« សំឡេងនៃការស្តារឡើងវិញ ៖ អិមម៉ា ហេល ស្ម៊ីធ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ គោលលទ្ធិ និងសេចក្តីសញ្ញា ឆ្នាំ ២០២៥ ( ឆ្នាំ ២០២៥ )
« អិមម៉ា ហេល ស្ម៊ីធ » ចូរមកតាមខ្ញុំ—សម្រាប់គេហដ្ឋាន និងសាសនាចក្រ ៖ ឆ្នាំ ២០២៥
សម្លេងនៃការស្តារឡើងវិញ
អិមម៉ា ហេល ស្ម៊ីធ
ព្រះបន្ទូលរបស់ព្រះអម្ចាស់ទៅកាន់ អិមម៉ា ស្ម៊ីធដែលបានកត់ត្រានៅក្នុង គោលលទ្ធិ និងសេចក្តីសញ្ញា ២៥ បង្ហាញពីព្រះទ័យរបស់ទ្រង់ចំពោះនាង និងការរួមចំណែកដែលនាងអាចធ្វើបានចំពោះកិច្ចការរបស់ទ្រង់ ។ ប៉ុន្ដែតើ អិមម៉ា មានលក្ខណៈបែបណា ? តើយើងដឹងអ្វីខ្លះអំពីអត្តចរិតរបស់នាង ទំនាក់ទំនងរបស់នាង និងកម្លាំងរបស់នាង ? របៀបមួយដើម្បីដឹងអំពី « ស្ត្រីរើសតាំង » នេះ ( គោលលទ្ធិ និងសេចក្ដីសញ្ញា ២៥:៣ ) គឺត្រូវអានអំពីពាក្យសម្ដីរបស់មនុស្សដែលស្គាល់នាងផ្ទាល់ ។
យ៉ូសែប ស្ម៊ីធ ជុញ្ញ័រ ស្វាមីរបស់នាង
« ជាមួយនឹងការអររីករាយដែលមិនអាចថ្លែងបាន និងអ្វីដែលនាំឲ្យមានអំណរពេញក្នុងខ្លួនខ្ញុំនៅពេលខ្ញុំបានចាប់ដៃនាងនៅយប់នោះ អិមម៉ា សំណប់ចិត្តរបស់ខ្ញុំ—នាងដែលជាភរិយារបស់ខ្ញុំ ជាភរិយាពីយុវវ័យរបស់ខ្ញុំ និងជាជម្រើសនៃដួងចិត្តខ្ញុំ ។ គំនិតខ្ញុំមានរលកអារម្មណ៍រំឭកជាថ្មីជាច្រើននៅពេលខ្ញុំគិតពីគ្រាមួយដែលមានស្ថានភាពជាច្រើនដែលយើងត្រូវបានហៅឲ្យឆ្លងកាត់ ។ ការហត់នឿយ និងការវេទនា ទុក្ខសោក និងការរងទុក្ខ ហើយអំណរ និងការលួងលោមចិត្ត ពីមួយគ្រាទៅមួយគ្រាបានរាយពេញផ្លូវយើង ហើយបានកើតក្នុងជីវិតយើង ។ អូ ! អ្វីដែលការលាយឡំដោយគំនិតល្អៗបានបំពេញគំនិតរបស់ខ្ញុំនៅពេលនេះ ។ ជាថ្មីម្តងទៀត នាងនៅទីនេះ អិមម៉ាជាទីស្រឡាញ់ សូម្បីតែនៅក្នុងបញ្ហាជាច្រើន ការខ្វល់ពីគ្នា ភាពម៉ឺងម៉ាត់ និងមិនប្រែប្រួល មិនផ្លាស់ប្តូរ » ។
លូស៊ី ម៉ាក ស្ម៊ីធ ម្ដាយក្មេករបស់នាង
« ពេលនោះគាត់នៅក្មេង ហើយដោយមានចំណង់ចង់បានពីធម្មជាតិ ដួងចិត្តទាំងស្រុងរបស់គាត់គឺនៅក្នុងកិច្ចការរបស់ព្រះអម្ចាស់ ហើយគាត់មិនមានចំណង់ចង់បានអ្វីក្រៅពីសម្រាប់សាសនាចក្រ និងបុព្វហេតុនៃសេចក្ដីពិតឡើយ ។ គាត់តែងតែរកកិច្ចការធ្វើជានិច្ច គឺគាត់ធ្វើវាដោយអស់ពីកម្លាំងរបស់គាត់ ហើយមិនសួរសំណួរអាត្មានិយមថា ‹ តើខ្ញុំអាចទទួលបានប្រយោជន៍ច្រើនជាងនរណាផ្សេងទៀតទេ ? › នោះទេ ។ ប្រសិនបើមនុស្សមានអាយុចំណាស់ត្រូវបញ្ជូនឲ្យចេញទៅផ្សាយសាសនា នោះគាត់គឺជាបុគ្គលទីមួយដែលស្ម័គ្រចិត្តផ្ដល់ការបម្រើដោយជួយរៀបចំសំលៀកបំពាក់ឲ្យពួកគេសម្រាប់ដំណើររបស់ពួកគេដោយមិនខ្វល់ពីទុក្ខលំបាករបស់ខ្លួនឡើយ » ។
