17–23 marzo: “Taasikʼ li kʼaʼru re jun ruchich’och’ q’axal chaab’il wi’chik”

Tzolʼlebʼ ut Sumwank 23–26

Choq’ reheb’ xk’ihal li kristiaan, li kib’iha’ a’an jun ch’anch’ookil ut tuqtuukil hoonal. A’b’anan, lix kub’iha’ li xEmma Smith ut jun siireb’ chik kirame’ xb’aaneb’ jun ch’uut li kristiaan li ke’reetz’uheb’, ke’xyeechi’i xrahob’tesinkileb’, ut ke’xmineb’ ru chi elk aran. Chirix chik a’an, naq laj Jose Smith ok raj re chixk’ojob’ankileb’ li ak’ komon sa’ li Iglees, kichape’ xb’aan naq ke’xye naq yoo chixch’i’ilenkileb’ li kristiaan rik’in li xjultinakil li evangelio. Sa’ xyanq li ch’a’ajkilal a’in, chan ta raj ru taak’ojlaaq xch’ool chirix naq us li yoo chixb’aanunkil? Chiqajunilo naru naqataw a’an sa’ jun ajwi’ li na’ajej—rik’in lix k’utb’esinb’il na’leb’ li Qaawa’. Kiraatina li xEmma chirix “li k’a’ru re jun [ruchich’och’] q’axal chaab’il wi’chik”—li rawa’b’ejihom—ut lix na’aj a’an chi sa’. A’an kixye re naq ink’a’ taaxuwaq, ut “tixwaklesi li raam ut chisaho’q sa’ xch’ool,” ut “chijiloq rik’ineb’ li sumwank li kixk’uub’.” Ut eb’ li aatin a’in re waklesink ch’oolej ut na’leb’ a’an lix “yaab’ xkux choq’ reheb’ chixjunil” (Tzol’leb’ ut Sumwank 25:9–10, 13, 16).

Chi’ilmanq ajwi’ Santos, 1:91–92, 96–99.

Li na’leb’ re tzolok sa’ li ochoch ut sa’ li iglees

Tzolʼlebʼ ut Sumwank 24

Li Kolonel naru tinixwaklesi chaq “sa’eb’ lin ch’a’ajkilal.”

Li k’utb’esinb’il na’leb’ natawman sa’ Tzolʼlebʼ ut Sumwank 24 kik’ehe’ re “xk’eeb’al xkawilaleb’, re xwaklesinkileb’ xch’ool, ut re xtzolb’aleb’” laj Jose ut laj Oliver chiruheb’ li kutan re ch’a’ajkilal (xjolomil li tasal; chi’ilmanq ajwi’ Santos, 1:96–97. Sik’eb’ aatin sa’ Tzol’leb’ ut Sumwank 24 li nakak’oxla naq xtenq’an ut xkawob’resin reheb’ a’an.

K’a’ru neke’xk’ut li raqal a’in chawu chirix chan ru naq li Kolonel nakatxtenq’a sa’eb’ laa ch’a’ajkilal?

Tzol’leb’ ut Sumwank 24:1–3

Tzol’leb’ ut Sumwank 24:8

Tzol’leb’ ut Sumwank 121:7–8

Isaias 40:28–31

Mosiah 24:14–15

Jalam-uuch re Kixk’irtesi naab’aleb’, k’iila paay ruheb’ lix yajel, xb’aan laj J. Kirk Richards

Tzolʼlebʼ ut Sumwank 25

Wan jun ink’anjel aajel ru sa’ li rawa’b’ejihom li Dios.

Naq li xEmma Smith kiril chan ru naq yoo chi uxmank li k’ojob’ank wi’chik rik’in xtenq’ lix b’eelom, a’ laj Jose Smith, maare kixpatz’ rib’ k’a’ ta wi’ ru lix k’anjel a’an. Sik’eb’ li sumehom kixk’e li Qaawa’ sa’ Tzol’leb’ ut Sumwank 25. Ma nakataw junaq na’leb’ sa’ li tasal a’in li nakaweek’a naq a’an lix “yaab’ xkux [choq’ aawe]”? (raqal 16).

Chi’ilmanq ajwi’ “Una dama elegida” (video), Biblioteca del Evangelio; “Eres una dama elegida,” Revelaciones en contexto, 36–43; Joy D. Jones, “Jun li b’oqok k’a’jo’ xnimal ru,” Jolomil ch’utub’aj-ib’ re abril 2020.

