« ថ្ងៃឈប់សម្រាក » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ថ្ងៃឈប់សម្រាក
« ចូរឲ្យនឹកចាំពីថ្ងៃឈប់សម្រាក ដើម្បីញែកថ្ងៃនោះចេញជាបរិសុទ្ធ » ( និក្ខមនំ ២០:៨ ) ។
តើថ្ងៃឈប់សម្រាកជាធម្មតាមានលក្ខណៈបែបណាសម្រាប់អ្នក ? នៅពេលដែលអ្នកព្យាយាមគោរពថ្ងៃឈប់សម្រាកតាមរបៀបរបស់ព្រះអម្ចាស់ នោះអ្នកនឹងចាប់ផ្ដើមចាត់ទុកថ្ងៃឈប់សម្រាកថាជាថ្ងៃដ៏រីករាយមួយ ( សូមមើល អេសាយ ៥៨:១៣-១៤ ) ។ ការថ្វាយបង្គំព្រះជាមួយអ្នកដទៃនៅព្រះវិហារ ការទទួលទានសាក្រាម៉ង់ ហើយការរក្សាថ្ងៃនោះឲ្យបរិសុទ្ធនៅផ្ទះនឹងនាំមកនូវអំណាចខាងវិញ្ញាណក្នុងជីវិតរបស់អ្នក ហើយទាញអ្នកឲ្យខិតទៅជិតព្រះ ។ ការទុកមួយថ្ងៃជារៀងរាល់សប្តាហ៍ដើម្បីសម្រាកពីការងារ និងសកម្មភាពកម្សាន្ដគឺជាវិធីមួយដែលយើងបង្ហាញសេចក្ដីស្រឡាញ់របស់យើងចំពោះព្រះ និងបំណងប្រាថ្នារបស់យើងក្នុងការគោរពតាមទ្រង់ ហើយរក្សាសេចក្ដីសញ្ញារបស់យើង ។ ប្រធាន អិម រ័សុល បាឡឺដ បានពន្យល់ថា « អនុភាពនៃថ្ងៃឈប់សម្រាកគឺដើម្បីដកពិសោធន៍នៅក្នុងព្រះវិហារ និងនៅផ្ទះនូវភាពរីករាយ អំណរ និងអារម្មណ៍កក់ក្ដៅពីព្រះវិញ្ញាណនៃព្រះអម្ចាស់ដោយគ្មានការអូសទាញណាមួយឡើយ » ។
តើអ្វីទៅជាថ្ងៃឈប់សម្រាក ?
ថ្ងៃឈប់សម្រាកគឺជាថ្ងៃដ៏បរិសុទ្ធដែលព្រះបានញែកទុកសម្រាប់យើងរាល់សប្តាហ៍ដើម្បីសម្រាកពីការងារប្រចាំថ្ងៃរបស់យើង ហើយថ្វាយបង្គំទ្រង់ ។ បន្ទាប់ពីការបង្កបង្កើតពិភពលោក ព្រះបានប្រទានពរដល់ថ្ងៃទីប្រាំពីរ ហើយបានធ្វើឲ្យវាពិសិដ្ឋ ( សូមមើល លោកុប្បត្តិ ២:២-៣ ) ។ ព្រះបានបង្គាប់ពួកសាសន៍អ៊ីស្រាអែលឲ្យ « នឹកចាំពីថ្ងៃឈប់សម្រាកដើម្បីញែកថ្ងៃនោះចេញជាបរិសុទ្ធ » ( និក្ខមនំ ២០:៨ ) ។ បន្ទាប់ពីការមានព្រះជន្មរស់ឡើងវិញរបស់ព្រះយេស៊ូវគ្រីស្ទ ពួកសិស្សរបស់ទ្រង់បានចាប់ផ្ដើមគោរពថ្ងៃឈប់សម្រាកនៅថ្ងៃអាទិត្យ ឬថ្ងៃទីមួយនៃសប្ដាហ៍ ( សូមមើល ម៉ាកុស ១៦:២; កិច្ចការ ២០:៧; កូរិនថូស ទី១ ១៦:១-២ ) ។ នៅថ្ងៃចុងក្រោយ ព្រះទ្រង់បានរំឭកបញ្ញត្តិជាថ្មីដើម្បីគោរពថ្ងៃឈប់សម្រាក ( សូមមើល គោលលទ្ធិ និងសេចក្តីសញ្ញា ៥៩:៩-១៣; ៦៨:២៩ ) ។
ទិដ្ឋភាពទូទៅនៃប្រធានបទ ៖ ថ្ងៃឈប់សម្រាក
