ជំពូកទី ៣០
អាលម៉ាទូន្មានកូនៗរបស់លោក
អាលម៉ាបានប្រាប់ហេលេមិន ដែលជាកូនប្រុសច្បងរបស់លោកឲ្យទុកចិត្តលើព្រះ ។ លោកបានប្រាប់គាត់អំពីទេវតានៃព្រះដែលបានបញ្ជូនមកប្រាប់អាលម៉ាឲ្យឈប់បំផ្លាញសាសនាចក្រទៀត ។
អស់រយៈពេលបីថ្ងៃ អាលម៉ាបានរងទុក្ខដោយសារតែកំហុសរបស់គាត់ ។ បន្ទាប់មកលោកបានចាំការបង្រៀនរបស់ឪពុកលោកអំពីព្រះយេស៊ូវ ហើយលោកបានដឹងថា អំពើបាបរបស់លោកអាចត្រូវបានអភ័យទោសឲ្យបាន ។
អាលម៉ាបានអធិស្ឋានសូមការអភ័យទោស ហើយអំណរបានជំនួសការឈឺចាប់នៅក្នុងព្រលឹងលោក ។ លោកត្រូវបានអភ័យទោសឲ្យ ដោយសារលោកមានសេចក្តីជំនឿលើព្រះយេស៊ូវគ្រីស្ទ ហើយបានប្រែចិត្ត ។
ចាប់តាំងពីពេលនោះមក អាលម៉ាបានបង្រៀនមនុស្សដទៃអំពីដំណឹងល្អ ដើម្បីឲ្យពួកគេអាចទទួលអារម្មណ៍អំណរដូចដែលលោកបានទទួល ។ ព្រះបានប្រទានពរដល់អាលម៉ា ដោយសារតែការទុកចិត្តរបស់លោកលើព្រះ ។
អាលម៉ាបានឲ្យបញ្ជីពិសិដ្ឋទៅហេលេមិន ហើយបានប្រាប់គាត់ឲ្យបន្តសរសេរប្រវត្តិរបស់ប្រជាជនពួកលោក ។
អាលម៉ាបានប្រាប់គាត់ថា ប្រសិនបើគាត់គោរពព្រះបញ្ញត្តិ នោះព្រះនឹងប្រទានពរដល់គាត់ ហើយជួយគាត់ការពារបញ្ជីទាំងនោះ ។
អាលម៉ាក៏បានប្រាប់ហេលេមិនឲ្យអធិស្ឋានរៀងរាល់ព្រឹក និងយប់ ព្រមទាំងទូលជាមួយព្រះអំពីគ្រប់កិច្ចការទាំងអស់ដែលគាត់ធ្វើ ដើម្បីឲ្យព្រះអាចជួយនាំផ្លូវគាត់ ។
អាលម៉ាសប្បាយចិត្តនឹងស៊ិបឡុនកូនប្រុសរបស់លោក ដែលធ្វើជាអ្នកផ្សព្វផ្សាយសាសនាដ៏អង់អាចទៅកាន់ពួកសាសន៍សូរាំ ។ ស៊ិបឡុនបានបន្តស្មោះត្រង់ទោះបីជាពួកគេបានចោលគាត់នឹងដុំថ្មក្តី ។
អាលម៉ាបានរំឭកស៊ិបឡុនថា មានផ្លូវតែមួយគត់ដើម្បីបានសង្គ្រោះគឺមានតែតាមរយៈព្រះយេស៊ូវគ្រីស្ទប៉ុណ្ណោះ ។ បន្ទាប់មក អាលម៉ាបានលើកទឹកចិត្តកូនប្រុសរបស់លោកឲ្យបន្តបង្រៀនដំណឹងល្អ ។
កូរីអានតុនកូនប្រុសរបស់អាលម៉ាពុំបានគោរពព្រះបញ្ញត្តិឡើយ ។ អំឡុងពេលបង្រៀនពួកសាសន៍សូរាំ គាត់ពុំបានធ្វើជាអ្នកផ្សព្វផ្សាយសាសនាស្មោះត្រង់ទេ ។
ដោយសារតែអ្វីដែលកូរីអានតុនបានធ្វើ នោះពួកសាសន៍សូរាំពុំជឿដល់ការបង្រៀនរបស់អាលម៉ាឡើយ ។
អាលម៉ាបានប្រាប់កូរីអានតុនថា មនុស្សពុំអាចលាក់អំពើបាបរបស់ពួកគេពីព្រះឡើយ ហើយកូរីអានតុនត្រូវតែប្រែចិត្ត ។
អាលម៉ាបានបង្រៀនកូនប្រុសរបស់លោកថា មនុស្សគ្រប់រូបនឹងបានរស់ឡើងវិញ ប៉ុន្តែមានតែពួកសុចរិតប៉ុណ្ណោះដែលនឹងរស់នៅជាមួយព្រះ ។
អាលម៉ាថ្លែងថា ជីវិតនេះជាពេលសម្រាប់មនុស្សប្រែចិត្ត និងបម្រើព្រះ ។
ដោយរំឭកដល់កូរីអានតុនថា គាត់ត្រូវបានហៅឲ្យធ្វើជាអ្នកផ្សព្វផ្សាយសាសនា នោះអាលម៉ាបានប្រាប់គាត់ឲ្យត្រឡប់ទៅរកពួកសាសន៍សូរាំវិញ ហើយបង្រៀនប្រជាជននោះឲ្យប្រែចិត្ត ។
អាលម៉ា និងពួកកូនប្រុសរបស់លោកបានបន្តបង្រៀនដំណឹងល្អ ។ ពួកគេបានបង្រៀនដោយអំណាចនៃបព្វជិតភាព ។