« ព្រះគុណ » ប្រធានបទ និង សំណួរ ( ឆ្នាំ ២០២៣ )
មគ្គុទ្ទេសក៍សិក្សាដំណឹងល្អ
ព្រះគុណ
អំណោយទាននៃសេចក្តីស្រឡាញ់ សេចក្តីមេត្តាករុណា និងជំនួយរបស់ព្រះ
ព្រះស្រឡាញ់ និងថែរក្សាអ្នក និងបុត្រាបុត្រីម្នាក់ៗរបស់ទ្រង់ ។ ទ្រង់ប្រទានពរដល់យើងនូវជំនួយ និងជំនួយដ៏ទេវភាពដែលព្រះគម្ពីរសំដៅទៅលើថាជា « ព្រះគុណ » ។ ការណ៍ទាំងអស់នេះអាចធ្វើទៅបានដោយសារដង្វាយធួនរបស់ព្រះយេស៊ូវគ្រីស្ទ ។ យើងទាំងអស់គ្នាមានការខ្វះខាតក្នុងកិច្ចខិតខំរបស់យើងដើម្បីរក្សាព្រះបញ្ញត្តិរបស់ព្រះ ដូច្នេះហើយយើងមិនសមនឹងទទួលបានអំណោយនៃព្រះគុណនោះទេ ។ ផ្ទុយទៅវិញ ព្រះគុណត្រូវបានប្រទានដោយសេរីដោយព្រះវរបិតាសួគ៌ ដែលធ្វើឲ្យយើងអាចទទួលបានពរជ័យដ៏បរិបូរណ៍ ។ នៅពេលដែលអ្នកខិតខំបង្កើនសេចក្តីជំនឿរបស់អ្នកទៅលើព្រះយេស៊ូវគ្រីស្ទ នោះអ្នកនឹងស្គាល់គំរូរាប់មិនអស់នៃព្រះគុណ និងបំណងល្អរបស់ទ្រង់ក្នុងជីវិតរបស់អ្នក ។
ផ្នែកទី ១
រកមើលព្រះគុណរបស់ព្រះក្នុងជីវិតរបស់អ្នក ហើយអ្នកនឹងមានអារម្មណ៍ថាមានសេចក្តីស្រឡាញ់ដ៏បរិបូររបស់ទ្រង់
នៅពេលអ្នកជឿលើព្រះវរបិតាសួគ៌ និងព្រះយេស៊ូវគ្រីស្ទ អ្នកចាប់ផ្ដើមមើលឃើញថាទ្រង់ទាំងទ្វេបានធ្វើសម្រាប់អ្នកប៉ុនណាដោយសារទ្រង់ទាំងទ្វេស្រឡាញ់អ្នក ។ យើងទទួលបានពរជាច្រើនពីព្រះ ទោះបីជាយើងមិនស្គាល់ប្រភពទេវភាពនោះក្តី ។ ពរជ័យផ្សេងទៀតត្រូវបានបម្រុងទុកសម្រាប់អស់អ្នកដែលស្វែងរក ដើម្បីរក្សានូវបញ្ញត្តិរបស់ព្រះវរបិតាសួគ៌ ប្រែចិត្តពីអំពើបាប ហើយបែរទៅរកទ្រង់ដោយរាបសានៅក្នុងការអធិស្ឋានដោយស្មោះទូលសុំនូវអ្វីដែលពួកគេត្រូវការ ។ ប៉ុន្តែគ្មានយើងណាម្នាក់អាចទទួលបានជំនួយ និងការណែនាំរបស់ព្រះបានឡើយ ( សូមមើល រ៉ូម ៣:២៣-២៤; ម៉ូសាយ ២:២០-២១ ) ។ ពរជ័យដ៏ទេវភាពទាំងអស់ត្រូវបានប្រទានតាមរយៈព្រះគុណរបស់ព្រះ ។
