« សិទ្ធិជ្រើសរើស » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
សិទ្ធិជ្រើសរើស
អំណោយទានដើម្បីជ្រើសរើស និងធ្វើសកម្មភាពសម្រាប់ខ្លួនឯង
ពីមុនបងប្អូនកើតមក បងប្អូនបានរស់នៅជាបុត្រា ឬបុត្រីជាវិញ្ញាណរបស់ព្រះ ។ បងប្អូនបានរៀនអំពីផែនការរបស់ព្រះវរបិតាសួគ៌សម្រាប់ឲ្យបងប្អូនរីកចម្រើន ហើយប្រែក្លាយដូចជាទ្រង់ ។ ទ្រង់បានប្រទានអំណោយទាននៃសិទ្ធជ្រើសរើសខាងសីលធម៌ ដែលមានន័យថាបងប្អូនមានសេរីភាពក្នុងការធ្វើតាមព្រះ និងផែនការរបស់ទ្រង់ ឬក៏មិនធ្វើតាម ( សូមមើល គោលលទ្ធិ និងសេចក្តីសញ្ញា ១០១:៧៨ ) ។ គោលការណ៍នៃសិទ្ធជ្រើសរើសផ្ដល់អំណាចដល់បងប្អូនដើម្បីធ្វើសកម្មភាពសម្រាប់ខ្លួនឯង ( នីហ្វៃទី២ ២:១៦ ) ។ វាក៏មានន័យថា បងប្អូនទទួលខុសត្រូវចំពោះជម្រើសរបស់បងប្អូនផងដែរ ( សូមមើល ហេលេមិន ១៤:២៩–៣១ ) ។
នៅក្នុងជីវិតមុនជីវិតលើផែនដី សាតាំង « បានខំរកបំផ្លាញសិទ្ធិជ្រើសរើសរបស់មនុស្ស » ( ម៉ូសេ ៤:៣ ) ហើយពួកពលបរិវាមួយចំនួនបានដើរតាមវា ( សូមមើល គោលលទ្ធិ និងសេចក្តីសញ្ញា ២៩:៣៥–៣៦ ) ។ ការពិតដែលបងប្អូនមានវត្តមាននៅទីនេះលើផែនដី មានន័យថាបងប្អូនបានប្រើសិទ្ធិជ្រើសរើសរបស់បងប្អូនដើម្បីទទួលយកផែនការរបស់ព្រះ ហើយដើរតាមទ្រង់ ( សូមមើល អ័ប្រាហាំ ៣:២៤–២៦, ២៨ ) ។ តាមរយៈការណែនាំរបស់ព្រះវិញ្ញាណបរិសុទ្ធ ព្រះនឹងពង្រឹងបងប្អូននៅក្នុងកិច្ចខិតខំប្រឹងប្រែងរបស់បងប្អូនក្នុងការប្រើសិទ្ធិជ្រើសរើសខាងសីលធម៌ដើម្បីធ្វើតាមទ្រង់ ។ នៅពេលបងប្អូនជ្រើសរើសធ្វើជាមនុស្សសុចរិត បងប្អូននឹងរកឃើញសេចក្ដីសុខសាន្ត និងអំណរកាន់តែប្រសើរឡើង ហើយនៅទីបំផុតមានលក្ខណៈសម្បត្តិគ្រប់គ្រាន់ដើម្បីទទួលបានជីវិតដ៏អស់កល្បជានិច្ច ។
ផ្នែកទី ១
បងប្អូនទទួលខុសត្រូវចំពោះជម្រើសដែលបងប្អូនធ្វើនៅក្នុងជីវិតនេះ