យ៉ូសែប ស្ម៊ីធ ស៊ីញ្ញ័រ ឪពុកក្មេករបស់នាង
ពរជ័យលោកអយ្យកោរបស់ អិមម៉ា ត្រូវបានប្រកាសដោយ យ៉ូសែប ស្ម៊ីធ ស៊ីញ្ញ័រ ដែលបានបម្រើជាលោកអយ្យកោនៃសាសនាចក្រ ៖
« អិមម៉ាកូនប្រសារស្រីឪពុកអើយ កូនគឺជាពរជ័យមកពីព្រះអម្ចាស់ ដោយសារសេចក្ដីស្មោះត្រង់ និងសេចក្ដីពិតរបស់កូន ៖ កូននឹងត្រូវមានពរជាមួយស្វាមីកូន ហើយអររីករាយក្នុងសិរីល្អដែលនឹងកើតមានដល់គាត់ ៖ ព្រលឹងកូនបានរងទុក្ខដោយសារតែអំពើទុច្ចរិតរបស់មនុស្សដែលស្វែងរកការបំផ្លាញដៃគូរបស់កូន ហើយព្រលឹងទាំងមូលរបស់កូនបានចេញទៅក្នុងការអធិស្ឋានសម្រាប់ការរំដោះគាត់ ៖ ចូរអររីករាយដោយសារព្រះអម្ចាស់ជាព្រះនៃកូនបានស្ដាប់ឮការអង្វរកររបស់កូន ។
កូនបានទួញសោកដោយសារភាពរឹងទទឹងនៃដួងចិត្តនៃអ្នកផ្ទះឪពុករបស់កូន ហើយកូនទន្ទឹងចង់ឲ្យពួកគេទទួលបានសេចក្ដីសង្គ្រោះ ។ ព្រះអម្ចាស់នឹងមានការគោរពដល់ការទួញយំរបស់កូន ហើយតាមរយៈការកាត់សេចក្ដីរបស់ទ្រង់ នោះទ្រង់នឹងបណ្ដាលឲ្យពួកគេមួយចំនួនឃើញកំហុសខ្លួន ហើយប្រែចិត្តពីអំពើបាបគេ ប៉ុន្ដែវានឹងដោយសេចក្ដីវេទនាដែលពួកគេនឹងត្រូវបានសង្គ្រោះ ។ កូននឹងឃើញថ្ងៃជាច្រើន មែនហើយ ព្រះអម្ចាស់នឹងទុកជីវិតឲ្យកូនរហូតដល់កូនពេញចិត្ត ដោយសារកូននឹងឃើញព្រះប្រោសលោះរបស់កូន ។ ដួងចិត្តកូននឹងរីករាយក្នុងកិច្ចការដ៏អស្ចារ្យរបស់ព្រះអម្ចាស់ ហើយគ្មាននរណាម្នាក់នឹងយកអំណរកូនចេញពីកូនបានឡើយ ។
កូននឹងចងចាំជានិច្ចដល់ការអនុញ្ញាតដ៏អស្ចារ្យពីព្រះរបស់កូនក្នុងការឲ្យកូននៅជាមួយកូនប្រុសរបស់ខ្ញុំ នៅពេលទេវតានឹងប្រគល់កំណត់ត្រានៃសាសន៍នីហ្វៃឲ្យគេថែរក្សា ។ កូនបានឃើញទុក្ខសោកជាច្រើនហើយដោយសារព្រះអម្ចាស់បានយកកូនចំនួនបីចេញពីកូន ៖ នៅក្នុងការណ៍នេះកូនមិនខុសឡើយដោយសារទ្រង់ជ្រាបពីបំណងដ៏បរិសុទ្ធរបស់កូនដែលចង់បីបាច់គ្រួសារមួយដើម្បីឲ្យឈ្មោះកូនប្រុសរបស់ឪពុកអាចទទួលបានពរ ។ ហើយឥឡូវនេះមើលចុះ ឪពុកនិយាយទៅកាន់កូនថាហេតុដូច្នេះព្រះអម្ចាស់មានព្រះបន្ទូលថា ប្រសិនបើកូននឹងជឿ កូននឹងទទួលពរជ័យនៅក្នុងការណ៍នេះ ហើយកូននឹងមានកូនចៅផ្សេងទៀតគឺដល់អំណរ និងការពេញចិត្តនៃព្រលឹងកូន ហើយដល់ការរីករាយនៃមិត្តកូន ។
កូននឹងមានពរឲ្យយល់ដឹង ហើយមានអំណាចដើម្បីបង្រៀនកូនចៅរបស់កូន ។ បង្រៀនគ្រួសាររបស់កូនអំពីសុចរិតភាព និងកូនតូចៗរបស់កូនអំពីផ្លូវជីវិត ហើយទេវតាដ៏បរិសុទ្ធនឹងតាមឃុំគ្រងថែកូន ៖ ហើយកូននឹងត្រូវបានសង្គ្រោះនៅក្នុងនគររបស់ព្រះគឺពិតដូច្នោះមែន ។ អាម៉ែន » ។
អិមម៉ា ស្ម៊ីធ ជាមួយនឹងកូនៗនាង ។ ពេលត្រូវសើច ដោយ លីស លេម៉ុន ស្វិនដល