« ព្រះជាព្រះវរបិតា » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ព្រះជាព្រះវរបិតា
ព្រះវរបិតានៃវិញ្ញាណរបស់យើង ទ្រង់ស្រឡាញ់យើងម្នាក់ៗយ៉ាងល្អឥតខ្ចោះ
គម្ពីរវិវរណៈពណ៌នាថាព្រះទ្រង់គង់នៅលើបល្ល័ង្កដូចជាស្ដេច ( សូមមើល វិវរណៈ ៣:២១; ៤:២, ១០; ៥:១ ) ។ ប៉ុន្តែយើងក៏អាចគិតអំពីទ្រង់តាមរបៀបផ្ទាល់ខ្លួនផងដែរ ។ ក្នុងនាមជាព្រះវរបិតាសួគ៌ដ៏ជាទីស្រឡាញ់របស់យើង នោះទ្រង់ពិតជាយកព្រះទ័យទុកដាក់ចំពោះ យើង ៖ អារម្មណ៍របស់យើង បទពិសោធន៍របស់យើង ក្តីសង្ឃឹម និងសុបិនរបស់យើងផងដែរ ។ សមាជិកក្នុងកូរ៉ុមនៃពួកសាវកដប់ពីរនាក់បានសរសេរថា « វាសំខាន់ណាស់ដែលព្រះបានសុំឲ្យយើងហៅទ្រង់ថាជាព្រះវរបិតាក្នុងចំណោមបរមងារនៃសេចក្តីគោរព និងការកោតសរសើរទាំងអស់ដែលត្រូវបានផ្ដល់ជូនដល់ [ ទ្រង់ ] នោះ » ។
ផ្នែកទី ១
យើងអាចស្គាល់ព្រះបាន
នៅយប់មួយដែលព្រះអង្គសង្គ្រោះបានរងទុក្ខវេទនានៅក្នុងសួនច្បារគេតសេម៉ានី ព្រះយេស៊ូវគ្រីស្ទបានអធិស្ឋានទៅកាន់ព្រះវរបិតាសួគ៌ថា « នេះជាជីវិតដ៏អស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង » ( យ៉ូហាន ១៧:៣ ) ។ ដោយសារព្រះស្រឡាញ់យើង ទ្រង់អញ្ជើញយើងឲ្យមកស្គាល់ទ្រង់ដើម្បីយើងអាចទទួលមរតកជីវិតដ៏អស់កល្បជានិច្ច ។ ពេលយើងរៀនកាន់តែច្រើនពីអ្វីដែលព្រះវរបិតាសួគ៌មានលក្ខណៈបែបណានោះ យើងកាន់តែចង់ក្លាយទៅដូចជាទ្រង់ដែរ ។
ការណ៍ទាំងឡាយដែលត្រូវពិចារណា
-
តើបងប្អូនដឹងអ្វីខ្លះអំពីព្រះវរបិតាសួគ៌ ? បងប្អូនអាចសិក្សាអំពីព្រះគម្ពីរមួយចំនួន ឬទាំងអស់ខាងក្រោមនេះ ដោយស្វែងរកអ្វីដែលបានបើកសម្តែងអំពីទ្រង់ ៖
-
ព្រះយេស៊ូវគ្រីស្ទមានបន្ទូលថា « ខ្ញុំជាផ្លូវ ជាសេចក្តីពិត ហើយជាជីវិត បើមិនមកតាមខ្ញុំ នោះគ្មានអ្នកណាទៅឯព្រះវរបិតាបានឡើយ » ( យ៉ូហាន ១៤:៦ ) និង « ចូរមកតាមខ្ញុំចុះ » ( ម៉ាថាយ ១៩:២១ ) ។ តើវគ្គបទគម្ពីរទាំងនេះបង្រៀនអ្វីខ្លះដែលនឹងជួយបងប្អូន ក្នុងការខិតខំដើម្បីស្គាល់ព្រះជាព្រះវរបិតា ?