មគ្គុទ្ទេសក៍សិក្សាដំណឹងល្អដែលជាប់ទាក់ទង ៖ ថ្វាយបង្គំព្រះជាព្រះវរបិតា, ពិធីសាក្រាម៉ង់, ការតមអាហារ, ការរស់នៅតាមដំណឹងល្អរបស់ព្រះយេស៊ូវគ្រីស្ទ
ផ្នែកទី ១
ការគោរពថ្ងៃឈប់សម្រាករបស់អ្នកគឺជាសញ្ញាមួយនៃការលះបង់របស់អ្នកចំពោះព្រះ
ប្រធាន រ័សុល អិម ណិលសុន បានមានប្រសាសន៍ថា « តើយើងចាត់ទុកថ្ងៃឈប់សម្រាកជាថ្ងៃ ដ៏បរិសុទ្ធ យ៉ាងដូចម្ដេច ? ? កាលខ្ញុំនៅក្មេង ខ្ញុំបានសិក្សាអំពីបញ្ជីមួយដែលគេចុះអំពីកិច្ចការដែលត្រូវធ្វើ និងកិច្ចការដែល មិន ត្រូវធ្វើនៅថ្ងៃឈប់សម្រាក ។ ទាល់តែក្រោយមកទៀត ទើបខ្ញុំបានរៀនចេញពីព្រះគម្ពីរថា ទង្វើ និង ឥរិយាបថខ្ញុំនៅថ្ងៃឈប់សម្រាក គឺជា ទីសម្គាល់ រវាងខ្ញុំ និងព្រះវរបិតាសួគ៌ [ សូមមើល និក្ខមនំ ៣១:១៣ ] ។ ដោយមានការយល់ដឹងបែបនោះ ខ្ញុំពុំត្រូវការបញ្ជីនៃអ្វីដែលត្រូវធ្វើ និងមិនត្រូវធ្វើទៀតឡើយ ។ ពេលខ្ញុំសម្រេចចិត្តថាតើសកម្មភាពណាដែលសមស្របនៅថ្ងៃឈប់សម្រាក នោះខ្ញុំគ្រាន់តែសួរខ្លួនឯងថា ‹ តើ ទីសម្គាល់ ណាដែលខ្ញុំចង់បង្ហាញដល់ព្រះ ? › សំណួរនេះបានធ្វើឲ្យជម្រើសខ្ញុំនៅថ្ងៃឈប់សម្រាកមានភាពច្បាស់លាស់ឡើង » ។ តើថ្ងៃឈប់សម្រាករបស់បងប្អូនផ្ដល់ទីសម្គាល់អ្វីខ្លះដល់ព្រះ ?
រឿងទាំងឡាយដែលត្រូវពិចារណា
-
សូមទស្សនាវីដេអូមកពីអែលឌើរ ជែហ្វ្រី អ័រ ហូឡិន « Upon My Holy Day—Rest and Renewal » ( នាទីទី ១:២៦ ) ។ អែលឌើរ ហូឡិន លើកទឹកចិត្តយើងឲ្យធ្វើកិច្ចការនៅថ្ងៃឈប់សម្រាកខុសពីកិច្ចការដែលយើងធ្វើនៅថ្ងៃផ្សេងទៀត ។ តើអ្នកបានទទួលនូវចំណាប់អារម្មណ៍អ្វីខ្លះអំពីការគោរពថ្ងៃឈប់សម្រាក ហើយរក្សាវាឲ្យបានបរិសុទ្ធ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអានជាមួយគ្នានូវដំណើររឿងរបស់អែលឌើរ ឃ្វីនថិន អិល ឃុក អំពីការចូលរួមថ្ងៃបរិសុទ្ធ ឬថ្ងៃឈប់សម្រាករបស់ជនជាតិយូដា នៅក្នុង « Shipshape and Bristol Fashion: Be Temple Worthy—in Good Times and Bad Times » ។ សូមអញ្ជើញសមាជិកក្រុមឲ្យនិយាយអំពីសំណួរខាងក្រោមនេះ ៖ តើការគោរពថ្ងៃឈប់សម្រាកបានប្រទានពរដល់មិត្តភក្តិរបស់អែលឌើរ ឃុក ដោយរបៀបណា ? តើថ្ងៃឈប់សម្រាកជាថ្ងៃដ៏ « រីករាយ » សម្រាប់ពួកគេយ៉ាងដូចម្ដេច ?
