« ការគោរពប្រតិបត្តិ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការគោរពប្រតិបត្តិ
ការធ្វើតាមព្រះដោយដួងចិត្ដដែលមានឆន្ទៈ
ឪពុកម្តាយស្គាល់ពីសារៈសំខាន់នៃការបង្រៀនកូនតូចៗឲ្យចៀសវាងការប៉ះរបស់ក្តៅ ឬរត់ចូលថ្នល់កាត់មុខរថយន្ត ។ ប្រសិនបើកុមារគោរពតាម ទោះបីជាពួកគេយល់ ឬមិនយល់ពីមូលហេតុដែលការគោរពតាមនោះចាំបាច់ក្ដី ក៏ពួកគេនឹងរីករាយនឹងសុវត្ថិភាព និងការការពារកាន់តែច្រើនឡើង ។
នៅក្នុងជីវិតមុនផែនដីរបស់យើង ព្រះអម្ចាស់បានប្រកាសថាការផ្តល់ឲ្យបុត្រាបុត្រីរបស់ព្រះ ជាមួយនឹងបទពិសោធន៍នៃជីវិតរមែងស្លាប់នៅលើផែនដីគឺចាំបាច់ដើម្បី « សាកល្បងពួកគេមើល … បើសិនជាពួកគេនឹងប្រព្រឹត្តនូវអ្វីៗគ្រប់យ៉ាង ដែលព្រះអម្ចាស់ដ៏ជាព្រះរបស់ពួកគេ នឹងបញ្ជាដល់ពួកគេ » ( អ័ប្រាហាំ ៣:២៥ ) ។ ព្រះទ័យរបស់ព្រះចង់ឲ្យយើងម្នាក់ៗរៀនធ្វើតាមទ្រង់ ហើយគោរពតាមបញ្ញត្តិរបស់ទ្រង់ ។ នៅពេលយើងធ្វើដូច្នេះ យើងនឹងទទួលពរជ័យនៃការរស់នៅជាមួយនឹងទ្រង់នៅក្នុង « ស្ថានភាពសុភមង្គលដ៏មិនចេះចប់មិនចេះហើយ » ( ម៉ូសាយ ២:៤១ ) ។ តាមរយៈការប្រើសិទ្ធជ្រើសរើសខាងសីលធម៌របស់យើង និងការណែនាំរបស់ព្រះវិញ្ញាណ នោះយើងអាចចាប់ផ្ដើមយល់ពីមូលហេតុដែលព្រះបានប្រទានឲ្យយើងនូវច្បាប់ដើម្បីគោរពប្រតិបត្តិ ។ ព្រះវរបិតាសួគ៌សន្យាថាសុភមង្គល និងពរជ័យកើតមានដល់អស់អ្នកដែលនឹងស្តាប់តាមបន្ទូលរបស់ទ្រង់ ហើយបានគោរពប្រតិបត្តិតាមបញ្ញត្តិរបស់ទ្រង់ដោយស្ម័គ្រចិត្ត ។
តើការគោរពប្រតិបត្តិគឺជាអ្វី ?
