ជំពូកទី ៤២
ទីសម្គាល់នៃការឆ្កាងរបស់ព្រះគ្រីស្ទ
ឥឡូវនេះពួកគេបានរង់ចាំមើលទីសម្គាល់នៃការសុគតរបស់ទ្រង់ ៖ គឺការងងឹតអស់រយៈពេលបីថ្ងៃ ។
មនុស្សមួយចំនួនពុំជឿថា ទីសម្គាល់នោះនឹងកើតឡើងឡើយ ។ ពួកគេបានឈ្លោះប្រកែកជាមួយនឹងអស់អ្នកដែលបានជឿ ។
ថ្ងៃមួយមានព្យុះដ៏កំណាចបានកើតឡើង ។ មានខ្យល់បោកបក់យ៉ាងខ្លាំង ។
មានរន្ទះបាញ់ និងផ្លេកបន្ទោរនៅលើផែនដីទាំងមូល ។
ភ្លើងបានឆេះទីក្រុងសារ៉ាហិមឡា ។ ទីក្រុងមរ៉ូណៃបានលិចទៅក្នុងជម្រៅសមុទ្រ ។ ទីក្រុងមរ៉ូណៃហាត្រូវបានលិចកប់បាត់ ។
មានការរញ្ជួយដីបានកក្រើកផែនដីទាំងមូល ។ ថ្នល់ទាំងឡាយត្រូវបានបាក់បែក ហើយអគារត្រូវដួលរលំ ។ ទីក្រុងជាច្រើនត្រូវបានបំផ្លាញចោល ហើយមនុស្សជាច្រើនត្រូវបានស្លាប់ ។
ព្យុះ និងផែនដីរញ្ជួយបានកើតឡើងប្រហែលជាបីម៉ោង ។
នៅពេលព្យុះ និងផែនដីរញ្ជួយបានឈប់ទៅ នោះភាពងងឹតក៏ក្រាស់បានគ្របដណ្តប់លើដែនដី ។ គ្មានពន្លឺនៅគ្រប់ទីកន្លែងទាំងអស់ ។ មនុស្សស្ថិតនៅក្នុងភាពងងឹត ។
ភាពងងឹតមានរយៈពេលបីថ្ងៃ ។ គ្មានទៀនសម្រាប់ដុត ហើយប្រជាជនពុំអាចឃើញព្រះអាទិត្យ ព្រះចន្ទ ឬ ផ្កាយទេ ។
ប្រជាជនស្រែកយំ ដោយសារតែភាពងងឹត ការបំផ្លិចបំផ្លាញ និងការស្លាប់ ។ ពួកគេបានកើតទុក្ខ ដែលពុំបានប្រែចិត្តពីអំពើបាបរបស់ពួកគេ ។
បន្ទាប់មក ប្រជាជនបានឮសំឡេងរបស់ព្រះយេស៊ូវគ្រីស្ទ ។
ព្រះយេស៊ូវបានប្រាប់ពួកគេអំពីការបំផ្លាញដ៏អាក្រក់នៅលើដែនដីនេះ ។ ទ្រង់បានមានបន្ទូលថា មនុស្សដែលទុច្ចរិតបំផុតត្រូវបានសម្លាប់ ។
ទ្រង់បានមានបន្ទូលថា អស់អ្នកដែលមិនត្រូវបានសម្លាប់ត្រូវតែប្រែចិត្ត ។ ប្រសិនបើពួកគេប្រែចិត្ត ហើយមករកទ្រង់ នោះទ្រង់នឹងប្រទានពរដល់ពួកគេ ។
ប្រជាជនមានការភ្ញាក់ផ្អើលយ៉ាងខ្លាំងបន្ទាប់ពីពួកគេបានឮសំឡេង នោះពួកគេបានឈប់យំ ។ អ្វីៗទាំងអស់បានស្ងប់ស្ងាត់អស់ជាច្រើនម៉ោង ។
បន្ទាប់មកព្រះយេស៊ូវបានមានបន្ទូលម្តងទៀតថា ជារឿយៗទ្រង់ព្យាយាមជួយប្រជាជន ។ ប្រសិនបើពួកគេប្រែចិត្តនៅពេលនេះ នោះពួកគេនៅតែអាចត្រឡប់ទៅរកទ្រង់វិញបាន ។
បីថ្ងៃក្រោយមកភាពងងឹតបានរសាត់អស់ទៅ ។ ប្រជាជនមានចិត្តសប្បាយរីករាយ ហើយពោរពេញដោយអំណរទាំងថ្លែងអំណរគុណដល់ព្រះអម្ចាស់ ។