« ថ្ងែទី ៣–៩ ខែ មីនា ‹ ចូររៀនអំពីយើង › គោលលទ្ធិនិងសេចក្តីសញ្ញា ១៩ » ចូរមកតាមខ្ញុំ–សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ១៩ » ចូរមកតាមខ្ញុំ—សម្រាប់គេហដ្ឋាន និង សាសនាចក្រ ៖ ឆ្នាំ ២០២៥

ព័ត៌មានលម្អិតមកពី ផ្លូវគេតសេម៉ានី ដោយ ស្ទីវ ម៉ាកជីនធី

ថ្ងៃទី ៣-៩ ខែ មីនា ៖ « ចូររៀនអំពីយើង »

គោលលទ្ធិ និងសេចក្ដីសញ្ញា ១៩

ម៉ាទិន និង លូស៊ី ហារីស ចំណាយពេលយ៉ាងយូរ ដើម្បីមានចម្ការដ៏ល្អបំផុតមួយនៅភូមិប៉ាលម៉ៃរ៉ា រដ្ឋញូវយ៉ក ។ ប៉ុន្ដែនៅ ឆ្នាំ ១៨២៩ វាច្បាស់ណាស់ថាព្រះគម្ពីរមរមនអាចបោះពុម្ពបានទាល់តែ ម៉ាទិន ដាក់បញ្ចាំចម្ការគាត់ដើម្បីបង់ថ្លៃបោះពុម្ព ។ ម៉ាទិន បានមានទីបន្ទាល់អំពីព្រះគម្ពីរមរមនប៉ុន្ដែ លូស៊ី មិនមានទេ ។ ប្រសិនបើ ម៉ាទិន នៅបន្ដបញ្ចាំ ហើយព្រះគម្ពីរមរមនមិនអាចលក់ដាច់នោះទេ គាត់នឹងបាត់បង់ចម្ការរបស់គាត់ អាពាហ៍ពិពាហ៍គាត់នឹងល្អក់កករ ហើយធ្វើឲ្យខូចកេរ្តិ៍ឈ្មោះនៅក្នុងសហគមន៍ ។ ទោះបីជាស្ថានភាពរបស់យើងខុសពីស្ថានភាពរបស់ម៉ាទិន ពេលខ្លះ ឬយ៉ាងណា ក៏យើងទាំងអស់គ្នាប្រឈមមុខនឹងសំណួរពិបាកៗដូចជាអស់អ្នកទាំងឡាយដែលគាត់បានប្រឈមមុខផងដែរថា ៖ តើដំណឹងល្អនៃព្រះយេស៊ូវគ្រីស្ទមានតម្លៃអ្វីសម្រាប់ខ្ញុំ ? តើខ្ញុំស្ម័គ្រចិត្តនឹងលះបង់អ្វីខ្លះដើម្បីជួយកសាងនគររបស់ព្រះ ? នៅទីបំផុត ម៉ាទីន ហារីស បានសម្រេចចិត្តថាគាត់នឹងខ្ចីប្រាក់កម្ចីកសិដ្ឋានរបស់គាត់ដើម្បីឲ្យព្រះគម្ពីរមរមនចំនួន ៥០០០ ច្បាប់ដំបូងអាចបានបោះពុម្ព ។ ប៉ុន្តែសូម្បីតែការលះបង់នេះ—ហើយការលះបង់ណាមួយដែលយើងអាចធ្វើបាន—គឺតូចបើប្រៀបធៀបទៅនឹងពលិកម្មរបស់ព្រះយេស៊ូវគ្រីស្ទ « មហិមាលើអ្វីៗទាំងអស់ » ( គោលលទ្ធិ និងសេចក្តីសញ្ញា ១៩:១៨ ) ដែលបានច្រួចព្រះលោហិតចេញពីគ្រប់រន្ធញើសដើម្បីសង្គ្រោះអ្នកប្រែចិត្ត ។

