ជំពូកទី ១៤
អ័ប៊ីណាដៃ និងស្តេចណូអេ
ណូអេពុំមែនជាស្តេចល្អដូចព្រះបិតាទ្រង់ឡើយ ។ ទ្រង់ទុច្ចរិត ហើយមិនបានគោរពបទបញ្ញត្តិរបស់ព្រះឡើយ ។
ទ្រង់បានបង្ខំប្រជាជនទ្រង់ឲ្យថ្វាយផ្នែកខ្លះនៃគ្រាប់ធុញ្ញជាតិ សត្វ មាស និងប្រាក់របស់ពួកគេដល់ទ្រង់ ។
ស្តេចណូអេធ្វើបែបនេះដោយសារទ្រង់ខ្ជិល ។ ទ្រង់បានធ្វើឲ្យពួកសាសន៍នីហ្វៃថ្វាយអ្វីៗគ្រប់យ៉ាងដល់ទ្រង់ ដែលទ្រង់ត្រូវការក្នុងការរស់នៅ ។
ទ្រង់បានផ្លាស់សង្ឃល្អៗដែលព្រះបិតាទ្រង់បានហៅជំនួសដោយសង្ឃទុច្ចរិតវិញ ។ ពួកសង្ឃទុច្ចរិតទាំងនេះបានបង្រៀនប្រជាជនឲ្យធ្វើអំពើបាប ។
ស្តេចណូអេបានសាងសង់អគារស្អាតៗជាច្រើន រួមទាំងវាំងដ៏ធំជាមួយនឹងបល្ល័ង្កមួយផងដែរ ។ អគារទាំងនោះតុបតែងដោយប្រើមាស ប្រាក់ និងឈើដ៏មានតម្លៃ ។
ស្តេចណូអេសព្វព្រះទ័យនឹងទ្រព្យសម្បត្តិដែលទ្រង់បានយកពីប្រជាជនទ្រង់ ។ ទ្រង់ និងពួកសង្ឃរបស់ទ្រង់បានចំណាយពេលរបស់ខ្លួនផឹកស្រា និងធ្វើអំពើទុច្ចរិត ។
ព្រះបានចាត់ព្យាការីមួយរូបឈ្មោះអ័ប៊ីណាដៃឲ្យទៅកាន់ប្រជាជនណូអេ ។ អ័ប៊ីណាដៃបានព្រមានពួកគេថា ប្រសិនបើពួកគេមិនប្រែចិត្តទេ នោះពួកគេនឹងក្លាយជាទាសកររបស់ពួកសាសន៍លេមិន ។
ពេលស្តេចណូអេបានស្តាប់ឮអ្វីដែលអ័ប៊ីណាដៃបានថ្លែង នោះទ្រង់បានខ្ញាល់ ។ ទ្រង់បានបញ្ជូនមនុស្សឲ្យទៅនាំអ័ប៊ីណាដៃទៅកាន់វាំង ដើម្បីទ្រង់អាចសម្លាប់លោកចោល ។
អ័ប៊ីណាដៃត្រូវបាននាំទៅកាន់ស្តេច ។ ស្តេចណូអេ និងពួកសង្ឃរបស់ទ្រង់បានសួរលោកជាច្រើនសំណួរ ។ ពួកគេព្យាយាមប្រើល្បិចឲ្យលោកនិយាយអ្វីមួយដែលខុស ។
អ័ប៊ីណាដៃពុំខ្លាចក្នុងការឆ្លើយសំណួររបស់ពួកគេឡើយ ។ លោកបានដឹងថា ព្រះនឹងជួយលោក ។ ពួកសង្ឃមានការណ៍អស្ចារ្យចំពោះចម្លើយរបស់អ័ប៊ីណាដៃ ។
ស្តេចណូអេបានខ្ញាល់ ហើយបានបញ្ជាឲ្យពួកសង្ឃរបស់ទ្រង់សម្លាប់អ័ប៊ីណាដៃចោល ។ អ័ប៊ីណាដៃបាននិយាយថា ប្រសិនបើពួកគេពាល់លោក នោះព្រះនឹងសម្លាប់ពួកគេ ។
ព្រះវិញ្ញាណបរិសុទ្ធបានការពារអ័ប៊ីណាដៃ ដើម្បីឲ្យលោកអាចបញ្ចប់ការថ្លែងដែលព្រះអម្ចាស់សព្វព្រះទ័យឲ្យលោកថ្លែង ។ ទឹកមុខរបស់អ័ប៊ីណាដៃបានពោរពេញដោយពន្លឺ ។ ពួកសង្ឃបានភ័យខ្លាចមិនហ៊ានពាល់លោកឡើយ ។
ដោយថ្លែងជាមួយនឹងព្រះចេស្តាមកពីព្រះ នោះអ័ប៊ីណាដៃបានប្រាប់ប្រជាជនអំពីអំពើទុច្ចរិតរបស់ពួកគេ ។ លោកបានអានបទបញ្ញត្តិព្រះដល់ពួកគេ ។
លោកបានប្រាប់ពួកគេថា ព្រះយេស៊ូវគ្រីស្ទនឹងប្រសូតមកលើផែនដីនេះ ។ ព្រះយេស៊ូវអាចធ្វើឲ្យមនុស្សប្រែចិត្ត រស់ឡើងវិញ ហើយរស់នៅជាមួយព្រះបាន ។
