« ពិធីសាក្រាម៉ង់ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ពិធីសាក្រាម៉ង់
ពិធីបរិសុទ្ធដ៏ពិសិដ្ឋមួយដើម្បីទាញយើងឲ្យខិតទៅជិតព្រះយេស៊ូវគ្រីស្ទ
តើពិធីសាក្រាម៉ង់មានន័យយ៉ាងណាសម្រាប់បងប្អូន ? ការចូលរួមក្នុងពិធីបរិសុទ្ធដ៏ពិសិដ្ឋនេះជារៀងរាល់សប្តាហ៍ អាចក្លាយជាចំណុចសំខាន់ខាងវិញ្ញាណនៅក្នុងជីវិតរបស់បងប្អូននៅពេលបងប្អូនព្យាយាមយល់អំពីអត្ថន័យរបស់វា ។ មិនយូរប៉ុន្មានមុនពេលការឆ្កាងរបស់ទ្រង់ ព្រះយេស៊ូវបានប្រមូលពួកសិស្សរបស់ទ្រង់ឲ្យទទួលទានអាហារដើម្បីរំឭកដល់ពិធីបុណ្យរំលង ។ ទ្រង់បានដឹងថាជីវិតរមែងស្លាប់របស់ទ្រង់ហៀបនឹងដល់ទីបញ្ចប់ ហើយថាទ្រង់នឹងចាកចេញពីសិស្សរបស់ទ្រង់ ។ ទ្រង់ចង់ឲ្យពួកគេចងចាំការបង្រៀនរបស់ទ្រង់ ។ នៅក្នុងការរៀបចំនោះ ព្រះយេស៊ូវបានប្រទាននំបុ័ង និងស្រាទំពាំងបាយជូរដល់សិស្សរបស់ទ្រង់ ដោយពន្យល់ថាពួកគេនឹងចូលរួមក្នុងការចងចាំដល់រូបកាយ និងព្រះលោហិតរបស់ទ្រង់ ។
ការខិតខំរបស់បងប្អូនក្នុងការសិក្សាអំពីអត្ថន័យ និងគោលបំណងនៃពិធីសាក្រាម៉ង់ អាចជួយបងប្អូនឲ្យមានអារម្មណ៍នៃអំណរគុណយ៉ាងជ្រាលជ្រៅចំពោះអ្វីៗដែលទ្រង់បានធ្វើសម្រាប់បងប្អូន ។
តើពិធីសាក្រាម៉ង់ជាអ្វីទៅ ?
សាក្រាម៉ង់គឺជាពិធីបរិសុទ្ធបព្វជិតភាពដែលសមាជិកសាសនាចក្រទទួលទាននំបុ័ង និងទឹកជារៀងរាល់សប្តាហ៍ដើម្បីចងចាំពីការលះបង់របស់ព្រះយេស៊ូវគ្រីស្ទ ។ នំប៉័ងដែលកាច់គឺជាការរំឭកអំពីរូបកាយរបស់ទ្រង់ និងការរងទុក្ខខាងរូបកាយរបស់ទ្រង់ ។ ទឹកតំណាងឲ្យលោហិតរបស់ព្រះយេស៊ូវដែលបានបង្ហូរក្នុងការឈឺចាប់យ៉ាងក្រៃលែង ។ នៅពេលដែលយើងបានទទួលទានសាក្រាម៉ង់ដោយស័ក្ដិសមនោះយើងរំឭកសេចក្តីសញ្ញារបស់យើងជាថ្មីជាមួយនឹងព្រះអម្ចាស់ យើងររក្សាបានការផ្តាច់បាបរបស់យើង ហើយយើងប្តេជ្ញាចិត្តរបស់យើងជាថ្មីក្នុងការដើរតាមព្រះយេស៊ូវ ។
ទិដ្ឋភាពទូទៅនៃប្រធានបទ ៖ ពិធីសាក្រាម៉ង់
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ព្រះយេស៊ូវគ្រីស្ទ, ការងារបម្រើក្នុងជីវិតរមែងស្លាប់របស់ព្រះយេស៊ូវគ្រីស្ទ, ដង្វាយធួនរបស់ព្រះយេស៊ូវគ្រីស្ទ, សេចក្តីសញ្ញា និងពិធីបរិសុទ្ធ, ថ្ងៃឈប់សម្រាក
