10–16 marzo: “Lix waklijik lix Iglees li Kristo”

Tzolʼlebʼ ut Sumwank 20–22

Lix k’anjel li Kolonel re risinkil chi kutankil lix Hu laj Mormon ak kitz’aqlok chik ru. A’b’an lix k’anjel re k’ojob’ank wi’chik toj yoo chi tiklaak. Jo’ xkomon xk’ojob’ankil li tzol’leb’ ut lix wankilal li tijonelil, li Qaawa’ kixye chi saqen sa’ k’utb’esinb’il na’leb’ naq naraj ajwi’ xk’ojob’ankil wi’chik li k’a’ru kixk’uub’ chaq–a’ lix Iglees (chi’ilmanq Tzol’leb’ ut Sumwank 10:53; 18:5). Sa’ li 6 re li po abril, 1830, numenaq 40 chi aj paab’anel ke’xch’utub’ rib’ sa’ rochoch li junkab’al Whitmer aran Fayette, Nueva York, re rilb’al lix k’uub’lajik lix Iglees li Jesukristo.

Junjunqeb’ li kristiaan neke’xpatz’ k’a’ut naq aajel ru jun li Iglees li k’uub’anb’il ru. Jun raqal re lix sumenkil a’an naru natawman sa’eb’ li k’utb’esinb’il na’leb’ wankeb’ rilom rik’in li xb’eenil ch’utam a’an re li Iglees sa’ 1830. Yeeb’ileb’ resil li osob’tesink maajaruj raj te’uxq wi ta ink’a’ “k’uub’anb’il ut xaqab’anb’il chi ch’olch’o” lix Iglees li Jesukristo sa’ roso’jikeb’ li kutan (Tzol’leb’ ut Sumwank 20:1).

Chi’ilmanq ajwi’ Santos, 1:84–87; “Edifica mi iglesia,” Revelaciones en contexto, 32–35.

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 20–21

Li Jesukristo kixk’ojob’ wi’chik lix Iglees.

K’a’ut naq wan jun li Iglees chi k’uub’anb’il ru? Maare, “Xb’aan naq li Jesukristo kixk’uub’ jun.” Naq taatzol Tzol’leb’ ut Sumwank 20–21, maare taak’e reetal naq li Iglees kixk’ojob’ chaq najter wan xjuntaq’eetil rik’in li kixk’ojob’ wi’chik sa’eb’ li kutan a’in. Oksiheb’ li raqal a’in re tzolok chirix lix najteril Iglees li Kolonel: Mateo 16:15–19; Jwan 7:16–17; Efesios 2:19–22; 3 Nefi 11:23–26; Moroni 4–5. Oksiheb’ li raqal a’in re tzolok chirix li Iglees k’ojob’anb’il wi’chik: Tzol’leb’ ut Sumwank 20:17–25, 60, 72–79; 21:1–2. Naru nakatz’iib’a li k’a’ru nakataw sa’ jun kaaxukuut jo’ a’in:

	Li tzol’leb’	K’ojob’anb’il k’anjel	Lix wankilal li tijonelil	Ebʼ li profeet
Lix najteril Iglees li Kristo	Li tzol’leb’	K’ojob’anb’il k’anjel	Lix wankilal li tijonelil	Ebʼ li profeet
Lix Iglees li Kristo li k’ojob’anb’il wi’chik	Li tzol’leb’	K’ojob’anb’il k’anjel	Lix wankilal li tijonelil	Ebʼ li profeet

K’a’ru nakatzol sa’ li ch’ina k’anjel a’in chirix k’a’ut naq li Jesukristo kixk’uub’—ut kixk’ojob’ wi’chik—lix Iglees?

Chi’ilmanq ajwi’ Dallin H. Oaks, “Na’ajman ru jun li Iglees,” Jolomil ch’utub’aj-ib’ re octubre 2021.

Kanab’eb’ chi wotzok. Naq taapatz’ reheb’ li kristiaan naq te’xwotz k’a’ru yookeb’ chixtzolb’al xjuneseb’, te’wakliiq xch’ool chi tzolok xjuneseb’. K’a’ru naru nakapatz’ reheb’ naq te’xwotz?

Tzol’leb’ ut Sumwank 20:37, 75–79; 22

Eb’ li loq’laj k’ojob’anb’il k’anjel nikine’xtenq’a chi wulak jo’ li Kolonel.

