រៀបចំដើម្បីបានអ្វីៗដែលត្រូវការគ្រប់មុខ
ពរជ័យនឹងកើតមានឡើង ពេលយើងព្យាយាមបំពេញការទទួលខុសត្រូវរបស់យើងម្នាក់ៗ ដើម្បីរៀន និងស្រឡាញ់ដំណឹងល្អរបស់ព្រះយេស៊ូវគ្រីស្ទដែលបានស្តារឡើងវិញ ។
កម្មវិធី និងសកម្មភាពនានាក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ បានផ្តោតលើគេហដ្ឋាន និងគាំទ្រដោយសាសនាចក្រកាន់តែច្រើនឡើង ដែលបានបង្ហាញតាមរយៈការប្រកាសកែសម្រួលជាបន្តបន្ទាប់នៅក្នុងសន្និសីទទូទៅថ្មីៗនេះ ។ ប្រធាន រ័សុល អិម ណិលសុន បានទូន្មានយើងថា ៖ « មានការផ្លាស់ប្តូរជាច្រើនទៀតដែលនឹងកើតមាន ។… សូមលេបថ្នាំគ្រាប់វីតាមីនរបស់អ្នក ។ ហើយសម្រាកឲ្យស្រួលខ្លួនចុះ ។ វានឹងមានរឿងរំភើបចិត្តកើតឡើង » ។
ខ្ញុំអធិស្ឋានទូលសូម និងយាងអញ្ជើញជំនួយពីព្រះវិញ្ញាណបរិសុទ្ធ នៅពេលយើងពិចារណាទាំងអស់គ្នា អំពីការអនុវត្តជាមូលដ្ឋានមួយចំនួននៃការកែសម្រួលជាបន្តបន្ទាប់ទាំងនេះនៅក្នុងសាសនាចក្ររបស់ព្រះអម្ចាស់ដែលបានស្តារឡើងវិញនេះ ។
ការរៀនសូត្រដំណឹងល្អដែលផ្តោតលើគេហដ្ឋាន និងការគាំទ្រពីសាសនាចក្រ
ថ្មីៗនេះ អែលឌើរ ក្រេហ្គ ស៊ី គ្រីស្ទីនសិន និងខ្ញុំគឺជាដៃគូគ្នាក្នុងសន្និសីទថ្នាក់ដឹកនាំបព្វជិតភាព ហើយលោកបានប្រើសំណួរសាមញ្ញពីរ ដើម្បីគូសបញ្ជាក់ពីគោលការណ៍នៃការផ្តោតលើគេហដ្ឋាន និងការគាំទ្រពីសាសនាចក្រ ។ លោកបានផ្តល់យោបល់ថា ជំនួសឲ្យការត្រឡប់ទៅផ្ទះវិញ បន្ទាប់ពីការប្រជុំព្រះវិហារនៅថ្ងៃអាទិត្យ ដោយសួរគ្នាថា « តើអ្នកបានរៀនអ្វីខ្លះពីព្រះអង្គសង្គ្រោះ និងដំណឹងល្អរបស់ទ្រង់នៅព្រះវិហារថ្ងៃនេះ ? » យើងគួរតែសួរគ្នានៅក្នុងការប្រជុំព្រះវិហារយើងថា « តើអ្នកបានរៀនអ្វីខ្លះពីព្រះអង្គសង្គ្រោះ និងដំណឹងល្អរបស់ទ្រង់នៅផ្ទះរបស់អ្នកក្នុងសប្តាហ៍នេះ ? » ការរក្សាថ្ងៃឈប់សម្រាកឲ្យបរិសុទ្ធត្រឹមត្រូវ កម្មវិធីសិក្សាថ្មី និងកាលវិភាគប្រជុំដែលបានកែសម្រួលទាំងអស់នេះ ជួយយើងឲ្យរៀនដំណឹងល្អទាំងនៅគេហដ្ឋានរបស់យើង និងនៅព្រះវិហារ ។
