« ថ្ងៃទី ១៧-២៣ ខែ មីនា ៖ ‹ ចូរស្វែងរករបស់ទាំងឡាយណាដែលគ្រាន់បើជាងនេះវិញ › ៖ គោលលទ្ធិ និងសេចក្ដីសញ្ញា ២៣-២៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )

« គោលលទ្ធិ និងសេចក្តីសញ្ញា ២៣-២៦ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥

ថ្ងៃទី ១៧-២៣ ខែ មីនា ៖ « ចូរស្វែងរករបស់ទាំងឡាយណាដែលគ្រាន់បើជាងនេះវិញ »

គោលលទ្ធិ និងសេចក្ដីសញ្ញា ២៣–២៦

សម្រាប់មនុស្សភាគច្រើន ការទទួលបានបុណ្យជ្រមុជទឹកគឺជាបទពិសោធន៍ដ៏គួរឲ្យគោរព និងសុខសាន្តមួយ ។ ទោះជាយ៉ាងណាក៏ដោយ ពិធីបុណ្យជ្រមុជទឹករបស់ អិមម៉ា ស្ម៊ីធ និងអ្នកផ្សេងទៀត ត្រូវបានរំខានដោយហ្វូងមនុស្សដែលបានចំអកពួកគេ គំរាមកំហែងពួកគេ ហើយបង្ខំពួកគេឲ្យរត់គេចខ្លួន ។ រួចហើយកាល យ៉ូសែប ហៀបនឹងបញ្ជាក់សមាជិកថ្មី លោកត្រូវបានគេចាប់ដោយសារបានធ្វើឲ្យសហគមន៍អាក់អន់ចិត្តតាមរយៈការផ្សាយអំពីព្រះគម្ពីរមរមន ។ នៅក្នុងការប្រឆាំងទាំងអស់នេះ តើ អិមម៉ា អាចរកឃើញការធានាថានាងកំពុងធ្វើអ្វីដែលត្រឹមត្រូវយ៉ាងដូចម្ដេច ? កន្លែងតែមួយដែលយើងគ្រប់គ្នាអាចស្វែងរកការធានានោះបាន—គឺតាមរយៈវិវរណៈមកពីព្រះអម្ចាស់ ។ ទ្រង់បានមានបន្ទូលទៅកាន់ អិមម៉ា អំពី « រឿងនៃ [ ពិភពលោក ] ដែលប្រសើរជាងនេះ—គឺនគររបស់ទ្រង់—និងកន្លែងរបស់នាងនៅក្នុងនគរនោះ ។ ទ្រង់បានប្រាប់នាងកុំឲ្យភ័យខ្លាចឲ្យ « លើកចិត្ត [ របស់នាង ] ហើយអរសប្បាយ » និង «នៅជាប់នឹងសេចក្ដីសញ្ញាទាំងឡាយ [ ដែលនាង] បានធ្វើចុះ » ។ ហើយពាក្យនៃការលើកទឹកចិត្ត និងការប្រឹក្សាទាំងនេះគឺជា« សំឡេងរបស់យើងដល់មនុស្សទាំងពួង » ( គោលលទ្ធិ និងសេចក្តីសញ្ញា ២៥:៩-១០, ១៣, ១៦ ) ។

សូមមើលផងដែរ ពួកបរិសុទ្ធ, ១:៨៩–៩០, ៩៤–៩៧ ។

គំនិតសម្រាប់ការរៀនសូត្រនៅឯគេហដ្ឋាន និងនៅព្រះវិហារ

គោលលទ្ធិ និងសេចក្តីសញ្ញា ២៤

ព្រះអង្គសង្គ្រោះអាចលើកខ្ញុំ « ឡើងឲ្យរួចពីសេចក្ដីវេទនាទាំងឡាយរបស់ [ ខ្ញុំ ] » ។

វិវរណៈនៅក្នុង គោលលទ្ធិ និងសេចក្ដីសញ្ញា ២៤ ត្រូវបានប្រទានឲ្យ « ដើម្បីចម្រើនកម្លាំង លើកទឹកចិត្ត និងបង្គាប់ » ដល់ យ៉ូសែប ស្ម៊ីធ និង អូលីវើរ នៅក្នុងគ្រាដ៏លំបាកមួយ ( ក្បាលកណ្ឌ សូមមើលផងដែរ ពួកបរិសុទ្ធ, ១:៩៤-៩៦ ) ។ ចូររកមើលពាក្យនៅក្នុង គោលលទ្ធិ និងសេចក្ដីសញ្ញា ២៤ ដែលបងប្អូននឹងមានអារម្មណ៍ថានឹងបានពង្រឹង និងលើកទឹកចិត្តដល់ពួកគេ ។

តើបទគម្ពីរដូចខាងក្រោមនេះផ្ដល់យោបល់អ្វីខ្លះដល់បងប្អូន អំពីរបៀបដែលព្រះអង្គសង្គ្រោះអាចជួយបងប្អូនពីឧបសគ្គទាំងឡាយរបស់បងប្អូន ?