ស្វែងយល់បន្ថែមទៀត
-
The Sabbath Is for You » ( វិដេអូ ), នៅលើគេហទំព័រ ChurchofJesusChrist.org
-
The Sabbath Is a Delight » ( វីដេអូ ) នៅលើបណ្ណាល័យដំណឹងល្អ
-
Henry B. Eyring, “Always Remember Him,” Ensign ខែ កុម្ភៈ ឆ្នាំ ២០១៨ ទំព័រ ៤–៥
-
ដេវីឌ អេ បែដណា « Exceeding Great and Precious Promises » Liahona ខែ វិច្ឆិកា ឆ្នាំ ២០១៧ ទំព័រ ៩០–៩៣
-
អិម រ័សុល បាឡឺដ « The True, Pure, and Simple Gospel of Jesus Christ » Liahona ខែ ឧសភា ឆ្នាំ ២០១៩ ទំព័រ ២៨–៣០
ផ្នែកទី ២
ព្រះយេស៊ូវគ្រីស្ទបានគោរពថ្ងៃឈប់សម្រាក
ក្នុងសម័យព្រះគម្ពីរសញ្ញាថ្មី បទបញ្ញត្តិ និងប្រពៃណីដែលគ្មានការអនុញ្ញាតត្រូវបានណែនាំទៅដល់វប្បធម៌សាសន៍យូដា អំពីអ្វីដែលត្រូវធ្វើ និងមិនត្រូវធ្វើនៅថ្ងៃឈប់សម្រាក ។ ព្រះយេស៊ូវតែងតែត្រូវបានរិះគន់ដោយពួកអ្នកដឹកនាំសាសនាអំពីពេលវេលារបស់ទ្រង់ចំពោះរបៀបដែលទ្រង់ និងពួកសិស្សរបស់ទ្រង់គោរពថ្ងៃឈប់សម្រាក ។ ព្រះយេស៊ូវបានបង្រៀនថា « ថ្ងៃឈប់សម្រាក[ គឺ ] តាំងឡើងសម្រាប់ឲ្យមនុស្ស ប្រុស [ និង មនុស្សស្រី ] » ហើយថាទ្រង់គឺជា « ព្រះអម្ចាស់ក៏ជាថ្ងៃឈប់សម្រាកផងដែរ » ( ម៉ាកុស ២:២៧, ២៨ ) ។ ដើម្បីរំឭកដល់ថ្ងៃដែលព្រះអម្ចាស់មានព្រះជន្មរស់ឡើងវិញ នោះពួកសិស្សរបស់ព្រះយេស៊ូវគ្រីស្ទបានគោរពថ្ងៃឈប់សម្រាកនៅថ្ងៃដំបូងនៃសប្តាហ៍ ( សូមមើល ម៉ាកុស ១៦:២; កិច្ចការ ២០:៧; កូរិនថូស ទី១ ១៦:១-២ ) ។
ជាផ្នែកដ៏សំខាន់មួយនៃការគោរពថ្ងៃឈប់សម្រាករបស់យើង នោះយើងទទួលទានសាក្រាម៉ង់ក្នុងការនឹកចងចាំពីការពលិកម្មដ៏ធួន ការសុគត និងការមានព្រះជន្មរស់ឡើងវិញរបស់ព្រះគ្រីស្ទ ។ នៅពេលយើងទទួលទានសាក្រាម៉ង់ យើងធ្វើសេចក្តីសញ្ញាមួយដើម្បីលើកយកព្រះនាមព្រះយេស៊ូវគ្រីស្ទមកដាក់លើខ្លួនយើង រក្សាបញ្ញត្តិទាំងឡាយរបស់ទ្រង់ ហើយចងចាំដល់ទ្រង់ជានិច្ច ។ ជាលទ្ធផល ព្រះសន្យាដល់យើងថាយើងអាចមានព្រះវិញ្ញាណបរិសុទ្ធដើម្បីនៅជាមួយយើងជានិច្ច ។ ការមានព្រះវិញ្ញាណគឺរួមបញ្ចូលទាំងការញែកឲ្យបរិសុទ្ធ និងការអភ័យទោសចំពោះអំពើបាបរបស់យើងដែរ ។ វាក៏មានន័យថាការមានដៃគូ និងការណែនាំជានិច្ចរបស់ព្រះវិញ្ញាណបរិសុទ្ធផងដែរ ។ ថ្ងៃឈប់សម្រាកគឺជាឱកាសមួយ ដើម្បីជញ្ជឹងគិតអំពីពរជ័យដែលបងប្អូនបានទទួលក្នុងនាមជាអ្នកដើរតាមព្រះយេស៊ូវគ្រីស្ទ ។