ការយល់ដឹងអំពីព្រះគុណដ៏ទេវភាពអាចផ្ដល់ឲ្យអ្នកនូវទំនុកចិត្តដើម្បីស្វែងរកជំនួយរបស់ព្រះជារៀងរាល់ថ្ងៃ ព្រោះទ្រង់មានពោរពេញដោយសេចក្តីមេត្តាករុណា និងមានឆន្ទៈក្នុងការអនុវត្តអំណាចដ៏ទេវភាពជំនួសឲ្យអ្នក ( សូមមើល ហេព្រើរ ៤:១៤-១៦; មរ៉ូណៃ ៨:៣ ) ។ ជីវិតរមែងស្លាប់របស់ព្រះយេស៊ូវគ្រីស្ទគឺជាគំរូមួយនៃការរីកចម្រើនខាងវិញ្ញាណ និងការទទួលបាននូវពរជ័យដ៏វិសេសតាមរយៈព្រះគុណនៃព្រះវរបិតាសួគ៌ ( សូមមើល គោលលទ្ធិ និងសេចក្ដីសញ្ញា ៩៣:១២-១៣ ) ។ ព្រះយេស៊ូវគ្រីស្ទអញ្ជើញអ្នកឲ្យមករកទ្រង់ និងព្រះជាព្រះវរបិតា ហើយទទួលព្រះគុណរបស់ទ្រង់ដើម្បីឲ្យអ្នកអាចទទួលបានពរ និងសរីល្អយ៉ាងពេញលេញដូចទ្រង់ទាំងទ្វេ ( សូមមើល គោលលទ្ធិ និងសេចក្ដីសញ្ញា ៩៣:១៩-២០ ) ។
រឿងទាំងឡាយដែលត្រូវពិចារណា
-
នីហ្វៃបានប្រកាសថា « ព្រលឹងខ្ញុំត្រេកអរដល់ព្រះគុណ [ របស់ព្រះអម្ចាស់ ] » ( នីហ្វៃទី២ ១១:៥ ) ។ តើព្រះគុណរបស់ព្រះមានអត្ថន័យយ៉ាងណាចំពោះបងប្អូន ? តើហេតុអ្វីបងប្អូនគិតថា នីហ្វៃប្រើពាក្យ ត្រេកអរ ដើម្បីរៀបរាប់ពីអារម្មណ៍របស់លោកអំពីព្រះគុណរបស់ព្រះ ?
-
ប្រធាន ឌៀថើរ អេហ្វ អុជដូហ្វ បានបង្រៀន « កត្តាសំខាន់ [ មួយ ] ទៀតក្នុងព្រះគុណនៃព្រះ គឺការបើកបង្អួចស្ថានសួគ៌ ដែលតាមបង្អួចនោះ ព្រះចាក់ស្រោចព្រះពរនៃអំណាច និងកម្លាំង ដែលជួយឲ្យយើងសម្រេចបានកិច្ចការនានា បើមិនដូច្នោះទេ យើងមិនអាចសម្រេចវាបានឡើយ ។ » ។ តើជំហានអ្វីខ្លះដែលអ្នកអាចធ្វើដើម្បីទទួលបានពរជ័យនៃអំណាចដ៏ទេវភាព និងកម្លាំងដែលព្រះបានត្រៀមព្រះកាយជាស្រេចដើម្បីចែកចាយជាមួយអ្នក ?
