អំណាចនៃសេចក្តីជំនឿដើម្បីគាំទ្រ

ដោយប្រធាន ហិនរី ប៊ី អាវរិង

ទីប្រឹក្សាទីពីរក្នុងគណៈប្រធានទីមួយ

តាមរយៈការលើកដៃរបស់អ្នកដើម្បីគាំទ្រ បងប្អូនសន្យានឹងព្រះ និងពួកអ្នកបម្រើរបស់ទ្រង់ថា បងប្អូនគាំទ្រពួកគាត់ ។

ជាច្រើនលើក ខ្ញុំបានស្ដាប់ឮថ្នាក់ដឹកនាំបព្វជិតភាពថ្លែងអំណរគុណចំពោះសេចក្ដីជំនឿដើម្បីគាំទ្រនៃបុគ្គលដែលពួកគាត់បម្រើ ។ នៅក្នុងសំឡេងក្ដុកក្ដួលរបស់ពួកគាត់ នោះបងប្អូនដឹងថា ពួកគាត់មានការដឹងគុណដ៏ជ្រាលជ្រៅ ហើយពិតប្រាកដ ។ គោលបំណងរបស់ខ្ញុំនៅថ្ងៃនេះគឺចង់ប្រាប់ពីការថ្លែងអំណរគុណរបស់ព្រះអម្ចាស់ចំពោះការគាំទ្ររបស់បងប្អូនចំពោះពួកអ្នកបម្រើរបស់ទ្រង់នៅក្នុងសាសនាចក្ររបស់ទ្រង់ ។ ហើយក៏ចង់លើកទឹកចិត្តបងប្អូនឲ្យអនុវត្ត ហើយរីកចម្រើននៅក្នុងអំណាចដើម្បីគាំទ្រមនុស្សដទៃដោយសេចក្ដីជំនឿរបស់បងប្អូនផងដែរ ។

ពីមុនបងប្អូនចាប់កំណើតមក បងប្អូនបានបង្ហាញនូវអំណាចនេះ ។ សូមគិតត្រឡប់ទៅរកអ្វីដែលយើងដឹងពីពិភពវិញ្ញាណពីមុនយើងកើតមក ។ ព្រះវរបិតាសួគ៌យើងបានបង្ហាញផែនការមួយសម្រាប់បុត្រាបុត្រីរបស់ទ្រង់ ។ យើងក៏នៅទីនោះដែរ ។ លូស៊ីហ្វើរជាបងប្រុសខាងវិញ្ញាណរបស់យើង បានបដិសេធផែនការដែលនឹងអនុញ្ញាតឲ្យមានសិទ្ធិជ្រើសរើស ។ ព្រះយេហូវ៉ាជាព្រះរាជបុត្រាស្ងួនភ្ញារបស់ព្រះវរបិតាសួគ៌ បានគាំទ្រផែនការនោះ ។ លូស៊ីហ្វើរបានដឹកនាំនូវការបះបោរមួយ ។ សំឡេងគាំទ្ររបស់ព្រះយេហូវ៉ាបានទទួលជោគជ័យ ហើយទ្រង់បានស្ម័គ្រព្រះទ័យធ្វើជាព្រះអង្គសង្គ្រោះរបស់យើង ។

ការពិតដែលបងប្អូនស្ថិតនៅក្នុងជីវិតរមែងស្លាប់នាពេលនេះ បញ្ជាក់ដល់យើងថា បងប្អូនបានគាំទ្រព្រះវរបិតា និងព្រះអង្គសង្គ្រោះ ។ វាតម្រូវឲ្យមានសេចក្ដីជំនឿលើព្រះយេស៊ូវគ្រីស្ទ ដើម្បីគាំទ្រផែនការនៃសុភមង្គល និងតួនាទីរបស់ព្រះគ្រីស្ទនៅក្នុងផែនការនោះ នៅពេលបងប្អូនបានដឹងតិចតួចពីឧបសគ្គដែលបងប្អូននឹងជួបប្រទះនៅក្នុងជីវិតរមែងស្លាប់ ។

