរាល់ថ្ងៃ ការតមអាហារ និងការអធិស្ឋានដោយស្មោះត្រង់ ។ ព្រះអម្ចាស់សន្យាថាទ្រង់នឹងដឹកនាំអ្នកប្រសិនបើអ្នកព្យាយាមដើម្បីចូលទៅជិតទ្រង់ ( សូមមើល គោលលទ្ធិ និងសេចក្ដីសញ្ញា ៨៨:៦៣ ) ។
ប្រធាន រ័សុល អិម ណិលសុន បានបង្រៀនថា ៖
« សូមស្វែងរកកន្លែងស្ងប់ស្ងាត់មួយជាកន្លែងដែលបងប្អូនអាចទៅជាទៀងទាត់ ។ សូមធ្វើចិត្តរាបសានៅចំពោះព្រះ ។ សូមបង្ហើរដួងចិត្តរបស់បងប្អូនទៅរកព្រះវរបិតាសួគ៌ ។ សូមងាកមករកទ្រង់ទូលសូមចម្លើយ និងការលួងលោមចិត្ត ។
« សូមអធិស្ឋាននៅក្នុងព្រះនាមនៃព្រះយេស៊ូវគ្រីស្ទអំពីកង្វល់ ការភ័យខ្លាច ភាពទន់ខ្សោយរបស់បងប្អូន—ពិតណាស់ ជាបំណងប្រាថ្នានៅក្នុងដួងចិត្តរបស់បងប្អូន ។ បន្ទាប់មកចូរស្តាប់ ! សូមសរសេរគំនិតដែលកើតមាននៅក្នុងគំនិតរបស់អ្នក ។ សូមកត់ត្រាអារម្មណ៍របស់អ្នក ហើយធ្វើសកម្មភាពតាមអ្វីដែលអ្នកត្រូវបានបំផុសគំនិតឲ្យធ្វើ ។ …
« គ្មានអ្វីមួយដែលធ្វើឲ្យស្ថានសួគ៌បើកចំហរដូចជាការដាក់បញ្ចូលគ្នានៃការកើនឡើងនូវបរិសុទ្ធភាព ការគោរពប្រតិបត្តិយ៉ាងមុតមាំ ការស្វែងរកដោយស្មោះ ការទទួលទានបន្ទូលនៃព្រះគ្រីស្ទជារៀងរាល់ថ្ងៃនៅក្នុងព្រះគម្ពីរមរមន និងការធ្វើកិច្ចការព្រះវិហារបរិសុទ្ធ និងពង្សប្រវត្តិជាទៀងទាត់នោះឡើយ » ។
រឿងទាំងឡាយដែលត្រូវពិចារណា
-
បុត្រាបុត្រីរបស់ព្រះម្នាក់ៗបានមកដល់ពិភពលោកនេះដោយមានពន្លឺរបស់ព្រះគ្រីស្ទ ។ សូមអាន មរ៉ូណៃ ៧:១៦–១៨; គោលលទ្ធិ និងសេចក្តីសញ្ញា ៨៤:៤៦-៤៨; ៩៣:២ ដោយស្វែងរកអ្វីដែលអំណោយទាននេះមាន និងមូលហេតុដែលវាមានសារៈសំខាន់ ។
-
បំណងប្រាថ្នារបស់អ្នកក្នុងការស្វែងរកវិញ្ញាណនៃវិវរណៈ អាចកើនឡើងនៅពេលអ្នកយល់កាន់តែច្បាស់អំពីឆន្ទៈរបស់ព្រះដើម្បីចែកចាយវាជាមួយនឹងអ្នក ។ ប្រៀបធៀបវគ្គបទគម្ពីរខាងក្រោមនេះ ដើម្បីស្វែងរកគោលការណ៍ដែលអាចរៀបចំអ្នកឲ្យទទួលបទពិសោធន៍នៃការមានវិញ្ញាណនៃវិវរណៈ ៖ នីហ្វៃទី១ ១០:១៧–១៩; នីហ្វៃទី២ ៣២:៣; គោលលទ្ធិ និងសេចក្តីសញ្ញា ៩:៨; យ៉ូសែប ស្ម៊ីធ—ប្រវត្តិ ១:១០-១៧ ។ តើអ្វីជាគោលការណ៍នៃវិវរណៈផ្ទាល់ខ្លួនដែលត្រូវបានបង្រៀននៅក្នុងបទគម្ពីរទាំងនេះ ? ហេតុអ្វីវាមានតម្លៃក្នុងការស្គាល់ថាយើងមានទំនួលខុសត្រូវក្នុងការរៀបចំខ្លួនឯងដើម្បីទទួលបានវិវរណៈផ្ទាល់ខ្លួន ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងអត្ថបទនៅក្នុង លីអាហូណា នៅខែ មករា ឆ្នាំ ២០២១ ដែលមានចំណងជើងថា « រីកលូតលាស់ទៅក្នុងគោលការណ៍នៃវិវរណៈ » ប្រធាន រ័សុល អិម ណិលសុន ពិភាក្សាអំពីរបៀបដែលយើងអាចយល់កាន់តែច្បាស់អំពីរបៀបអញ្ជើញការដឹកនាំរបស់ព្រះវរបិតាសួគ៌ចូលក្នុងជីវិតរបស់យើង ។ សូមអញ្ជើញសមាជិកក្រុមរបស់អ្នកឲ្យសិក្សាផ្នែកខ្លះនៃអត្ថបទនេះ ។ និយាយជាមួយគ្នាអំពីសំណួរខាងក្រោមនេះ ៖ តើគោលការណ៍អ្វីខ្លះដែលប្រធាន ណិលសុន សង្កត់ធ្ងន់ ? តើអ្នកមានអារម្មណ៍បំផុសគំនិតឲ្យធ្វើអ្វីខ្លះបន្ទាប់ពីអានជំពូកទាំងនេះហើយ ?
ស្វែងយល់បន្ថែមទៀត
-
អាល់ម៉ា ៥:៤៣–៤៨; គោលលទ្ធិ និងសេចក្តីសញ្ញា ៥០:២៤-២៥; ៧៦:៥–១០; ៨៤:៤៤–៤៧; ១២១:២៦–៣៣
-
ឌែល ជី រិនឡាន់ « លក្ខខណ្ឌសម្រាប់វិវរណៈផ្ទាល់ខ្លួន » លីអាហូណា ខែ វិច្ឆិកា ឆ្នាំ ២០២២ ទំព័រ ១៦–១៨
-
ជូលី ប៊ី ប៊េក « And upon the Handmaids in Those Days Will I Pour Out My Spirit » Liahona ខែ ឧសភា ឆ្នាំ ២០១០ ទំព័រ ១០-១២
-
Teachings of Presidents of the Church: John Taylor ( ឆ្នាំ ២០១១ ) ទំព័រ ១៥៣–១៦១
ផ្នែកទី ២
ជាទូទៅវិវរណៈផ្ទាល់ខ្លួនកើតឡើងជាចំណាប់អារម្មណ៍ គំនិត និង អារម្មណ៍
តើអ្នកធ្លាប់រៀនឃ្លាជាភាសាថ្មីដែរឬទេ ? ដោយមានការសិក្សា និងការអនុវត្ត នោះអ្នកអាចចាប់ផ្ដើមស្គាល់ពាក្យទាំងនោះនៅពេលដែលពាក្យទាំងនោះត្រូវបាននិយាយដោយអ្នកដទៃក្នុងការសន្ទនា ។ ក្នុងវិធីស្រដៀងគ្នានេះដែរ អ្នកប្រហែលជាមិនតែងតែស្គាល់សំឡេងនៃព្រះវិញ្ញាណនៅលើកដំបូងនោះទេ ប៉ុន្តែការរៀនគោលការណ៍សំខាន់ៗអាចរៀបចំឲ្យអ្នកយល់កាន់តែច្បាស់អំពីការប្រាស្រ័យទាក់ទងដ៏ទេវភាព ។ ឧទាហរណ៍ ព្យាការីព្រះគម្ពីរសញ្ញាចាស់ អេលីយ៉ា បានឃើញខ្យល់ព្យុះគំហុកខ្លាំង