រឿងទាំងឡាយដែលត្រូវពិចារណា
-
សូមអានដំណើររឿងខាងក្រោមរបស់ព្រះអង្គសង្គ្រោះដែលគោរពថ្ងៃឈប់សម្រាក ៖ យ៉ូហាន ៥:២-១៥; លូកា ១៣:១១-១៧; ១៤:១–៦ ។ តើមនុស្សនៅក្នុងដំណើររឿងទាំងនេះបានទទួលពរជ័យតាមរយៈការបម្រើរបស់ព្រះអង្គសង្រ្គោះយ៉ាងដូចម្តេច ? នៅក្នុងវគ្គបទគម្ពីរមួយទៀត ព្រះយេស៊ូវបានមានបន្ទូលថា « មានច្បាប់ឲ្យធ្វើការល្អនៅថ្ងៃឈប់សម្រាកដែរ » ( ម៉ាថាយ ១២:១២ ) ។ តើអ្នកគិតថាពាក្យ « ធ្វើការល្អ » នៅថ្ងៃឈប់សម្រាកមានន័យដូចម្តេច ?
តើអ្នកអាចធ្វើតាមគំរូរបស់ព្រះយេស៊ូវក្នុងការបម្រើអ្នកដទៃនៅថ្ងៃឈប់សម្រាកដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមមើលវីដេអូ « Gratitude on the Sabbath Day » ជាក្រុម ( នាទីទី ៣:៣៩ ) ។ ចូរនិយាយអំពីរបៀបដែលយើងអាចបង្ហាញការដឹងគុណ និងអំណរគុណរបស់យើងចំពោះព្រះយេស៊ូវគ្រីស្ទនៅថ្ងៃឈប់សម្រាក ។ តើអ្វីទៅជាការតភ្ជាប់រវាងការរក្សាថ្ងៃឈប់សម្រាកឲ្យបរិសុទ្ធ និងការមានអារម្មណ៍អំណរគុណចំពោះពរជ័យរបស់ព្រះ ?
ស្វែងយល់បន្ថែមទៀត
-
ជេមស៍ អ៊ី ថាលម៉េហ្គ Jesus the Christ ( ឆ្នាំ ១៩១៦ ) ទំព័រ ២០៣–២១៦
-
« Dallin H. Oaks, Sacrament Meeting and the Sacrament » Liahona ខែ វិច្ឆិកា ឆ្នាំ ២០០៨ ទំព័រ ១៧–២០
-
ដេវីឌ អេ បែដណា « Exceeding Great and Precious Promises » Liahona ខែ វិច្ឆិកា ឆ្នាំ ២០១៧ ទំព័រ ៩០–៩៣
ផ្នែកទី ៣
ការរក្សាថ្ងៃឈប់សម្រាកឲ្យបានបរិសុទ្ធជួយយើង « កុំឲ្យប្រឡាក់ពីលោកិយ »
ទ្រង់បានមានព្រះបន្ទូលថា « ហើយប្រយោជន៍ឲ្យអ្នកអាចរក្សាខ្លួនឲ្យបានពេញលេញកុំឲ្យប្រឡាក់ពីលោកិយនោះអ្នកត្រូវទៅដំណាក់នៃការអធិស្ឋាន ហើយថ្វាយសាក្រាម៉ង់របស់អ្នកឡើងនៅថ្ងៃបរិសុទ្ធរបស់យើងចុះ » ( គោលលទ្ធិ និងសេចក្ដីសញ្ញា ៥៩:៩ ) ។ ការថ្វាយបង្គំរបស់យើងជាមួយអ្នកដទៃនៅថ្ងៃឈប់សម្រាករួមបញ្ចូលមិនត្រឹមតែការទទួលសាក្រាម៉ង់ប៉ុណ្ណោះទេ ប៉ុន្តែថែមទាំងការអធិស្ឋាន ការច្រៀងទំនុកតម្កើង ការថ្វាយ និងការទទួលពរជ័យបព្វជិតភាព ការចែកចាយទីបន្ទាល់ ការសិក្សាព្រះគម្ពីរ និងការផ្តល់ការបម្រើផងដែរ ។