សកម្មភាពសម្រាប់ការរៀនសូត្រជាមួយអ្នកដទៃ
-
សូមអញ្ជើញសមាជិកក្រុមរបស់អ្នកឲ្យអាន អេធើរ ១២:២៧ ។ ចូរពិភាក្សាអំពីគំរូនៃភាពទន់ខ្សោយដែលជាទូទៅបានជួបប្រទះដោយបុត្រាបុត្រីរបស់ព្រះ ។ ចូរនិយាយអំពីការផ្លាស់ប្តូរដ៏មានសក្តានុពល ដែលអាចកើតឡើងដល់បុគ្គលម្នាក់តាមរយៈព្រះចេស្ដានៃព្រះគុណរបស់ព្រះ ។ សូមអញ្ជើញអ្នកចូលរួមឲ្យចងចាំពេលដែលពួកគេមានអារម្មណ៍អំពីអំណាចនៃព្រះគុណរបស់ព្រះ ។ សូមអញ្ជើញពួកគេឲ្យចែកចាយបទពិសោធន៍តាមការគួរ ។
ស្វែងយល់បន្ថែមទៀត
-
កូរិនថូស ទី១ ២:៩; កូរិនថូស ទី២ ១២:៩-១០; អេធើរ ១២:៤១; មរ៉ូណៃ ១០:៣២–៣៣
-
ឌៀថើរ អេស្វ អុជដូហ្វ « The Gift of Grace » Liahona ខែ ឧសភា ឆ្នាំ ២០១៥ ទំព័រ ១០៧–១១០
-
ប្រាត វីលឃុស « His Grace Is Sufficient » Ensign ខែ កញ្ញា ឆ្នាំ ២០១៣ ទំព័រ ៣៥-៣៧ ។
-
« His Grace: Change Is Possible through Christ » ( វីដេអូ ) នៅលើគេហទំព័រ ChurchofJesusChrist.org ។
ផ្នែកទី ២
អ្នកត្រូវបានសង្គ្រោះដោយព្រះគុណរបស់ព្រះយេស៊ូវគ្រីស្ទ
ព្យាការីលីហៃបានពន្យល់ថា « គ្មានសាច់ឈាមណាអាចរស់នៅក្នុងវត្តមាននៃព្រះបានឡើយ លើកលែងតែដោយបុណ្យគុណ និងសេចក្ដីមេត្តាករុណា និងព្រះគុណនៃព្រះមែស៊ីដ៏បរិសុទ្ធ » ( នីហ្វៃទី២ ២:៨ ) ។ ការបង្ហាញដ៏ធំបំផុតនៃសេចក្ដីស្រឡាញ់របស់ព្រះគឺដង្វាយធួនរបស់ព្រះយេស៊ូវគ្រីស្ទ រួមទាំងការមានព្រះជន្មឡើងវិញរបស់ទ្រង់ផងដែរ ។ ដោយសារការពលិកម្មនោះបានផ្ដល់ឲ្យតាមរយៈព្រះគុណរបស់ព្រះយេស៊ូវគ្រីស្ទ នោះទ្រង់បានសង្គ្រោះយើងពីសេចក្តីស្លាប់ជាអចិន្ត្រៃយ៍ ហើយបើកផ្លូវឲ្យយើងម្នាក់ៗប្រែចិត្តពីអំពើបាបរបស់យើង ហើយរកឃើញការអភ័យទោស ។