សមាជិកគ្រប់រូបក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ មានការទទួលខុសត្រូវរៀងៗខ្លួន ដើម្បីរៀន និងរស់នៅតាមការបង្រៀនរបស់ព្រះអម្ចាស់ ហើយទទួលពិធីបរិសុទ្ធនៃការសង្គ្រោះ និងភាពតម្កើងឡើង ដោយសិទ្ធិអំណាចត្រឹមត្រូវ ។ យើងពុំគួររំពឹងថា សាសនាចក្រគឺជាអង្គការមួយដែលបង្រៀន ឬប្រាប់យើងនូវអ្វីគ្រប់យ៉ាង ដែលយើងត្រូវដឹង និងធ្វើ ដើម្បីក្លាយជាសិស្សស្មោះត្រង់ ហើយស៊ូទ្រាំដោយក្លាហានដល់ទីបញ្ចប់នោះទេ ។ ផ្ទុយទៅវិញ ការទទួលខុសត្រូវផ្ទាល់របស់យើងគឺត្រូវរៀនអ្វីដែលយើងគួររៀន រស់នៅតាមអ្វីដែលយើងដឹងថា យើងគួររស់នៅតាម ហើយក្លាយជាបុគ្គលម្នាក់ដែលលោកចៅហ្វាយចង់ឲ្យយើងប្រែក្លាយ ។ ហើយគេហដ្ឋានរបស់យើងគឺជាមជ្ឈដ្ឋានសំខាន់បំផុតសម្រាប់ការរៀនសូត្រ ការរស់នៅតាម និងការប្រែក្លាយនោះ ។
កាលនៅតូច យ៉ូសែប ស៊្មីធ បានរៀនអំពីព្រះពីគ្រួសាររបស់លោក ។ ការប្រឹងប្រែងរបស់លោកដើម្បីដឹងពីព្រះទ័យព្រះសម្រាប់លោក បានបណ្តាលឲ្យយ៉ូសែបស្រាវជ្រាវរកក្តីពិតក្នុងចំណោមនិកាយគ្រិស្តសាសនាផ្សេងៗជាច្រើន ពិចារណាបទគម្ពីរដោយឧស្សាហ៍ព្យាយាម ហើយអធិស្ឋានដោយស្មោះសរទៅកាន់ព្រះ ។ ពេលយុវជន យ៉ូសែប ស៊្មីធ បានត្រឡប់ទៅផ្ទះលោកវិញភ្លាមពីព្រៃពិសិដ្ឋ បន្ទាប់ពីព្រះវរបិតា និងព្រះបុត្រាបានបង្ហាញព្រះកាយមក នោះលោកបាននិយាយជាមួយនឹងម្តាយរបស់លោកមុនគេ ។ កាលលោក « ផ្អែកខ្លួនទៅនឹងជើងក្រានកម្ដៅផ្ទះ នោះម្ដាយ [ លោក ] បានសួរថា តើកូនកើតអីហ្នឹង ។ [ យ៉ូសែប ] បានឆ្លើយថា ៖ ‹ មិនអីទេម៉ែ កូនស្រួលខ្លួនទេតើ—កូនស្រួលខ្លួនទេ › ។ រួច [ លោក ] បាននិយាយប្រាប់ម្ដាយ [ លោក ] ថា ៖ ‹ កូនបានរៀនដឹងដោយផ្ទាល់ខ្លួនកូន › » ។ បទពិសោធន៍របស់យ៉ូសែបផ្តល់លំនាំដ៏មានឥទ្ធិពលស្តីពីការរៀនសូត្រ ដែលពួកយើងម្នាក់ៗគួរតែយកគំរូតាម ។ យើងក៏ត្រូវរៀនឲ្យដឹងដោយខ្លួនយើងផងដែរ ។