រញ្ជួយដី និងភ្លើងឆេះ តែអេលីយ៉ាបានកត់សម្គាល់ថា « ព្រះយេហូវ៉ាទ្រង់មិនមែនគង់នៅ » ក្នុងរឿងទាំងអស់នោះទេ ។ តែក្រោយមកលោកបានឮ « សំឡេងតូចរហៀងៗ » ហើយលោកស្គាល់ថាជាសំឡេងរបស់ព្រះអម្ចាស់ ( សូមមើល ពង្សាវតារក្សត្រ ទី១ ១៩:១១-១៣ ) ។ ព្រះមានបន្ទូលមកកាន់យើងដោយមាន « សំឡេងតូចរហៀងៗ » ( សូមមើល ហេលេមិន ៥:២៨-៣០ ) ហើយដោយមានអារម្មណ៍ដូចជា សេចក្ដីសុខសាន្ត ការលួងលោម និងអំណរ ( សូមមើល កាឡាទី ៥:២២-២៣ ) ។
គោលការណ៍មួយទៀតនៃវិវរណៈគឺថាព្រះ « ប្រ [ ទាន ] ដល់កូនចៅមនុស្សមួយបន្ទាត់ម្ដងៗ មួយសិក្ខាបទម្ដងៗ ឯណេះបន្តិច ឯណោះបន្តិច »( នីហ្វៃទី២ ២៨:៣០ ) ។ នេះមានន័យថាព្រះមិនប្រទានឲ្យយើងនូវអ្វីៗទាំងអស់ក្នុងពេលតែមួយទេ ។ ផ្ទុយទៅវិញវិវរណៈផ្ទាល់ខ្លួនអាចបើកសម្តែងទៅតាមពេលវេលា ។
អែលឌើរ ដេវីឌ អេ បែដណា បានគូសបញ្ជាក់ពីគំនិតនេះថា ៖ « ក្នុងនាមជាសមាជិកនៃសាសនាចក្រ យើងមានទំនោរសង្កត់ធ្ងន់លើការបើកសម្ដែងខាងវិញ្ញាណដ៏អស្ចារ្យ និង រំភើបខ្លាំង ដែលយើងអាចនឹងភ្លេចភ្លាំងក្នុងការដឹងគុណ ហើយអាចនឹងមើលរំលងនូវគំរូដែលជាទម្លាប់ ដែលព្រះវិញ្ញាណបរិសុទ្ធសម្រេចនូវកិច្ចការរបស់ទ្រង់នោះ ។ វិធី ‹ ងាយពេក ឬស្រួលពេក › ( នីហ្វៃទី១ ១៧:៤១ ) នៃការទទួលនូវចំណាប់អារម្មណ៍ខាងវិញ្ញាណដ៏តិចតួចច និងបន្តបន្ទាប់គ្នាដដែលៗដែលយូរៗទៅបង្កើតជាចម្លើយដែលចង់បាន ឬទិសដៅដែលយើងត្រូវការដែលអាចនឹងបណ្ដាលឲ្យយើងមើលឃើញ ‹ ហួសទីដៅ › ទៅទៀត ( យ៉ាកុប ៤:១៤ ) ។
រឿងទាំងឡាយដែលត្រូវពិចារណា
-
នៅក្នុងសុន្ទរកថាសន្និសីទទូទៅនៅ ខែ មេសា ឆ្នាំ ២០២០ របស់លោក « ចូរស្តាប់តាមទ្រង់ចុះ » ប្រធាន ណិលសុន បានមានប្រសាសន៍ថា « វាគ្មានអ្វីចាំបាច់ជាងការស្គាល់របៀបដែលព្រះវិញ្ញាណមានបន្ទូលមកកាន់បងប្អូននាពេលនេះទេ ។ … ខ្ញុំសូមធ្វើការអង្វរជាថ្មីទៅកាន់បងប្អូន សូមធ្វើអ្វីក៏ដោយ ដើម្បីចម្រើនសមត្ថភាពខាងវិញ្ញាណបងប្អូនក្នុងការទទួលវិវរណៈផ្ទាល់ខ្លួន » ។ តើបងប្អូនបានដកពិសោធន៍វិវណៈផ្ទាល់ខ្លួនតាមរបៀបណាខ្លះ ?