សម្រាប់ព័ត៌មានបន្ថែមអំពីការបោះពុម្ពព្រះគម្ពីរមរមនសូមមើល ពួកបរិសុទ្ធ, ១:៧៦–៨៤ ។

គំនិតសម្រាប់ការរៀនសូត្រនៅឯគេហដ្ឋាន និងនៅព្រះវិហារ

គោលលទ្ធិ និងសេចក្តីសញ្ញា ១៩:១–១២

« យើងជាព្រះ គ្មានទីបញ្ចប់ » ។

យ៉ូសែប ស្ម៊ីធ បានពន្យល់ថាវិវរណៈនៅក្នុង កណ្ឌទី ១៩ គឺជា « បញ្ញត្តិ … ដល់ ម៉ាទីន ហារីស ដែលត្រូវបានប្រទានឲ្យមកពីព្រះអង្គទ្រង់ដែលនៅអស់កល្បជានិច្ច » ( ក្បាលកណ្ឌ ) ។ រកមើលនៅក្នុង ខទី ១-១២ កន្លែងដែលព្រះអម្ចាស់គូសបញ្ជាក់អំពីនិស្ស័យដ៏អស់កល្បជានិច្ចរបស់ទ្រង់ ។ ហេតុអ្វីអ្នកគិតថាវាសំខាន់សម្រាប់ ម៉ាទីន ហារីស ដើម្បីដឹងរឿងនេះអំពីព្រះអម្ចាស់ ? ហេតុអ្វីបានជាវាសំខាន់សម្រាប់អ្នកដើម្បីដឹងរឿងនេះ ?

ហេតុអ្វីអ្នកគិតថាព្រះយេស៊ូវគ្រីស្ទត្រូវបានគេហៅថាជា « ដើម ហើយជាចុង » ? ( ខទី ១ ) ។

គោលលទ្ធិ និងសេចក្តីសញ្ញា ១៩:១៥–២០

ព្រះយេស៊ូវគ្រីស្ទបានរងទុក្ខដើម្បីឲ្យខ្ញុំអាចប្រែចិត្ត និងមករកទ្រង់បាន ។

ព្រះគម្ពីរសញ្ញាថ្មីពិពណ៌នាការរងទុក្ខរបស់ព្រះអង្គសង្គ្រោះនៅសួនច្បារគេតសេម៉ានី ចេញពីទស្សនវិស័យនៃអស់អ្នកទាំងឡាយដែលបានសង្កេតការណ៍នេះ ។ នៅក្នុង គោលលទ្ធិ និងសេចក្ដីសញ្ញា ១៩:១៥–២០ ព្រះយេស៊ូវគ្រីស្ទបានមានបន្ទូលអំពីការរងទុក្ខរបស់ទ្រង់ចេញពីទស្សនៈផ្ទាល់របស់ទ្រង់ ។ នៅពេលដែលបងប្អូនអានដំណើររឿងផ្ទាល់ខ្លួនដ៏ពិសិដ្ឋនេះ សូមស្វែងរករបៀបដែលព្រះអង្គសង្គ្រោះបានរៀបរាប់អំពីទុក្ខវេទនារបស់ទ្រង់ ។ សូមពិចារណាអំពីអ្វីដែលពាក្យ ឬឃ្លានីមួយៗបង្រៀនបងប្អូន ។ ហេតុអ្វីក៏ព្រះអង្គសង្គ្រោះស្ម័គ្រព្រះទ័យរងទុក្ខ ? បងប្អូនអាចស្វែងរកបន្ថែមទៀតនៅក្នុង យ៉ូហាន ១៥:១៣; ម៉ូសាយ ៣:៧; អាលម៉ា ៧:១១–១២; គោលលទ្ធិ និងសេចក្ដីសញ្ញា ១៨:១០–១៣ ។

អារម្មណ៍ដែលបងប្អូនមាននៅពេលបងប្អូនសិក្សាអំពីទុក្ខវេទនារបស់ព្រះអង្គសង្គ្រោះអាចនឹងជំរុញឲ្យមានសំណួរដូចនេះ ៖ ហេតុអ្វីបានជាព្រះអង្គសង្គ្រោះត្រូវរងទុក្ខចំពោះអំពើបាបរបស់ខ្ញុំ ? ហេតុអ្វីខ្ញុំត្រូវប្រែចិត្ដដើម្បីទទួលពរជ័យពេញលេញនៃការពលិកម្មរបស់ទ្រង់ ? បងប្អូនអាចរកឃើញការយល់ដឹងអំពីសំណួរទាំងនេះ និងសំណួរផ្សេងទៀតនៅក្នុងសារលិខិតរបស់អែលឌើរ អូលីសេស សូរ៉េស « ព្រះយេស៊ូវគ្រីស្ទ ៖អង្គមើលថែនៃព្រលឹងរបស់យើង » ( លីអាហូណា ខែ ឧសភា ឆ្នាំ ២០២១ ទំព័រ ៨២-៨៤ ) ។ ពេលបងប្អូនសិក្សា តើបងប្អូនមានចំណាប់អារម្មណ៍អ្វីខ្លះ ? សូមពិចារណាកត់ត្រាអារម្មណ៍របស់បងប្អូនអំពីព្រះយេស៊ូវគ្រីស្ទ និងពលិកម្មរបស់ទ្រង់សម្រាប់បងប្អូន ។

