ជំពូកទី ២២
បេសកកម្មរបស់អាលម៉ាទៅទីក្រុងអាំម៉ូណៃហា
អាលម៉ាបានបារម្ភអំពីអំពើទុច្ចរិតរបស់ពួកសាសន៍នីហ្វៃ ដូច្នេះលោកបានសម្រេចចិត្តចំណាយពេលទាំងប៉ុន្មានរបស់លោកប្រកាសដំណឹងល្អ ។ លោកបានជ្រើសរើសនីហ្វៃហាឲ្យជំនួសតំណែងលោកក្នុងនាមជាមេចៅក្រម ។
អាលម៉ាបានបង្រៀនដំណឹងល្អទូទាំងដែនដី ។ ពេលលោកបានព្យាយាមប្រកាសនៅក្នុងទីក្រុងអាំម៉ូណៃហា ប្រជាជនពុំស្តាប់លោកឡើយ ។ ពួកគេបានបោះលោកចេញពីទីក្រុង ។
អាលម៉ាកើតទុក្ខដោយសារប្រជាជននៅទីក្រុងអាំម៉ូណៃហាទុច្ចរិតយ៉ាងខ្លាំង ។ លោកបានចេញទៅទីក្រុងមួយផ្សេងទៀត ។
ទេវតាមួយអង្គបានបង្ហាញព្រះកាយ ហើយបានលួងលោមអាលម៉ា ។ ទេវតានោះបានប្រាប់លោកឲ្យត្រឡប់ទៅទីក្រុងអាំម៉ូណៃហាវិញ ហើយប្រកាសដំណឹងល្អម្តងទៀត ។ អាលម៉ាបានប្រញាប់ត្រឡប់ទៅវិញ ។
អាលម៉ាបានឃ្លានអាហារ ។ ពេលលោកចូលទៅទីក្រុង លោកបានសូមអាហារខ្លះៗពីបុរសម្នាក់ ។ ទេវតានោះបានប្រាប់បុរសនោះថា អាលម៉ានឹងមក ហើយថាអាលម៉ាគឺជាព្យាការីរបស់ព្រះ ។
បុរសម្នាក់នេះឈ្មោះអាមូលេកបានយកអាលម៉ាទៅផ្ទះរបស់គាត់ ហើយផ្តល់អាហារឲ្យលោកបរិភោគ ។ អាលម៉ាបានស្នាក់នៅជាមួយអាមូលេក និងគ្រួសាររបស់គាត់អស់ជាច្រើនថ្ងៃ ។ លោកបានថ្លែងអំណរគុណដល់ព្រះសម្រាប់គ្រួសាររបស់អាមូលេក ហើយបានផ្តល់ពរដល់ពួកគេ ។
អាលម៉ាបានប្រាប់អាមូលេកអំពីការហៅរបស់លោកដើម្បីបង្រៀនប្រជាជនទីក្រុងអាំម៉ូណៃហា ។ អាមូលេកបានទៅជាមួយអាលម៉ាដើម្បីបង្រៀនប្រជាជន ។ ព្រះវិញ្ញាណបរិសុទ្ធបានជួយពួកលោក ។
អាលម៉ាបានប្រាប់ប្រជាជនឲ្យប្រែចិត្ត បើមិនដូច្នេះទេព្រះនឹងបំផ្លាញពួកគេ ។ លោកបានប្រាប់ថា ព្រះយេស៊ូវគ្រីស្ទនឹងយាងមក ហើយសង្គ្រោះអស់អ្នកដែលមានសេចក្តីជំនឿលើទ្រង់ ហើយបានប្រែចិត្ត ។
ប្រជាជននៅទីក្រុងអាំម៉ូណៃហាបានខឹងសម្បារ ។ ពួកគេបានព្យាយាមចាប់អាលម៉ាដាក់គុក ប៉ុន្តែព្រះអម្ចាស់បានការពារលោក ។
បន្ទាប់មក អាមូលេកបានចាប់ផ្តើមបង្រៀន ។ ប្រជាជនជាច្រើនបានស្គាល់អាមូលេក លោកពុំមែនជាមនុស្សចម្លែកដូចជាអាលម៉ាឡើយ ។ គាត់បានប្រាប់ពួកគេអំពីទេវតាដែលគាត់បានឃើញ ។
អាមូលេកបាននិយាយថា អាលម៉ាគឺជាព្យាការីរបស់ព្រះ ហើយបាននិយាយសេចក្តីពិត ។ ប្រជាជនមានការភ្ញាក់ផ្អើលដែលបានស្តាប់ឮទីបន្ទាល់របស់អាមូលេក ។