សេចក្ដីជំនឿរបស់បងប្អូនដើម្បីគាំទ្រចំពោះពួកអ្នកបម្រើរបស់ព្រះបាននាំឲ្យកើតមាននូវសុភមង្គលរបស់បងប្អូននៅក្នុងជីវិតនេះផងដែរ ។ នៅពេលបងប្អូនទទួលយកសំណូមពររបស់អ្នកផ្សព្វផ្សាយសាសនាដើម្បីអធិស្ឋានឲ្យដឹងថា ព្រះគម្ពីរមរមនគឺជាបន្ទូលរបស់ព្រះ នោះបងប្អូនមានសេចក្ដីជំនឿដើម្បីគាំទ្រចំពោះអ្នកបម្រើមួយរូបរបស់ព្រះអម្ចាស់ ។ នៅពេលបងប្អូនបានទទួលយកការអញ្ជើញឲ្យជ្រមុជទឹក នោះបងប្អូនបានគាំទ្រអ្នកបម្រើដ៏រាបសាមួយរូបរបស់ព្រះ ។

នៅពេលបងប្អូនឲ្យមនុស្សម្នាក់ដាក់ដៃលើក្បាលរបស់បងប្អូន ហើយនិយាយថា « ចូរទទួលព្រះវិញ្ញាណបរិសុទ្ធចុះ » នោះបងប្អូនគាំទ្រគាត់ជាអ្នកកាន់បព្វជិតភាពមិលគីស្សាដែកម្នាក់ ។

ចាប់តាំងពីថ្ងៃនោះមក ដោយបម្រើដោយស្មោះត្រង់ បងប្អូនបានគាំទ្រដល់បុគ្គលម្នាក់ៗដែលបានប្រគល់បព្វជិតភាពដល់បងប្អូន និងបុគ្គលម្នាក់ៗដែលបានតែងតាំងបងប្អូនទៅក្នុងតំណែងមួយក្នុងបព្វជិតភាពនោះ ។

នៅគ្រាចាប់ផ្ដើមនៃបទពិសោធន៍របស់បងប្អូនក្នុងបព្វជិតភាព ការគាំទ្រនីមួយៗគឺជាព្រឹត្តិការណ៍ដ៏សាមញ្ញមួយនៃការទុកចិត្តលើអ្នកបម្រើម្នាក់របស់ព្រះ ។ ឥឡូវនេះ បងប្អូនភាគច្រើនបានរីកចម្រើនទៅកាន់ស្ថានភាពមួយដែលតម្រូវឲ្យមានការគាំទ្រកាន់តែច្រើន ។

បងប្អូនជ្រើសរើសគាំទ្រ ឬពុំគាំទ្រដល់បុគ្គលគ្រប់រូបដែលព្រះអម្ចាស់ហៅ—ក្នុងតួនាទីនានាដែលព្រះអម្ចាស់បានហៅពួកគាត់ ។ ការជ្រើសរើសនោះកើតឡើងនៅក្នុងសន្និសីទទូទាំងពិភពលោក ។ វាបានកើតឡើងនៅក្នុងសន្និសីទនេះដែរ ។ នៅក្នុងការប្រជុំបែបនេះ ឈ្មោះរបស់បុរសស្ត្រី—ជាអ្នកបម្រើរបស់ព្រះ—ត្រូវបានអាន ហើយបងប្អូនត្រូវបានអញ្ជើញឲ្យលើកដៃគាំទ្រ ។ បងប្អូនអាចបដិសេធពុំគាំទ្រ ឬបងប្អូនអាចសន្យាដោយនូវសេចក្ដីជំនឿរបស់បងប្អូនដើម្បីគាំទ្រ ។ តាមរយៈការលើកដៃគាំទ្រ បងប្អូនធ្វើការសន្យាមួយ ។ បងប្អូនសន្យានឹងព្រះ និងពួកអ្នកបម្រើរបស់ទ្រង់ថា បងប្អូនគាំទ្រពួកគាត់ ។

