« ការប្រែចិត្ត » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ការប្រែចិត្ត
ការរីកចម្រើន និងកែលម្អតាមរយៈសេចក្ដីស្រឡាញ់ និងសេចក្ដីមេត្តាករុណារបស់ព្រះយេស៊ូវគ្រីស្ទ
ព្រះវរបិតាសួគ៌ស្រឡាញ់យើង ។ ទ្រង់សព្វព្រះទ័យចង់ឲ្យយើងត្រឡប់ទៅរកទ្រង់វិញ លើសពីអ្វីទាំងអស់ ។ ប៉ុន្តែអំពើបាប និងភាពមិនល្អឥតខ្ចោះរបស់យើងបានបំបែកយើងចេញពីព្រះ ។ អំពើបាប និងភាពមិនល្អឥតខ្ចោះទាំងនោះរារាំងយើងពីការត្រឡប់ទៅរស់នៅក្នុងវត្តមានរបស់ទ្រង់វិញ និងពីការក្លាយដូចជាទ្រង់ ។ ទោះជាយ៉ាងណាក៏ដោយ ក្ដីសង្ឃឹមនៅតែមាន ។ ព្រោះព្រះវរបិតាដែលគង់នៅស្ថានសួគ៌ស្រឡាញ់យើងខ្លាំងណាស់ ទ្រង់បានបញ្ជូនព្រះរាជបុត្រារបស់ទ្រង់គឺព្រះយេស៊ូវគ្រីស្ទឲ្យមកសង្គ្រោះយើង ។ ព្រះគ្រីស្ទបានស្ម័គ្រចិត្តលើកដាក់លើអង្គទ្រង់នូវអំពើបាប និងភាពមិនល្អឥតខ្ចោះរបស់យើង ដើម្បីយើងអាចត្រូវបានអភ័យទោស បន្តរីកចម្រើន ហើយនៅទីបំផុតអាចត្រឡប់ទៅរស់នៅជាមួយនឹងព្រះវរបិតាដែលគង់នៅស្ថានសួគ៌របស់យើងវិញ ។ ការណ៍នេះត្រូវបានហៅថាដង្វាយធួនរបស់ព្រះយេស៊ូវគ្រីស្ទ ។ យើងចាប់ផ្ដើមទទួលបានពរនៃដង្វាយធួនរបស់ព្រះគ្រីស្ទនៅពេលយើងអនុវត្តសេចក្តីជំនឿលើទ្រង់ ហើយប្រែចិត្តពីអំពើបាបរបស់យើង ។
ផ្នែកទី ១
ត្រូវបានជ្រះស្អាតតាមរយៈការប្រែចិត្ត ៖ « តើវាធ្វើដោយរបៀបណា ? »
នៅក្នុងព្រះគម្ពីរមរមន ព្យាការី អេណុស បានរៀបរាប់អំពី « ការពុះពារដែល [ គាត់ ] បានធ្វើទៅចំពោះព្រះ » នៅពេលដែលគាត់ស្វែងរកការអភ័យទោសចំពោះអំពើបាបរបស់គាត់ ។ នៅពេលចុងក្រោយ « ទោសរបស់ខ្ញុំបានបំបាត់ចោលទៅ » គាត់បានសួរអ្វីមួយដែលប្រហែលជាបងប្អូនបានឆ្ងល់ថា ៖ « ឱព្រះអម្ចាស់អើយ ចុះតើការណ៍នេះបានធ្វើយ៉ាងណាទៅ ? » សូមអានអំពីបទពិសោធន៍របស់គាត់នៅក្នុង អេណុស ១:១–៨ ។ តើ អេណុស បានផ្លាស់ប្ដូរដោយរបៀបណា ? តើបងប្អូនរៀនអ្វីខ្លះអំពីរបៀបដែលគាត់បានរៀបរាប់ពីការប្រែចិត្តរបស់គាត់ ?