គោលលទ្ធិ និងសេចក្ដីសញ្ញា ២៤:១–៣

គោលលទ្ធិ និងសេចក្ដីសញ្ញា ២៤:៨

គោលលទ្ធិ និងសេចក្ដីសញ្ញា ១២១:៧–៨

អេសាយ ៤០:២៨–៣១

ម៉ូសាយ ២៤:១៤–១៥

ព្រះគ្រីស្ទកំពុងព្យាបាលបុរសម្នាក់ — ព័ត៌មានលម្អិតមកពី ទ្រង់បានព្យាបាលមនុស្សជាច្រើនដែលមានជំងឺផ្សេងៗ ដោយ ជេ ខើក រីឆាត

គោលលទ្ធិ និងសេចក្តីសញ្ញា ២៥

ខ្ញុំមានតួនាទីសំខាន់ដើម្បីធ្វើនៅក្នុងនគររបស់ព្រះ ។

នៅពេលដែល អិមម៉ា ស្ម៊ីធ បានមើលការស្តារឡើងវិញដែលលាតត្រដាងតាមរយៈស្វាមីរបស់នាងគឺ យ៉ូសែប ស្ម៊ីធ នាងប្រហែលជាឆ្ងល់ថា តើតួនាទីរបស់នាងអាចជាអ្វីបាន ។ សូមរកមើលចម្លើយរបស់ព្រះដែលមាននៅក្នុង គោលលទ្ធិ និងសេចក្ដីសញ្ញា ២៥ ។ តើបងប្អូនរកឃើញអ្វីខ្លះនៅក្នុងកណ្ឌនេះដែលបងប្អូនមានអារម្មណ៍ថាជា « សំឡេងរបស់ទ្រង់ចំពោះ [ បងប្អូន ] ដែរឬទេ ? ( ខទី ១៦ ) ។

សូមមើលផងដែរ « An Elect Lady » ( វីដេអូ ) នៅលើបណ្ណាល័យដំណឹងល្អ; « Thou Art an Elect Lady » នៅក្នុង Revelations in Context ទំព័រ ៣៣–៣៩, ចយ ឌី ចូនស៍ « An Especially Noble Calling » Liahona ខែ ឧសភា ឆ្នាំ ២០២០ ទំព័រ ១៥-១៨ ។

គោលលទ្ធិ និងសេចក្តីសញ្ញា ២៥:៥, ១៤

« ចូរបន្តនៅក្នុងវិញ្ញាណនៃភាពស្លូតបូត » ។

តើឃ្លា « នៅក្នុងវិញ្ញាណនៃភាពស្លូតបូត » មានអត្ថន័យយ៉ាងណាចំពោះបងប្អូន ? សូមពិចារណាស្វែងរក កណ្ឌទី ២៥ សម្រាប់ពាក្យ និងឃ្លាដែលជួយបងប្អូនឲ្យយល់អំពីអត្ថន័យនៃភាពស្លូតបូត ។ សារលិខិតរបស់អែលឌើរ ដេវីឌ អេ បែដណា « Meek and Lowly of Heart » ក៏អាចជួយបានផងដែរ ( Liahona ខែ ឧសភា ឆ្នាំ ២០១៨ ទំព័រ ៣០–៣៣ ) ។ តើព្រះយេស៊ូគ្រីស្ទជាគំរូនៃភាពស្លូតបូតចំពោះបងប្អូនដោយរបៀបណា ? ( សូមមើល ម៉ាថាយ ១១:២៨-៣០ ) ។ សូមគិតអំពីអ្វីៗនៅក្នុងជីវិតរបស់បងប្អូនដែលបងប្អូនអាចធ្វើ « ក្នុងវិញ្ញាណនៃភាពស្លូតបូត » ។

គោលលទ្ធិ និងសេចក្ដីសញ្ញា ២៥:១០, ១៣

« អ្នកត្រូវទុកចោលរបស់ទាំងឡាយនៃពិភពលោកនេះ ហើយចូរស្វែងរករបស់ទាំងឡាយណាដែលគ្រាន់បើជាងនេះវិញ » ។