នៅក្នុងដំណឹងល្អរបស់ព្រះយេស៊ូវគ្រីស្ទ ការគោរពប្រតិបត្តិត្រូវបានយល់ថាជាការធ្វើតាមបំណងរបស់ព្រះ ហើយការរក្សាបញ្ញត្តិរបស់ទ្រង់ ។ វារួមបញ្ចូលទាំងការអនុវត្តសិទ្ធជ្រើសរើសរបស់យើង ឬសេរីភាពនៃការជ្រើសរើសដើម្បីធ្វើតាមព្រះដោយដួងចិត្ដដែលមានឆន្ទៈ ។ យើងបង្ហាញពីសេចក្ដីស្រឡាញ់របស់យើងចំពោះព្រះ នៅពេលយើងជ្រើសរើសទុកចិត្ត ហើយធ្វើតាមព្រះរាជបំណងរបស់ទ្រង់ ។
ទិដ្ឋភាពទូទៅនៃប្រធានបទ ៖ ការគោរពប្រតិបត្តិ
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ បទបញ្ញត្តិ,ការប្រែចិត្ត, សេចក្ដីសញ្ញា និងពិធីបរិសុទ្ធ, ការរស់នៅតាមដំណឹងល្អរបស់ព្រះយេស៊ូវគ្រីស្ទ
ផ្នែកទី ១
ព្រះយេស៊ូវគ្រីស្ទបានគោរពប្រតិបត្តិព្រះជាព្រះវរបិតាក្នុងគ្រប់ការណ៍ទាំងអស់
ព្រះយេស៊ូវគ្រីស្ទបានប្រកាស « ខ្ញុំបានចុះពីស្ថានសួគ៌មក មិនមែននឹងធ្វើតាមចិត្តខ្ញុំទេ គឺតាមបំណងព្រះហឫទ័យនៃព្រះវិញ ដែលទ្រង់ចាត់ឲ្យខ្ញុំមក » ( យ៉ូហាន ៦:៣៨ ) ។ ក្នុងជីវិតរមែងស្លាប់របស់ទ្រង់ ព្រះយេស៊ូវបានបង្ហាញពីការគោរពប្រតិបត្តិតាមច្បាប់ និងបទបញ្ញត្តិទាំងអស់របស់ព្រះវរបិតារបស់ទ្រង់ ។ ទ្រង់បានមានបន្ទូល « ខ្ញុំចេះតែធ្វើការ ដែលគាប់ដល់ព្រះហឫទ័យទ្រង់ជាដរាប » ( យ៉ូហាន ៨:២៩ ) ។
នៅក្នុងសួនច្បារគែតសេម៉ានី ព្រះយេស៊ូវបានអធិស្ឋាន « ឱព្រះវរបិតាអើយ បើសិនជាទ្រង់សព្វព្រះហឫទ័យ នោះសូមយកពែងនេះចេញពីទូលបង្គំទៅ ប៉ុន្តែកុំតាមចិត្តទូលបង្គំឡើយ សូមតាមតែព្រះហឫទ័យទ្រង់វិញ » ( លូកា ២២:៤២ ) ។ ក្រោយរងទុក្ខនៅក្នុងសួនច្បារគែតសេម៉ានី ទ្រង់បានធ្វើតាមព្រះរាជបំណងរបស់ព្រះវរបិតារបស់ទ្រង់ ហើយត្រូវបានគេឆ្កាង ធ្វើឲ្យអង្គទ្រង់ក្លាយជាដង្វាយដើម្បីប្រោសលោះយើងទាំងអស់គ្នា ( សូមមើល ម៉ូសាយ ១៥:៧ ) ។ ដោយសារព្រះយេស៊ូវគ្រីស្ទបានគោរពតាមព្រះវរបិតារបស់ទ្រង់គ្រប់ការណ៍ទាំងអស់ នោះទ្រង់បានធ្វើឲ្យសេចក្ដីសង្គ្រោះ និងភាពតម្កើងឡើងអាចកើតមានឡើងសម្រាប់បុត្រាបុត្រីរបស់ព្រះ ។
នៅក្នុងសម័យរបស់យើង ព្រះអម្ចាស់សុំឲ្យយើងដើរតាមដានព្រះបាទារបស់ទ្រង់ ហើយ « រស់នៅដោយសារគ្រប់ទាំងព្រះបន្ទូល ដែលចេញពីព្រះឱស្ឋនៃព្រះ » ( គោលលទ្ធិ និងសេចក្ដីសញ្ញា ៩៨:១១ សូមមើលផងដែរ ចោទិយកថា ៨:៣ ) ។ ព្រះយេស៊ូវគ្រីស្ទបានបញ្ជាក់ពីមូលហេតុដ៏សំខាន់បំផុតសម្រាប់យើងក្នុងការគោរពតាមព្រះនៅពេលទ្រង់ចេញនូវសេចក្ដីអញ្ជើញដោយផ្ទាល់ និងសាមញ្ញថា « បើអ្នករាល់គ្នាស្រឡាញ់ខ្ញុំ ចូរកាន់តាមបញ្ញត្តិរបស់ខ្ញុំចុះ » ( យ៉ូហាន ១៤:១៥ ) ។
រឿងទាំងឡាយដែលត្រូវពិចារណា
-
ព្រះយេស៊ូវគ្រីស្ទបានរស់នៅក្នុងជីវិតដ៏គ្មានបាប និង បរិសុទ្ធ ។ ទ្រង់អញ្ជើញឲ្យយើងធ្វើតាមទ្រង់ ។ សូមអាន នីហ្វៃទី២ ៣១:៧–១០ ។ តើអស់អ្នកដែលចង់ធ្វើតាមព្រះយេស៊ូវគ្រីស្ទតម្រូវឲ្យមានអ្វីខ្លះ ?