ព្រះរាជបំណងដែលអាចយល់បានរបស់ផែនការព្រះវរបិតាសួគ៌គឺដើម្បីឲ្យបុត្រាបុត្រីរបស់ទ្រង់ប្រែកាន់តែដូចទ្រង់ ។ ដោយហេតុនេះ ទ្រង់ប្រទានឱកាសចាំបាច់នានាដល់យើង ដើម្បីលូតលាស់ និងរីកចម្រើន ។ ការតាំងចិត្តរបស់យើងដើម្បីរៀន និងរស់នៅតាមសេចក្តីពិត គឺកាន់តែសំខាន់ឡើងនៅក្នុងពិភពលោកមួយដែល « នៅក្នុងស្ថានភាពចលាចល » និងកាន់តែច្របូកច្របល់ និងទុច្ចរិតនេះ ។ យើងពុំអាចរំពឹងយ៉ាងសាមញ្ញថា គ្រាន់តែចូលរួមការប្រជុំ និងកម្មវិធីនានាក្នុងព្រះវិហារ នោះនឹងទទួលបាននូវការស្អាងឡើង និងការការពារខាងវិញ្ញាណទាំងអស់ ដែលអាចនឹងឲ្យយើង « ទប់ទល់ក្នុងថ្ងៃអាក្រក់ » បាននោះទេ ។
« ឪពុកម្ដាយមានកាតព្វកិច្ចដ៏ពិសិដ្ឋ ដើម្បីចិញ្ចឹមបីបាច់កូនចៅរបស់ខ្លួនដោយក្ដីស្រឡាញ់ និងសេចក្ដីសុចរិត » ។ ថ្នាក់ដឹកនាំសាសនាចក្រ គ្រូបង្រៀន និងសកម្មភាពដ៏បំផុសគំនិតនានា ជួយបុគ្គលម្នាក់ៗ និងក្រុមគ្រួសារឲ្យរីកចម្រើនខាងវិញ្ញាណ ។ ហើយទោះបីយើងទាំងអស់គ្នាត្រូវការជំនួយដើម្បីបោះជំហានទៅមុខលើផ្លូវនៃសេចក្តីសញ្ញាក្តី ក៏ការទទួលខុសត្រូវចម្បងសម្រាប់ការអភិវឌ្ឍកម្លាំងខាងវិញ្ញាណ និងការស៊ូទ្រាំគឺធ្លាក់មកលើពួកយើងម្នាក់ៗ ។
សូមរំឭកពីរបៀបដែលនីហ្វៃកូនប្រុសរបស់ព្យាការីលីហៃ មានបំណងប្រាថ្នាចង់ឃើញ ស្តាប់ និងដឹងដោយខ្លួនលោក តាមរយៈព្រះចេស្តានៃព្រះវិញ្ញាណបរិសុទ្ធនូវរឿងនានាដែលឪពុកលោកបានដឹង នៅក្នុងការនិមិត្តអំពីដើមជីវិត ។ នីហ្វៃបានត្រូវការ និងបានទទួលពរយ៉ាងពិតប្រាកដនៅក្នុងយុវវ័យរបស់លោក តាមរយៈគំរូ និងការបង្រៀនពី « ឪពុកម្ដាយល្អ » របស់លោក ។ មែនហើយ ដូចជា យ៉ូសែប ស៊្មីធ ដែរ លោកបានចង់រៀន និងដឹងដោយខ្លួនលោកផ្ទាល់ ។
ប្រសិនបើបងប្អូនទាំងអស់គ្នា ឬខ្ញុំដឹងអំពីព្រះយេស៊ូវគ្រីស្ទ និងដំណឹងល្អដែលបានស្តារឡើងវិញរបស់ទ្រង់ គឺជាអ្វីដែលមនុស្សដទៃបង្រៀន ឬប្រាប់ពួកយើង នោះគ្រឹះនៃទីបន្ទាល់របស់យើងអំពីទ្រង់ និងកិច្ចការដ៏រុងរឿងនៅថ្ងៃចុងក្រោយរបស់ទ្រង់គឺត្រូវបានសង់នៅលើដីខ្សាច់ហើយ ។ យើងពុំអាចពឹងផ្អែកទាំងស្រុង ឬខ្ចីពន្លឺ និងចំណេះដឹងនៃដំណឹងល្អពីមនុស្សដទៃ—សូម្បីតែពីមនុស្សដែលយើងស្រឡាញ់ និងទុកចិត្តបានទេ ។