ពិតណាស់ វិធីតែមួយគត់ដើម្បីយល់យ៉ាងពេញលេញអំពីការប្រែចិត្ដគឺដកពិសោធន៍វា ។ ពេលបងប្អូនប្រែចិត្ត ហើយមានអារម្មណ៍សុខសាន្ត និងអំណរនៃការអភ័យទោស សូមពិចារណាសរសេរអំពីបទពិសោធន៍របស់បងប្អូន ។ បងប្អូនប្រហែលជាមានអារម្មណ៍បំផុសគំនិត ដើម្បីចែកចាយវាជាមួយសមាជិកគ្រួសារ ឬមិត្តភក្តិ ។
ការណ៍ទាំងឡាយដែលត្រូវពិចារណា
-
តើយើងអាចទទួលព្រះចេស្ដានៃការលាងសម្អាតរបស់ព្រះអង្គសង្គ្រោះនៅក្នុងជីវិតរបស់យើងដោយរបៀបណា ? បងប្អូនអាចរកចម្លើយចំពោះសំណួរនេះនៅក្នុងសារលិខិតរបស់ប្រធាន ដាល្លិន អេក អូក « Cleansed by Repentance » ។ សូមគិតអំពីការបង្រៀនដែលបានរកឃើញនៅក្នុងផ្នែកទីមួយ ដែលមានចំណងជើងថា « ការប្រែចិត្ត » ជាពិសេស ។ សូមពិចារណាអំពីអ្វីដែលព្រះអម្ចាស់ចង់ឲ្យបងប្អូនធ្វើ ដើម្បីទទួលបានការអភ័យទោសពីអំពើបាបរបស់បងប្អូន ។
-
ស្វែងយល់អំពីអ្វីដែលព្រះអង្គសង្គ្រោះបានមានបន្ទូលអំពីការពលិកម្មដ៏ធួនរបស់ទ្រង់សម្រាប់យើងនៅក្នុង នីហ្វៃទី៣ ៩:១៣–១៤ និង គោលលទ្ធិ និងសេចក្តីសញ្ញា ១៩:១៦–១៩ ។ តើសារលិខិតអ្វីខ្លះដែលព្រះអម្ចាស់អាចមានសម្រាប់បងប្អូនជាពិសេសនៅក្នុងព្រះបន្ទូលរបស់ទ្រង់ ?
-
សូមកត់សម្គាល់នូវពាក្យ និងឃ្លាដែលពិពណ៌នាអំពីការអភ័យទោសនៅក្នុង យេរេមា ៣៣:៦–៩; អាលម៉ា ៥:២១ ។ តើពាក្យ និងឃ្លាទាំងនេះផ្ដល់យោបល់អ្វីខ្លះដល់បងប្អូនអំពីការប្រែចិត្ត និងការអភ័យទោសចំពោះអំពើបាប ?
-
សកម្មភាពសម្រាប់ការរៀនសូត្រជាមួយអ្នកដទៃ
-
ព្យាការី អេសាយ បានមានប្រសាសន៍អំពីការលាងសម្អាត និងការជម្រះនៅពេលដែលគាត់បានបង្រៀនអំពីការប្រែចិត្ត ។ សូមពិចារណាអាន អេសាយ ១:១៦–១៨ ជាក្រុមគ្រួសារខណៈដែលកំពុងលាងសម្អាតអ្វីមួយជាមួយគ្នា ដូចជាបោកសម្លៀកបំពាក់ ឬលាងចានជាដើម ។ តើរបស់អ្វីដែលធ្វើឲ្យរបស់ទាំងនេះអាចក្លាយជាស្អាតបាន ? តើការណ៍អ្វីដែលធ្វើឲ្យយើងអាចក្លាយជាមនុស្សស្អាតខាងវិញ្ញាណ—ឬជ្រះស្អាតពីអំពើបាបរបស់យើង ? ( សូមមើល នីហ្វៃទី៣ ២៧:១៩–២០ ) ។
បងប្អូនក៏អាចប្រៀបធៀបពីអារម្មណ៍ដែលត្រូវបានសម្អាតខាងរូបកាយ ជាមួយនឹងរបៀបដែលវាមានអារម្មណ៍ថាត្រូវបានអភ័យទោសចំពោះអំពើបាបរបស់យើង ។
