ជំពូកទី ៤១
ទីសម្គាល់នៃការប្រសូតរបស់ព្រះគ្រីស្ទ
ពួកសាសន៍នីហ្វៃបានឃើញទីសម្គាល់ និងអព្ភូតហេតុដ៏អស្ចារ្យដែលពួកព្យាការីបានថ្លែងថានឹងកើតឡើងពីមុនព្រះយេស៊ូវប្រសូតមក ។
ប៉ុន្តែពួកសាសន៍នីហ្វៃមួយចំនួនបាននិយាយថា ពេលដែលព្រះយេស៊ូវប្រសូតនោះបានកន្លងផុតទៅហើយ ។ ពួកគេបាននិយាយចំអកដល់អស់អ្នកដែលនៅតែជឿលើពាក្យព្យាកររបស់សាំយូអែលជាសាសន៍លេមិននោះ ។
ប្រជាជនដែលបានជឿលើព្រះយេស៊ូវគ្រីស្ទ និងលើពួកព្យាការីបានកើតទុក្ខ ដោយគិតថាមានអ្វីមួយដែលរារាំងមិនឲ្យការព្យាករនោះបានសម្រេច ។
ប្រជាជនបានទន្ទឹងចាំមើលដោយស្មោះត្រង់នូវយប់មួយដែលមិនងងឹតជាទីសម្គាល់ថា ព្រះយេស៊ូវគ្រីស្ទនឹងប្រសូតមក ។
អស់អ្នកដែលពុំជឿលើព្រះយេស៊ូវគ្រីស្ទ គេបានរើសយកថ្ងៃមួយទុកសម្លាប់អស់អ្នកដែលជឿ ប្រសិនបើទីសម្គាល់ទាំងនោះពុំបានកើតឡើង ។
នីហ្វៃបានកើតទុក្ខដោយសារតែអំពើទុច្ចរិតរបស់អស់អ្នកដែលពុំជឿលើព្រះអង្គសង្គ្រោះ ។
នីហ្វៃបានអធិស្ឋានពេញមួយថ្ងៃសម្រាប់ប្រជាជនដែលនឹងត្រូវគេយកទៅសម្លាប់ ។
ព្រះអម្ចាស់បានលួងលោមនីហ្វៃ ហើយបានប្រាប់គាត់ថា វានឹងមិនងងឹតទេនៅយប់នោះ ។ ព្រះយេស៊ូវនឹងប្រសូតមកនៅថ្ងៃបន្ទាប់នៅទីក្រុងបេថ្លេហិម ។
នាយប់នោះព្រះអាទិត្យបានលិចចុះ ប៉ុន្តែវាពុំងងឹតទេ ។ ទីសម្គាល់នៃការប្រសូតរបស់ព្រះយេស៊ូវគ្រីស្ទក៏បានកើតឡើង ។ ប្រជាជនបានមានការណ៍អស្ចារ្យក្នុងចិត្ត ។
អស់អ្នកដែលគ្រោងសម្លាប់ពួកអ្នកជឿបានដួលទៅលើដី ហើយមានសភាពដូចជាស្លាប់ ។
ពួកគេមានការភ័យខ្លាច ដោយសារពួកគេជាមនុស្សទុច្ចរិត ។ ឥឡូវនេះ ពួកគេបានដឹងថា ព្រះអង្គសង្គ្រោះនឹងប្រសូតមក ហើយថាពួកព្យាការីបានថ្លែងរឿងត្រឹមត្រូវ ។
វានៅបន្តភ្លឺពេញមួយយប់ ។ នៅពេលព្រះអាទិត្យបានរះឡើងនៅព្រឹកបន្ទាប់ នោះប្រជាជនបានដឹងថា ព្រះយេស៊ូវគ្រីស្ទនឹងប្រសូតនៅថ្ងៃនោះ ។ ការព្យាករត្រូវបានបំពេញ ។
មានផ្កាយថ្មីមួយបានរះឡើងនៅលើមេឃ គឺដូចជាព្យាការីបាននិយាយពីមុនមក ។
សាតាំងនៅតែព្យាយាមនាំប្រជាជនមិនឲ្យជឿដល់ទីសម្គាល់ទាំងនោះដែលពួកគេបានឃើញ ប៉ុន្តែមានមនុស្សភាគច្រើនបានជឿ ។
នីហ្វៃ និងថ្នាក់ដឹកនាំផ្សេងទៀតនៃសាសនាចក្របានធ្វើបុណ្យជ្រមុជទឹកដល់អស់អ្នកដែលបានជឿ និងប្រែចិត្ត ។
នេះជាដំណឹងដ៏រីករាយនៅលើដែនដី ដោយសារតែពាក្យរបស់ពួកព្យាការីត្រូវបានបំពេញ ។ ព្រះយេស៊ូវគ្រីស្ទបានប្រសូតហើយ ។