ប្រាកដណាស់ ព្យាការី យ៉ូសែប ស៊្មីធ បានបង្រៀនថា ពួកបរិសុទ្ធថ្ងៃចុងក្រោយគ្រប់រូបត្រូវតែយល់ដោយខ្លួនពួកគេផ្ទាល់នូវ « គម្រោងការ និងព្រះរាជបំណងរបស់ព្រះស្តីពីការមកកាន់ផែនដីនេះរបស់ពួកគេ » ។
« តើយើងអាចអាន ហើយយល់អ្វីៗទាំងអស់ដែលបានកត់ត្រាមកតាំងពីជំនាន់របស់អ័ដាម ស្តីពីទំនាក់ទំនងរបស់មនុស្សជាមួយព្រះ និងពួកទេវតានៅក្នុងស្ថានភាពនាពេលអនាគតដែរឬទេ ? យើងដឹងបានតិចតួចណាស់អំពីរឿងនេះ ។ ការអានពីបទពិសោធន៍របស់មនុស្សដទៃ ឬទំនាក់ទំនងដែលបានប្រទានដល់ ពួកគេ នោះមិនអាចផ្តល់ដល់ ពួកយើង នូវការយល់ដឹងពីស្ថានភាព និងទំនាក់ទំនងពិតប្រាកដរបស់យើងជាមួយព្រះបានឡើយ ។ ចំណេះដឹងអំពីរឿងទាំងនេះអាចទទួលបានតែតាមរយៈបទពិសោធន៍ឆ្លងកាត់ពិធីបរិសុទ្ធនៃព្រះ ដែលបានតាក់តែងឡើងសម្រាប់គោលបំណងនោះប៉ុណ្ណោះ » ។
ការជួយឲ្យសម្រេចបាននូវកម្មវត្ថុខាងវិញ្ញាណដ៏ធំសម្រាប់បុគ្គលម្នាក់ៗ និងក្រុមគ្រួសារនេះ គឺជាហេតុផលគ្រឹះមួយដែលកម្មវិធី និងសកម្មភាពនានាក្នុងសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ កំពុងតែផ្តោតលើគេហដ្ឋាន និងគាំទ្រដោយសាសនាចក្រកាន់តែច្រើនឡើង ក្នុងរដូវកាលជាក់លាក់នៃសម័យកាន់កាប់ត្រួតត្រានៃពេលពេញកំណត់នេះ ។
ការអនុវត្តនៃការរៀនសូត្រដែលផ្តោតលើគេហដ្ឋាន និងការគាំទ្រពីសាសនាចក្រ
ខ្ញុំសូមសង្ខេបការអនុវត្តគ្រឹះមួយចំនួននៃការរៀនសូត្រដំណឹងល្អ ដែលកំពុងតែផ្តោតលើគេហដ្ឋាន និងគាំទ្រពីសាសនាចក្រកាន់តែច្រើនឡើងនេះ ។
មជ្ឈមណ្ឌលបំពាក់បំប៉នអ្នកផ្សព្វផ្សាយសាសនាចម្បងគឺនៅក្នុងគេហដ្ឋានផ្ទាល់របស់យើង មជ្ឈមណ្ឌលបំពាក់បំប៉នអ្នកផ្សព្វផ្សាយសាសនាបន្ទាប់គឺនៅទីក្រុងប្រូវ៉ូ, ម៉ានីល, ម៉ិកស៊ីកូ និងនៅក្នុងទីតាំងផ្សេងទៀត ។ ភាគច្រើន ថ្នាក់សាលាថ្ងៃអាទិត្យដែលជាថ្នាក់បង្ហាត់បង្រៀនយើង គួរតែរៀនដោយផ្ទាល់ខ្លួន និងជាក្រុមគ្រួសារយើងនៅកន្លែងដែលយើងរស់នៅតែម្តង ហើយថ្នាក់សាលាថ្ងៃអាទិត្យដ៏មានប្រយោជន៍ តែបន្ទាប់បន្សំនោះគឺរៀននៅក្នុងសាលាប្រជុំរបស់យើង ។