ពួកគាត់ទាំងនេះគឺជាមនុស្សពុំល្អឥតខ្ចោះ ដូចជាបងប្អូនដែរ ។ ការរក្សាការសន្យារបស់បងប្អូននឹងតម្រូវឲ្យមានសេចក្ដីជំនឿដ៏រឹងមាំថា ព្រះអម្ចាស់បានហៅពួកគាត់ ។ ការរក្សាសន្យាទាំងនេះក៏នឹងនាំមកនូវសុភមង្គលដ៏អស់កល្បជានិច្ចផងដែរ ។ ការពុំបានរក្សាវានឹងនាំមកនូវភាពសោកសៅដល់បងប្អូន និងដល់មនុស្សជាទីស្រឡាញ់របស់បងប្អូន—ហើយអាចនាំមកនូវការបាត់បង់ដែលហួសពីការនឹកស្រមៃរបស់បងប្អូនទៅទៀត ។

បងប្អូនប្រហែលជាធ្លាប់ ឬនឹងត្រូវបានសួរថា តើបងប្អូនគាំទ្រដល់ប៊ីស្សពរបស់បងប្អូន ប្រធានស្តេក ពួកអ្នកមានសិទ្ធិអំណាចទូទៅ និងពួកអ្នកកាន់តំណែងទូទៅក្នុងសាសនាចក្រដែរឬទេ ។ វាប្រហែលជាកើតឡើង នៅពេលបងប្អូនត្រូវបានសុំឲ្យគាំទ្រដល់ពួកអ្នកកាន់តំណែង និងពួកថ្នាក់ដឹកនាំក្នុងសន្និសីទមួយ ។ ពេលខ្លះ វានឹងកើតឡើងនៅក្នុងការសម្ភាសន៍មួយជាមួយនឹងប៊ីស្សព ឬប្រធានស្ដេក ។

ពាក្យទូន្មានរបស់ខ្ញុំគឺថា បងប្អូនត្រូវសួរសំណួរទាំងនោះដោយខ្លួនឯងដោយប្រុងប្រយ័ត្ន និងប្រកបដោយការអធិស្ឋានជាមុនសិន ។ នៅពេលបងប្អូនធ្វើដូច្នោះ បងប្អូនអាចក្រឡេកមើលទៅគំនិត ពាក្យសម្ដី និងទង្វើថ្មីៗរបស់បងប្អូន ។ សូមព្យាយាមចងចាំ ហើយរៀបចំចម្លើយដែលបងប្អូននឹងឆ្លើយ នៅពេលព្រះអម្ចាស់សម្ភាសបងប្អូន ដោយដឹងថា នៅថ្ងៃមួយទ្រង់នឹងធ្វើកិច្ចការនេះ ។ បងប្អូនអាចរៀបចំខ្លួនដោយសួរខ្លួនឯងនូវសំណួរដូចតទៅនេះ ៖

តើខ្ញុំធ្លាប់គិត ឬនិយាយពីភាពទន់ខ្សោយរបស់បុគ្គលដែលខ្ញុំបានសន្យាថាគាំទ្រដែរឬទេ ?
តើខ្ញុំធ្លាប់រកមើលភស្តុតាងថា ព្រះអម្ចាស់កំពុងដឹកនាំពួកគាត់ដែរឬទេ ?
តើខ្ញុំធ្លាប់ធ្វើតាមការដឹកនាំរបស់ពួកគាត់ដោយមានមនសិការ និងដោយភក្ដីភាពដែរឬទេ ?
តើខ្ញុំធ្លាប់និយាយពីភស្ដុតាងដែលខ្ញុំអាចមើលឃើញថា ពួកគាត់គឺជាពួកអ្នកបម្រើរបស់ព្រះដែរឬទេ ?
តើខ្ញុំអធិស្ឋានឲ្យពួកគាត់ជាទៀងទាត់តាមឈ្មោះរបស់ពួកគាត់ និងដោយអារម្មណ៍នៃសេចក្ដីស្រឡាញ់ដែរឬទេ ?

