ជំពូកទី ៤៨
ភាពសុខសាន្តនៅទ្វីបអាមេរិក
បន្ទាប់ពីព្រះយេស៊ូវបានយាងឡើងទៅស្ថានសួគ៌វិញ នោះពួកសិស្សរបស់ទ្រង់បានតាំងសាសនាចក្ររបស់ទ្រង់ឡើងនៅទូទាំងដែនដី ។
ប្រជាជនដែលបានប្រែចិត្តពីអំពើបាបរបស់ពួកគេបានទទួលបុណ្យជ្រមុជទឹក ហើយបានទទួលព្រះវិញ្ញាណបរិសុទ្ធ ។
មិនយូរប៉ុន្មានពួកសាសន៍នីហ្វៃ និងសាសន៍លេមិនទាំងអស់ក៏បានប្រែចិត្តជឿ ។ ពួកគេមិនបានឈ្លោះប្រកែកគ្នាទៀតឡើយ ហើយមនុស្សគ្រប់រូបមានចិត្តស្មោះត្រង់ ។
គ្មាននរណាមាន ឬក្រឡើយ ។ ប្រជាជនបានចែករំលែកអ្វីៗជាមួយគ្នា ហើយពួកគេទាំងអស់គ្នាមាននូវអ្វីៗដែលពួកគេត្រូវការ ។
ពួកសិស្សបានសម្តែងអព្ភូតហេតុជាច្រើននៅក្នុងព្រះនាមរបស់ព្រះយេស៊ូវគ្រីស្ទ ។ ពួកគេបានព្យាបាលអ្នកឈឺ ហើយបានប្រោសមនុស្សស្លាប់ឲ្យរស់ឡើងវិញ ។
ប្រជាជនបានសាងសង់ទីក្រុងថ្មីៗ ខណៈដែលទីក្រុងផ្សេងទៀតត្រូវបានបំផ្លិចបំផ្លាញចោល ។
ពួកគេបានគោរពតាមព្រះបញ្ញត្តិនៃព្រះ ។ ពួកគេបានតមអាហារ ហើយអធិស្ឋាន និងបានជួបគ្នាជាញឹកញាប់ដើម្បីស្តាប់ព្រះបន្ទូលរបស់ព្រះ ។
ប្រជាជនបានមានចិត្តសប្បាយរីករាយ ។
គ្មានអំពើឆក់ប្លន់ គ្មានការកុហក គ្មានអំពើឃាតកម្មឡើយ ។ ប្រជាជនឈប់បែងចែកថាជាពួកសាសន៍នីហ្វៃ និងពួកសាសន៍លេមិនទៀតហើយ ប៉ុន្តែពួកគេរួមគ្នាតែមួយជាកូនចៅរបស់ព្រះគ្រីស្ទវិញ ។
ព្រះអម្ចាស់បានប្រទានពរដល់ប្រជាជននូវគ្រប់កិច្ចការដែលពួកគេបានធ្វើ ។
ពួកគេបានរស់នៅដោយសុខសាន្តអស់រយៈពេល ២០០ ឆ្នាំ ។ ប្រជាជនបានប្រែជាមានទ្រព្យសម្បត្តិយ៉ាងច្រើន ។