នៅពេលដែលបងប្អូនពិចារណាអំពីដំបូន្មានរបស់ព្រះអម្ចាស់នៅក្នុង គោលលទ្ធិ និងសេចក្ដីសញ្ញា ២៥:១០ នោះវាអាចនឹងជួយក្នុងការធ្វើបញ្ជីនៃ « របស់ទាំងឡាយនៃពិភពលោកនេះ » ដែលទ្រង់សព្វព្រះទ័យចង់ឲ្យបងប្អូន « ទុកចោល » ។ បន្ទាប់មក បងប្អូនអាចបង្កើតបញ្ជីនៃ « របស់ទាំងឡាយណាដែលគ្រាន់បើជាង [ ពិភពលោកនេះ ] ដែលទ្រង់សព្វព្រះទ័យចង់ឲ្យបងប្អូនស្វែងរក ។ បងប្អូនអាចជ្រើសរើសយ៉ាងហោចណាស់ដំណើររឿងមួយមកពីបញ្ជីទីមួយដែលបងប្អូននឹងទុកចោល និងដំណើររឿងមួយមកពីបញ្ជីទីពីរដែលបងប្អូននឹងស្វែងរក ។

ប្រធាន រ័សុល អិម ណិលសុន បានផ្តល់ដំបូន្មាន និងការសន្យាអំពី « [ ការទុក ] ចោលរឿងជាច្រើននៃពិភពលោកនេះ » ។ រកមើលវានៅលើទំព័រ ៧៧ នៅក្នុងសាររបស់លោក « Spiritual Treasures » ( Liahona ខែ វិច្ឆិកា ឆ្នាំ ២០១៩ ) ។ តើបងប្អូននឹងអនុវត្តតាមដំបូន្មានរបស់លោកដោយរបៀបណា ?

ពេលបងប្អូនអាន ខទី ១៣ សូមគិតអំពីសេចក្ដីសញ្ញាដែលបងប្អូនបានធ្វើជាមួយនឹងព្រះវរបិតាសួគ៌ និងព្រះយេស៊ូវគ្រីស្ទ ។ តើ « នៅជាប់នឹង » មានន័យយ៉ាងណាចំពោះសេចក្ដីសញ្ញាទាំងនេះ ? តើសេចក្តីសញ្ញារបស់បងប្អូនជួយអ្នកឲ្យ « ទុកចោលរបស់ទាំងឡាយនៃពិភពលោកនេះ ហើយស្វែងរករបស់ទាំងឡាយណាដែលគ្រាន់បើជាងនេះវិញ »ដោយរបៀបណា ?

នេះជាបទគម្ពីរមួយចំនួនទៀតដែលអាចជួយបងប្អូនឲ្យយល់ដឹងរវាង« របស់ទាំងឡាយនៃពិភពលោកនេះ » និង « របស់ទាំងឡាយណាដែលគ្រាន់បើជាង » ៖ ម៉ាថាយ ៦:១៩, ២១; ២៥-៣៤; លូកា ១០:៣៩-៤២; នីហ្វៃទី២ ៩:៥១ ។

សូមមើលផងដែរ Topics and Questions « Sacrifice » បណ្ណាល័យដំណឹងល្អ ។

អញ្ជើញឲ្យចែកចាយ ។ ប្រសិនបើបងប្អូនកំពុងបង្រៀនអ្នកដទៃអំពីរបៀប « ទុកចោលរបស់ទាំងឡាយនៃពិភពលោកនេះ » សូមពិចារណាអំពីវិធីដើម្បីអញ្ជើញពួកគេឲ្យចែកចាយនូវអ្វីដែលពួកគេកំពុងធ្វើដើម្បីធ្វើតាមដំបូន្មាននេះ ។ យើងអាចទាញកម្លាំង និងភាពក្លាហានដ៏អស្ចារ្យមកពីការស្តាប់ការយល់ដឹង និងបទពិសោធន៍របស់គ្នាទៅវិញទៅមក ។

គោលលទ្ធិ និងសេចក្ដីសញ្ញា ២៥:១១–១២

ព្រះអម្ចាស់មានសេចក្តីរីករាយនៅក្នុង « បទចម្រៀងពីចិត្ត » របស់ខ្ញុំ ។

តើ « បទចម្រៀង[ ទាំងឡាយ ] ពីចិត្ត »របស់បងប្អូន—បទចម្រៀងដែលបង្ហាញពីអារម្មណ៍របស់បងប្អូនអំពីព្រះវរបិតាសួគ៍ និងព្រះយេស៊ូវគ្រីស្ទមានអ្វីខ្លះ ? សូមពិចារណាអំពីការច្រៀង ឬការស្តាប់បទចម្រៀងមួយចំនួន ។ តើអ្វីដែលធ្វើឲ្យបទចម្រៀងទាំងនេះពិសេសចំពោះបងប្អូន ?