រឿងទាំងឡាយដែលត្រូវពិចារណា
-
ការចូលរួមក្នុងការប្រជុំសាក្រាម៉ង់គឺជាវិធីដ៏មានអត្ថន័យមួយ ដើម្បីផ្តោតជីវិតរបស់អ្នកទៅលើព្រះយេស៊ូវគ្រីស្ទ និងបង្កើនកម្លាំងខាងវិញ្ញាណ ។ នៅពេលយើងមានកម្លាំងខាងវិញ្ញាណ យើងរៀបចំខ្លួនកាន់តែប្រសើរដើម្បីចៀសវាង និងយកឈ្នះលើការល្បួង ។ តើការរក្សាថ្ងៃឈប់សម្រាកឲ្យបរិសុទ្ធ និងការចូលរួមក្នុងការប្រជុំសាក្រាម៉ង់បានជួយអ្នកក្នុងកិច្ចខិតខំប្រឹងប្រែងរបស់ដើម្បី « កុំឲ្យប្រឡាក់ពីលោកិយ » ដោយរបៀបណា ?
-
សូមពិនិត្យមើលឡើងវិញអំពីការបង្រៀនរបស់ព្រះអម្ចាស់អំពីថ្ងៃឈប់សម្រាកនៅក្នុង គោលលទ្ធិ និងសេចក្ដីសញ្ញា ៥៩:៩–១៥ ។ ទាក់ទងទៅនឹងវគ្គបទគម្ពីរនេះ ប្រធាន អិម រ័សុល បាឡឺដ បានចែកចាយ « សូមកត់សម្គាល់ពីពាក្យគន្លឹះមួយចំនួននៅក្នុងវិវរណៈនេះ ៖ អំណរ, ការមានអំណរ, អំណរគុណ, ចិត្តរីករាយ, ចិត្តអរសប្បាយ និង ទឹកមុខរីករាយ ។ ចំពោះខ្ញុំ ការរក្សាថ្ងៃឈប់សម្រាកគួរតែធ្វើឲ្យយើងមានស្នាមញញឹម » ។ តើអ្នកបានជួបប្រទះអារម្មណ៍ទាំងនេះនៅថ្ងៃឈប់សម្រាកនៅពេលណា ? តើអ្នកអាចធ្វើអ្វីខ្លះដើម្បីធ្វើឲ្យការថ្វាយបង្គំរបស់អ្នកនៅថ្ងៃឈប់សម្រាកជាបទពិសោធន៍ដ៏រីករាយមួយ ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមមើលវីដេអូ « Is There a Place for Me? » ( នាទីទី ៣:៥៩ ) ។ និយាយអំពីសារៈសំខាន់នៃការជួយអ្នកដទៃឲ្យមានអារម្មណ៍ថា ពួកគេមានចំណែកនៅក្នុងក្រុមជំនុំរបស់ពួកគេនៅឯព្រះវិហារ ។ តើការខិតខំរបស់អ្នកអាចជួយអ្នកដទៃឲ្យមានអារម្មណ៍ថាមានចំណែក បង្កើនអារម្មណ៍នៃការថ្វាយបង្គំដល់ខ្លួនឯងនៅថ្ងៃឈប់សម្រាកដោយរបៀបណា ?
ស្វែងយល់បន្ថែមទៀត
-
រ័សុល អិម ណិលសុន « The Sabbath Is a Delight » Liahona ខែ ឧសភា ឆ្នាំ ២០១៥ ទំព័រ ១២៩–១៣២
-
ដាល្លិន អេក អូក « Sacrament Meeting and the Sacrament » Liahona ខែ វិច្ឆិកា ឆ្នាំ ២០០៨ ទំព័រ ១៧–២០