ចំពោះយើងភាគច្រើន សំណួរទាំងនេះនឹងដឹកនាំទៅរកការពិបាកចិត្តមួយចំនួន និងការប្រែចិត្ត ។ ព្រះបានបង្គាប់យើងកុំឲ្យវិនិច្ឆ័យមនុស្សដទៃដោយពុំត្រឹមត្រូវ ប៉ុន្តែជាក់ស្ដែង យើងឃើញថា វាពិបាកនឹងចៀសវាងណាស់ ។ ភាគច្រើន ក្នុងការងារដែលយើងបានធ្វើជាមួយមនុស្សទូទៅ វាដឹកនាំយើងឲ្យវាយតម្លៃពួកគេ ។ ហើយស្ទើរតែគ្រប់កត្តានៃជីវិតរបស់យើង យើងប្រៀបធៀបខ្លួនឯងទៅនឹងមនុស្សដទៃ ។ យើងអាចធ្វើដូច្នេះដោយសារហេតុផលជាច្រើន ហេតុផលខ្លះជារឿងត្រឹមត្រូវ ប៉ុន្តែជាញឹកញាប់វាដឹកនាំយើងឲ្យមានអាកប្បកិរិយារិះគន់ ។

ប្រធាន ចច ឃ្យូ ខេនិន បានផ្ដល់ការព្រមានមួយ ហើយខ្ញុំសូមផ្ដល់វាដល់បងប្អូនទុកជាការព្រមានរបស់ខ្ញុំផ្ទាល់ ។ ខ្ញុំជឿថា លោកបានថ្លែងពីសេចក្ដីពិតនេះថា ៖ « ព្រះបានជ្រើសរើសពួកអ្នកបម្រើរបស់ទ្រង់ ។ ទ្រង់អះអាងថា វាគឺជាសិទ្ធិរបស់ទ្រង់ដើម្បីថ្កោលទោសពួកគេ ប្រសិនបើពួកគេត្រូវការការថ្កោលទោសនោះ ។ ទ្រង់ពុំបានផ្ដល់សិទ្ធិនោះដល់យើងម្នាក់ៗដើម្បីរិះគន់ ហើយថ្កោលទោសពួកគេនោះឡើយ ។ មិនថាគាត់មានសេចក្ដីជំនឿខ្លាំង មានបព្វជិតភាពខ្ពស់ដល់កម្រិតណានោះទេ គឺគ្មាននរណាម្នាក់អាចនិយាយអាក្រក់ពីបុគ្គលដែលព្រះបានចាក់ប្រេងតាំង ហើយរិះគន់អ្នកមានសិទ្ធិអំណាចរបស់ព្រះនៅលើផែនដី ដោយពុំបានធ្វើឲ្យព្រះអាក់អន់ព្រះទ័យបានឡើយ ។ ព្រះវិញ្ញាណបរិសុទ្ធនឹងដកខ្លួនចេញពីបុគ្គលនោះ ហើយគាត់នឹងចូលទៅក្នុងភាពងងឹត ។ ហេតុដូច្នេះហើយ តើបងប្អូនឃើញថា រឿងនេះសំខាន់ប៉ុណ្ណាទេ ដែលយើងគួរតែមានការប្រុងប្រយ័ត្ននោះ ?

តាមការសង្កេតឃើញរបស់ខ្ញុំគឺថា សមាជិកសាសនាចក្រជុំវិញពិភពលោក ជាទូទៅ មានភក្ដីភាពចំពោះគ្នា និងចំពោះបុគ្គលដែលធ្វើជាអធិបតីលើពួកគេ ។ ប៉ុន្តែ វាមាននូវការកែលម្អដែលយើងអាច ហើយត្រូវតែធ្វើ ។ យើងអាចកែលម្អអំណាចរបស់យើងដើម្បីគាំទ្រគ្នាទៅវិញទៅមក ។ វានឹងតម្រូវឲ្យមានសេចក្ដីជំនឿ និងការខិតខំ ។ ខ្ញុំសូមផ្ដល់ជាយោបល់ចំនួនបួនសម្រាប់យើង ដើម្បីធ្វើនៅក្នុងសន្និសីទនេះ ។