ជាផ្នែកមួយនៃការសិក្សា និងការថ្វាយបង្គំរបស់បងប្អូន បងប្អូនអាចស្វែងរកទំនុកតម្កើងដែលបងប្អូនអាចស្តាប់ ឬច្រៀងដែលបង្ហាញអំពីការដឹងគុណរបស់បងប្អូនចំពោះការរងទុក្ខរបស់ព្រះអង្គសង្រ្គោះជំនួសបងប្អូន ។ « ខ្ញុំឆ្ងល់យ៉ាងអស្ចារ្យ » ( ទំនុកតម្កើង ល.រ. ១១៥ ) ជាគំរូដ៏ល្អ ។

តើបងប្អូនមានអារម្មណ៍ថាព្រះវរបិតាសួគ៌ និងព្រះយេស៊ូវគ្រីស្ទនឹងឲ្យបងប្អូនធ្វើអ្វីខ្លះដែលជាលទ្ធផលនៃអ្វីដែលបងប្អូនមានអារម្មណ៍ និងបានសិក្សានោះ ?

សូមមើលផងដែរ « ព្រះយេស៊ូវគ្រីស្ទនឹងជួយអ្នក » ដើម្បីកម្លាំងនៃយុវវ័យ ៖ សេចក្តីណែនាំដើម្បីធ្វើការជ្រើសរើស ( ឆ្នាំ ២០២២ ) ទំព័រ ៦–៩;Topics and Questions « Atonement of Jesus Christ » « Repentance » នៅលើបណ្ណាល័យដំណឹងល្អ; ឌី ថត គ្រីស្តូហ្វឺសិន « The Divine Gift of Repentance » Liahona ខែ វិច្ឆិកា ឆ្នាំ ២០១១ ទំព័រ ៣៨–៤១; « ព្រះយេស៊ូរងទុក្ខក្នុងសួនច្បារគេតសេម៉ានី » ( វីដេអូ ) នៅលើបណ្ណាល័យដំណឹងល្អ ។

គោលលទ្ធិ និងសេចក្តីសញ្ញា ១៩:២៣

សេចក្ដីសុខសាន្ដកើតចេញពីការរៀនសូត្រអំពីព្រះយេស៊ូវគ្រីស្ទ និងការធ្វើតាមទ្រង់ ។

សូមពិចារណាអំពីការអញ្ជើញរបស់ព្រះអង្គសង្គ្រោះឲ្យ« រៀនអំពីយើង » ។ តើបងប្អូនរៀនអ្វីខ្លះអំពីព្រះយេស៊ូវគ្រីស្ទនៅក្នុង គោលលទ្ធិ និងសេចក្តីសញ្ញា ១៩ ? សូមកត់ត្រាគំនិតរបស់បងប្អូន ហើយជញ្ជឹងគិតអំពីរបៀបដែលសេចក្ដីពិតទាំងនេះអំពីព្រះអង្គសង្គ្រោះជួយបងប្អូនឲ្យរកឃើញសេចក្ដីសុខសាន្ដ ។ តើវាន័យចំពោះបងប្អូនយ៉ាងដូចម្ដេចដែលត្រូវ « ដើរក្នុងភាពស្លូតបូតនៃព្រះវិញ្ញាណរបស់ [ ទ្រង់ ] » ?

សូមមើលផងដែរ ហិនរី ប៊ី អាវរិង « ការស្វែងរកភាពសុខសាន្តផ្ទាល់ខ្លួន » លីអាហូណា ខែ ឧសភា ឆ្នាំ ២០២៣ ទំព័រ ២៩-៣១; « Peace in Christ » ( វីដេអូ ) នៅលើបណ្ណាល័យដំណឹងល្អ ។