បងប្អូនធ្វើការជ្រើសរើសរាប់រយជារៀងរាល់ថ្ងៃនៅក្នុងអ្វីៗដែលបងប្អូនគិត និយាយ និងធ្វើ ។ ប្រធាន ថូម៉ាស អេស ម៉នសុន បានមានប្រសាសន៍ថា ការសម្រេចចិត្តមួយចំនួនរបស់យើង « នឹងមិនធ្វើឲ្យមានភាពខុសគ្នាក្នុងគ្រោងការណ៍ដ៏នៅអស់កល្បជានិច្ចនោះទេ ហើយខ្លះទៀតនឹងធ្វើឲ្យមានភាពខុសគ្នា ទាំងស្រុង » ។ ដោយមានជំនួយពីព្រះ បងប្អូនអាចដឹងថាជម្រើសមួយណាសំខាន់បំផុត ។
មូលហេតុមួយដែលព្រះបញ្ជូនបុត្រាបុត្រីរបស់ទ្រង់មកផែនដីគឺដើម្បី « សាកល្បងពួកគេ … បើសិនជាពួកគេនឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេ នឹងបញ្ជាដល់ពួកគេ »( អ័ប្រាហាំ ៣:២៥ ) ។ នៅក្នុងលោកនេះ បងប្អូនប្រឈមមុខនឹង « ការផ្ទុយចំពោះរឿងសព្វសារពើ » ( នីហ្វៃទី២ ២:១១ ) ឱកាសរាប់មិនអស់ដើម្បីអនុវត្តសិទ្ធិជ្រើសរើសរបស់បងប្អូន ។ ថ្ងៃណាមួយបងប្អូននឹងត្រូវទទួលខុសត្រូវចំពោះគំនិត ពាក្យសម្ដី និងទង្វើរបស់បងប្អូន ( សូមមើល ម៉ូសាយ ៤:៣០ ) ។ របៀបដែលបងប្អូនប្រើសិទ្ធិជ្រើសរើសខាងសីលធម៌របស់បងប្អូននឹងដុសខាត់បទពិសោធន៍របស់បងប្អូនក្នុងជីវិតនេះ និងនៅបរលោក ។
ការណ៍ទាំងឡាយដែលត្រូវពិចារណា
-
អែលឌើរ ដេវីឌ អេ បែដណា បានពន្យល់ថា ៖ « នៅក្នុងរូបភាពដ៏ធំនៃការបង្កបង្កើតរបស់ព្រះទាំងអស់ មានអ្វីដែលធ្វើសកម្មភាព និងទទួលសកម្មភាពផង ( សូមមើល នីហ្វៃទី២ ២:១៣–១៤ ) ។ … ដោយទទួលបានសិទ្ធិជ្រើសរើស បងប្អូន និងខ្ញុំគឺជាភ្នាក់ងារ ហើយជាចម្បងយើងត្រូវធ្វើសកម្មភាពមិនមែនគ្រាន់តែទទួលរងនូវសកម្មភាពនោះទេ » ។ តើសេចក្ដីថ្លែងការណ៍នេះបញ្ជាក់អំពីភាពខុសគ្នារវាងបុត្រាបុត្រីរបស់ព្រះ និងការបង្កបង្កើតផ្សេងទៀតរបស់ព្រះដោយរបៀបណា ? ហេតុអ្វីបងប្អូនគិតថាគោលការណ៍នៃសិទ្ធិជ្រើសរើសខាងសីលធម៌គឺជាផ្នែកមួយដ៏ចាំបាច់នៃផែនការរបស់ព្រះសម្រាប់សេចក្តីសង្គ្រោះរបស់បុត្រាបុត្រីរបស់ទ្រង់ ?