យើងអាចស្គាល់ពីសកម្មភាពជាក់លាក់ ដែលអ្នកឡើងនិយាយផ្ដល់អនុសាសន៍ឲ្យ ហើយចាប់ផ្ដើមនៅថ្ងៃនេះដើម្បីអនុវត្តវា ។ នៅពេលយើងធ្វើដូច្នោះ អំណាចរបស់យើងដើម្បីគាំទ្រពួកគាត់នឹងកើនឡើង ។
នៅពេលពួកគាត់និយាយ យើងអាចអធិស្ឋានឲ្យពួកគាត់ថា ព្រះវិញ្ញាណបរិសុទ្ធនឹងនាំពាក្យសម្ដីរបស់ពួកគាត់ចូលទៅក្នុងដួងចិត្តនៃមនុស្សជាក់លាក់ដែលយើងស្រឡាញ់ ។ ក្រោយមកទៀត នៅពេលយើងដឹងថា ការអធិស្ឋានរបស់យើងត្រូវបានឆ្លើយតប នោះអំណាចរបស់យើងដើម្បីគាំទ្រដល់ថ្នាក់ដឹកនាំទាំងនោះនឹងកើនឡើង ។
យើងអាចអធិស្ឋានថា អ្នកឡើងនិយាយជាក់លាក់នឹងមានពរ ហើយតម្កើងឡើង នៅពេលពួកគាត់ថ្លែងសារលិខិតរបស់ពួកគាត់ ។ នៅពេលយើងឃើញថា ពួកគាត់ត្រូវបានតម្កើងឡើង យើងនឹងរីកចម្រើនក្នុងសេចក្ដីជំនឿដើម្បីគាំទ្រពួកគាត់ ហើយវានឹងបន្តរហូត ។
យើងអាចស្ដាប់រកសារលិខិតមកពីអ្នកឡើងនិយាយ ដែលជាចម្លើយមួយចំពោះការអធិស្ឋានសូមជំនួយផ្ទាល់ខ្លួនរបស់យើង ។ នៅពេលចម្លើយនោះមកដល់ ប្រាកដណាស់វានឹងមក នោះយើងនឹងរីកចម្រើនក្នុងសេចក្ដីជំនឿរបស់យើង ដើម្បីគាំទ្រដល់ពួកអ្នកបម្រើគ្រប់រូបរបស់ព្រះអម្ចាស់ ។

បន្ថែមពីលើការកែលម្អនៅក្នុងការគាំទ្រដល់បុគ្គលដែលបម្រើក្នុងសាសនាចក្រ នោះយើងនឹងដឹងថា មានមជ្ឈដ្ឋានមួយទៀតដែលយើងអាចបង្កើនអំណាចនេះ ។ នៅទីនោះ វាអាចនាំពរជ័យកាន់តែច្រើនដល់យើង ។ វាស្ថិតនៅក្នុងគេហដ្ឋាន និងគ្រួសារ ។

ខ្ញុំសូមនិយាយទៅកាន់អ្នកកាន់បព្វជិតភាពវ័យក្មេងម្នាក់ដែលរស់នៅក្នុងផ្ទះមួយជាមួយនឹងឪពុករបស់គាត់ ។ ខ្ញុំសូមប្រាប់បងប្អូនពីបទពិសោធន៍របស់ខ្ញុំផ្ទាល់ពីអារម្មណ៍ដែលឪពុកម្នាក់មានចំពោះសេចក្ដីជំនឿរបស់បងប្អូនដើម្បីគាំទ្រ ។ បងប្អូនប្រហែលជាគិតថា គាត់ជាមនុស្សមានភាពជឿជាក់ ។ ប៉ុន្តែគាត់ជួបនឹងឧបសគ្គជាច្រើនលើសពីអ្វីដែលបងប្អូនដឹងទៅទៀត ។ ពេលខ្លះ គាត់ពុំអាចមើលបញ្ហានៅចំពោះមុខគាត់ឡើយ ។

ការកោតសរសើររបស់បងប្អូនចំពោះគាត់នឹងជួយគាត់បានខ្លះ ។ សេចក្ដីស្រឡាញ់របស់បងប្អូនចំពោះគាត់នឹងជួយគាត់បានកាន់តែច្រើន ។ ប៉ុន្តែរឿងដែលជួយគាត់ច្រើនបំផុតគឺពាក្យសម្ដីស្មោះត្រង់ដូចតទៅនេះ ៖ « ប៉ា កូនបានអធិស្ឋានឲ្យប៉ា ហើយកូនមានអារម្មណ៍ថា ព្រះអម្ចាស់នឹងជួយដល់ប៉ា ។ អ្វីៗគ្រប់យ៉ាងនឹងប្រសើរឡើង ។ កូនដឹងថា វានឹងកើតឡើង » ។