សកម្មភាពសម្រាប់ការរៀនសូត្រជាមួយអ្នកដទៃ
-
សូម្បីតែកុមារតូចៗក៏អាចស្គាល់ព្រះជាព្រះវរបិតា ហើយមានអារម្មណ៍ជិតស្និទ្ធជាមួយទ្រង់បានដែរ ។ បងប្អូនអាចច្រៀងចម្រៀងដូចជាបទ « ខ្ញុំជាកូនរបស់ព្រះ » ( ទំនុកតម្កើង ល.រ. ១៨៨ ), « ខ្ញុំដឹងព្រះបិតារស់ » ( ទំនុកតម្កើង ល.រ. ១៨៩) ឬ « ប្រាប់ខ្ញុំឲ្យដើរក្នុងពន្លឺ » ( ទំនុកតម្កើង ល.រ. ១៩១ ) ។ បន្ទាប់មកពិភាក្សាអំពីអ្វីដែលពួកគេរៀនអំពីព្រះវរបិតាសួគ៌ចេញពីបទចម្រៀងទាំងនេះ ។
ស្វែងយល់បន្ថែមទៀត
-
« God the Eternal Father » Teachings of Presidents of the Church: Joseph Smith ( ឆ្នាំ ២០០៧ ) ទំព័រ ៣៧–៤៤ ។
-
ជែហ្វ្រី អ័រ ហូឡិន « The Grandeur of God » Liahona ខែ វិច្ឆិកា ឆ្នាំ ២០០៣ ទំព័រ ៧០–៧៣
ផ្នែកទី ២
យើងទាំងអស់គ្នាគឺជាបុត្រាបុត្រីរបស់ព្រះ ។
ទោះបីជាមានភាពខុសគ្នាយ៉ាងខ្លាំងនៅក្នុងគ្រួសារ របស់មនុស្សជាតិក៏ដោយ ក៏សេចក្ដីពិតរួមគ្នាមួយនោះគឺថា យើងទាំងអស់គ្នាគឺជាបុត្រាបុត្រីរបស់ព្រះវរបិតាសួគ៌ដ៏ជាទីស្រឡាញ់ ( សូមមើល ហេព្រើរ ១២:៩ ) ។ « មនុស្សទាំងអស់—ទាំងប្រុសទាំងស្រី—ត្រូវបានបង្កើតឡើងតាមរូបភាពនៃព្រះ ។ មនុស្សម្នាក់ៗសុទ្ធតែជាបុត្រា និងបុត្រីខាងវិញ្ញាណរបស់មាតាបិតាសួគ៌ ដូច្នេះហើយមនុស្សម្នាក់ៗមានចរិត និងគោលដៅនៃព្រះ » ( « ក្រុមគ្រួសារ ៖ ការប្រកាសដល់ពិភពលោក » នៅលើបណ្ណាល័យដំណឹងល្អ ) ។
ព្រះសព្វព្រះទ័យឲ្យបុត្រាបុត្រីរបស់ទ្រង់ម្នាក់ៗមានអំណរដ៏យូរអង្វែងក្នុងជីវិតនេះ ហើយទទួលបានពរនៃការរស់នៅជាមួយនឹងទ្រង់រហូតដល់កល្បជានិច្ច ។
ការណ៍ទាំងឡាយដែលត្រូវពិចារណា
-
ព្រះប្រទានពរជ័យដែលបានសន្យាយ៉ាងច្រើនដល់អស់អ្នកដែលស្មោះត្រង់ ដែលលើសពីសមត្ថភាពរបស់យើងក្នុងការយល់ដឹងទៅទៀត ( សូមមើល កូរិនថូស ទី១ ២:៩–១០ ) ។ ទ្រង់បានចែកចាយព័ត៌មានលម្អិតជាច្រើនអំពីពរជ័យទាំងនេះនៅក្នុងព្រះគម្ពីរ ។ បងប្អូនអាចសិក្សា គោលលទ្ធិ និងសេចក្ដីសញ្ញា ៧៦:៥០–៧០ ហើយស្វែងរកពរជ័យមួយចំនួនដែលរង់ចាំអ្នកដែលដើរតាមព្រះ ។
-
សូមពិចារណាមើល « Earthly Father, Heavenly Father » ( នាទីទី ៣:៥៩ ) ។ តើតួនាទីគ្រួសាររបស់យើងនៅលើផែនដីអាចផ្តល់ឲ្យយើងនូវទស្សនៈតូចមួយ អំពីអ្វីដែលព្រះសព្វព្រះទ័យឲ្យយើងក្លាយដូចទ្រង់ដោយរបៀបណា ?
សកម្មភាពសម្រាប់ការរៀនសូត្រជាមួយអ្នកដទៃ
-
សិក្សា លោកុប្បត្តិ ១:២៦–២៧ ។ តើយើងមានភាពស្រដៀងគ្នាអ្វីខ្លះជាមួយនឹងព្រះ ? ហេតុអ្វីបានជាវាមានប្រយោជន៍ដើម្បីដឹងថាយើងមិនត្រឹមតែជាបុត្រខាងវិញ្ញាណរបស់ព្រះប៉ុណ្ណោះទេ ប៉ុន្តែក៏ថារូបកាយរបស់យើងត្រូវបានបង្កើតឡើងតាមរូបភាពរបស់ទ្រង់ផងដែរនោះ ?