ឥឡូវនេះមជ្ឈមណ្ឌលពង្សប្រវត្តិគឺនៅក្នុងផ្ទះរបស់យើង ។ ការគាំទ្របន្ថែមទៀតសម្រាប់ការស្រាវជ្រាវកិច្ចការពង្សប្រវត្តិរបស់យើងក៏មាននៅក្នុងសាលាប្រជុំរបស់យើងផងដែរ ។
ថ្នាក់រៀបចំចាំបាច់សម្រាប់ព្រះវិហារបរិសុទ្ធកើតឡើងនៅក្នុងគេហដ្ឋានយើង ថ្នាក់សំខាន់នេះក៏អាចធ្វើឡើងយូរៗម្តងនៅក្នុងសាលាប្រជុំរបស់យើងផងដែរ ។
ការធ្វើឲ្យគេហដ្ឋានយើងជាកន្លែងមានសុវត្ថិភាព និងបរិសុទ្ធ ជាកន្លែងដែលយើងអាច « ឈរនៅទីបរិសុទ្ធនានា » គឺជារឿងចាំបាច់នៅក្នុងថ្ងៃចុងក្រោយនេះ ។ ហើយការរៀនសូត្រដែលផ្តោតទៅលើគេហដ្ឋាន និងការគាំទ្រពីសាសនាចក្រសំខាន់សម្រាប់កម្លាំង និងការការពារខាងវិញ្ញាណរបស់យើងនាពេលបច្ចុប្បន្ននេះ វាក៏នឹងកាន់តែចាំបាច់សម្រាប់ពេលអនាគតដែរ ។
ការរៀនសូត្រ និងការរៀបចំខ្លួនសម្រាប់ព្រះវិហារបរិសុទ្ធ ដែលផ្តោតលើគេហដ្ឋាន និងការគាំទ្រពីសាសនាចក្រ
សូមពិចារណាពីរបៀបដែលគោលការណ៍នៃ « ការផ្តោតលើគេហដ្ឋាន និងការគាំទ្រពីសាសនាចក្រ » អនុវត្តចំពោះការរៀបចំខ្លួន និងភាពស័ក្តិសមរបស់យើងម្នាក់ៗ ដើម្បីទទួលពិធីបរិសុទ្ធ និងសេចក្តីសញ្ញាពិសិដ្ឋនៅក្នុងដំណាក់ព្រះអម្ចាស់ ។
ប្រាកដណាស់ ការរៀបចំខ្លួនទៅព្រះវិហារបរិសុទ្ធមានប្រសិទ្ធភាពខ្លាំងបំផុតនៅក្នុងផ្ទះរបស់យើង ។ ប៉ុន្តែសមាជិកសាសនាចក្រជាច្រើនពុំប្រាកដចិត្តអំពីអ្វីត្រឹមត្រូវដែលអាច និងមិនអាចនិយាយ ទាក់ទងនឹងបទពិសោធន៍ព្រះវិហារបរិសុទ្ធ ពេលនៅក្រៅព្រះវិហារបរិសុទ្ធទេ ។
ប្រធាន អ៊ែសរ៉ា ថាហ្វ ប៊ែនសឹន បានពិពណ៌នាពីមូលហេតុដែលមានភាពមិនប្រាកដប្រជានេះ ។
« ព្រះវិហារបរិសុទ្ធគឺជាកន្លែងពិសិដ្ឋ ហើយពិធីបរិសុទ្ធនៅក្នុងព្រះវិហារបរិសុទ្ធគឺជាលក្ខណៈពិសិដ្ឋមួយ ។ ដោយសារតែភាពពិសិដ្ឋរបស់ព្រះវិហារបរិសុទ្ធ ជួនកាលយើងរុញរាចិត្តនឹងនិយាយអំពីព្រះវិហារបរិសុទ្ធទៅកាន់កូនចៅរបស់យើង ។
ជាលទ្ធផល មនុស្សជាច្រើនពុំបានអភិវឌ្ឍបំណងប្រាថ្នាពិតប្រាកដដើម្បីទៅព្រះវិហារបរិសុទ្ធ ឬពេលពួកគេទៅទីនោះ ពួកគេធ្វើវាដោយគ្មានប្រវត្តិច្រើន ដើម្បីរៀបចំខ្លួនពួកគេសម្រាប់កាតព្វកិច្ច និងសេចក្តីសញ្ញាដែលពួកគេចុះទេ ។