Naq kik’uub’aman li Iglees, li Qaawa’ kixtzoleb’ lix santil paab’anel chirixeb’ li santil k’ojob’anb’il k’anjel, jo’ li kub’iha’ ut li loq’laj wa’ak. Naq tattzoloq chirixeb’ li k’ojob’anb’il k’anjel a’an, k’oxla chan ru nakate’xtenq’a chixchapb’al aawib’ rik’in li Kolonel. Qayehaq, chan ru nakate’xtenq’a li k’ojob’anb’il k’anjel a’an chi wank “chi k’eek’o aach’ool chi k’anjelak chiru [li Jesukristo] toj sa’ roso’jik”? (raqal 37). Naru ajwi’ nakawileb’ li tij re li loq’laj wa’ak (eb’ li raqal 77, 79) ut taak’oxla naq a’an xb’een sut naq nakawab’iheb’. K’a’ru li na’leb’ nakataw?

Chi’ilmanq ajwi’ D. Todd Christofferson, “K’a’ru aj-e lix b’ehil li sumwank,” Jolomil ch’utub’aj-ib’ re abril 2021.

Tzolʼlebʼ ut Sumwank 20:38–60

Lix k’anjel li tijonelil narosob’tesiheb’ li komon re li Iglees ut eb’ lix junkab’al.

Ma aak’oxlahom jun sutaq k’a’ut naq aajel ru choq’ re li Kolonel xk’ojob’ankil wi’chik li tijonelil sa’ lix Iglees? Rilb’al li naxpatz’ a’an naq te’xb’aanu laj k’amol re li tijonelil sa’ Tzol’leb’ ut Sumwank 20:38–60 naru naxk’e aana’leb’. Chan ru naq li Kolonel nakatrosob’tesi laa’at ut laa junkab’al rik’in li k’anjel nach’olob’aman sa’eb’ li raqal a’an?

Jo’eb’ li neke’k’ojob’aak re te’xk’ul li tijonelil, eb’ li ixq li neke’k’ojob’aak re k’anjelak sa’ li Iglees neke’xk’anjela ajwi’ xwankil li Dios naq neke’tz’aqon sa’ lix k’anjel. Re xtzolb’al chan ru, il li raatin li Awa’b’ej Dallin H. Oaks, “Eb’ li laaw ut wankilal re li tijonelil” Jolomil ch’utub’aj-ib’ re abril 2014).

Chi’ilmanq ajwi’ Temas y preguntas “Enseñanzas de José Smith sobre el sacerdocio, el templo, las mujeres,” Biblioteca del Evangelio.

Tzolʼlebʼ ut Sumwank 21

Xpaab’ankil li raatin li Dios rik’ineb’ li profeet tixk’e inchoxahil kolb’al.

Sa’ Tzol’leb’ ut Sumwank 21:4–9 wankeb’ b’oqom re xtaaqenkil lix profeet li Qaawa’ ut xninqaleb’ ru yeechi’ihom choq’ reheb’ li kristiaan neke’xb’aanu a’an. Eb’ li na’leb’ a’in naru nakate’xtenq’a chi k’oxlak chirixeb’ li raqal a’in:

• K’a’ chi aatin sa’eb’ li raqal 4–5 neke’xch’olob’ li naraj li Kolonel naq taab’aanu rik’in li raatin lix yo’yookil profeet? K’a’ut naq aajel ru naq wanq “aakuyum ut aapaab’aal” re xb’aanunkil a’in?

• K’oxlan chirixeb’ li jalam-uuch naroksi li Kolonel sa’ li raqal 6 re xch’olob’ankil li osob’tesiik nachal sa’ xk’ab’a’ xtaaqenkil lix profeet. K’a’ru natawman ru rik’in “rokeb’aal xb’alb’a”? K’a’ru naraj naxye naq “tixjek’i chaq cheru li wankilal re q’ojyin” choq’ aawe? K’a’ru naraj naxye “tixk’e chi chiq’mank li choxa choq’ re lee chaab’ilal”?

• K’a’ru naxpatz’ li Qaawa’ aawe naq taab’aanu rik’in li Awa’b’ej sa’ li Iglees anajwan? Chan ru naq li Qaawa’ naxtz’aqob’resi ru lix yeechi’ihom naq laa’at nakataaqe lix na’leb’?

Tz’iib’aheb’ xkomon li na’leb’ li naru nakataweb’ sa’ li raqal a’in sa’ li raatin li Elder Neil L. Andersen “Lix profeet li Dios” (Jolomil ch’utub’aj-ib’ re abril 2018):

• K’a’ut naq naqataaqe li profeet:

• Jun aj k’aak’alenel sa’ xb’een li najt xteramil kab’l:

• Misach aach’ool:

Chi’ilmanq ajwi’ “Los atalayas en la torre” (video), ChurchofJesusChrist.org; Temas y Preguntas, “Profetas,” Biblioteca del Evangelio.

Watchman on the Tower

(Ezekiel 33:1-7) The Lord calls prophets to be the "watchmen" on the tower.

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 20–21

Lix Iglees li Jesukristo k’ojob’anb’il wi’chik.