ស្វែងយល់បន្ថែមទៀត
-
ឌៀថើរ អេហ្វ អុជដូហ្វ « He Will Place You on His Shoulders and Carry You Home » Liahona ខែ ឧសភា ឆ្នាំ ២០១៦ ទំព័រ ១០១–១០៤
ផ្នែកទី ២
ការប្រែចិត្តមានន័យថាការផ្លាស់ប្តូរ—ហើយវាគឺសម្រាប់មនុស្សគ្រប់គ្នា
ព្រះគម្ពីរផ្ដល់គំរូជាច្រើនពីមនុស្សដែលមើលទៅដូចជាមិនទំនងជាបេក្ខជនសម្រាប់ការផ្លាស់ប្ដូរ ប៉ុន្តែជាអ្នកដែលប្រែចិត្តតាមរយៈអំណាចរបស់ព្រះយេស៊ូវគ្រីស្ទបាន ហើយក្លាយទៅជាមនុស្សសុចរិត ។ សាវកប៉ុល ពួកសាសន៍លេមិនជាច្រើននាក់ និងអាលម៉ាជាកូន ទាំងអស់គ្នាបានមានបទពិសោធន៍នូវការផ្លាស់ប្ដូរដួងចិត្តដ៏គួរឲ្យរំភើប និងគួរឲ្យភ្ញាក់ផ្អើល ។ ពួកគេបែរចេញពីអំពើបាប និងឆ្ពោះទៅរកព្រះអង្គសង្រ្គោះ ដែលអនុញ្ញាតឲ្យទ្រង់ផ្លាស់ប្ដូរជីវិតរបស់ពួកគេ ។ ពេលខ្លះការផ្លាស់ប្ដូរនេះហាក់ដូចជាកើតឡើងភ្លាមៗ ជាញឹកញាប់វាគឺជាការផ្លាស់ប្តូរបន្តិចម្តងៗ ។ ទោះជាយ៉ាងណាក៏ដោយវាជាអព្ភូតហេតុមួយដែលព្រះយេស៊ូវគ្រីស្ទប្រទានដល់អស់អ្នកដែលប្រែចិត្ត ។ ហើយវាជាអព្ភូតហេតុដែលយើងគ្រប់គ្នាត្រូវការ « ពីព្រោះគ្រប់គ្នាបានធ្វើបាប ហើយខ្វះមិនដល់សិរីល្អនៃព្រះ » ( រ៉ូម ៣:២៣ ) ។
ការណ៍ទាំងឡាយដែលត្រូវពិចារណា
-
សិក្សាអំពីគំរូនៃការប្រែចិត្ដនៅក្នុង កិច្ចការ ២២:៣–២១ ( អំពី ប៉ុល ); អាលម៉ា ២៤:៦–១៩ ( អំពីក្រុមនៃពួកសាសន៍លេមិន ); និង អាលម៉ា ៣៦ ( អំពីអាលម៉ាជាកូន ) ។ តើមនុស្សទាំងនេះបានធ្វើអ្វីខ្លះដើម្បីប្រែចិត្ត ? ហេតុអ្វីវាមានតម្លៃដើម្បីអានអំពីបទពិសោធន៍របស់ពួកគេ ? សូមជញ្ជឹងគិត ហើយកត់ត្រានូវអ្វីដែលបងប្អូនរៀន ។
-
តើការផ្លាស់ប្តូរអ្វីខ្លះដែលបងប្អូនចង់ធ្វើនៅក្នុងជីវិតរបស់បងប្អូន ? ពេលបងប្អូនពិចារណារឿងនេះ សូមសិក្សា យ៉ាកុប ៤:១៧; ម៉ូសាយ ៤:២៩–៣០; អាលម៉ា ៥:២៦; និងសាររបស់ប្រធាន រ័សុល អិម ណិលសុន « We Can Do Better and Be Better » ។ តើបងប្អូនមានអារម្មណ៍ថាព្រះអម្ចាស់ចង់ឲ្យបងប្អូនកែលម្អ និងរីកចម្រើនអ្វីខ្លះ ?