អ័ប៊ីណាដៃបានប្រាប់ប្រជាជនឲ្យប្រែចិត្ត ហើយជឿលើព្រះយេស៊ូវគ្រីស្ទ បើមិនដូច្នោះទេពួកគេនឹងពុំបានសង្គ្រោះឡើយ ។
ស្តេចណូអេ និងពួកសង្ឃទាំងអស់របស់ទ្រង់បានបដិសេធមិនជឿតាមអ័ប៊ីណាដៃ លើកលែងតែសង្ឃម្នាក់ ។ ស្តេចណូអេបានប្រាប់ពួកសង្ឃឲ្យសម្លាប់អ័ប៊ីណាដៃ ។ ពួកគេបានចងលោក ហើយបោះលោកចូលទៅក្នុងគុក ។
សង្ឃម្នាក់ដែលបានជឿតាមអ័ប៊ីណាដៃឈ្មោះអាលម៉ា ។ លោកបានសូមឲ្យស្តេចណូអេដោះលែងអ័ប៊ីណាដៃ ។
ស្តេចបានខឹងនឹងអាលម៉ា ហើយបានដេញលោកចេញ ។ រួចទ្រង់បានបញ្ជូនអ្នកបម្រើទ្រង់ឲ្យទៅសម្លាប់លោក ។ អាលម៉ាបានរត់គេច ហើយលាក់ខ្លួន ហើយពួកអ្នកបម្រើរកលោកពុំឃើញឡើយ ។
បន្ទាប់ពីនៅក្នុងគុកអស់បីថ្ងៃមក អ័ប៊ីណាដៃត្រូវបាននាំមកកាន់ព្រះភក្ត្រស្តេចណូអេម្តងទៀត ។ ស្តេចបានប្រាប់អ័ប៊ីណាដៃឲ្យដកពាក្យសម្តីដែលលោកបាននិយាយទាស់នឹងទ្រង់ និងប្រជាជនទ្រង់ ។
ស្តេចណូអេបានប្រាប់អ័ប៊ីណាដៃថា ប្រសិនបើលោកពុំព្រមបដិសេធនូវអ្វីទាំងអស់ដែលលោកបាននិយាយទេ នោះលោកនឹងត្រូវស្លាប់ ។
អ័ប៊ីណាដៃបានដឹងថា អ្វីដែលលោកបាននិយាយគឺជាការពិត ។ លោកសុខចិត្តស្លាប់ ជាជាងដកយកពាក្យសម្តីដែលព្រះបានបញ្ជូនលោកឲ្យមកនិយាយ ។
ស្តេចណូអេបានបញ្ជាឲ្យពួកសង្ឃរបស់ទ្រង់សម្លាប់អ័ប៊ីណាដៃ ។ ពួកគេបានចងលោក វាយលោកនឹងខ្សែតី ហើយដុតលោករហូតដល់ស្លាប់ ។ ពីមុនលោកស្លាប់ អ័ប៊ីណាដៃបាននិយាយថា ស្តេចណូអេនឹងស្លាប់ដោយសារភ្លើងផងដែរ ។
ពួកសាសន៍នីហ្វៃមួយចំនួនប្រឆាំងនឹងស្តេចណូអេ ហើយព្យាយាមចង់សម្លាប់ទ្រង់ ។ ពួកកងទ័ពរបស់ពួកសាសន៍លេមិនក៏បានមកប្រយុទ្ធនឹងស្តេច និងអ្នកដើរតាមទ្រង់ផងដែរ ។
ស្តេច និងអ្នកដើរតាមទ្រង់បានរត់ចេញពីពួកសាសន៍លេមិន ប៉ុន្តែពួកលេមិនបានរត់តាមទាន់ ហើយបានចាប់ផ្តើមសម្លាប់ពួកគេ ។ ស្តេចបានប្រាប់មនុស្សរបស់ទ្រង់ឲ្យចាកចេញពីគ្រួសារពួកគេ ហើយបន្តរត់ទៀត ។
បុរសជាច្រើនពុំចាកចេញឡើយ ។ ពួកគេត្រូវបានពួកសាសន៍លេមិនចាប់បាន ។
ភាគច្រើនពួកបុរសដែលបានរត់គេចទៅជាមួយស្តេចណូអេមានការសោកស្តាយ ។ ពួកគេចង់ត្រឡប់ទៅវិញ ហើយជួយភរិយា និងកូនៗព្រមទាំងប្រជាជនរបស់ពួកគេវិញ ។
ស្តេចណូអេពុំសព្វព្រះទ័យឲ្យពួកបុរសទាំងនោះត្រឡប់ទៅរកគ្រួសារពួកគេវិញឡើយ ។ ទ្រង់បានបញ្ជាឲ្យពួកគេនៅជាមួយទ្រង់ ។
ពួកបុរសទាំងនោះខឹងនឹងស្តេចណូអេ ។ ពួកគេបានដុតទ្រង់រហូតដល់ស្លាប់ ដូចអ័ប៊ីណាដៃបានព្យាករ ។ ក្រោយមក ពួកគេបានត្រឡប់ទៅរកក្រុមគ្រួសារពួកគេវិញ ។