"An Elect Lady"

(D&C 25:2-3) Video portraying events in the life of Emma Smith.

Tzolʼlebʼ ut Sumwank 25:5, 14

“Chatkanaaq sa’ li musiq’ej re tuulanil.”

Kʼaʼru naraj naxye choqʼ aawe “li musiq’ej re tuulanil”? Naru nakasik’ aatin ut ch’ol aatin sa’ li tasal 25 li tate’xtenq’a chixtawb’al ru k’a’ru naraj naxye li wank sa’ tuulanil. Li raatin li Elder David A. Bednar, “Tuulan ut kub’enaq xch’ool” naru ajwi’ natenq’an (Jolomil ch’utub’aj-ib’ re abril 2018). Chan ru naq li Jesukristo a’an jun reetalil li tuulanil choq’ aawe? (chi’ilmanq Mateo 11:28–30). K’oxla k’a’ru naru nakab’aanu rik’in “li musiq’ej re tuulanil.”

Tzolʼlebʼ ut Sumwank 25:10, 13

“Taatzʼeq chawix li kʼaʼaq re ru re li ruchichʼochʼ aʼin, ut taasikʼ li kʼaʼru re jun qʼaxal chaabʼil wiʼchik.”

Naq tatk’oxlaq chirix xna’leb’ li Qaawa’ wan sa’ Tzol’leb’ ut Sumwank 25:10, naru nakatz’iib’aheb’ li “k’a’aq re ru re li ruchich’och’ a’in” li naraj a’an naq “taatz’eq chawix.” Chirix a’an naru nakatz’iib’aheb’ “li k’a’ru re jun [ruchich’och’] q’axal chaab’il wi’chik” li naraj a’an naq taasik’. Naru nakasik’ ru jun k’a’aq re ru li xatz’iib’a xb’een wan re taatz’eq chawix ut jun k’a’aq re ru li xatz’iib’a sa’ xkab’ li ch’uut li nakawaj xtawb’al.

Li Awa’b’ej Russell M. Nelson naxk’e qana’leb’ ut nayeechi’in chirix naq “teekanab’ naab’al li k’a’ re ru re li ruchich’och’ a’in.” Sik’ a’an sa’ li raatin, “Li musiq’ejil b’ihomal” (Jolomil ch’utub’aj-ib’ re octubre 2019). Chan ru naq taayu’ami li na’leb’ kixk’ut?

Naq taawil li raqal 13, k’oxlaheb’ li sumwank okenaqat wi’ rik’in li qaChoxahil Yuwa’ ut li Jesukristo. K’a’ru nara naxye “jilok” rik’ineb’ li sumwank a’an? Chan ru naq li qasumwank nokohe’xtenq’a “chixtz’eqb’al chiqix li k’a’aq re ru re li ruchich’och’ a’in, ut xsik’b’al li k’a’ru re jun q’axal chaab’il wi’chik”?

Arin wankeb’ junjunq li raqal li naru nakate’xtenq’a chixtawb’al xjalanil “li k’a’aq re ru re li ruchich’och’ a’in” ut li k’a’ru re jun [ruchich’och’] q’axal chaab’il wi’chik”: Mateo 6:19, 21, 25–34; Lukas 10:39–42; 2 Nefi 9:51.

Chi’ilmanq ajwi’ Temas y preguntas, “Sacrificio,” Biblioteca del Evangelio.

B’oqeb’ chi wotzok. Wi yookat chixtzolb’aleb’ jalan chirix chan ru “xkanab’ankil chi ixb’ej li k’a’ru re li ruchich’och’ a’in,” k’oxla chan ru taab’oqeb’ chixwotzb’al k’a’ru yookeb’ chixb’aanunkil re xtaaqenkil li na’leb’ a’in. Naru naqak’ul qakawilal ut xkawil qach’ool naq naqab’i xna’leb’eb’ ut xnumsihomeb’ li qas qiitz’in.

Tzol’leb’ ut Sumwank 25:11–12

Li Qaawa’ nasaho’ xch’ool rik’in “lix b’ichahom li aamej.”