សកម្មភាពសម្រាប់ការរៀនសូត្រជាមួយអ្នកដទៃ
-
នៅក្នុងវីដេអូទាំងបីភាគនេះ Patterns of Light អែលឌើរ ដេវីឌ អេ បែដណា ពិភាក្សាអំពីរបៀបដែលយើងអាចយល់កាន់តែច្បាស់អំពីវិវរណៈផ្ទាល់ខ្លួន ។ មើលវីដេអូមួយ ឬច្រើនជាមួយគ្នាជាក្រុម ។ សូមអញ្ជើញសមាជិកក្រុមឲ្យចែកចាយអំពីរបៀបដែលសារលិខិតទាំងនេះជួយពួកគេឲ្យមើលវិវរណៈផ្ទាល់ខ្លួនដោយមានភាពច្បាស់លាស់កាន់តែខ្លាំង ។ អ្នកក៏អាចចង់ពិនិត្យឡើងវិញនូវសុន្ទរកថាសន្និសីទទូទៅរបស់អែលឌើរ បែដណា នៅខែ មេសា ឆ្នាំ ២០១១ « The Spirit of Revelation » ។
ស្វែងយល់បន្ថែមទៀត
-
នីហ្វៃទី៣ ១១:១–៧; គោលលទ្ធិ និងសេចក្តីសញ្ញា ៦:១៤-១៦, ២២-២៣; ៨:២–៣; ១១:១២-១៤; ៨៥:៦
-
ហិនរី ប៊ី អាវរិង « The First Vision: A Pattern for Personal Revelation » Liahona ខែ កុម្ភៈ ឆ្នាំ ២០២០ ទំព័រ ១៣-១៧
-
« Receiving Revelation » ( វីដេអូ ) នៅលើគេហទំព័រ ChurchofJesusChrist.org
-
Teachings of Presidents of the Church: Thomas S. Monson ( ឆ្នាំ ២០២០ ) ទំព័រ ៧៧–៨៧
ផ្នែកទី ៣
ព្រះអម្ចាស់ដឹកនាំសាសនាចក្ររបស់ទ្រង់តាមរយៈវិវរណៈ
ព្រះវិញ្ញាណនៃវិវរណៈអាចដឹកនាំយើងម្នាក់ៗបាន ប៉ុន្តែនៅពេលដែលព្រះអម្ចាស់ចង់ដឹកនាំសាសនាចក្ររបស់ទ្រង់ នោះទ្រង់មានបន្ទូលតាមរយៈព្យាការីដែលនៅរស់ដែលបម្រើជាប្រធាននៃសាសនាចក្រ ( សូមមើល គោលលទ្ធិ និងសេចក្ដីសញ្ញា ១០៧:៩១-៩២ ) ។ អែលឌើរ ឌែល ជី រិនឡាន់ បានបង្រៀនថា ៖ « មានតែព្យាការីប៉ុណ្ណោះដែលទទួលវិវរណៈ សម្រាប់សាសនាចក្រ ។ វានឹង ‹ ផ្ទុយពីកិច្ចការរបស់ព្រះ › សម្រាប់មនុស្សដទៃដើម្បីទទួលវិវរណៈបែបនេះ ដែលវាជាកម្មសិទ្ធិរបស់ព្យាការី ។ … វិវរណៈផ្ទាល់ខ្លួន ជាកម្មសិទ្ធិរបស់បុគ្គលម្នាក់ៗ ។ ឧទាហរណ៍ ៖ បងប្អូនអាចទទួលវិវរណៈអំពីកន្លែងដែលត្រូវរស់នៅ អាជីពការងារដែលត្រូវធ្វើ ឬបុគ្គលដែលត្រូវរៀបការ ។ ថ្នាក់ដឹកនាំសាសនាចក្រអាចបង្រៀនគោលលទ្ធិ និងចែកចាយការប្រឹក្សាដ៏បំផុសគំនិត ប៉ុន្ដែការសម្រចចិត្តជាទំនួលខុសត្រូវរបស់បងប្អូន ។ នោះគឺជាវិវរណៈរបស់បងប្អូនដើម្បីទទួលបាន » ។