បងប្អូនក៏អាចពិចារណាអំពីរបៀបដែលទំនុកតម្កើងទាំងនេះប្រៀបដូចជាការអធិស្ឋានផងដែរ ។ តើតន្ត្រី និងការអធិស្ឋានដ៏ពិសិដ្ឋមានអ្វីដូចគ្នា ? តើបទចម្រៀងពិសិដ្ឋរបស់បងប្អូនត្រូវបាន « ឆ្លើយតបដោយនូវព្រះពរ » យ៉ាងដូចម្ដេច ?

សូមមើលផងដែរថា « ឱ !ចម្រៀងនៃដួងចិត្ត » ទំនុកតម្កើង ល.រ. ១៧៧ ។

គោលលទ្ធិ និងសេចក្ដីសញ្ញា ២៦:២

« ហើយរបស់ទាំងអស់នឹងត្រូវបានសម្រេច ដោយសារការយល់ព្រមទូទៅនៅក្នុងសាសនាចក្រ » ។

ឃ្លា « ការយល់ព្រមទូទៅ » នៅក្នុងខគម្ពីរនេះសំដៅទៅលើទង្វើនៃការលើកដៃរបស់យើង ដើម្បីបង្ហាញថាយើងទ្រទ្រង់ និងគាំទ្រដល់បុគ្គលដែលកំពុងទទួលការហៅ ឬការតែងតាំងបព្វជិតភាព ។ តើបងប្អូននឹងពន្យល់យ៉ាងដូចម្ដេចដល់ភ្ញៀវម្នាក់ដែលបានប្រជុំនៅក្នុងព្រះវិហារថា តើវាមានន័យយ៉ាងណាពេលយើងគាំទ្រនរណាម្នាក់ ? តើបងប្អូនរកឃើញចម្លើយអ្វីខ្លះនៅក្នុងសាររបស់ប្រធាន ហិនរី ប៊ី អាវរិង « The Power of Sustaining Faith » ? ( Liahona ខែ ឧសភា ឆ្នាំ ២០១៩ ទំព័រ ៥៨–៦០ ) ។

សម្រាប់គំនិតបន្ថែម សូមមើលទស្សនាវដ្តី លីអាហូណា និង ដើម្បីកម្លាំងនៃយុវជន ប្រចាំខែនេះ ។

គំនិតសម្រាប់បង្រៀនកុមារ

គោលលទ្ធិ និងសេចក្ដីសញ្ញា ២៤:១, ៨

ព្រះអង្គសង្គ្រោះអាចលើកខ្ញុំ « ឡើងឲ្យរួចពីសេចក្ដីវេទនាទាំងឡាយរបស់ [ ខ្ញុំ ] » ។

ដើម្បីរៀនអំពីទុក្ខលំបាក ឬឧបសគ្គមួយចំនួនដែល យ៉ូសែប ស្ម៊ីធ និងពួកបរិសុទ្ធដំបូងបានប្រឈមមុខ នោះបងប្អូនអាចពិនិត្យឡើងវិញនូវ« ជំពូកទី ១១ ៖ មនុស្សជាច្រើនទៀតចូលជាសមាជិកសាសនាចក្រ » នៅក្នុង ដំណើររឿងព្រះគម្ពីរគោលលទ្ធិ និងសេចក្ដីសញ្ញា ទំព័រ ៤៦-៤៧ ឬវីដេអូដែលត្រូវគ្នានៅក្នុងបណ្ណាល័យដំណឹងល្អ ។ បន្ទាប់មកបងប្អូន និងកូនរបស់បងប្អូនអាចរកមើលនូវអ្វីដែលព្រះអម្ចាស់មានបន្ទូលទៅកាន់ យ៉ូសែប អំពីសេចក្ដីវេទនារបស់លោកនៅក្នុង គោលលទ្ធិ និងសេចក្ដីសញ្ញា ២៤:១, ៨ ។ បងប្អូនក៏អាចចែកចាយជាមួយគ្នាទៅវិញទៅមក អំពីរបៀបដែលព្រះអម្ចាស់ជួយបងប្អូនក្នុងគ្រាលំបាកផងដែរ ។