គោលលទ្ធិ និងសេចក្តីសញ្ញា ១៩:២៦–៤១

ពរជ័យរបស់ព្រះគឺមហិមាជាងសម្បត្តិនៃផែនដី ។

ព្រះគម្ពីរមរមនលក់មិនសូវដាច់ទេនៅ ប៉ាលម៉ៃរ៉ា ។ ជាលទ្ធផល ម៉ាទីន ហារីស បានត្រូវលក់ដីមួយភាគធំនៃកសិដ្ឋានរបស់គាត់ដើម្បីសងបំណុលទៅឲ្យអ្នកបោះពុម្ព ( សូមមើល « The Contributions of Martin Harris » Revelations in Context ៧-៨ ) ។ សូមពិចារណាអំពីការលះបង់របស់ ម៉ាទីន និងពរជ័យដែលបងប្អូនបានទទួលដោយសារតែវា—ដូចដែលបងប្អូនអាន គោលលទ្ធិ និងសេចក្ដីសញ្ញា ១៩:២៦-៤១ ។ បងប្អូនក៏អាចគិតអំពីអ្វីដែលព្រះអម្ចាស់បានសុំឲ្យបងប្អូនលះបង់ផងដែរ ។ តើបងប្អូនរកឃើញអ្វីខ្លះនៅក្នុងខគម្ពីរទាំងនេះដែលបំផុសគំនិតបងប្អូនឲ្យធ្វើការលះបង់ទាំងនេះដោយ « អំណរ » និង « ការរីករាយ » ( សូមមើលផងដែរ ខទី ១៥–២០ ) ?

គំនូរកសិដ្ឋាននៅ ប៉ាលម៉ៃរ៉ា — ព័ត៌មានលម្អិតមកពី ចម្ការរបស់ ម៉ាទីន ហារីស ដោយ អាល រ៉ោនស៍

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ១៩:១៦-១៩

ព្រះយេស៊ូវគ្រីស្ទបានរងទុក្ខដើម្បីខ្ញុំ ។

បងប្អូនអាចជួយកូនរបស់បងប្អូនឲ្យមានអារម្មណ៍គោរព និងដឹងគុណចំពោះព្រះអង្គសង្រ្គោះដោយការអានរួមគ្នា គោលលទ្ធិ និងសេចក្ដីសញ្ញា ១៩:១៦-១៩ ឬ « ជំពូកទី ៥១ ៖ ព្រះគ្រីស្ទរងទុក្ខនៅក្នុងសួនច្បារគែតសេម៉ានី » នៅក្នុង ដំណើររឿងព្រះគម្ពីរសញ្ញាថ្មី ទំព័រ ១២៩-១៣២ ឬវីដេអូដែលត្រូវគ្នានៅក្នុងបណ្ណាល័យដំណឹងល្អ ។ សូមពិចារណាអំពីការផ្អាកដើម្បីធ្វើឲ្យប្រាកដថាកូនរបស់បងប្អូនយល់ និងអនុញ្ញាតឲ្យពួកគេបង្ហាញពីអារម្មណ៍របស់ពួកគេ ។ ឧទាហរណ៍នៅក្នុង ខទី ១៦ តើអ្វីទៅជា « រឿងទាំងនេះ » ដែលព្រះយេស៊ូបានទទួលរងទុក្ខសម្រាប់យើង ? ( សូមមើល ម៉ូសាយ ៣:៧; អាល់ម៉ា ៧:១១-១២ ) ។ តើយើងអាចរៀនអ្វីខ្លះមកពីការពិពណ៌នារបស់ទ្រង់ ? តើយើងអាចបង្ហាញអំណរគុណរបស់យើងចំពោះអ្វីដែលព្រះអង្គសង្រ្គោះធ្វើសម្រាប់យើងដោយរបៀបណា ?

Chapter 51: Jesus Suffers in the Garden of Gethsemane

ជួយកុមារឲ្យរៀនចេញពីព្រះគម្ពីរ ។ កុមារមួយចំនួនអាចនឹងពិបាកក្នុងការអានបទគម្ពីរ ។ សូមផ្ដោតការយកចិត្តទុកដាក់ទៅលើតែខ ឬឃ្លាមួយដែលនឹងអាចជួយដល់ពួកគេ ។

សូមជួយកុមាររកមើលនៅក្នុង ទំនុកតម្កើង ឬ សៀវភៅចម្រៀងកុមារ បទចម្រៀងដែលជួយពួកគេបង្ហាញអារម្មណ៍របស់ពួកគេអំពីព្រះយេស៊ូវគ្រីស្ទ ( សូមមើល លិបិក្រមប្រធានបទនៅក្នុងសៀវភៅទាំងនេះ ) ។