-
ព្រះបានប្រកាសថាកិច្ចការ និងសិរីល្អរបស់ទ្រង់គឺដើម្បី « នាំឲ្យមានអមតភាព និងជីវិតដ៏នៅអស់កល្បជានិច្ចដល់មនុស្ស » ( ម៉ូសេ ១:៣៩ ) ។ សូមអាន គោលលទ្ធិ និងសេចក្តីសញ្ញា ១១:២០ ហើយពិចារណាអំពីអ្វីដែលព្រះអម្ចាស់បានកំណត់អត្តសញ្ញាណថាជា « កិច្ចការរបស់អ្នក » ។
សកម្មភាពសម្រាប់ការរៀនសូត្រជាមួយអ្នកដទៃ
-
អែលឌើរ រ៉ូប៊ើត ឌី ហែល បានបង្រៀនថា « ដោយសារព្រះអង្គសង្គ្រោះយើងទ្រង់គោរពប្រតិបត្តិ ទ្រង់បានធ្វើឲ្យធួននឹងបាបរបស់យើង ដោយធ្វើឲ្យមានលទ្ធភាពរស់ឡើងវិញ ហើយរៀបចំផ្លូវសម្រាប់យើងត្រឡប់ទៅព្រះវរបិតាសួគ៌វិញ » ។ សូមពិភាក្សាអំពីពរជ័យដែលយើងរីករាយដោយសារព្រះយេស៊ូវគ្រីស្ទបានគោរពតាមព្រះយ៉ាងល្អឥតខ្ចោះចំពោះព្រះជាព្រះវរបិតា ។ តើព្រះនឹងឲ្យយើងធ្វើអ្វីខ្លះដើម្បីបង្ហាញការដឹងគុណរបស់យើងចំពោះពរជ័យជាច្រើនដែលយើងទទួល ?
ស្វែងយល់បន្ថែមទៀត
-
រ៉ូប៊ើត ឌី ហែល « If Ye Love Me, Keep My Commandments » Liahona ខែ ឧសភា ឆ្នាំ ២០១៤ ទំព័រ ៣៥–៣៨
-
ឌី ថត គ្រីស្តូហ្វឺសិន « That They May Be One in Us » Liahona ខែ វិច្ឆិកា ឆ្នាំ ២០០២ ទំព័រ ៧១–៧៣
ផ្នែកទី ២
ការគោរពប្រតិបត្តិចំពោះព្រះនឹងដឹកនាំឲ្យមានសុភមង្គល និងពរជ័យ
យើងរៀននៅក្នុងព្រះគម្ពីរមរមនថា អស់អ្នកដែលបានស្តាប់ឮការបង្រៀនដ៏សំខាន់របស់ស្តេចបេនយ៉ាមីន បានប្រែចិត្តជឿយ៉ាងខ្លាំងទៅលើព្រះយេស៊ូវគ្រីស្ទ ។ ជាលទ្ធផលពួកគេបានសម្តែងនូវឆន្ទៈក្នុងការចុះសេចក្តីសញ្ញាដើម្បីធ្វើតាមព្រះបញ្ញត្តិរបស់ព្រះ ( សូមមើល ម៉ូសាយ ៥:១-៧ ) ។ ការទទួលខុសត្រូវមួយក្នុងចំណោមការទទួលខុសត្រូវដែលសមាជិកសាសនាចក្រនៃព្រះគ្រីស្ទមាននៅក្នុងជំនាន់របស់យើង