1:52
Chapter 11: More People Join the Church: April–June 1830
ដើម្បីរៀនអំពីអត្ថន័យនៃ « ការមានចិត្តអត់ធ្មត់នៅក្នុងការឈឺចាប់ [ របស់យើង ] » បងប្អូន និងកូនៗរបស់បងប្អូនអាចបង្កើតការពិសោធន៍ដែលមាននៅក្នុងវីដេអូឡើងវិញបាន « Continue in Patience » ( បណ្ណាល័យដំណឹងល្អ ) ។ តើ គោលលទ្ធិ និងសេចក្ដីសញ្ញា ២៤:៨ បង្រៀនយើងអ្វីខ្លះអំពីការអត់ធ្មត់ ? តើព្រះអង្គសង្រ្គោះចង់ឲ្យយើងដឹងថាទ្រង់ « គង់នៅជាមួយ [ យើង ] ក្នុងការឈឺចាប់របស់យើង » ដោយរបៀបណា ?

2:41
Continue in Patience

គោលលទ្ធិ និងសេចក្ដីសញ្ញា ២៥:១១–១២

ព្រះយេស៊ូវស្រឡាញ់ « បទចម្រៀងពីចិត្ត » ។

បន្ទាប់ពីអាន គោលលទ្ធិ និងសេចក្តីសញ្ញា ២៥:១២ រួចហើយ យើងអាចប្រាប់គ្នាទៅវិញទៅមកអំពីទំនុកតម្កើង ឬចម្រៀងរបស់សាសនាចក្រដែលបងប្អូនពេញចិត្ត—គឺបទ « បទចម្រៀងពីចិត្ត » របស់បងប្អូន—ហើយច្រៀងវាជាមួយគ្នា ។ ចែកចាយជាមួយគ្នាអំពីមូលហេតុដែលអ្នកស្រលាញ់បទទាំងនេះ ។ ហេតុអ្វីព្រះជាម្ចាស់សប្បាយចិត្តពេលយើងច្រៀងបទទាំងនេះ ? តើការច្រៀងរបស់យើងប្រៀបដូចជា «ការអធិស្ឋានចំពោះ [ ទ្រង់ ]» យ៉ាងដូចម្ដេច ?

គោលលទ្ធិ និងសេចក្តីសញ្ញា ២៥:១៣, ១៥

សេចក្ដីសញ្ញារបស់ខ្ញុំជាមួយនឹងព្រះវរបិតាសួគ៌នាំឲ្យខ្ញុំមានអំណរ ។

ដើម្បីយល់អំពីអត្ថន័យនៃការ « នៅជាប់នឹងសេចក្ដីសញ្ញា » ( គោលលទ្ធិ និងសេចក្តីសញ្ញា ២៥:១៣ ) កូនរបស់បងប្អូនអាចដាក់វេនគ្នាកាន់អ្វីមួយឲ្យបានជាប់តាមដែលពួកគេអាចធ្វើបាន ។ បន្ទាប់មកបងប្អូន និងកូនៗរបស់បងប្អូនអាចនិយាយអំពីរបៀបដែលបងប្អូន « នៅជាប់នឹង » ឬ កាន់តាមសេចក្តីសញ្ញារបស់បងប្អូន ។ ប្រសិនបើចាំបាច់ សូមពិនិត្យមើលជាមួយកូនរបស់បងប្អូននូវសេចក្តីសញ្ញាដែលយើងធ្វើ ( សូមមើល ម៉ូសាយ ១៨:៨–១០; គោលលទ្ធិ និងសេចក្តីសញ្ញា ២០:៣៧; និង ទំព័រសកម្មភាពរបស់សប្តាហ៍នេះ ) ។
ដើម្បីផ្តល់បរិបទដល់កូនរបស់បងប្អូនសម្រាប់ គោលលទ្ធិ និងសេចក្ដីសញ្ញា ២៥:១៣ បងប្អូនអាចចង្អុលបង្ហាញថានេះជាអ្វីដែលព្រះអម្ចាស់បានប្រាប់ដល់ អិមម៉ា ស្ម៊ីធ មិនយូរប៉ុន្មានក្រោយពីពិធីជ្រមុជទឹករបស់នាង ។ ហេតុអ្វីបានជាការណ៍នេះជាដំបូន្មានដ៏ល្អសម្រាប់នរណាម្នាក់ដែលទើបបានជ្រមុជទឹកថ្មីៗ ?

សម្រាប់គំនិតបន្ថែម សូមមើលទស្សនាវដ្តី ប្រិយមិត្ត ប្រចាំខែនេះ ។

អិមម៉ា ស្ម៊ីធ កំពុងសិក្សាព្រះគម្ពីរ — ទំនុកតម្កើងរបស់ អិមម៉ា ដោយ លីស ឡេមិន ស្វីនដល