-
សូមពិចារណាអំពីការអាននូវអ្វីដែល លីហៃ បានបង្រៀនកូនប្រុសរបស់គាត់ យ៉ាកុប អំពីសារៈសំខាន់នៃសិទ្ធិជ្រើសរើសនៅក្នុង នីហ្វៃទី២ ២:២៦–២៩ ។ តើបងប្អូននឹងពិពណ៌នាអំពីបទពិសោធន៍នៃសេរីភាព និងការជាប់ឃុំឃាំងដែលបានលើកឡើងនៅក្នុងវគ្គបទគម្ពីរនេះដោយរបៀបណា ? តើវគ្គបទគម្ពីរនេះបង្រៀនបងប្អូនអ្វីខ្លះអំពីរបៀបដើម្បី « ជ្រើសរើសជីវិតដ៏នៅអស់កល្បជានិច្ច » ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមទស្សនាវីដេអូ « The Ten Virgins » ( ១:៤០ ) ឬអានរួមគ្នាអំពីរឿងប្រៀបប្រដូចអំពីស្រ្តីព្រហ្មចារីដប់នាក់នៅក្នុង ម៉ាថាយ ២៥:១–១៣ ។ ពិភាក្សាអំពីអ្វីដែលរឿងប្រៀបប្រដូចនេះបង្រៀនអំពីសិទ្ធិជ្រើសរើស ។ និយាយអំពីរបៀបដែលបងប្អូនអាចជ្រើសរើស ដើម្បីត្រៀមខ្លួនទៅជួបព្រះអង្គសង្គ្រោះ ។
ស្វែងយល់បន្ថែមទៀត
-
នីហ្វៃទី២ ២:២៦; អាលម៉ា ៤១:៣–៧; ហេលេមិន ១៤:៣០-–៣១; គោលលទ្ធិ និងសេចក្តីសញ្ញា ២៩:៣៩; ៥៨:២៧–២៨; ៩៣:៣១–៣២; ម៉ូសេ ៤:១–៤
-
រ័សុល អិម ណិលសុន « Choices for Eternity » ( ការប្រជុំធម្មនិដ្ឋានទូទាំងពិភពលោកសម្រាប់យុវមជ្ឈិមវ័យ ថ្ងៃទី ១៥ ខែ ឧសភា ឆ្នាំ ២០២២ ) នៅលើបណ្ណាល័យដំណឹងល្អ ។
-
រ័សុល អិម ណិលសុន « Let God Prevail » លីអាហូណា ខែ វិច្ឆិកា ឆ្នាំ ២០២០ ទំព័រ ៩២
-
ដាល្លិន អេក អូក « Opposition in All Things » Liahona ខែ ឧសភា ឆ្នាំ ២០១៦
-
ឌី ថត គ្រីស្តូហ្វីសិន « Moral Agency » Ensign ខែ មិថុនា ឆ្នាំ ២០០៩ ទំព័រ ៤៦–៥២
-
« War in Heaven » ( វីដេអូ ) នៅលើបណ្ណាល័យដំណឹងល្អ
ផ្នែកទី ២
ព្រះយេស៊ូវគ្រីស្ទបានជ្រើសរើសធ្វើតាមព្រះឆន្ទៈរបស់ព្រះវរបិតានៅក្នុងគ្រប់ការណ៍ទាំងអស់
នៅពេលដែលព្រះយេស៊ូវមានព្រះជន្ម ១២ ឆ្នាំ ម៉ារា និង យ៉ូសែប បានដឹងថាទ្រង់មិននៅជាមួយគ្រួសាររបស់ពួកគេទេ នៅពេលពួកគេធ្វើដំណើរត្រឡប់ពីក្រុងយេរូសាឡិមមកផ្ទះវិញ ។ ពួកគេបានរកឃើញទ្រង់នៅព្រះវិហារបរិសុទ្ធកំពុងឆ្លើយសំណួរពីអស់អ្នកដែលសិក្សាក្រឹត្យវិន័យរបស់ព្រះ ។ ម៉ារា