ជំពូកទី ១៨
អាលម៉ាជាកូនប្រែចិត្ត
អាលម៉ា និងស្តេចម៉ូសាយមានក្តីបារម្ភ ដោយសារអ្នកដែលពុំជឿកំពុងធ្វើឲ្យសមាជិកសាសនាចក្ររងទុក្ខដោយព្រោះតែជំនឿរបស់ពួកគេ ។
អាលម៉ាមានកូនប្រុសម្នាក់ឈ្មោះអាលម៉ា ។ អាលម៉ាជាកូនពុំជឿលើការបង្រៀនរបស់ឪពុកគាត់ឡើយ ហើយក្លាយជាមនុស្សទុច្ចរិត ។
អាលម៉ាជាកូន និងបុត្រាបួននាក់របស់ស្តេចម៉ូសាយប្រឆាំងនឹងសាសនាចក្រ ។ ពួកគេបានបៀតបៀនមនុស្សជាច្រើនឲ្យចាកចេញពីសាសនាចក្រ ហើយក្លាយជាទុច្ចរិត ។
អាលម៉ាបានអធិស្ឋានសូមឲ្យកូនប្រុសរបស់លោកនឹងរៀនអំពីសេចក្តីពិត ហើយប្រែចិត្ត ។
អាលម៉ាជាកូន និងបុត្រារបស់ស្តេចម៉ូសាយបានបន្តព្យាយាមបំផ្លាញសាសនាចក្រ ។
ថ្ងៃមួយមានទេវតាមួយអង្គបានបង្ហាញព្រះកាយឲ្យពួកគេឃើញ ។ ទេវតានោះបានមានបន្ទូលជាសំឡេងឮយ៉ាងខ្លាំងដែលធ្វើឲ្យកក្រើកដី ។
យុវជនទាំងប្រាំនាក់មានការភ័យខ្លាចជាខ្លាំងដែលធ្វើឲ្យពួកគេដួលចុះលើដី ។ ដំបូងឡើយ ពួកគេពុំយល់អ្វីដែលទេវតានោះបានមានបន្ទូលឡើយ ។
ទេវតាបានយាងមកដែលជាចម្លើយចំពោះការអធិស្ឋានរបស់ពួកសមាជិកសាសនាចក្រ ។ ទេវតាបានសួរអាលម៉ាជាកូនពីមូលហេតុដែលគាត់កំពុងប្រឆាំងនឹងសាសនាចក្រ ។
ផែនដីបានកក្រើកពេលទេវតានោះបានប្រាប់អាលម៉ាជាកូនឲ្យឈប់ព្យាយាមបំផ្លាញសាសនាចក្រ ។
អាលម៉ាជាកូន និងពួកបុត្រានៃម៉ូសាយបានដួលចុះទៅលើដីម្តងទៀត ។ ពួកគេបានឃើញទេវតាមួយអង្គ ហើយពួកគេបានដឹងថា ព្រះចេស្តារបស់ព្រះបានធ្វើឲ្យដីកក្រើក ។
អាលម៉ាជាកូនមានការណ៍អស្ចារ្យក្នុងចិត្តជាខ្លាំង ដែលធ្វើឲ្យគាត់ពុំអាចនិយាយបានឡើយ ។ គាត់បានប្រែជាទន់ខ្សោយយ៉ាងខ្លាំង ដែលធ្វើឲ្យគាត់ពុំអាចកម្រើកដៃគាត់បានឡើយ ។
ពួកបុត្រានៃម៉ូសាយបានសែងអាលម៉ាជាកូនទៅរកឪពុករបស់គាត់ ហើយបានប្រាប់លោកនូវការណ៍ទាំងអស់ដែលបានកើតឡើងដល់ពួកគេ ។
អាលម៉ាមានចិត្តរីករាយ ។ លោកបានដឹងថា ព្រះបានឆ្លើយតបការអធិស្ឋានរបស់លោក ។
អាលម៉ាបានហៅមនុស្សជាច្រើនឲ្យមកជុំគ្នាដើម្បីមើលនូវអ្វីដែលព្រះអម្ចាស់បានធ្វើដល់កូនប្រុសរបស់លោក និងដល់ពួកបុត្រានៃម៉ូសាយ ។
អាលម៉ាជាមួយនឹងថ្នាក់ដឹកនាំផ្សេងទៀតនៃសាសនាចក្របានតមអាហារ និងអធិស្ឋាន ហើយទូលសូមឲ្យព្រះជួយអាលម៉ាជាកូនឲ្យមានកម្លាំងឡើងវិញ ។
បន្ទាប់ពីពីរថ្ងៃ និងពីរយប់មក អាលម៉ាជាកូនអាចនិយាយ និងកម្រើកវិញបាន ។
គាត់បានប្រាប់ប្រជាជនថា គាត់បានប្រែចិត្តពីអំពើបាបរបស់គាត់ ហើយព្រះបានអភ័យទោសឲ្យគាត់ ។
គាត់បានបង្រៀនមនុស្សគ្រប់គ្នាថា ពួកគេត្រូវតែសុចរិតដើម្បីចូលទៅក្នុងនគរព្រះ ។ គាត់ក៏បានប្រាប់អំពីការឈឺចាប់ដ៏ធំធេងដែលគាត់បានរងទុក្ខ ដោយសារតែអំពើបាបរបស់គាត់ផងដែរ ។
អាលម៉ាជាកូនមានចិត្តរីករាយដោយសារគាត់បានប្រែចិត្ត ហើយព្រះបានអភ័យទោសឲ្យគាត់ ។ គាត់បានដឹងថា ព្រះស្រឡាញ់គាត់ ។
អាលម៉ាជាកូន និងពួកបុត្រានៃស្តេចម៉ូសាយបានចាប់ផ្តើមបង្រៀនសេចក្តីពិតនៅទូទាំងដែនដី ដោយប្រាប់មនុស្សគ្រប់គ្នានូវអ្វីដែលពួកគេបានឃើញ និងបានស្តាប់ឮ ។
ពួកគេបានព្យាយាមកែប្រែកំហុសឆ្គងដែលពួកគេធ្លាប់បានធ្វើ ។ ពួកគេបានពន្យល់ព្រះគម្ពីរដល់ប្រជាជន ហើយបង្រៀនពួកគេអំពីព្រះយេស៊ូវគ្រីស្ទ ។
ព្រះបានប្រទានពរដល់អាលម៉ាជាកូន និងពួកបុត្រានៃម៉ូសាយ ពេលពួកគេបានបង្រៀនដំណឹងល្អ ។ មនុស្សជាច្រើនបានស្តាប់ពួកគេ ហើយបានជឿ ។