រឿងទាំងឡាយដែលត្រូវពិចារណា
-
មិនយូរប៉ុន្មានក្រោយពីសាសនាចក្រត្រូវបានរៀបចំឡើង នោះតួនាទីដ៏សំខាន់របស់ យ៉ូសែប ស្ម៊ីធ ជាព្យាការីត្រូវបានបញ្ជាក់ដល់សមាជិកសាសនាចក្រ ។ សូមអាន គោលលទ្ធិ និងសេចក្ដីសញ្ញា ៤៣:១–៧ ។ តើគោលការណ៍ដែលបានពិពណ៌នានៅក្នុងវគ្គបទគម្ពីរនេះអាចការពារអ្នកពីការបោកបញ្ឆោត ដោយអស់អ្នកដែលមិនមែនជារបស់ព្រះដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
ជាមួយនឹងក្រុមរបស់អ្នក សូមអានសារលិខិតរបស់ប្រធាន អិម រ័សុល បាឡឺដ « The Vision of the Redemption of the Dead » ដោយស្វែងរករបៀបដែលព្រះអម្ចាស់បានរៀបចំប្រធាន យ៉ូសែប អេហ្វ ស្ម៊ីធ ឲ្យទទួលបានវិវរណៈដ៏សំខាន់បែបនេះសម្រាប់សាសនាចក្រ ។ តើបទពិសោធន៍ជីវិតរបស់ប្រធាន ស្ម៊ីធ រៀបចំលោកសម្រាប់ការនិមិត្តដែលលោកបានទទួលដោយរបៀបណា ? យោងតាម គោលលទ្ធិ និងសេចក្ដីសញ្ញា ១៣៨:១–១១ តើប្រធាន ស្ម៊ីធ បានធ្វើអ្វីខ្លះដែលបានរៀបចំឲ្យលោកទទួលបានការបង្រៀនពីស្ថានសួគ៌ ? តើគំរូនេះជួយយើងឲ្យយល់អំពីសារៈសំខាន់នៃការរៀបចំខ្លួនដើម្បីស្គាល់ព្រះវិញ្ញាណនៃវិវរណៈដោយរបៀបណា ?
ស្វែងយល់បន្ថែមទៀត
-
អេម៉ុស ៣:៧; ម៉ាថាយ ១៦:១៣-១៨; គោលលទ្ធិ និងសេចក្តីសញ្ញា ១:៣៧-៣៨; មាត្រានៃសេចក្តីជំនឿ ១:៩
-
រ័សុល អិម ណិលសុន « Revelation for the Church, Revelation for Our Lives » Liahona ខែ ឧសភា ឆ្នាំ ២០១៨ ទំព័រ ៩៣–៩៦
-
ឃ្វីនថិន អិល ឃុក « The Blessing of Continuing Revelation to Prophets and Personal Revelation to Guide Our Lives » Liahona ខែ ឧសភា ឆ្នាំ ២០២០ ទំព័រ ៩៦–១០០
-
Teachings of Presidents of the Church: George Albert Smith ( ឆ្នាំ ២០១១ ) ទំព័រ ១១១–១២២
-
Hear Him កម្រងវីដេអូ នៅលើគេហទំព័រ, ChurchofJesusChrist.org