ជំពូកទី ៣
លីហៃចាកចេញពីទីក្រុងយេរូសាឡិម
គ្រួសាររបស់លីហៃបានវេចស្បៀងអាហារ និងត្រសាល ។ ពួកគេបានចាកចោលផ្ទះរបស់ពួកគេ និងមាសរបស់ពួកគេ និងប្រាក់របស់ពួកគេ ហើយបានធ្វើដំណើរចូលទៅក្នុងទីរហោស្ថាន ។
លីហៃ និងភរិយារបស់លោក សារ៉ាយ មានកូនប្រុសបួននាក់ ។ ពួកគេឈ្មោះ លេមិន លេមយួល សាំ និង នីហ្វៃ ។
បន្ទាប់ពីធ្វើដំណើរអស់រយៈពេលបីថ្ងៃមក គ្រួសាររបស់លីហៃបានបោះត្រសាលនៅក្នុងជ្រលងភ្នំក្បែរទន្លេមួយ ។
លីហៃបានសង់អាសនាមួយពីថ្ម ហើយបានថ្វាយដង្វាយដល់ព្រះ ។ លោកបានថ្លែងអំណរគុណដល់ព្រះក្នុងការជួយសង្គ្រោះគ្រួសារលោកពីការបំផ្លាញបង់ ។
លីហៃបានដាក់ឈ្មោះទន្លេនោះថា លេមិន និងដាក់ឈ្មោះជ្រលងភ្នំនោះថា លេមយួល ។ លីហៃចង់ឲ្យកូនៗរបស់លោកក្លាយដូចជាទឹកទន្លេ និងជ្រលងភ្នំនោះ ដោយបន្តហូរចាក់ទៅព្រះ និងខ្ជាប់ខ្ជួនក្នុងការកាន់តាមបញ្ញត្តិទាំងឡាយ ។
លេមិន និង លេមយួលបានគិតថា ឪពុករបស់ពួកគេគឺជាមនុស្សឆ្កួតដែលចាកចេញពីទីក្រុងយេរូសាឡិម និងទ្រព្យសម្បត្តិរបស់ពួកគេ ។ ពួកគេពុំជឿថា ទីក្រុងយេរូសាឡិមនឹងត្រូវបំផ្លាញចោលឡើយ ។
នីហ្វៃចង់យល់ពីរឿងទាំងឡាយដែលលីហៃបានឃើញ ។ លោកបានអធិស្ឋានដើម្បីដឹង ប្រសិនបើឪពុកលោកបានធ្វើរឿងត្រឹមត្រូវដោយបានចាកចេញពីទីក្រុងយេរូសាឡិមមកនោះ ។
ព្រះយេស៊ូវគ្រីស្ទបានយាងមកជួបនីហ្វៃ ហើយបានប្រាប់លោកថា ពាក្យសម្តីរបស់លីហៃគឺជាការពិត ។ នីហ្វៃបានជឿ ហើយពុំបានបះបោរដូច លេមិន និង លេមយួលឡើយ ។
នីហ្វៃបានប្រាប់បងៗរបស់លោកអំពីអ្វីដែលព្រះយេស៊ូវបានប្រាប់លោក ។ សាំបានជឿនីហ្វៃ ប៉ុន្តែ លេមិន និង លេមយួលពុំបានជឿឡើយ ។
ព្រះអម្ចាស់បានសន្យានឹងនីហ្វៃថា លោកនឹងមានពរដោយសារសេចក្តីជំនឿរបស់លោក ។ លោកនឹងក្លាយជាអ្នកដឹកនាំលើបងៗរបស់លោក ។