ព្រះនឹងមិនបង្ខំនរណាម្នាក់ឲ្យទទួលព្រះគុណរបស់ទ្រង់ ហើយត្រឡប់ទៅកាន់វត្តមានរបស់ទ្រង់វិញឡើយ ។ ហេតុដូច្នេះហើយ ទ្រង់សូមឲ្យយើង « សម្រុះសម្រួល [ ខ្លួនយើង ] ទៅតាមបំណងនៃព្រះ ហើយមិនមែនតាមបំណងនៃអារក្ស និងរបស់ខាងសាច់ឈាមទេ … គឺមានតែដោយសារ និងតាមរយៈព្រះគុណរបស់ព្រះប៉ុណ្ណោះ ដែល [ យើង ] ត្រូវបានសង្គ្រោះ » ( នីហ្វៃទី២ ១០:២៤ ) ។ ក្នុងនាមជាអ្នកដើរតាមដែលមានចិត្តរាបទាប យើងមករកព្រះយេស៊ូវគ្រីស្ទតាមរយៈសេចក្តីជំនឿ ការប្រែចិត្ត ពិធីបុណ្យជ្រមុជទឹក ការទទួលព្រះវិញ្ញាណបរិសុទ្ធ និងការគោរពតាមព្រះបញ្ញត្តិរបស់ទ្រង់ ។ ដោយធ្វើដូច្នេះយើងបង្ហាញពីបំណងប្រាថ្នារបស់យើងក្នុងការធ្វើអ្វីៗគ្រប់យ៉ាងដែលយើងអាចធ្វើបាន ខណៈដែលយើងទទួលស្គាល់ថាព្រះគុណរបស់ទ្រង់គឺជាអ្វីដែលជួយសង្គ្រោះយើងបាន ( សូមមើល នីហ្វៃទី២ ២៥:២៣ ) ។
រឿងទាំងឡាយដែលត្រូវពិចារណា
-
សូមអាន នីហ្វៃទី២ ២៥:២៣ ហើយសូមពិចារណាអំពីគំនិតខាងក្រោមនេះមកពីប្រធាន ឌៀថើរ អេហ្វ អុជដូហ្វ ៖
« យើងពុំអាចត្រូវបានសង្គ្រោះ ‹ ដោយសារ › អ្វីៗដែលយើងអាចធ្វើនោះទេ ។ តើមានពួកយើងណាម្នាក់បានធ្វើ អ្វីៗទាំងអស់ ដែលយើងអាចធ្វើឬទេ ? …
« ខ្ញុំប្រាកដថា នីហ្វៃស្គាល់ថាព្រះគុណរបស់ព្រះអង្គសង្គ្រោះ អនុញ្ញាត និង ធ្វើឲ្យ យើងយកឈ្នះអំពើបាប ។ នេះជាមូលហេតុដែលនីហ្វៃធ្វើការដោយឧស្សាហ៍ព្យាយាមដើម្បីបញ្ចុះបញ្ចូលកូនចៅ និងពួកបងប្អូនលោក ‹ ឲ្យជឿដល់ព្រះគ្រីស្ទ ហើយឲ្យស្រុះស្រួលនឹងព្រះ › [ នីហ្វៃទី២ ២៥:២៣ ] ។
« ទីបញ្ចប់ នោះជា អ្វីដែលយើងអាចធ្វើបាន ! ហើយ នោះជា កិច្ចការដែលយើងធ្វើក្នុងជីវិតរមែងស្លាប់ ! »
ហេតុអ្វីបានជាសំខាន់ក្នុងការចាត់ទុកព្រះគុណជាអំណោយទាន ជាងចាត់ទុកជាអ្វីដែលត្រូវបានទទួល ?
សកម្មភាពសម្រាប់ការរៀនសូត្រជាមួយអ្នកដទៃ
-
មើលសុន្ទរកថាដែល អែលឌើរ ឌៀថើរ អេហ្វ អុជដូហ្វ និយាយអំពីព្រះគុណក្នុងវីដេអូ « Saved by Grace » ( នាទីទី ១:៤១ ) ។ សូមពិភាក្សាគ្នាអំពីសារៈសំខាន់នៃការទទួលខុសត្រូវផ្ទាល់ខ្លួនក្នុងផែនការរបស់ព្រះសម្រាប់សេចក្ដីសង្គ្រោះរបស់យើង ។ ហេតុអ្វីយើងត្រូវតែប្រែចិត្ដប្រសិនបើយើងត្រូវបានសង្គ្រោះដោយព្រះគុណរបស់ព្រះ ?