កណ្ឌទី ១
ពិធីសាក្រាម៉ង់ជួយខ្ញុំឲ្យចងចាំអំពីព្រះយេស៊ូវគ្រីស្ទ
ថ្ងៃបន្ទាប់ពីថ្ងៃដែលទ្រង់បានប្រទានអាហារដោយអព្ភូតហេតុដល់មនុស្ស ៥០០០ នាក់ នោះព្រះយេស៊ូវបានផ្សព្វផ្សាយ ហើយបានបង្រៀនថា « អ្នកណាដែលបរិភោគសាច់ នឹងឈាមរបស់ខ្ញុំ នោះមានជីវិតដ៏នៅអស់កល្បជានិច្ច ហើយខ្ញុំនឹងឲ្យអ្នកនោះរស់ឡើងវិញ នៅថ្ងៃចុងបំផុត » ។ ( យ៉ូហាន ៦:៥៤ ) ។ នៅពេលនោះពាក្យទាំងនេះហាក់ដូចជាធ្វើឲ្យសិស្សរបស់ទ្រង់ច្របូកច្របល់ ។ ទោះជាយ៉ាងណាក៏ដោយអត្ថន័យរបស់ពាក្យទាំងនោះក្រោយមកត្រូវបានបញ្ជាក់យ៉ាងច្បាស់ នៅពេលដែលព្រះអម្ចាស់បានណែនាំអំពីសាក្រាម៉ង់ទៅកាន់ពួកសិស្សរបស់ទ្រង់ក្នុងអំឡុងពេលអាហារយប់ថ្ងៃចុងក្រោយ ។
ក្នុងនាមជាសមាជិកនៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បងប្អូនមានឱកាសចូលរួមជារៀងរាល់សប្តាហ៍ក្នុងពិធីបរិសុទ្ធនេះ ។ ការទទួលទាននំប៉័ង និងទឹកជួយបងប្អូនឲ្យចងចាំពីសាច់ និងលោហិតរបស់ព្រះយេស៊ូវគ្រីស្ទ ដែលទ្រង់បានប្រទានដោយស្ម័គ្រព្រះទ័យដល់បុត្រាបុត្រីរបស់ព្រះទាំងអស់ ។
ការណ៍ទាំងឡាយដែលត្រូវពិចារណា
-
សូមអានដំណើររឿងព្រះគម្ពីរអំពីព្រះយេស៊ូវគ្រីស្ទ ណែនាំពិធីបរិសុទ្ធនៃពិធីសាក្រាម៉ង់ទៅដល់ពួកសិស្សរបស់ទ្រង់នៅក្រុងយេរូសាឡិម ( សូមមើល ម៉ាថាយ ២៦:២៦–២៨; ម៉ាកុស ១៤:២២–២៤; លូកា ២២:១៩–២០ ) និងដល់ពួកសាសន៍នីហ្វៃ ( សូមមើល នីហ្វៃទី៣ ១៨:១–១១ ) ។ តើបងប្អូនរៀនអ្វីខ្លះចេញពីផ្នែកនេះអំពីពិធីសាក្រាម៉ង់ ? វាក៏អាចមានប្រយោជន៍ក្នុងការអានដំណើររឿងដែលមាននៅក្នុង ការបកប្រែដោយ យ៉ូសែប ស្ម៊ីធ, ម៉ាថាយ ២៦:២២, ២៤–២៥ ( ឧបសម្ព័ន្ធព្រះគម្ពីរបរិសុទ្ធ ) និង ការបកប្រែដោយ យ៉ូសែបស្ម៊ីធ, ម៉ាកុស ១៤:២០–២៥ ( នៅក្នុងឧបសម្ព័ន្ធព្រះគម្ពីរបរិសុទ្ធ ) ។
-
សូមអាន ម៉ូសេ ៥:៤–៨ ។ ពីបុរាណមក ព្រះបានបញ្ជាឲ្យបុត្រាបុត្រីរបស់ទ្រង់ថ្វាយយញ្ញបូជាសត្វដែលតំណាងឲ្យ ឬលក្ខណៈស្រដៀងគ្នានឹងការពលិកម្មរបស់ព្រះយេស៊ូវគ្រីស្ទ—កូនចៀមនៃព្រះ ។ តើសព្វថ្ងៃពិធីសាក្រាម៉ង់ធ្វើឡើងក្នុងគោលបំណងមួយដូចគ្នានឹងការពលិកម្មនៅសម័យព្រះគម្ពីរសញ្ញាចាស់ដោយរបៀបណា ? ( សូមមើលផងដែរ គោលលទ្ធិ និងសេចក្តីសញ្ញា ៥៩:៩–១២ ) ។