ពាក្យសម្ដីបែបនោះក៏មានអនុភាពដូចគ្នា ពេលឪពុកនិយាយទៅកាន់កូនប្រុសដែរ ។ នៅពេលកូនប្រុសម្នាក់ធ្វើកំហុសធ្ងន់ធ្ងរ ប្រហែលជាបញ្ហាខាងវិញ្ញាណមួយ គាត់អាចនឹងមានអារម្មណ៍ថា គាត់បានបរាជ័យ ។ នៅគ្រានោះ ក្នុងនាមជាឪពុករបស់គាត់ បងប្អូនអាចនឹងភ្ញាក់ផ្អើល នៅពេលព្រះវិញ្ញាណផ្ដល់ពាក្យពេចន៍ទាំងនោះចេញពីមាត់របស់បងប្អូន ក្រោយពីបងប្អូនអធិស្ឋាន ដើម្បីដឹងពីអ្វីដែលត្រូវធ្វើថា « កូនប្រុស ប៉ានៅជាមួយនឹងកូនជានិច្ច ។ ព្រះអម្ចាស់ស្រឡាញ់កូន ។ ដោយមានជំនួយរបស់ទ្រង់ កូនអាចត្រឡប់មកវិញបាន ។ ប៉ាដឹងថា កូនអាច ហើយថាកូននឹងធ្វើវាបាន ។ ប៉ាស្រឡាញ់កូន » ។

នៅក្នុងកូរ៉ុមបព្វជិតភាព និងក្នុងគ្រួសារ សេចក្ដីជំនឿដែលបានកើនឡើងដើម្បីគាំទ្រគ្នាទៅវិញទៅមកគឺជាវិធីមួយ ដែលយើងស្ថាបនាក្រុងស៊ីយ៉ូនដែលព្រះអម្ចាស់សព្វព្រះទ័យឲ្យយើងបង្កើតឡើង ។ ដោយមានជំនួយរបស់ទ្រង់យើងអាច ហើយនឹងធ្វើវា ។ វានឹងតម្រូវឲ្យមានការរៀនស្រឡាញ់ព្រះអម្ចាស់ឲ្យអស់ពីចិត្ត ពលំ គំនិត និងកម្លាំងរបស់យើង ហើយស្រឡាញ់គ្នាដូចជាយើងស្រឡាញ់ខ្លួនឯង ។

នៅពេលយើងរីកចម្រើននៅក្នុងសេចក្ដីស្រឡាញ់ដ៏សុទ្ធសាធនៃព្រះគ្រីស្ទ នោះយើងមានចិត្តទន់ភ្លន់ ។ សេចក្ដីស្រឡាញ់នោះនឹងធ្វើឲ្យយើងរាបសា ហើយដឹកនាំយើងឲ្យប្រែចិត្ត ។ ភាពជឿជាក់របស់យើងលើព្រះអម្ចាស់ និងចំពោះគ្នានឹងរីកចម្រើន ។ បន្ទាប់មក យើងនឹងដើរឆ្ពោះទៅមុខដោយសាមគ្គីគ្នា ដូចជាព្រះអម្ចាស់សន្យាថា យើងអាចធ្វើបាន ។

ខ្ញុំសូមថ្លែងទីបន្ទាល់ថា ព្រះវរបិតាសួគ៌ស្គាល់ ហើយស្រឡាញ់បងប្អូន ។ ព្រះយេស៊ូវគឺជាព្រះគ្រីស្ទដ៏មានព្រះជន្មរស់ ។ នេះគឺជាសាសនាចក្ររបស់ទ្រង់ ។ យើងកាន់បព្វជិតភាពរបស់ទ្រង់ ។ ទ្រង់នឹងសរសើរដល់ការខិតខំរបស់យើងដើម្បីរីកចម្រើននៅក្នុងអំណាចរបស់យើងដើម្បីអនុវត្តវា ហើយគាំទ្រគ្នា ។ ខ្ញុំសូមថ្លែងទីបន្ទាល់ដូច្នោះ ក្នុងព្រះនាមដ៏ពិសិដ្ឋនៃព្រះយេស៊ូវគ្រីស្ទ អាម៉ែន ។