• Naru nakawoksi li jolomil na’leb’ sa’ li tasal Tzol’leb’ ut Sumwank 21, Ch’ol 9 sa’ Eb’ li Esilal sa’ li Tzol’leb’ ut Sumwank, malaj li video “La organización de la Iglesia” (ChurchofJesusChrist.org) re xtenq’ankileb’ laa kok’al chixtawb’al ru k’a’ru kik’ulman sa’ li kutan naq kik’uub’aman li Iglees.

  Chapter 9: Organization of the Church of Jesus Christ: 6•April 1830

• Laa kok’al maare te’raj xtawb’aleb’ xyaalal xjalam-uuch li Jesukristo, junaq komon naril ras riitz’in, jun kub’iha’ ut li loq’laj wa’ak rik’ineb’ li raqal sa’ li tasal 20 (che’ilmanq li raqal 21–23, 47, 72–74, 75–79). Oksiheb’ li jalam-uuch ut li raqal a’in re aatinak chirixeb’ li osob’tesihom neke’qak’ul xb’aan naq li Jesukristo kixk’ojob’ wi’chik lix Iglees.

Tzol‘leb‘ ut Sumwank 20:37, 41, 71–74

Naq nakub’e inha’ ut nink’ojob’aak, ninyeechi’i xtaaqenkil li Jesukristo.

• Maare taawulaq chiruheb’ laa kok’al rilb’al xjalam-uuch jun ch’ina al naq nakub’e xha’ ut nak’ojob’aak. Naru neke’xye ma nab’aanuman jo’ chanru naxye sa’ Tzol’leb’ ut Sumwank 20:41, 71–74. K’a’ru naqatzol sa’ Tzol’leb’ ut Sumwank 20:37 chirixeb’ li kristiaan neke’raj kub’eek xha’? Naru ajwi’ nekeb’icha “Naq nakubʼe lin haʼ” (B’ichleb’aal choq’ reheb’ li Kok’al, 53) malaj naru nekeril li video “El bautismo de Jesús” (Biblioteca del Evangelio).

  The Baptism of Jesus

  Jesus seeks out John the Baptist and is baptized in order to fulfill all righteousness.

  

• Wi eb’ laa kok’al ak kub’enaqeb’ xha’ ut k’ojob’anb’ileb’, patz’ reheb’ chan ru ke’xnumsi a’an. Ma wankeb’ xjalam-uuch li naru neke’xk’ut? Aatinan rik’ineb’ chirix li yookeb’ chixb’aanunkil re xtaaqenkil li Jesukristo ut chan ru naq yookeb’ chi osob’tesiik xb’aan a’an.

Tzol’leb’ ut Sumwank 20:75–79

Naru nink’ul xk’ab’a’ li Jesus sa’ inb’een ut naru ninjultika junelik.

• Laa kok’al naru neke’xsik’ li aatin “wankeb’ xch’ool” sa’ Tzol’leb’ ut Sumwank 20:37 (chirix li kub’iha’) ut li raqal 77 (li tij re li loq’laj wa’ak). K’a’ru naraj li Jesukristo naq wanq qach’ool chixb’aanunkil? Laa kok’al naru neke’ril k’a’ruhaq li wan xk’ab’a’ chiru (jo’ junaq eetalil malaj xk’ab’a’ junaq kristiaan). K’a’ru naxye li k’ab’a’ej chirix li k’a’aq re ru? K’a’ru naraj naxye xk’ulb’al sa’ qab’een lix k’ab’a’ li Jesukristo?

• Naru nekeril Tzolʼlebʼ ut Sumwank 20:77 ut taapatz’ reheb’ laa kok’al naq te’xk’e reetal li yeechi’ink naqab’aanu sa’ li loq’laj wa’ak. Maare naru neke’xk’e xhoonal chixk’utb’esinkil k’a’ru naru neke’xb’aanu re “xjultikankil junelik” li Kolonel ut te’xq’ehi k’a’ru naxk’utb’esi li junjunq. Jo’ naxye li raqal 77, chan ru naq noko’osob’tesiik xb’aan xjultikankil junelik li Kolonel?

Tzol’leb’ ut Sumwank 21:4–6

Li Jesus nikinrosob’tesi naq nintaaqe lix profeet.

• Chirix xtawb’aleb’ li b’oqom ut li yeechi’ihom sa’ Tzol’leb’ ut Sumwank 21:4–6, laa kok’al naru neke’ril jun xjalam-uuch li profeet wan anajwan ut te’xwotz junaq na’leb’ xe’xtzol rik’in malaj xe’rab’i chirix a’an. Wotzomaq cherib’il eerib’ chan ru naq li Jesukristo nekexrosob’tesi sa’ xk’ab’a’ xtaaqenkil lix profeet.

Re xtawb’al xkomon chik li na’leb’, chi’ilmanq li hu Amigos re li po a’in.

Laj Oliver Cowdery naxk’ojob’ laj Jose Smith, xb’aan laj Walter Rane