ប្រជាជនមួយចំនួនបានខឹងសម្បារ ជាពិសេសមនុស្សទុច្ចរិតម្នាក់ឈ្មោះស៊ីអែសរ៉ុម ។ ពួកគេបានព្យាយាមប្រើល្បិចសួរសំណួរអាមូលេក ប៉ុន្តែគាត់បានប្រាប់ពួកគេថា គាត់បានដឹងអំពីផែនការរបស់ពួកគេ ។
ស៊ីអែសរ៉ុមបានចង់បំផ្លាញអ្វីគ្រប់យ៉ាងដែលល្អ ។ គាត់នឹងបង្កឲ្យមានបញ្ហា ហើយបន្ទាប់មកប្រជាជននឹងបង់ប្រាក់ឲ្យគាត់ដើម្បីដោះស្រាយបញ្ហានានាដែលគាត់បានបង្កើតនោះ ។
ស៊ីអែសរ៉ុមពុំអាចប្រើល្បិចជាមួយអាមូលេកបានឡើយ ដូច្នេះគាត់បានផ្តល់ជាប្រាក់ឲ្យអាមូលេកដើម្បីនិយាយបដិសេធថា គ្មានព្រះ ។ អាមូលេកបានដឹងថា ព្រះមានព្រះជន្មរស់ ហើយបាននិយាយថា ស៊ីអែសរ៉ុមក៏បានដឹងថាវាជាការពិតផងដែរ ប៉ុន្តែគាត់ស្រឡាញ់ប្រាក់ជាងស្រឡាញ់ព្រះ ។
បន្ទាប់មកអាមូលេកបានបង្រៀនស៊ីអែសរ៉ុមអំពីព្រះយេស៊ូវ និងអំពីការមានព្រះជន្មរស់ឡើងវិញ ព្រមទាំងជីវិតអស់កល្បជានិច្ច ។ ប្រជាជនមានការណ៍អស្ចារ្យក្នុងចិត្ត ។ ស៊ីអែសរ៉ុមបានចាប់ផ្តើមញ័រដោយការភ័យខ្លាច ។
ស៊ីអែសរ៉ុមបានដឹងថា អាលម៉ា និង អាមូលេកមានព្រះចេស្តានៃព្រះ ដោយសារពួកលោកបានដឹងអំពីគំនិតរបស់គាត់ ។ ស៊ីអែសរ៉ុមបានសួរសំណួរ ហើយស្តាប់ពេលអាលម៉ាបានបង្រៀនគាត់អំពីដំណឹងល្អ ។
ប្រជាជនមួយចំនួនបានជឿលើអាលម៉ា និងអាមូលេក ហើយបានចាប់ផ្តើមប្រែចិត្ត ព្រមទាំងសិក្សាព្រះគម្ពីរ ។
ប៉ុន្តែប្រជាជនភាគច្រើនចង់សម្លាប់អាលម៉ា និង អាមូលេក ។ ពួកគេបានចងពួកលោកទាំងពីរនាក់នោះ ហើយបានយកពួកលោកទៅឲ្យមេចៅក្រម ។
ស៊ីអែសរ៉ុមសោកស្តាយដែលគាត់បានធ្វើអំពើទុច្ចរិត ហើយបានបង្រៀនសេចក្តីកុហកដល់ប្រជាជន ។ គាត់បានសុំឲ្យប្រជាជនដោះលែងអាលម៉ា និង អាមូលេក ។
ស៊ីអែសរ៉ុម និងមនុស្សដទៃទៀតដែលបានជឿតាមការបង្រៀនរបស់អាលម៉ា និង អាមូលេកត្រូវបានបណ្តេញចេញពីទីក្រុង ។ មនុស្សទុច្ចរិតបានចោលថ្មលើពួកគេ ។
បន្ទាប់មក ពួកមនុស្សទុច្ចរិតបានប្រមូលស្ត្រី និងកូនក្មេងដែលបានជឿ ហើយបោះពួកគេ និងព្រះគម្ពីររបស់ពួកគេចូលទៅក្នុងភ្លើង ។
អាលម៉ា និងអាមូលេកត្រូវបានបង្ខំឲ្យមើលស្ត្រី និងកូនក្មេងស្លាប់នៅក្នុងភ្លើង ។ អាមូលេកចង់ប្រើព្រះចេស្តារបស់ព្រះដើម្បីសង្គ្រោះពួកគេ ។
ប៉ុន្តែអាលម៉ាបានប្រាប់អាមូលេកថា លោកពុំត្រូវបានអនុញ្ញាតឲ្យបញ្ឈប់ការសម្លាប់នេះឡើយ ដោយសារប្រជាជនដែលស្លាប់នេះនឹងទៅនៅជាមួយព្រះ ហើយមនុស្សទុច្ចរិតនឹងទទួលទោស ។
