ជំពូកទី ៦
សុបិនរបស់លីហៃ
នៅក្នុងសុបិនរបស់លោក លីហៃបានឃើញបុរសម្នាក់ពាក់រ៉ូបពណ៌ស ហើយបានប្រាប់លីហៃឲ្យដើរតាមលោក ។ លីហៃបានដើរតាមបុរសនោះចូលទៅក្នុងទីរហោស្ថានដ៏ងងឹត និងអាប់អួរមួយ ។
បន្ទាប់ពីធ្វើដំណើរនៅក្នុងទីរហោស្ថានអស់រយៈពេលជាច្រើនម៉ោងមក លីហៃបានអធិស្ឋានទូលសូមជំនួយ ។
ក្រោយមកលោកបានឃើញដើមឈើមួយដែលមានផ្លែពណ៌ស ។ ផ្លែឈើផ្អែមនេះធ្វើឲ្យបុគ្គលដែលបរិភោគវាមានចិត្តរីករាយ ។
លីហៃបានទទួលទានផ្លែឈើនោះ ហើយចិត្តលោកបានពោរពេញដោយអំណរ ។ លោកចង់ឲ្យគ្រួសារលោកភ្លក់រសជាតិនៃផ្លែឈើនោះដែរ ដោយសារលោកបានដឹងថា ផ្លើឈើនោះនឹងធ្វើឲ្យពួកគេរីករាយផងដែរ ។
លីហៃបានឃើញទន្លេមួយហូរនៅក្បែរដើមឈើនោះ ។ នៅឯក្បាលទន្លេនោះ លោកបានឃើញសារ៉ាយ សាំ និង នីហ្វៃ ។
លីហៃបានហៅភរិយា និងកូនៗលោកឲ្យមក ហើយភ្លក់រសជាតិនៃផ្លែឈើនោះ ។ សារ៉ាយ សាំ និង នីហ្វៃបានទៅ ហើយភ្លក់រសជាតិផ្លែឈើនោះ ប៉ុន្តែលេមិន និង លេមយួលពុំបានមកឡើយ ។
លីហៃក៏បានឃើញដំបងដែក និងផ្លូវតូច ហើយចង្អៀតដែលនាំទៅកាន់ដើមឈើនោះ ។
លោកបានឃើញមនុស្សជាច្រើនកំពុងដើរលើផ្លូវនោះ ឬកំពុងដើរទៅរកផ្លូវនោះ ។ ដោយសារតែអ័ព្ទនៃសេចក្តីងងឹត នោះមនុស្សមួយចំនួនបានធ្លាក់វង្វេងផ្លូវ ហើយបានខ្ចាត់ខ្ចាយបាត់អស់ទៅ ។
មនុស្សផ្សេងទៀតបានកាន់ដំបងដែកយ៉ាងមាំ ហើយដើរកាត់ភាពងងឹតទៅដល់ដើមឈើនោះ ។ ពួកគេបានភ្លក់រសជាតិផ្លែឈើនោះ ។
មនុស្សនៅក្នុងអគារដ៏ធំនៅត្រើយម្ខាងទៀតនៃទន្លេបានសើចចំអកដល់អស់អ្នកដែលទទួលទានផ្លែឈើនោះ ។ មានមនុស្សមួយចំនួនបានទទួលទានផ្លែឈើហើយបានខ្មាសអៀន ហើយចាកចេញពីដើមឈើនោះ ។
លីហៃបានឃើញមនុស្សជាច្រើននៅក្នុងសុបិនរបស់លោក ។ មនុស្សមួយចំនួនបានកាន់ដំបងដែកយ៉ាងមាំ ហើយធ្វើដំណើរកាត់ភាពងងឹតទៅដល់ដើមឈើនោះ ។ ពួកគេបានភ្លក់រសជាតិផ្លែឈើនោះ ។ មនុស្សផ្សេងទៀតបានដើរទៅអាគារដ៏ធំនោះ ឬលង់ទឹកទន្លេ ឬបានវង្វេង ។ លេមិន និង លេមយួលពុំទទួលទានផ្លែឈើនោះឡើយ ។ លីហៃបារម្ភពីពួកគេ ហើយបានព្យាយាមជួយពួកគេឲ្យគោរពបទបញ្ញត្តិរបស់ព្រះ ។