ខ្ញុំជឿថា ការយល់ដឹង ឬប្រវត្តិត្រឹមត្រូវ នឹងជួយច្រើនដល់យុវវ័យយើងឲ្យទៅព្រះវិហារបរិសុទ្ធ… [ ហើយ ] និងចិញ្ចឹមបីបាច់ក្នុងខ្លួនពួកគេនូវបំណងប្រាថ្នាមួយ ដើម្បីស្វែងរកពរជ័យបព្វជិតភាព ដូចដែលអ័ប្រាហាំបានស្វែងរកពរជ័យរបស់លោក » ។
សេចក្តីណែនាំគ្រឹះចំនួនពីរអាចជួយយើងឲ្យសម្រេចបានការយល់ដឹងត្រឹមត្រូវដែលប្រធានប៊ែនសឹនបានគូសបញ្ជាក់នោះ ។
សេចក្តីណែនាំទី #១ ។ ដោយសារយើងស្រឡាញ់ព្រះអម្ចាស់ នោះយើងគួរតែនិយាយអំពីព្រះដំណាក់របស់ទ្រង់ដោយការគោរពជានិច្ច ។ យើងពុំគួរបង្ហាញ ឬពិពណ៌នាពីនិមិត្តសញ្ញាពិសេសៗដែលទាក់ទងនឹងសេចក្តីសញ្ញា ដែលយើងទទួលនៅក្នុងពិធីពិសិដ្ឋនានាក្នុងព្រះវិហារបរិសុទ្ធទេ ។ យើងក៏ពុំគួរពិភាក្សាពីព័ត៌មានពិសិដ្ឋដែលយើងសន្យាជាពិសេសនៅក្នុងព្រះវិហារបរិសុទ្ធថា មិនបើកបង្ហាញដល់គេដែរ ។
សេចក្តីណែនាំទី #២ ។ ព្រះវិហារបរិសុទ្ធគឺជាដំណាក់របស់ព្រះអម្ចាស់ ។ អ្វីៗគ្រប់យ៉ាងនៅក្នុងព្រះវិហារបរិសុទ្ធ ចង្អុលបង្ហាញយើងទៅកាន់ព្រះអង្គសង្គ្រោះព្រះយេស៊ូវគ្រីស្ទ ។ យើងអាចពិភាក្សាពីគោលបំណងគ្រឹះ និងគោលលទ្ធិ ព្រមទាំងគោលការណ៍នានាដែលទាក់ទងនឹងពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ ។
ប្រធាន ហាវើដ ដបុលយូ ហឹនធើរ បានទូន្មានថា ៖ « ចូរយើងចែកចាយដល់កូនចៅរបស់យើងពីអារម្មណ៍ខាងវិញ្ញាណ ដែលយើងមាននៅក្នុងព្រះវិហារបរិសុទ្ធ ។ ហើយចូរយើងបង្រៀនពួកគេដោយស្មោះអស់ពីចិត្ត និងងាយស្រួលជាងពីរឿងទាំងឡាយ ដែលយើងអាចនិយាយបាន ដោយសមរម្យអំពីគោលបំណងទាំងឡាយនៃដំណាក់របស់ព្រះអម្ចាស់ » ។
ចាប់តាំងពីជំនាន់ព្យាការី យ៉ូសែប ស៊្មីធ រហូតដល់ប្រធាន រ័សុល អិម ណិលសុន គោលបំណងនៃគោលលទ្ធិស្តីពីពិធីបរិសុទ្ធ និងសេចក្ដីសញ្ញានៃព្រះវិហារបរិសុទ្ធ ត្រូវបានបង្រៀនយ៉ាងលម្អិតដោយថ្នាក់ដឹកនាំសាសនាចក្រ ។ ធនធានបម្រុងដ៏ច្រើនមាននៅក្នុងការបោះពុម្ព មានជាសំឡេង វីដេអូ និងមានជាទម្រង់ផ្សេងៗទៀត