ជំពូកទី ៩
ផ្ទះថ្មីនៅលើដែនដីសន្យា
ពួកគេបានរៀបចំដី ហើយដាំគ្រាប់ពូជដែលពួកគេបានយកមកនោះ ។
ពេលពួកគេបានធ្វើដំណើរជុំវិញនៅក្នុងដែនដីថ្មីរបស់ខ្លួន នោះពួកគេបានឃើញសត្វជាច្រើនប្រភេទ ។ ពួកគេក៏បានឃើញមាស ប្រាក់ និងទង់ដែងផងដែរ ។
ព្រះបានប្រាប់នីហ្វៃឲ្យធ្វើផ្ទាំងដែកដើម្បីកត់ត្រា ។ នីហ្វៃបានកត់ត្រាអំពីគ្រួសាររបស់លោក និងការធ្វើដំណើររបស់ពួកគេ ។ លោកក៏បានកត់ត្រាអំពីព្រះបន្ទូលនៃព្រះផងដែរ ។
លីហៃមានវ័យចំណាស់ ។ ពីមុនលោកស្លាប់ លោកបាននិយាយទៅកាន់កូនប្រុសរបស់លោក ហើយបានប្រាប់ពួកគេឲ្យគោរពបទបញ្ញត្តិរបស់ព្រះ ។ លោកក៏បានប្រសិទ្ធពរឲ្យចៅៗរបស់លោកផងដែរ ។
បន្ទាប់ពីលីហៃបានស្លាប់ទៅ លេមិន និង លេមយួលបានខឹងនឹងនីហ្វៃ ហើយចង់សម្លាប់លោកចោល ។ ពួកគេមិនចង់ឲ្យនីហ្វៃដែលជាប្អូនធ្វើជាអ្នកដឹកនាំពួកគេឡើយ ។
ព្រះអម្ចាស់បានប្រាប់នីហ្វៃឲ្យនាំមនុស្សសុចរិតចូលទៅក្នុងទីរហោស្ថាន ។ ពួកគេបានធ្វើដំណើរអស់ជាច្រើនថ្ងៃ ហើយទីបំផុតពួកគេបានឈប់នៅកន្លែងមួយដែលពួកគេដាក់ឈ្មោះថា នីហ្វៃ ។
ប្រជាជនដែលដើរតាមនីហ្វៃបានគោរពតាមព្រះ ។ ពួកគេបានខិតខំធ្វើការ ហើយទទួលពរ ។ នីហ្វៃបានបង្រៀនប្រជាជនលោកឲ្យចេះសាងសង់ដោយប្រើឈើ និងដែក ។ ពួកគេបានសាងសង់ព្រះវិហារបរិសុទ្ធដ៏ស្រស់ស្អាត ។
ពួកអ្នកដើរតាម លេមិន និង លេមយួល បានហៅខ្លួនពួកគេថាសាសន៍លេមិន ។
ពួកសាសន៍លេមិន ពុំបានគោរពព្រះទេ ហើយត្រូវបានកាត់ចេញពីវត្តមានរបស់ទ្រង់ ។ ព្រះវិញ្ញាណនៃព្រះអម្ចាស់មិនអាចគង់ជាមួយពួកគេបានទេ ទាល់តែពួកគេបានប្រែចិត្ត ។
ពួកសាសន៍លេមិនពោរពេញទៅដោយការព្យាបាទ ហើយច្បាំងនឹងពួកសាសន៍នីហ្វៃជាញឹកញាប់ ។