ព្រះយេស៊ូវកំពុងអធិស្ឋាននៅក្នុងសួនច្បារគែតសេម៉ានី

គោលលទ្ធិ និងសេចក្ដីសញ្ញា ១៩:១៨–១៩, ២៤

ព្រះយេស៊ូវគ្រីស្ទបានគោរពប្រតិបត្តិតាមព្រះវរបិតាសួគ៌ទោះជាវាលំបាកក្ដី ។

ការរងទុក្ខចំពោះអំពើបាបរបស់យើងគឺពិបាកណាស់ ប៉ុន្តែព្រះយេស៊ូវគ្រីស្ទមានឆន្ទៈធ្វើវាដើម្បីគោរពប្រតិបត្តិតាមព្រះបិតារបស់ទ្រង់ និងបង្ហាញសេចក្ដីស្រឡាញ់របស់ទ្រង់ចំពោះព្រះបិតា និងចំពោះយើង ។ បងប្អូនអាចមើលរូបភាពមួយអំពីព្រះយេស៊ូវគ្រីស្ទដែលកំពុងរងទុក្ខនៅក្នុងសួនច្បារគែតសេម៉ានីជាមួយគ្នា ( ដូចជារូបទាំងនោះដែលនៅក្នុងគម្រោងមេរៀននេះ ) ហើយសុំឲ្យកូនរបស់បងប្អូនប្រាប់បងប្អូនពីអ្វីដែលពួកគេដឹងអំពីអ្វីដែលកំពុងកើតឡើងនៅក្នុងរូបភាពនោះ ។ បងប្អូនអាចអានជាមួយគ្នា គោលលទ្ធិ និងសេចក្ដីសញ្ញា ១៩:១៨-១៩, ២៤ ដើម្បីបញ្ជាក់ថាការរងទុក្ខចំពោះអំពើបាបរបស់យើង គឺជារឿងដ៏លំបាកបំផុតដែលនរណាម្នាក់ធ្លាប់ឆ្លងកាត់ប៉ុន្តែដោយសារព្រះយេស៊ូវស្រឡាញ់ព្រះវរបិតា និងយើង នោះទ្រង់គោរពតាមព្រះបញ្ញត្តិរបស់ព្រះ ( សូមមើលផងដែរ ម៉ូសាយ ៣:៧ ) ។ តើកិច្ចការសំខាន់អ្វីខ្លះដែលព្រះបានប្រទានឲ្យយើងធ្វើ ? តើយើងអាចស្វែងរកភាពក្លាហាន ដើម្បីគោរពទ្រង់ដោយរបៀបណា ?

គោលលទ្ធិ និងសេចក្តីសញ្ញា ១៩:២៣

« ចូររៀនអំពីយើង ហើយស្តាប់តាមព្រះបន្ទូលទាំងឡាយរបស់យើងចុះ »

សូមជួយកុមារគិតអំពីសកម្មភាពសាមញ្ញដែលត្រូវនឹងឃ្លានៅក្នុង គោលលទ្ធិ និងសេចក្ដីសញ្ញា ១៩:២៣ ។ សូមអានខគម្ពីរជាច្រើនដងខណៈពេលដែលកុមារកំពុងធ្វើសកម្មភាព ។ សូមជួយពួកគេគិតអំពីវិធីនានាដែលយើងអាចរៀនអំពីព្រះគ្រីស្ទ និងស្ដាប់តាមព្រះបន្ទូលរបស់ទ្រង់ ។

គោលលទ្ធិ និងសេចក្ដីសញ្ញា ១៩:៣៨

ពរជ័យរបស់ព្រះគឺមហិមាជាងសម្បត្តិនៃផែនដី ។

បងប្អូន និងកូនៗរបស់បងប្អូនអាចប្តូរវេនគ្នាកាន់ព្រះគម្ពីរមរមន ហើយចែកចាយនូវអ្វីដែលបងប្អូនស្រឡាញ់អំពីព្រះគម្ពីរនេះ ។ សូមនិយាយដោយសង្ខេបអំពីការលះបង់របស់ ម៉ាទីន ហារីស ដើម្បីឲ្យព្រះគម្ពីរមរមនអាចបានបោះពុម្ព( គោលលទ្ធិ និងសេចក្តីសញ្ញា, ៣៣ ) ។ តើព្រះអម្ចាស់បានមានបន្ទូលអ្វីខ្លះទៅកាន់ ម៉ាទីន នៅក្នុង គោលលទ្ធិ និងសេចក្ដីសញ្ញា ១៩:៣៨ ដែលអាចជួយគាត់ឲ្យស្មោះត្រង់ និងគោរពប្រតិបត្តិ ? សូមជួយកុមារឲ្យគិតអំពីអ្វីមួយដែលពួកគេអាចធ្វើការលះបង់ដើម្បីគោរពតាមព្រះ ឬជួយនៅក្នុងកិច្ចការរបស់ទ្រង់ ។

2:7
Chapter 7: Witnesses See the Gold Plates: 1829–1830

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

គំនូរព្រះយេស៊ូវនៅក្រុងសួនច្បារគែតសេម៉ានី — ព្រះគ្រីស្ទកំពុងអធិស្ឋាននៅក្នុងសួនច្បារគែតសេម៉ានី ដោយ ហែរម៉ាន់ ក្លេមិនហ្ស៍