-
ព្រះអម្ចាស់បានប្រាប់ យ៉ូសែប ស្ម៊ីធ ថាវាមិនសំខាន់អ្វីដែលយើងបរិភោគ ឬផឹកសម្រាប់ពិធីសាក្រាម៉ង់ទេ ដរាបណាយើងចងចាំអំពីគោលបំណងសម្រាប់ពិធីនោះ ( សូមមើល គោលលទ្ធិ និងសេចក្ដីសញ្ញា ២៧:១–២ ) ។ សូមពិចារណាថាហេតុអ្វីបានជាយើងប្រើជានិមិត្តសញ្ញាសាក្រាម៉ង់មិនសំខាន់ដូចអ្វីដែលនិមិត្តសញ្ញាទាំងនោះជួយយើងឲ្យចងចាំ ។
សកម្មភាពសម្រាប់ការរៀនសូត្រជាមួយអ្នកដទៃ
-
សូមពិចារណាមើលវីដេអូ « Sacrament » ( នាទីទី ២:៥៩ ) ឬ « Always Remember Him » ( នាទីទី ៥:២៧ ) ។ បងប្អូនអាចពិភាក្សាអំពីរបៀបដែលការខិតខំរបស់បងប្អូនដើម្បីចងចាំព្រះយេស៊ូវគ្រីស្ទ និងពលិកម្មដ៏ធួនរបស់ទ្រង់អាចជះឥទ្ធិពលដល់អារម្មណ៍ និងសកម្មភាពរបស់បងប្អូន ។ តើបងប្អូនអាចធ្វើអ្វីខ្លះដើម្បីផ្ដោតអារម្មណ៍កាន់តែខ្លាំងទៅលើព្រះយេស៊ូវគ្រីស្ទអំឡុងពេលប្រជុំសាក្រាម៉ង់ និងពេលដែលទទួលទានសាក្រាម៉ង់ ?
ស្វែងយល់បន្ថែមទៀត
-
ជែហ្វ្រី អ័រ ហូឡិន « Behold the Lamb of God » Liahona ខែ ឧសភា ឆ្នាំ ២០១៩, ទំព័រ ៤៤–៤៦
កណ្ឌទី ២
ការរៀបចំខ្លួនឲ្យមានភាពស័ក្តិសមសម្រាប់ពិធីសាក្រាម៉ង់នាំមកនូវពរជ័យ
ពេលខ្លះបងប្អូនប្រហែលជាបានឃើញខ្លួនឯងគ្រាន់តែអង្គុយក្នុងពិធីសាក្រាម៉ង់ ភ្លេចនូវគោលបំណងនៃការទទួល និងបទពិសោធន៍ដ៏ពិសិដ្ឋនៃពិធីបរិសុទ្ធនេះ ដូចព្រះទ័យដែលព្រះអម្ចាស់ចង់បាន ។ ប៉ុន្តែការខិតខំរបស់បងប្អូនដើម្បីរៀបចំខ្លួន និងទទួលទានសាក្រាម៉ង់ដោយភាពស័ក្តិសមអាចធ្វើឲ្យបងប្អូនមានលក្ខណៈសម្បត្តិគ្រប់គ្រាន់សម្រាប់ពរជ័យដ៏សម្បូរបែប ។
អែលឌើរ ដេវីឌ អេ បែដណា បានពន្យល់ថា « ពិធីបរិសុទ្ធនៃសាក្រាម៉ង់គឺជាការអញ្ជើញដ៏ពិសិដ្ឋ និងដដែលៗឲ្យប្រែចិត្តដោយស្មោះ និងដើម្បីរំឭកជាថ្មីខាងវិញ្ញាណ ។ ទង្វើនៃការទទួលទានសាក្រាម៉ង់ ពុំកាត់បន្ថយបាបរបស់យើងទេ ។ ប៉ុន្តែនៅពេលយើងរៀបចំដោយយកចិត្តទុកដាក់ និងចូលរួមនៅក្នុងពិធីបរិសុទ្ធដ៏ពិសិដ្ឋនេះដោយមានដួងចិត្តសង្រេង និងវិញ្ញាណទន់ទាប នោះការសន្យានឹងមានចំពោះយើងថា យើងអាចមានព្រះវិញ្ញាណនៃព្រះអម្ចាស់គង់នៅជាមួយនឹងយើងជានិច្ច ។ ហើយតាមរយៈអំណាចនៃការញែកចេញជាបរិសុទ្ធរបស់ព្រះវិញ្ញាណបរិសុទ្ធដែលជាដៃគូដ៏ខ្ជាប់ខ្ជួនរបស់យើង នោះយើងអាចទទួលការផ្ដាច់បាបរបស់យើង ជានិច្ច » ។
ការណ៍ទាំងឡាយដែលត្រូវពិចារណា
-
សូមអាន កូរិនថូស ទី១ ១១:២៣–២៩ ។ តើមានន័យយ៉ាងណាចំពោះមនុស្សម្នាក់ក្នុងការ « ពិនិត្យមើលខ្លួនឯង » នៅពេលដែលទទួលទានសាក្រាម៉ង់ ? ហេតុអ្វីបានជាវាមានសារៈសំខាន់ក្នុងការរៀបចំខ្លួនដើម្បីមានភាពស័ក្តិសមក្នុងការទទួលទានសាក្រាម៉ង់ ?
-
សូមស្ដាប់ ឬអានពាក្យនៃទំនុកតម្កើងសាក្រាម៉ង់ដូចជា « មានភ្នំខៀវមួយនៅដ៏សែនឆ្ងាយ » ឬ « ព្រះអង្គអើយយើងបន្ទាបខ្លួនប្រាណ » ។ តើការពិចារណាសារលិខិតដែលបានរកឃើញនៅក្នុងទំនុកតម្កើងនៃពិធីសាក្រាម៉ង់នេះអាចធ្វើឲ្យបងប្អូនមានការដឹងគុណចំពោះពិធីបរិសុទ្ធនៃសាក្រាម៉ង់ កាន់តែខ្លាំងរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអានពាក្យអធិស្ឋានរបស់ពិធីសាក្រាម៉ង់ដែលមាននៅក្នុង គោលលទ្ធិ និងសេចក្តីសញ្ញា ២០:៧៥–៧៩ ។ សូមអញ្ជើញមនុស្សមួយចំនួននៅក្នុងក្រុមរបស់បងប្អូនឲ្យស្វែងរកអ្វីដែលយើងសន្យា នៅពេលយើងទទួលទានសាក្រាម៉ង់ អំឡុងពេលដែលអ្នកផ្សេងទៀតស្វែងរកអ្វីដែលព្រះអម្ចាស់សន្យាថានឹងផ្តល់ឲ្យត្រឡប់មកវិញ ។ បងប្អូនក៏អាចឲ្យក្រុមនេះអាន គោលលទ្ធិ និងសេចក្ដីសញ្ញា ២០:៣៧ ហើយពិភាក្សាអំពីភាពស្រដៀងគ្នារវាងការសន្យាដែលបានធ្វើឡើងក្នុងអំឡុងពេលនៃពិធីសាក្រាម៉ង់ និងសេចក្ដីសញ្ញានៃពិធីបុណ្យជ្រមុជទឹក ។
ស្វែងយល់បន្ថែមទៀត
-
ជែហ្វ្រី អ័រ ហូឡិន « Behold the Lamb of God » Liahona ខែ ឧសភា ឆ្នាំ ២០១៩, ទំព័រ ៤៤–៤៦
-
ខេវីន ដបុលយូ ភៀរសុន « តើបងប្អូននៅតែព្រមទេ ? » លីអាហូណា ខែ វិច្ឆិកា ឆ្នាំ ២០២២ ទំព័រ ៦៧–៦៩
-
ភីទើរ អែហ្វ ម៉ើរស្ស « The Sacrament Can Help Us Become Holy » Liahona ខែ វិច្ឆិកា ឆ្នាំ ២០១៦ ទំព័រ ៨៥–៨៧
ធនធានផ្សេងទៀតអំពីពិធីសាក្រាម៉ង់
-
ធនធានសម្រាប់កុមារ