ជំពូកទី ២៧
កូរីហូរ
កូរីហូរបានប្រាប់ប្រជាជនថា ពួកគេគឺជាមនុស្សឆ្កួតដែលជឿថា ព្រះយេស៊ូវនឹងយាងមកកាន់ផែនដី ហើយរងទុក្ខជំនួសអំពើបាបរបស់ពួកគេ ។
គាត់បាននិយាយថា មនុស្សពុំអាចត្រូវទទួលទោសចំពោះអំពើបាបរបស់ពួកគេឡើយ ដោយសារគ្មានជីវិតបន្ទាប់ពីការស្លាប់ឡើយ ។ មនុស្សជាច្រើនបានជឿលើកូរីហូរ ។ ពួកគេបានក្លាយជាទុច្ចរិត ។
កូរីហូរបានព្យាយាមប្រកាសដល់ប្រជាជនអាំម៉ូន ប៉ុន្តែពួកគេពុំស្តាប់ឡើយ ។ ពួកគេបានចងគាត់ ហើយបាននាំគាត់មកឯអាំម៉ូន ដែលបានបង្ខំឲ្យគាត់ចេញពីទីក្រុងនោះ ។
កូរីហូរបានទៅដែនដីគេឌាន ប៉ុន្តែប្រជាជននៅទីនោះក៏ពុំបានស្តាប់គាត់ដែរ ។ មេចៅក្រមបានបញ្ជូនគាត់ទៅឲ្យអាលម៉ា ។
អាលម៉ាបានសួរកូរីហូរ ប្រសិនបើគាត់ជឿលើព្រះ ។ កូរីហូរបាននិយាយថា គាត់ពុំជឿទេ ។ អាលម៉ាបានថ្លែងទីបន្ទាល់ថា មានព្រះមួយអង្គ ហើយថាព្រះគ្រីស្ទនឹងយាងមក ។
កូរីហូរចង់ឲ្យអាលម៉ាសម្តែងអព្ភូតហេតុមួយដើម្បីបង្ហាញថា មានព្រះមួយអង្គមែន ។ កូរីហូរបាននិយាយថា គាត់នឹងជឿលើព្រះ ប្រសិនបើគាត់បានឃើញទីសម្គាល់មួយនៃព្រះចេស្តារបស់ព្រះ ។
អាលម៉ាបានប្រាប់កូរីហូរថា គាត់បានឃើញទីសម្គាល់ជាច្រើនរួចមកហើយអំពីព្រះចេស្តារបស់ព្រះ តាមរយៈព្រះគម្ពីរ និងទីបន្ទាល់របស់ពួកព្យាការីទាំងអស់ ។
អាលម៉ាបាននិយាយថា ផែនដី និងអ្វីៗគ្រប់យ៉ាងនៅលើផែនដីនេះ និងចលនានៃភពនានានៅលើមេឃក៏ជាទីសម្គាល់ផងដែរថា មានព្រះមួយអង្គ ។
កូរីហូរនៅតែបដិសេធពុំព្រមជឿ ។ អាលម៉ាកើតទុក្ខដោយសារអំពើទុច្ចរិតរបស់កូរីហូរ ហើយបានព្រមានគាត់ថា ព្រលឹងរបស់គាត់អាចត្រូវបានបំផ្លាញចោល ។
កូរីហូរនៅតែចង់បានទីសម្គាល់មួយដើម្បីបញ្ជាក់ថាមានព្រះមួយអង្គមែន ។ អាលម៉ាបាននិយាយថា ទីសម្គាល់មកពីព្រះនោះគឺថា កូរីហូរពុំអាចនិយាយបានឡើយ ។
បន្ទាប់ពីអាលម៉ាបាននិយាយរឿងនេះហើយ កូរីហូរពុំអាចនិយាយបានឡើយ ។
កូរីហូរបានសរសេរថា គាត់បានដឹងថាទីសម្គាល់នេះគឺមកពីព្រះ ហើយថាគាត់ដឹងជានិច្ចថា មានព្រះមួយអង្គ ។ គាត់បានសូមឲ្យអាលម៉ាអធិស្ឋាន ហើយដកយកបណ្តាសានោះចេញ ។
អាលម៉ាបានដឹងថា ប្រសិនបើកូរីហូរអាចនិយាយបានវិញ នោះគាត់នឹងកុហកប្រជាជនម្តងទៀត ។ អាលម៉ាបាននិយាយថា ព្រះអម្ចាស់នឹងសម្រេចព្រះទ័យថា កូរីហូរអាចនឹងនិយាយម្តងទៀតឬអត់ ។
ព្រះអម្ចាស់ពុំបានប្រទានឲ្យកូរីហូរអាចនិយាយបានវិញឡើយ ។ កូរីហូរបានចេញពីផ្ទះមួយទៅផ្ទះមួយទៀត សូមទានរកអាហារ ។
មេចៅក្រមបានផ្ញើសំបុត្រមួយទៅទូទាំងដែនដី ដោយប្រាប់នូវអ្វីដែលបានកើតឡើងចំពោះកូរីហូរ ។ គាត់បានប្រាប់ដល់អស់អ្នកដែលបានជឿលើកូរីហូរឲ្យប្រែចិត្ត ។ ប្រជាជនបានប្រែចិត្ត ។
កូរីហូរបានទៅរស់នៅជាមួយពួកសាសន៍សូរាំ ។ នៅថ្ងៃមួយ ខណៈដែលគាត់កំពុងសូមទានគេ គាត់ត្រូវបានគេរត់ជាន់រហូតដល់ស្លាប់ ។