បានសួរព្រះយេស៊ូវថាតើទ្រង់បានដឹងថាពួកគេបានស្វែងរកទ្រង់ដែរឬទេ ។ ព្រះយេស៊ូវបានឆ្លើយតបថា « តើមិន [ ជ្រាប ] ថាគួរឲ្យខ្ញុំនៅក្នុងព្រះវិហាររបស់ព្រះវរបិតានៃខ្ញុំទេឬអី ? » ( លូកា ២:៤៩ ) ។ ព្រះយេស៊ូវតែងតែធ្វើការសម្រេចចិត្តដោយផ្អែកលើព្រះវាជបំណងរបស់ព្រះវរបិតារបស់ទ្រង់ ( សូមមើល លូកា ២២:៤២; នីហ្វៃទី៣ ១១:១១; ២៧:១៣ ) ។ ព្រះយេស៊ូវគ្រីស្ទគឺជាគំរូដ៏ល្អឥតខ្ចោះនៃការប្រើសិទ្ធជ្រើសរើសខាងសីលធម៌ ដើម្បីជ្រើសរើសសេចក្ដីសុចរិតជាជាងប្រយោជន៍ផ្ទាល់ខ្លួន និងអំពើបាប ។
ការណ៍ទាំងឡាយដែលត្រូវពិចារណា
-
ព្រះយេស៊ូវគ្រីស្ទបានប្រឈមមុខនឹងការល្បួងក្នុងអំឡុងពេលនៃជីវិតរមែងស្លាប់របស់ទ្រង់ដូចយើងដែរ ( សូមមើល ហេព្រើរ ៤:១៥; ម៉ូសាយ ៣:៧; អាលម៉ា ៧:១១ ) ។ សូមអាន ម៉ាថាយ ៤:១–១១ ។ តើបងប្អូនអាចរៀនអ្វីខ្លះមកពីការឆ្លើយតបរបស់ព្រះយេស៊ូវនៅពេលសាតាំងបានព្យាយាមឲ្យទ្រង់ជ្រើសរើសដោយមិនទៀងត្រង់ ?
-
នៅក្នុងសុន្ទរកថា « ឈ្នះលោកិយ ហើយបានសេចក្តីសម្រាក » ប្រធាន រ័សុល អិម ណិលសុន បានមានប្រសាសន៍ថា ៖ « តើការឈ្នះលោកិយមានន័យដូចម្តេច ? វាមានន័យថា ការយកឈ្នះលើការល្បួងដែលនាំឲ្យខ្វល់ខ្វាយច្រើនចំពោះរបស់ផងលោកិយ ជាងការណ៍ទាំងឡាយនៃព្រះនោះ ។ វាមានន័យថា ទុកចិត្តលើគោលលទ្ធិនៃព្រះគ្រីស្ទ ជាងលើទស្សនៈរបស់មនុស្ស ។ វាមានន័យថា ការអររីករាយនៅក្នុងសេចក្តីពិត ការទប់ទល់ការបោកបញ្ឆោត ហើយការប្រែជា ‹ អ្នកដើរតាមព្រះគ្រីស្ទដោយរាបសា › [ នីហ្វៃទី២ ២៨:១៤ ] ។ វាមានន័យថា ការជ្រើសរើសមិនធ្វើអ្វីដែលបណ្ដេញព្រះវិញ្ញាណបរិសុទ្ធ ។ វាមានន័យថាការមានឆន្ទៈក្នុងការ ‹ បោះបង់ចោល › សូម្បីតែអំពើបាបដែលយើងចូលចិត្តក៏ដោយ [ អាលម៉ា ២២:១៨ ] » ។ តើការធ្វើតាមគំរូនៃព្រះយេស៊ូវគ្រីស្ទអាចដឹកនាំការខិតខំប្រឹងប្រែងរបស់បងប្អូនឲ្យយកឈ្នះលើលោកិយដោយរបៀបណា ?
-
តើអ្វីខ្លះដែលអាចរារាំងបងប្អូនពីការធ្វើតាមព្រះឆន្ទះរបស់ព្រះវរបិតា ? តើបងប្អូនអាចធ្វើអ្វីខ្លះដើម្បីធ្វើតាមទ្រង់ឲ្យបានពេញលេញ ?