ផ្នែកទី ៣
បងប្អូនអាចពង្រឹងទំនាក់ទំនងរបស់បងប្អូនជាមួយនឹងព្រះវរបិតាសួគ៌បាន
ជាញឹកញាប់នៅពេលយើងចង់មានអារម្មណ៍កាន់តែជិតស្និទ្ធនឹងសមាជិកគ្រួសារ ឬមិត្តភក្តិ នោះយើងធ្វើសកម្មភាពជាមួយពួកគេដូចជា និយាយគ្នា ចំណាយពេលជាមួយគ្នា ហើយយល់ពីពួកគេឲ្យកាន់តែច្បាស់ ។ ព្រះវរបិតាសួគ៌សព្វព្រះទ័យឲ្យយើងនៅជិតទ្រង់—ហើយទ្រង់សព្វព្រះទ័យនៅជិតយើងដែរ ។ ការអញ្ជើញរបស់ទ្រង់មកកាន់យើងគឺថា ៖ « ចូរចូលមកជិតយើង នោះយើងនឹងចូលទៅជិតអ្នក » ( គោលលទ្ធិ និងសេចក្តីសញ្ញា ៨៨:៦៣ ) ។ សូមស្រមៃថាតើវាមានន័យយ៉ាងណាដែលព្រះដ៏មានមហិទ្ធិឬទ្ធិបំផុតនៅក្នុងសកលលោកសព្វព្រះទ័យទាក់ទងជាមួយនឹងយើង ហើយខិតមកជិតយើង ។
ការចងចាំនៃជីវិតមុនជីវិតលើផែនដីនេះរបស់យើងជាមួយនឹងព្រះត្រូវបានលាក់ទុកពីយើង ។ ប៉ុន្តែប្រធាន អ៊ែសរ៉ា ថាហ្វ ប៊ែនសឹន បានពន្យល់ថា « គ្មានអ្វីនឹងធ្វើឲ្យយើងភ្ញាក់ផ្អើលច្រើនជាងនេះទេនៅពេលដែលយើងឆ្លងកាត់វាំងននទៅផ្នែកម្ខាងទៀតនៃវាំងនន ដោយដឹងថាយើងស្គាល់ព្រះវរបិតារបស់យើងច្បាស់ប៉ុណ្ណា ហើយចំណាំព្រះភ័ក្ររបស់ទ្រង់ដែលយើងធ្លាប់ស្គាល់នោះ » ។
ការណ៍ទាំងឡាយដែលត្រូវពិចារណា
-
មានវិធីជាច្រើនដែលយើងអាចចាប់ផ្ដើម និងពង្រឹងទំនាក់ទំនងរបស់យើងជាមួយនឹងព្រះវរបិតាសួគ៌ ។ បងប្អូនអាចសាកល្បងនូវគំនិតមួយចំនួនដែលបានបង្រៀននៅក្នុងវគ្គបទគម្ពីរទាំងនេះ ៖
សកម្មភាពសម្រាប់ការរៀនសូត្រជាមួយអ្នកដទៃ
-
សូមពិចារណាសួរអ្នកផ្សេងទៀតឲ្យស្វែងរកដំណើររឿងមួយនៅក្នុងបន្ទប់ដែលតំណាងឲ្យអ្វីមួយដែលអាចពង្រឹងទំនាក់ទំនងរបស់យើងជាមួយនឹងព្រះវរបិតាសួគ៌ ។ សូមឲ្យពួកគេចែកចាយនូវអ្វីដែលពួកគេបានរកឃើញ និងអ្វីដែលវាតំណាងឲ្យ ។ សូមពិភាក្សាជាមួយគ្នានូវអ្វីដែលបងប្អូនទាំងអស់គ្នាអាចធ្វើបានដែលនឹងនាំបងប្អូនឲ្យខិតទៅកាន់តែជិតព្រះ ។
ស្វែងយល់បន្ថែមទៀត
-
ឌែល ជី រិនឡាន់ « That I Might Draw All Men unto Me » Liahona ខែ ឧសភា ឆ្នាំ ២០១៦ ទំព័រ ៣៩–៤២
-
នែល អេហ្វ ម៉ារីអូត « Abiding in God and Repairing the Breach » Liahona ខែ វិច្ឆិកា ឆ្នាំ ២០១៧ ទំព័រ ១០–១២