ជំពូកទី ៣៩
នីហ្វៃទទួលអំណាចដ៏អស្ចារ្យ
នីហ្វៃបានដើរឆ្ពោះទៅផ្ទះរបស់គាត់ ដោយគិតអំពីអ្វីដែលព្រះអម្ចាស់បានបង្ហាញដល់គាត់ និងអំពីពួកសាសន៍នីហ្វៃទុច្ចរិត ។ គាត់បានកើតទុក្ខដោយសារតែអំពើទុច្ចរិតរបស់ពួកគេ ។
ព្រះអម្ចាស់បានមានបន្ទូលទៅនីហ្វៃ ហើយបានសរសើរគាត់ចំពោះការគោរពប្រតិបត្តិ និងការខិតខំបង្រៀនដំណឹងល្អ ។
នីហ្វៃត្រូវបានប្រទានឲ្យនូវព្រះចេស្ដាដើម្បីធ្វើកិច្ចការគ្រប់យ៉ាង ។ ព្រះអម្ចាស់បានជ្រាបថា គាត់នឹងប្រើអំណាចនេះដោយសុចរិត ។
ព្រះអម្ចាស់បានប្រាប់នីហ្វៃឲ្យព្រមានប្រជាជនថា ប្រសិនបើពួកគេពុំព្រមប្រែចិត្តទេ នោះពួកគេនឹងត្រូវបំផ្លាញចោល ។ នីហ្វៃបានទៅយ៉ាងលឿនដើម្បីព្រមានប្រជាជន ។
ពួកសាសន៍នីហ្វៃពុំបានជឿលើនីហ្វៃទេ ។ ពួកគេបានព្យាយាមចាប់គាត់ដាក់ក្នុងគុក ប៉ុន្តែព្រះចេស្តារបស់ព្រះបានការពារគាត់ ។
នីហ្វៃបានប្រកាសព្រះបន្ទូលរបស់ព្រះទៅកាន់ពួកសាសន៍នីហ្វៃទាំងអស់ ។
ប៉ុន្តែប្រជាជនបានប្រែកាន់តែទុច្ចរិត ហើយបានចាប់ផ្តើមប្រយុទ្ធគ្នាទៅវិញទៅមក ។
នីហ្វៃបានអធិស្ឋានសូមឲ្យមានអំណត់អត់មួយ ដោយសង្ឃឹមថា ការខ្វះខាតស្បៀងនឹងធ្វើឲ្យប្រជាជនសាសន៍នីហ្វៃបន្ទាបខ្លួន ហើយជួយពួកគេឲ្យប្រែចិត្ត ។
អំណត់អត់បានកើតឡើង ។ គ្មានភ្លៀងសោះ ដូច្នេះដីបានស្ងួតហែង ហើយដំណាំពុំអាចលូតលាស់បានឡើយ ។ ប្រជាជនបានឈប់ប្រយុទ្ធគ្នា ។
ពួកសាសន៍នីហ្វៃមានការស្រេកឃ្លាន ហើយពួកគេជាច្រើននាក់បានស្លាប់ ។ អស់អ្នកដែលនៅរស់បានចាប់ផ្តើមនឹកចាំដល់ព្រះអម្ចាស់ និងអ្វីដែលនីហ្វៃបានបង្រៀនពួកគេ ។
ប្រជាជនបានប្រែចិត្តពីអំពើបាបរបស់ពួកគេ ហើយបន្ទាប់មកបានសូមអង្វរដល់ពួកចៅក្រមឲ្យសូមនីហ្វៃបញ្ចប់អំណត់អត់នោះ ។ ពួកចៅក្រមបានទៅរកនីហ្វៃ ។
នៅពេលនីហ្វៃបានឃើញថា ប្រជាជនបានបន្ទាបខ្លួន ហើយបានប្រែចិត្ត នោះគាត់បានទូលសូមព្រះអម្ចាស់ឲ្យបញ្ចប់អំណត់អត់នោះ ។
ព្រះអម្ចាស់បានឆ្លើយតបការអធិស្ឋានរបស់នីហ្វៃ ហើយមេឃបានចាប់ផ្តើមភ្លៀង ។ មិនយូរប៉ុន្មានក្រោយមក ដំណាំបានលូតលាស់សារជាថ្មីម្តងទៀត ។ ប្រជាជនបានសរសើរតម្កើងព្រះ ហើយបានដឹងថា នីហ្វៃជាព្យាការីដ៏អស្ចារ្យ ។
ពួកសាសន៍នីហ្វៃភាគច្រើនបានចូលជាសមាជិកសាសនាចក្រ ។ ពួកគេបានក្លាយជាអ្នកមានទ្រព្យសម្បតិ្ត ហើយទីក្រុងនានារបស់ពួកគេបានរីកចម្រើនឡើង ។ វាបានមានភាពសុខសាន្តនៅក្នុងដែនដី ។
ក្រោយមក ពួកសាសន៍នីហ្វៃមួយចំនួនដែលបានចូលរួមជាមួយពួកសាសន៍លេមិនពីមុនបានវាយប្រហារមកលើពួកសាសន៍នីហ្វៃ ។
ពួកសាសន៍នីហ្វៃបានព្យាយាមប្រយុទ្ធបង្ក្រាបមារសត្រូវរបស់ពួកគេដែលបានក្លាយជាពួកចោរកាឌីអានតុន ប៉ុន្តែពួកគេពុំអាចយកឈ្នះបានឡើយ ដោយសារខ្លួនពួកគេផ្ទាល់ក៏បានប្រែជាទុច្ចរិតម្តងទៀត ។
កាលពួកសាសន៍នីហ្វៃនៅសុចរិត ព្រះអម្ចាស់បានប្រទានពរដល់ពួកគេ ។ ពេលពួកគេមានអំនួត និងភ្លេចព្រះអម្ចាស់ នោះទ្រង់បានប្រទានបញ្ហាដល់ពួកគេដើម្បីជួយឲ្យពួកគេចងចាំដល់ទ្រង់ ។