មេចៅក្រមបានទះកំភ្លៀងអាលម៉ា និងអាមូលេកជាច្រើនដង ហើយសើចចំអកដល់ពួកលោក ដោយសារតែពួកលោកពុំបានសង្គ្រោះស្ត្រី និងកូនក្មេងដែលកំពុងឆេះក្នុងភ្លើង ។ បន្ទាប់មកគាត់បានបោះពួកលោកចូលទៅក្នុងគុក ។
មនុស្សទុច្ចរិតផ្សេងទៀតបានចូលមកក្នុងគុក ហើយធ្វើបាបអាលម៉ា និងអាមូលេកតាមវិធីជាច្រើន រួមទាំងបង្អត់អាហារ និងស្តោះទឹកមាត់ដាក់ពួកលោកផងដែរ ។
មេចៅក្រមបាននិយាយថា ប្រសិនបើអាលម៉ា និង អាមូលេកបានប្រើព្រះចេស្តានៃព្រះដោះលែងខ្លួនពួកលោក នោះគាត់នឹងជឿ ។ គាត់បានទះកំភ្លៀងពួកលោកម្តងទៀត ។
អាលម៉ា និង អាមូលេកបានក្រោកឈរឡើង ។ អាលម៉ាបានអធិស្ឋាន ហើយទូលសូមព្រះធ្វើឲ្យពួកលោករឹងមាំឡើង ដោយសារតែជំនឿរបស់ពួកលោកលើព្រះគ្រីស្ទ ។
ព្រះចេស្តានៃព្រះបានប្រទានឲ្យអាលម៉ា និងអាមូលេក ហើយពួកលោកបានផ្តាច់ខ្សែចំណងដែលចងពួកលោក ។ ពួកមនុស្សអាក្រក់បានភ័យ ហើយព្យាយាមរត់គេច ប៉ុន្តែបានដួលចុះវិញ ។
ដីបានរញ្ជួយ ហើយជញ្ជាំងគុកបានដួលរលំសង្កត់លើមនុស្សទុច្ចរិត ។ ព្រះអម្ចាស់បានការពារអាលម៉ា និងអាមូលេក ហើយពួកលោកគ្មានគ្រោះថ្នាក់ឡើយ ។
ប្រជាជននៅទីក្រុងអាំម៉ូណៃហាបានមកមើលអ្វីដែលកំពុងកើតឡើង ។ នៅពេលពួកគេបានឃើញអាលម៉ា និងអាមូលេកកំពុងដើរចេញពីគុកដែលបាក់បែកខ្ទេចខ្ទីដូច្នោះ ពួកគេបានចាប់ផ្តើមភ័យខ្លាច ហើយបានរត់គេចខ្លួន ។
ព្រះអម្ចាស់បានប្រាប់អាលម៉ា និង អាមូលេកឲ្យទៅទីក្រុងសៃដុម ។ នៅទីនោះពួកលោកបានជួបនឹងមនុស្សសុចរិត ។ ស៊ីអែសរ៉ុមក៏បាននៅទីនោះផងដែរ ហើយគាត់មានជំងឺជាទម្ងន់ ។
ស៊ីអែសរ៉ុមសប្បាយចិត្តដែលបានឃើញអាលម៉ា និង អាមូលេក ។ គាត់បានបារម្ភថា ពួកលោកត្រូវគេសម្លាប់ដោយសារតែអ្វីដែលគាត់បានធ្វើ ។ គាត់បានសូមឲ្យពួកលោកព្យាបាលគាត់ ។
ស៊ីអែសរ៉ុមបានជឿលើព្រះយេស៊ូវគ្រីស្ទ ហើយបានប្រែចិត្តពីអំពើបាបរបស់គាត់ ។ នៅពេលអាលម៉ាបានអធិស្ឋានឲ្យគាត់ ស៊ីអែសរ៉ុមស្រាប់តែបានជាមួយរំពេច ។
ស៊ីអែសរ៉ុមបានទទួលបុណ្យជ្រមុជទឹក ហើយចាប់ផ្តើមប្រកាសដំណឹងល្អ ។ មនុស្សដទៃទៀតជាច្រើនក៏បានទទួលបុណ្យជ្រមុជទឹកផងដែរ ។
ប្រជាជនទុច្ចរិតទាំងអស់នៅទីក្រុងអាំម៉ូណៃហាត្រូវបានសម្លាប់ដោយកងទ័ពសាសន៍លេមិន ដូចដែលអាលម៉ាបានព្យាករ ។