សកម្មភាពសម្រាប់ការរៀនសូត្រជាមួយអ្នកដទៃ
-
ពិភពលោកពោរពេញទៅដោយគំរូនៃការផ្លាស់ប្ដូរដ៏គួរឲ្យចាប់អារម្មណ៍—ជាគ្រាប់ពូជតូចមួយដែលក្លាយជាដើមឈើដ៏ធំ ដង្កូវមួយដែលក្លាយជាមេអំបៅ ពងសត្វមួយដែលក្លាយជាសត្វឥន្រ្ទី ។ បងប្អូន ឬគ្រួសាររបស់បងប្អូនអាចពិនិត្យមើលគំរូមួយចំនួននេះ ហើយអាន កូរិនថូស ទី២ ៥:១៧ ។ ការអាននេះអាចនាំឲ្យមានការសន្ទនាអំពីការផ្លាស់ប្ដូរដែលអាចធ្វើទៅបានតាមរយៈព្រះយេស៊ូវគ្រីស្ទ ។
-
កុមារតូចៗប្រហែលជារីករាយក្នុងការរៀនសូត្រអំពីការប្រែចិត្តចេញពីដំណើររឿងព្រះគម្ពីរមរមន ដូចជាចេញមកពីឧទាហរណ៍នៅក្នុង « ជំពូកទី ១៨ ៖ អាលម៉ាជាកូនប្រែចិត្ត » និង « ជំពូកទី ២៦ ៖ ប្រជាជនអាំម៉ូន » ។ តើព្រះអង្គសង្គ្រោះបានជួយមនុស្សទាំងនេះឲ្យផ្លាស់ប្ដូរយ៉ាងដូចម្ដេច ?
-
បងប្អូនក៏អាចធ្វើបញ្ជីនៃគុណលក្ខណៈមួយចំនួនរបស់ព្រះវរបិតាសួគ៌ និងព្រះយេស៊ូវគ្រីស្ទបានផងដែរ ( ទំនុកតម្កើង « ឲ្យខ្ញុំកាន់តែវិសុទ្ធ » លើកឡើងជាច្រើនដង ) ។ តើយើងអាចផ្លាស់ប្ដូរដើម្បីក្លាយដូចជាទ្រង់ទាំងទ្វេតាមវិធីណា ? តើទ្រង់ទាំងទ្វេជួយយើងធ្វើបែបនេះដោយរបៀបណា ?
ស្វែងយល់បន្ថែមទៀត
-
លែរី អរ ឡរិនស៍ « What Lack I Yet? » Liahona ខែ វិច្ឆិកា ឆ្នាំ ២០១៥ ទំព័រ ៣៣–៣៥
ផ្នែកទី ៣
ការប្រែចិត្ដគឺជាក្តីរីករាយ
ពីព្រោះការផ្លាស់ប្ដូរអាចជាការពិបាក ពេលខ្លះយើងអាចមានអារម្មណ៍ភ័យខ្លាចចំពោះការប្រែចិត្ត ។ ប្រហែលយើងគិតថាវាជាអ្វីដែលគួរឲ្យសោកសៅ ឬបាក់ទឹកចិត្ត ឬពិបាកដែលមិនអាចធ្វើទៅរួច ។ សូមចងចាំថាផែនការរបស់ព្រះវរបិតាសួគ៌របស់យើងគឺជាផែនការនៃសុភមង្គល ។ តាមរយៈការប្រែចិត្ត នោះយើងអាចក្លាយជាមនុស្សកាន់តែសប្បុរស ជាទីស្រឡាញ់ អត់ធ្មត់ រាបសា និងដ៏រីករាយ ។
អំពើបាបនាំមកនូវទុក្ខវេទនា—ការប្រែចិត្ដគឺជាវិធីដែលយើងគេចផុតពីទុក្ខវេទនានោះ ។
ការណ៍ទាំងឡាយដែលត្រូវពិចារណា
-