សកម្មភាពសម្រាប់ការរៀនសូត្រជាមួយអ្នកដទៃ
-
ជាញឹកញាប់ជម្រើសរបស់យើងគឺមិនមែនរវាងត្រូវ និងខុស ឬ ល្អ និងអាក្រក់នោះទេ ។ សូមអានជាមួយគ្នានូវសេចក្តីថ្លែងការណ៍ដូចខាងក្រោមរបស់ប្រធាន ដាល្លិន អេក អូក ថា ៖ « នៅពេលដែលយើងពិចារណាអំពីជម្រើសផ្សេងៗ យើងគួរចងចាំថាវាមិនគ្រប់គ្រាន់ទេដែលអ្វីមួយល្អ ។ ជម្រើសផ្សេងទៀតគឺប្រសើរជាង ហើយនៅតែមានជម្រើសផ្សេងៗទៀតដែលល្អបំផុត ។ ទោះបីជាជម្រើសជាក់លាក់មួយមានតម្លៃថ្លៃជាងនេះក៏ដោយ ក៏តម្លៃរបស់វាអាចធ្វើឲ្យវាក្លាយជាជម្រើសដ៏ល្អបំផុត » ។ និយាយអំពីគោលការណ៍មួយចំនួនដែលអាចជួយណែនាំឲ្យបងប្អូនធ្វើការជ្រើសរើសរវាងជម្រើសដែលល្អ ល្អជាង ឬល្អបំផុត ។ តើបងប្អូនអាចរៀនអ្វីខ្លះមកពីគំរូរបស់ព្រះយេស៊ូវគ្រីស្ទនៅពេលដែលបងប្អូនធ្វើការជ្រើសរើសទាំងនោះ ?
ស្វែងយល់បន្ថែមទៀត
-
ដាល្លិន អេក អូក « Good, Better, Best » Liahona ខែ វិច្ឆិកា ឆ្នាំ ២០០៧ ទំព័រ ១០៤–១០៨ ។
-
ឌែល ជី រិនឡាន់ « Choose You This Day » Liahona ខែ វិច្ឆិកា ឆ្នាំ ២០១៨ ទំព័រ ១០៤–១០៦
-
« ចូរដឹងថាគ្រប់គ្នាមានសេរី » » ទំនុកតម្កើង ល.រ. ១៤៩; « ខ្ញុំនឹងធ្វើតាមផែនការព្រះ » សៀវភៅចម្រៀងកុមារ » ទំព័រ ៨៦–៨៧
ផ្នែកទី ៣
សូមទុកឲ្យព្រះឈ្នះក្នុងជីវិតរបស់បងប្អូន
ប្រធាន រ័សុល អិម ណិលសុន បានបង្រៀន ៖ « យើងទាំងអស់គ្នាមានសិទ្ធជ្រើសរើស ។ … យើងអាចជ្រើសរើសទុកឲ្យព្រះឈ្នះនៅក្នុងជីវិតរបស់យើងឬក៏អត់ ។ យើងអាចជ្រើសរើសទុកឲ្យព្រះមានឥទ្ធិពលខ្លាំងបំផុតនៅក្នុងជីវិតរបស់យើងឬក៏អត់ » ។ នៅពេលដែលបងប្អូនសម្រេចចិត្តធ្វើតាមព្រះដោយស្ម័គ្រចិត្តក្នុងជម្រើសដែលបងប្អូនធ្វើ នោះបងប្អូនបង្ហាញថាផែនការរបស់ទ្រង់មានអាទិភាពក្នុងជីវិតរបស់បងប្អូន ។