គឺត្រូវរក្សាព្រះបញ្ញត្តិទាំងអស់របស់ព្រះ ( សូមមើល គោលលទ្ធិ និងសេចក្តីសញ្ញា ៤២:៧៨ ) ។ ព្យាការី យ៉ូសែប ស្ម៊ីធ បានពន្យល់ថាកាតព្វកិច្ចនេះមានសារៈសំខាន់ប៉ុនណាចំពោះលោក នៅពេលលោកបានមានប្រសាសន៍ថា « ខ្ញុំបានបង្កើតច្បាប់របស់ខ្ញុំ ៖ នៅពេលដែលព្រះអម្ចាស់បញ្ជា ចូរធ្វើតាម ។ »
ព្រះវរបិតាសួគ៌ដ៏ជាទីស្រឡាញ់របស់យើងបានបង្ហាញពីគោលការណ៍ដ៏អស់កល្បជានិច្ចដែលគ្រប់គ្រងអំពីរបៀបដើម្បីទទួលបានពរជ័យ ៖ « កាលណាយើងបានព្រះពរណាមួយពីព្រះ នោះគឺដោយសារការគោរពដល់ក្រឹត្យវិន័យនោះ ដែលព្រះពរនោះផ្អែកទៅលើ » ( សូមមើល គោលលទ្ធិ និងសេចក្ដីសញ្ញា ១៣០:២០-២១ ) ។ មានហេតុផលផ្សេងៗដែលយើងអាចជ្រើសរើសដើម្បីគោរពប្រតិបត្តិតាមព្រះបញ្ញត្តិរបស់ព្រះ ។ ជួនកាលយើងអាចធ្វើដូច្នោះដោយសារខ្លាចនូវការដាក់ទណ្ឌកម្ម ។ ពេលខ្លះយើងអាចនឹងចង់ស្វែងរករង្វាន់ដែលបានសន្យា ។ ប៉ុន្តែមូលហេតុសំខាន់បំផុតដែលយើងត្រូវគោរពប្រតិបត្តិនោះគឺ យើងស្រឡាញ់ព្រះវរបិតាសួគ៌ និងព្រះយេស៊ូវគ្រីស្ទ ហើយចង់បម្រើទ្រង់ទាំងទ្វេ ។ ព្រះ « ទ្រង់តម្រូវចិត្ត និងគំនិតដែលស្ម័គ្រតាម » ( គោលលទ្ធិ និងសេចក្ដីសញ្ញា ៦៤:៣៤ ) ។
រឿងទាំងឡាយដែលត្រូវពិចារណា
-
សូមគិតអំពីរបៀបទាំងអស់ដែលព្រះវរបិតាសួគ៌បានបង្ហាញអំពីសេចក្ដីស្រឡាញ់របស់ទ្រង់ចំពោះអ្នក ។ សូមអាន ម៉ូសាយ ២:២០–២៤ ។ ហេតុអ្វីការស្តាប់បង្គាប់របស់យើងគឺជាតម្រូវការមកពីព្រះសម្រាប់យើងទាំងអស់ ? ឥឡូវនេះសូមអាន ម៉ូសាយ ២:៤១ ។ តើអ្នកអាចពិពណ៌នាទៅកាន់មនុស្សម្នាក់ទៀតដោយរបៀបណា អំពីសេចក្តីសប្បុរសដែលព្រះមានចំពោះអស់អ្នកដែលព្យាយាមគោរពប្រតិបត្តិតាមព្រះបញ្ញត្តិរបស់ទ្រង់ដោយស្មោះនោះ ?
