ជំពូកទី ៤០
សាំយូអែលជាសាសន៍លេមិនប្រាប់អំពីព្រះយេស៊ូវគ្រីស្ទ
សាំយូអែលជាព្យាការីសាសន៍លេមិនម្នាក់បានទៅទីក្រុងសារ៉ាហិមឡាដើម្បីប្រកាសប្រាប់ដល់ពួកសាសន៍នីហ្វៃទុច្ចរិត ។ គាត់បានប្រាប់ពួកគេឲ្យប្រែចិត្ត ។
ពួកសាសន៍នីហ្វៃបានចាប់បោះសាំយូអែលចេញពីទីក្រុង ហើយគាត់បានចាប់ផ្តើមត្រឡប់ទៅដែនដីផ្ទាល់របស់គាត់វិញ ។
ប៉ុន្តែព្រះអម្ចាស់បានប្រាប់សាំយូអែលឲ្យត្រឡប់ទៅកាន់ទីក្រុងសារ៉ាហិមឡាវិញ ហើយប្រាប់ប្រជាជននូវរឿងទាំងឡាយដែលព្រះអម្ចាស់បានដាក់ក្នុងចិត្តរបស់គាត់ ។
ពួកសាសន៍នីហ្វៃពុំព្រមឲ្យសាំយូអែលត្រឡប់ចូលទៅក្នុងទីក្រុងវិញទេ ដូច្នេះគាត់បានឡើងទៅលើកំពូលកំផែងទីក្រុងនោះ ហើយបានប្រកាសពីលើកំផែងនោះ ។
គាត់បានព្យាករថា ពួកសាសន៍នីហ្វៃនឹងត្រូវបានបំផ្លាញបង់ក្នុងរយៈពេល ៤០០ ឆ្នាំ លើកលែងតែប្រជាជនប្រែចិត្ត ហើយមានសេចក្តីជំនឿលើព្រះយេស៊ូវគ្រីស្ទប៉ុណ្ណោះ ។
សាំយូអែលបានប្រាប់ពួកសាសន៍នីហ្វៃថា ព្រះយេស៊ូវគ្រីស្ទនឹងប្រសូតមកក្នុងរយៈពេលប្រាំឆ្នាំទៀត ហើយទ្រង់នឹងសង្គ្រោះដល់អស់អ្នកដែលបានជឿលើទ្រង់ ។
សាំយូអែលបានប្រាប់ពួកគេអំពីទីសម្គាល់នៃការប្រសូតរបស់ព្រះយេស៊ូវ ។ មានផ្កាយថ្មីមួយនឹងរះឡើង ហើយយប់មុនព្រះយេស៊ូវប្រសូតមក នោះមេឃនឹងមិនងងឹតទេ ។
បន្ទាប់មកសាំយូអែលបានប្រាប់ពួកគេអំពីទីសម្គាល់នៃការសុគតរបស់ព្រះយេស៊ូវ ។ គឺនឹងមានភាពងងឹតទាំងស្រុងក្នុងរយៈពេលបីថ្ងៃ—ព្រះអាទិត្យ ព្រះចន្ទ និងផ្កាយទាំងឡាយនឹងមិនរះឡើងទេ ។
ក៏នឹងមានរន្ទះបាញ់ ហើយផ្លេកបន្ទោរ ព្រមទាំងការរញ្ជួយដី ។ ភ្នំនឹងបែកជាដុំតូចៗ ហើយទីក្រុងជាច្រើននឹងត្រូវបំផ្លាញចោល ។
ពួកសាសន៍នីហ្វៃមួយចំនួនបានជឿលើសាំយ៉ូអែល ហើយបានប្រែចិត្តពីអំពើបាបរបស់ពួកគេ ។ ពួកគេបានទៅរកនីហ្វៃ ជាសាសន៍នីហ្វៃសុចរិតម្នាក់ដែលគាត់អាចធ្វើបុណ្យជ្រមុជទឹកឲ្យពួកគេបាន ។
ពួកសាសន៍នីហ្វៃដែលនៅសល់ពុំបានជឿដល់សាំយូអែលទេ ។ ពួកគេបានចោលដុំថ្ម និងបាញ់ព្រួញសម្លាប់គាត់ ។ ប៉ុន្តែព្រះអម្ចាស់បានការពារគាត់ ហើយគ្មានដុំថ្ម ឬព្រួញណាមួយបាញ់ត្រូវគាត់ឡើយ ។
កាលប្រជាជនបានឃើញថា គេបាញ់មិនត្រូវគាត់សោះ នោះមានប្រជាជនជាច្រើនទៀតបានជឿដល់គាត់ ហើយបានទៅរកនីហ្វៃដើម្បីទទួលបុណ្យជ្រមុជទឹក ។
នីហ្វៃក៏បានបង្រៀនប្រជាជនអំពីព្រះយេស៊ូវ ។ គាត់ចង់ឲ្យពួកគេជឿលើព្រះយេស៊ូវ ប្រែចិត្ត ហើយទទួលបុណ្យជ្រមុជទឹក ។
ទោះជាយ៉ាងណាក៏ដោយ ពួកសាសន៍នីហ្វៃភាគច្រើនពុំបានជឿលើសាំយូអែលឡើយ ។ ពួកគេបានព្យាយាមតាមចាប់គាត់ ។
សាំយូអែលបានលោតចេញពីកំផែង ហើយបានរត់ទៅកាន់ប្រទេសគាត់វិញ ។
សាំយូអែលបានចាប់ផ្តើមបង្រៀនពួកសាសន៍លេមិន ។ គេពុំដែលបានឮពីគាត់នៅក្នុងចំណោមពួកសាសន៍នីហ្វៃទៀតឡើយ ។