ការជ្រើសរើសជឿគឺជាជំហានមួយក្នុងចំណោមជំហានដំបូងនៅក្នុងការប្រើប្រាស់សិទ្ធជ្រើសរើសរបស់បងប្អូនឲ្យបានត្រឹមត្រូវ ។ ជំនឿលើព្រះយេស៊ូវគ្រីស្ទបង្កើនសេចក្តីជំនឿ និងទំនុកចិត្តលើទ្រង់ ។ ព្រះគ្រីស្ទក៏សព្វព្រះទ័យឲ្យបងប្អូនជឿលើពាក្យសម្ដីរបស់ទ្រង់ដែលបានបង្ហាញតាមរយៈព្យាការីរបស់ទ្រង់ផងដែរ ខណៈពេលដែលការស្ដារឡើងវិញនូវដំណឹងល្អរបស់ទ្រង់នៅតែបន្ត ។ ពេលបងប្អូនជ្រើសរើសមានសេចក្តីជំនឿហើយជឿ នោះបងប្អូននឹងទទួលបានការយល់ដឹងខាងវិញ្ញាណកាន់តែច្រើន ហើយស្វែងរកភាពច្បាស់លាស់នៅពេលធ្វើការសម្រេចចិត្ត ។ បំណងប្រាថ្នារបស់បងប្អូនក្នុងការគោរពនឹងកើនឡើង ហើយបងប្អូននឹងជ្រើសរើសផ្លូវមួយដែលនាំឲ្យមានជីវិតអស់កល្បជានិច្ច ។
ការណ៍ទាំងឡាយដែលត្រូវពិចារណា
-
ប្រធាន រ័សុល អិម ណិលសុន បានមានប្រសាសន៍ថា ៖ « បន្តដើរនៅលើផ្លូវនៃសេចក្តីសញ្ញានេះ ។ ការតាំងចិត្តរបស់បងប្អូនដើម្បីធ្វើតាមព្រះអង្គសង្គ្រោះដោយការធ្វើសេចក្ដីសញ្ញាជាមួយទ្រង់ ហើយបន្ទាប់មករក្សាសេចក្ដីសញ្ញានោះ នឹងបើកទ្វារទៅកាន់ពរជ័យ និងឯកសិទ្ធិខាងវិញ្ញាណដែលមានសម្រាប់បុរស ស្ត្រី និងកុមារនៅគ្រប់ទីកន្លែង » ។ តើជម្រើសអ្វីខ្លះដែលបានជួយបងប្អូនឲ្យរីកចម្រើននៅលើផ្លូវនៃសេចក្ដីសញ្ញារបស់ព្រះអម្ចាស់ ? តើបងប្អូន នឹង ធ្វើការជ្រើសរើសអ្វីខ្លះដែលនឹងជួយបងប្អូនឲ្យនៅលើផ្លូវនោះ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអញ្ជើញអ្នកដទៃឲ្យនិយាយអំពីបទពិសោធន៍នៅពេលដែលជីវិតមិនបានក្លាយទៅជាអ្វីដែលពួកគេបានរំពឹងទុក ។ និយាយអំពីគំនិត និងអារម្មណ៍ បទពិសោធន៍បែបនេះអាចបង្កើតបាន ។ សូមពិចារណាអំពីការអាន អេសាយ ៥៥:៨–៩ ជាមួយគ្នា ហើយពិភាក្សាអំពីមូលហេតុដែលគោលការណ៍នៃការអនុញ្ញាតឲ្យព្រះឈ្នះនាំមកនូវសេចក្ដីសុខសាន្ត និងទំនុកចិត្ត ។
ស្វែងយល់បន្ថែមទៀត
-
រ័សុល អិម ណិលសុន « Let God Prevail » Liahona ខែ វិច្ឆិកា ឆ្នាំ ២០២០ ទំព័រ ៩២–៩៥
-
ហ្គើរីត ដបុលយូ ហ្គង « Choose to Let God Prevail » ដើម្បីកម្លាំងនៃយុវជន ខែ សីហា ឆ្នាំ ២០២២ ទំព័រ ២–៥
-
រែនដល ឃេ បិនណិ្ណត « Choose Eternal Life » Liahona ខែ វិច្ឆិកា ឆ្នាំ ២០១១ ទំព័រ ៩៨–១០០