-
គ្រួសាររបស់លីហៃបានជួបប្រទះការលំបាកយ៉ាងខ្លាំងនៅពេលដែលពួកគេបានធ្វើដំណើរនៅក្នុងទីរហោស្ថានអស់រយៈពេលជាច្រើនឆ្នាំ ។ ព្រោះគេស្វះស្វែងដើម្បីរក្សាព្រះបញ្ញត្តិរបស់ព្រះ នោះព្រះអម្ចាស់បានប្រទានពរដល់ពួកគេ ។ សូមអាន នីហ្វៃទី១ ១៧:១–៤ ។ យោងតាម ខទី ៣ តើព្រះបានរៀបចំធ្វើអ្វីខ្លះសម្រាប់អស់អ្នកដែលរក្សាព្រះបញ្ញត្តិរបស់ទ្រង់ ?
-
យើងនឹងមិនតែងតែយល់ជានិច្ចពីមូលហេតុដែលព្រះបានប្រទានព្រះបញ្ញត្តិជាក់លាក់នោះទេ ។ ប៉ុន្តែនៅពេលយើងអនុវត្តសិទ្ធជ្រើសរើសរបស់យើង ហើយជ្រើសរើសទុកចិត្ត និងគោរពតាមព្រះ នោះយើងអាចមានទំនុកចិត្តថាគ្រប់ការណ៍ទាំងអស់នឹងបានផ្សំគ្នា សម្រាប់សេចក្ដីល្អដល់យើង ( សូមមើល គោលលទ្ធិ និងសេចក្ដីសញ្ញា ១០០:១៥ ) ។ ព្រះអម្ចាស់បានប្រកាសយ៉ាងច្បាស់ថា « បើសិនជាអ្នកកាន់តាមព្រះបញ្ញត្តិទាំងឡាយរបស់យើង ហើយកាន់ខ្ជាប់ដរាបដល់ចុងបំផុត នោះអ្នកនឹងបានជីវិតដ៏នៅអស់កល្បជានិច្ច គឺជាអំណោយទានដ៏មហិមាបំផុតនូវគ្រប់អំណោយទានទាំងឡាយនៃព្រះ » ( គោលលទ្ធិ និងសេចក្ដីសញ្ញា ១៤:៧ ) ។
សកម្មភាពសម្រាប់ការរៀនសូត្រជាមួយអ្នកដទៃ
-
ប្រធាន អ៊ែសរ៉ា ថាហ្វ ប៊ែនសឹន បានប្រកាសថា « នៅពេលយើងដាក់ព្រះជាទីមួយ នោះរឿងទាំងអស់ផ្សេងទៀតនឹងកើតឡើងតាមរបៀបរបស់វា ឬបាត់បង់ចេញពីជីវិតរបស់យើង » ។ តើ « ការដាក់ព្រះជាទីមួយ » មានន័យយ៉ាងណាចំពោះអ្នក ? សូមឲ្យសមាជិកក្រុមនិយាយអំពីពេលវេលាដែលពួកគេបានឃើញថា « រឿងទាំងអស់ផ្សេងទៀតនឹងកើតឡើងតាមរបៀបរបស់វា ឬបាត់បង់ចេញពីជីវិតរបស់យើង » នៅពេលយើងដាក់ព្រះជាមុន ។
ស្វែងយល់បន្ថែមទៀត
-
លេវីវិន័យ ២៦:៣–១៣; ចោទិយកថា ៤:៤០; នីហ្វៃទី១ ៣:១–៧; ហេលេមិន ១៤:៣០-៣១; គោលលទ្ធិ និងសេចក្តីសញ្ញា ៥៩:២៣
-
ថូម៉ាស អេស ម៉នសុន « The Blessings of Obedience » Liahona ខែ តុលា ឆ្នាំ ២០១៦ ទំព័រ ៤–៦
-
ឌី ថត គ្រីស្តូហ្វឺសិន « ហេតុអ្វីជាផ្លូវនៃសេចក្តីសញ្ញា » លីអាហូណា ខែ ឧសភា ឆ្នាំ ២០២១ ទំព័រ ១១៦–១១៩
-
« Obedience: ‘When the Lord Commands, Do It » Teachings of Presidents of the Church: Joseph Smith ( ឆ្នាំ ២០១១ ) ទំព័រ ១៥៩-១៦៩