ដើម្បីជួយយើងឲ្យរៀនពីពិធីបរិសុទ្ធនៃការលាងជម្រះ អំណោយទានពិសិដ្ឋ អាពាហ៍ពិពាហ៍ និងពិធីផ្សារភ្ជាប់ដទៃផ្សេងទៀត ។ ក៏មានព័ត៌មានអំពីការធ្វើតាមព្រះអង្គសង្គ្រោះ តាមរយៈការទទួល និងការគោរពសេចក្តីសញ្ញានានា ដើម្បីរក្សាក្រឹត្យវិន័យនៃការគោរពប្រតិបត្តិ ក្រឹត្យវិន័យនៃការបូជា ក្រឹត្យវិន័យនៃដំណឹងល្អ ក្រឹត្យវិន័យនៃព្រហ្មចារីភាព និងក្រឹត្យវិន័យនៃការថ្វាយផងដែរ ។ សមាជិកសាសនាចក្រទាំងអស់គួរតែស្គាល់នូវសម្ភារដ៏អស្ចារ្យនានា ដែលមាននៅគេហទំព័រ temples.ChurchofJesusChrist.org ។
ប្រធាន រ័សុល អិម ណិលសុន បានគូសបញ្ជាក់ពីតុល្យភាពសំខាន់រវាងលក្ខណៈពិសិដ្ឋនៃពិធីនានាក្នុងព្រះវិហារបរិសុទ្ធ និងព័ត៌មានដ៏មានតម្លៃអំពីព្រះវិហារបរិសុទ្ធ ដែលបានបោះពុម្ពដោយសាសនាចក្រដែលពិត ត្រឹមត្រូវ និងមានជាសាធារណៈ ។ លោកបានពន្យល់ថា ៖ « ខ្ញុំសូមផ្តល់អនុសាសន៍ឲ្យសមាជិក…អានពាក្យ នៅក្នុងសេចក្តីណែនាំដល់បទគម្ពីរទាំងឡាយ ដែលទាក់ទងនឹងព្រះវិហារបរិសុទ្ធ ដូចជា ‹ ពិធីចាក់ប្រេង › ‹ សេចក្តីសញ្ញា › ‹ ពលិកម្ម › និង ‹ ព្រះវិហារបរិសុទ្ធ › ។ អ្នកក៏គួរអាន និក្ខមនំ ជំពូក ២៦–២៩ និង លេវីវិន័យ ជំពូក ៨ ។ នៅក្នុងព្រះគម្ពីរសញ្ញាចាស់ ក៏ដូចជានៅក្នុង ម៉ូសេ និង អ័ប្រាហាំ នៅក្នុងមុក្តាដ៏មានតម្លៃមហិមា គូសបញ្ជាក់អំពីកិច្ចការព្រះវិហារបរិសុទ្ធពីបុរាណ និងការកាន់ខ្ជាប់នូវសភាពដើម នៃពិធីបរិសុទ្ធទាំងឡាយនោះ » ។
ដូច្នេះ ឧបមាថា កូនប្រុសស្រីរបស់បងប្អូនសួរថា « មានគេនៅសាលារៀនបានប្រាប់កូនថា គេស្លៀកសម្លៀកបំពាក់ចម្លែកនៅក្នុងព្រះវិហារបរិសុទ្ធ ។ តើវាត្រូវទេ ? » មានវីដេអូខ្លីមួយនៅលើគេហទំព័រ temples.churchofjesuschrist.org ដែលមានចំណងជើងថា « ( សម្លៀកបំពាក់ពិសិដ្ឋនៃព្រះវិហារបរិសុទ្ធ ) Sacred Temple Clothing » ។ ធនធានដ៏អស្ចារ្យនេះពន្យល់ពីរបៀបដែលបុរស និងស្ត្រីពីជំនាន់បុរាណបានទទួលយកតន្ត្រីពិសិដ្ឋ ការអធិស្ឋានតាមបែបផ្សេងៗ សម្លៀកបំពាក់ដែលជានិមិត្តសញ្ញាសាសនា កាយវិការ និងក្បួនរីត៍នានា ដើម្បីបង្ហាញពីអារម្មណ៍នៃភក្តីភាពដ៏ខ្លាំងបំផុតរបស់ពួកគេចំពោះព្រះ ។ ហេតុដូច្នេះហើយ សាសនាចក្រគាំទ្រដល់ការរៀបចំខ្លួនដែលផ្តោតទៅលើគេហដ្ឋាន សម្រាប់ពរជ័យដ៏រុងរឿងនៃព្រះវិហារបរិសុទ្ធ តាមរយៈសេចក្តីណែនាំគ្រឹះ និងធនធានដ៏អស្ចារ្យដូចជាវីដេអូនេះ ។ មានព័ត៌មានដ៏មានប្រយោជន៍ជាច្រើនទៀតសម្រាប់បងប្អូន ។
ពេលយើងព្យាយាមដើរក្នុងភាពស្លូតបូតនៃព្រះវិញ្ញាណរបស់ព្រះអម្ចាស់ នោះយើងនឹងបានពរ ដើម្បីយល់ ហើយសម្រេចបានក្នុងគេហដ្ឋានយើងនូវតុល្យភាពចាំបាច់រវាងអ្វីដែលត្រឹមត្រូវ និងមិនត្រឹមត្រូវ ដើម្បីពិភាក្សាគ្នាអំពីពិធីបរិសុទ្ធ និងសេចក្តីសញ្ញាពិសិដ្ឋនៃព្រះវិហារបរិសុទ្ធ ។
ការសន្យា និងទីបន្ទាល់
ខ្ញុំសង្ស័យថា បងប្អូនមួយចំនួនអាចងឿងឆ្ងល់ថា តើការរៀនសូត្ររបស់បងប្អូនពិតជាអាចផ្តោតលើគេហដ្ឋាន និងគាំទ្រពីសាសនាចក្រដែរឬទេ ។ ប្រហែលបងប្អូនអាចជាសមាជិកតែម្នាក់ឯងក្នុងសាសនាចក្រ ឬគ្មានស្វាមី ឬភរិយាដែលគាំទ្រ ឬជាឪពុកម្តាយទោល ឬរស់នៅតែឯងជាអ្នកនៅលីវ ឬជាពួកបរិសុទ្ធថ្ងៃចុងក្រោយដែលលះលែងគ្នា ហើយបងប្អូនអាចមានសំណួរអំពីរបៀបដែលគោលការណ៍ទាំងនេះអនុវត្តចំពោះបងប្អូន ។ បងប្អូនអាចជាស្វាមី ឬភរិយាដែលកំពុងសម្លឹងមើលមុខគ្នា ហើយឆ្ងល់ថា « តើយើងអាចធ្វើរឿងនេះបានដែរឬទេ ? »
ប្រាកដណាស់ បងប្អូនអាចធ្វើវានេះបាន ! ខ្ញុំសន្យាថា ពរជ័យដ៏រឹងមាំនេះនឹងហូរចូល ហើយឃើញកើតមាននៅក្នុងជីវិតរបស់បងប្អូន ។ ទ្វារនឹងបើកឡើង ។ ពន្លឺនឹងភ្លឺចែងចាំងឡើង ។ សមត្ថភាពរបស់បងប្អូននឹងកើនឡើង ដើម្បីបន្តដោយឧស្សាហ៍ និងអត់ធ្មត់ ។
ខ្ញុំសូមថ្លែងទីបន្ទាល់ដោយរីករាយថា ពរជ័យនឹងកើតមានឡើង ពេលយើងព្យាយាមបំពេញការទទួលខុសត្រូវរបស់យើងម្នាក់ៗ ដើម្បីរៀន និងស្រឡាញ់ដំណឹងល្អរបស់ ព្រះយេស៊ូវគ្រីស្ទដែលបានស្តារឡើងវិញ ។ យើងពិតជាអាច « រៀបចំដើម្បីបានអ្វីៗដែលត្រូវការគ្រប់មុខ » ។ ខ្ញុំសូមសន្យា និងថ្លែងទីបន្ទាល់នេះ នៅក្នុងព្រះនាមដ៏ពិសិដ្ឋនៃព្រះអម្ចាស់ ព្រះយេស៊ូវគ្រីស្ទ អាម៉ែន ។