ស្វែងយល់បន្ថែមទៀត
-
ដាល្លិន អេក អូក « Have You Been Saved ? Ensign ខែ ឧសភា ឆ្នាំ ១៩៩៨ ទំព័រ ៥៥–៥៧
ផ្នែកទី ៣
ព្រះគុណផ្ដល់កម្លាំងដល់អ្នកដើម្បីស្រឡាញ់ និងបម្រើព្រះ និងអ្នកដទៃ
នៅក្នុង Bible Dictionary បញ្ជាក់ថា « វា … តាមរយៈព្រះគុណរបស់ព្រះអម្ចាស់ តាមរយៈសេចក្តីជំនឿលើដង្វាយធួនរបស់ព្រះយេស៊ូវគ្រីស្ទ និងការប្រែចិត្តពីអំពើបាបទាំងឡាយរបស់ពួកគេ នោះបុគ្គលម្នាក់ៗនឹងទទួលបានកម្លាំង និងជំនួយដើម្បីធ្វើកិច្ចការល្អនានា បើពុំដូចនោះទេពួកគេនឹងមិនមានលទ្ធភាពដើម្បីបន្តឡើយប្រសិនបើត្រូវទុកឲ្យពួកគេធ្វើដោយខ្លួនឯងនោះ » ( ព្រះគុណ ) ។
ក្នុងនាមជាអ្នកដើរតាមព្រះយេស៊ូវគ្រីស្ទ អ្នកអាចទទួលបានជំនួយពីព្រះដើម្បីបម្រើព្រះ និងអ្នកដទៃដូចជាសាវកប៉ុល ដែលបានសង្កេតឃើញថា « ខ្ញុំអាចនឹងធ្វើគ្រប់ទាំងអស់បាន ដោយសារព្រះគ្រីស្ទដែលទ្រង់ចម្រើនកម្លាំងដល់ខ្ញុំ » ( ភីលីព ៤:១៣ ) ។ នៅពេលយើងត្រូវបានហៅឲ្យបម្រើនៅក្នុងនគរព្រះ នោះទ្រង់ធ្វើឲ្យយើងមានលក្ខណៈសម្បត្តិគ្រប់គ្រាន់ដោយការផ្ដល់ព្រះគុណដើម្បីសម្រេចកិច្ចការទ្រង់ ( សូមមើល អាលម៉ា ២៦:១១-១៣ ) ។ អំណោយនៃព្រះគុណក៏ផ្តល់ឲ្យបុគ្គលទាំងឡាយនូវកម្លាំងបន្ថែមដើម្បីប្រឈមមុខនឹងឧបសគ្គក្នុងជីវិត ( សូមមើល ម៉ូសាយ ២៤:១៤-១៥; អាលម៉ា ៣១:៣០–៣៥, ៣៨ ) ។
រឿងទាំងឡាយដែលត្រូវពិចារណា
-
សូមស្រមៃថាកាច់បំបាក់មែកឈើតូចមួយចេញពីដើមឈើ ។ សូមពិចារណាអំពីអ្វីដែលនឹងកើតឡើងចំពោះមែកឈើនោះបន្ទាប់ពីត្រូវបានដាច់ចេញពីដើមរបស់វា ។ សូមអាន យ៉ូហាន ១៥:១–១១ ។ តើព្រះយេស៊ូចង់ឲ្យសិស្សរបស់ទ្រង់យល់យ៉ាងណា អំពីអំណាចដែលទ្រង់ប្រទានដល់បុត្រាបុត្រីរបស់ព្រះ ? តើគោលការណ៍នេះអាចជួយអ្នកឲ្យយល់កាន់តែច្បាស់អំពីរបៀបដែលព្រះគុណអាចពង្រឹងអ្នកក្នុងកិច្ចខិតខំរបស់អ្នក ដើម្បីបម្រើអ្នកដទៃយ៉ាងដូចម្ដេច ?
សកម្មភាពសម្រាប់ការរៀនសូត្រជាមួយអ្នកដទៃ
-
មើលវីដេអូ « The Atonement Enables Us » ( ២:១៨ ) ។ សូមនិយាយជាមួយគ្នាអំពីផលប៉ះពាល់ដែលព្រះគុណរបស់ព្រះមានទៅលើកិច្ចខិតខំប្រឹងប្រែងរបស់យើងដើម្បីអនុវត្តកិច្ចការល្អ ។ ហេតុអ្វីបានជាសំខាន់ក្នុងការអធិស្ឋានសម្រាប់ព្រះគុណរបស់ព្រះអម្ចាស់ពេលយើងព្យាយាមបម្រើ និងធ្វើការងារបម្រើដល់អ្នកដទៃ ?
ស្វែងយល់បន្ថែមទៀត
-
កូរិនថូស ទី២ ៩:៨; យ៉ាកុប ៤:៧; គោលលទ្ធិ និងសេចក្តីសញ្ញា ៥០:៤០-៤៤
-
ដេវីឌ អេ បែដណា « The Atonement and the Journey of Mortality » Ensign ខែ មេសា ឆ្នាំ ២០១២ ទំព័រ ៤០–៤៧ ។