សូមគិតអំពីបទគម្ពីរខាងក្រោមដែលបង្រៀនអំពីរបៀបនៃការប្រែចិត្តអាចនាំមកនូវភាពរីករាយបាន ៖ ម៉ូសាយ ៤:១–៣; អាលម៉ា ៣៦:១៧–២១; គោលលទ្ធិ និងសេចក្តីសញ្ញា ១៨:១០–១៦ ។ បន្ទាប់មកកត់ត្រាអារម្មណ៍របស់បងប្អូន ។ នៅពេលបងប្អូនត្រូវការការលើកទឹកចិត្តដើម្បីប្រែចិត្ត បងប្អូនអាចពិនិត្យឡើងវិញនូវបទគម្ពីរទាំងនេះ និងអារម្មណ៍ដែលបងប្អូនបានកត់ត្រា ។
-
បងប្អូនក៏អាចសិក្សាសារលិខិតរបស់អែលឌើរ ឌែល ជី រិនឡាន់ « Repentance: A Joyful Choice » ឬ មើលវីដេអូដែលទាក់ទងគ្នា ។ តើបងប្អូនគិតថាអ្វីខ្លះដែលធ្វើឲ្យការប្រែចិត្ត និងការអភ័យទោសមានភាពរីករាយ ?
សកម្មភាពសម្រាប់ការរៀនសូត្រជាមួយអ្នកដទៃ
-
បងប្អូនអាចមើលវីដេអូមួយ ឬទាំងពីរនេះជាមួយអ្នកដទៃ ដើម្បីរៀនបន្ថែមទៀតអំពីអំណរនៃការប្រែចិត្ត ៖ « The Shiny Bicycle » ( នាទីទី ៣:០៤ ) និង «The Goal: A Story of Faith, Friendship, and Forgiveness » ( នាទីទី ៧:២៧ ) ។ នៅពេលដែលបងប្អូនមើលវីដេអូ សូមរកមើល ( ១ ) រឿងដែលធ្វើឲ្យបុគ្គលក្នុងវីដេអូនេះសោកសៅ និង ( ២ ) រឿងដែលធ្វើឲ្យបុគ្គលនោះសប្បាយចិត្ត ។ បងប្អូនក៏អាចស្វែងរករឿងទាំងនេះនៅក្នុងរឿងប្រៀបប្រដូចនៅក្នុង លូកា ១៥ បានផងដែរ ។
-
ឬបងប្អូនអាចនិយាយអំពីពេលវេលាដែលនរណាម្នាក់បានជាសះស្បើយពីជំងឺ ឬរបួស ហើយប្រៀបធៀបបទពិសោធន៍នោះទៅនឹងការប្រែចិត្ដ ។ សូមអាន នីហ្វៃទី៣ ៩:១៣-១៤ ហើយនិយាយអំពីអារម្មណ៍នៃក្តីអំណរ នៅពេលព្រះអង្គសង្រ្គោះព្យាបាលយើងខាងវិញ្ញាណកាលដែលយើងប្រែចិត្ត ។ តើយើងអាចនិយាយអ្វីខ្លះដើម្បីជួយនរណាម្នាក់ដែលមានអារម្មណ៍ភ័យខ្លាចក្នុងការប្រែចិត្ត ?
ស្វែងយល់បន្ថែមទៀត
-
អាលម៉ា ១៣:២១–២២; ២២:១៣–១៦; គោលលទ្ធិ និងសេចក្តីសញ្ញា ៧៦:៤០–៤២
-
ឌី ថត គ្រីស្តូហ្វឺសិន « The Divine Gift of Repentance » Liahona ខែ វិច្ឆិកា ឆ្នាំ ២០១១ ទំព័រ ៣៨–៤១