B’ar wan junjunq reheb’ “lix b’ichahom laa waam”—li neke’xch’olob’ laa week’ahom chirix li qaChoxahil Yuwa’ malaj chirix li Jesukristo? Naru nakab’icha malaj nakawab’i junjunq reheb’ a’an. K’a’ru neke’xye li b’ich a’in li chaab’il choq’ aawe?

Naru ajwi’ nakak’oxla chan ru naq eb’ li b’ich a’in a’aneb’ jo’ jun li tij. K’a’ru xjuntaq’eetileb’ li loq’laj b’ich rik’in li tij? Chan ru naq laa loq’laj b’ich a’aneb’ “sumehom rik’in yeechi’ihom”?

Chi’ilmanq ajwi’ “Kʼaʼjoʼaq xbʼich li qaam,” Eb’ li B’ich, 184.

Tzol’leb’ ut Sumwank 26:2

“Chixjunil li k’a’aq re ru taab’aanumanq chi k’ulub’anb’il sa’ komonil sa’ li iglees.”

Li ch’ol aatin “chi k’uub’anb’il” sa’ li raqal a’in na’aatinak chirix xtaqsinkil li uq’ej re xk’utb’al naq naqaxaqab’ xwankil ut naqatenq’a li kristiaan yoo chixk’ulb’al junaq xb’oqb’al malaj yoo chi k’ojob’aak sa’ li tijonelil. Chan raj ru taach’olob’ chiru junaq ula’ sa’ li Iglees k’a’ru naraj naxye naq naqaxaqab’ xwankil junaq komon? K’a’ru sumehom nakataw sa’ li raatin li Awa’b’ej Henry B. Eyring sa’ “Lix wankilal li paab’aal aj xaqab’anel”? (Jolomil ch’utub’aj-ib’ re abril 2109).

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 24:1, 8

Li Kolonel naru “nikinixwaklesi chaq sa’eb’ lin ch’a’ajkilal.”

• Re xnawb’al b’ar wan junjunq reheb’ li ch’a’ajkilal ke’xnumsi laj Jose Smith ut eb’ li xb’eenil aj santil paab’anel, naru nakawil “Ch’ol 11: Xkomon chik neke’ok sa’ li Iglees,” sa’ Eb’ li Esilal sa’ li Tzol’leb’ ut Sumwank, 46–47, malaj li video sa’ li Biblioteca del Evangelio. Chirix a’an, laa’at ut eb’ laa kok’al teek’e reetal k’a’ru kixye li Qaawa’ re laj Jose chirixeb’ lix ch’a’ajkilal sa’ Tzolʼlebʼ ut Sumwank 24:1, 8. Naru ajwi’ nekewotz cherib’il eerib’ chan ru naq li Qaawa’ nekexxtenq’a sa’eb’ li hoonal ch’a’aj.

  Chapter 11: More People Join the Church: April–June 1830

• Re xtzolb’al k’a’ru naraj naxye wank choq’ “aj kuyunel sa’ li qach’a’ajkilal,” laa’at ut eb’ laa kok’al naru nekek’utb’esi li na’ilman sa’ li video “Continuemos con paciencia” (Biblioteca del Evangelio). K’a’ru naxk’ut Tzol’leb’ ut Sumwank 24:8 chiqu chirix li kuyuk? Chan ru naq li Kolonel naxk’e chiqanaw naq wan “qik’in” sa’eb’ li qach’a’ajkilal?

  Continue in Patience

  Patience requires that we obey God's commandments and faithfully wait for His will to be fulfilled.

Tzol’leb’ ut Sumwank 25:11–12

Jwal nawulak chiru li Jesus “lix b’ichahom li aamej.”

• Chirix rilb’al Tzol’leb’ ut Sumwank 25:12, naru nekeye cherib’il eerib’ b’ar wan li b’ich re li Iglees nawulak cheru—“lix b’ich lee raam”—ut teeb’icha sa’ komonil. Wotzomaq cherib’il eerib’ k’a’ut naq nekeraheb’ li b’ich a’an. K’a’ut naq li Qaawa’ nasaho’ xch’ool naq neke’qab’icha li b’ich a’in? Chan ru naq li qab’ich chanchan chik “li tij chiru a’an”?

Tzolʼlebʼ ut Sumwank 25:13, 15

Eb’ lin sumwank rik’in li qaChoxahil Yuwa’ neke’xk’e xsahil inch’ool.

• Re xtawb’al ru k’a’ru naraj naxye “chatjiloq rik’ineb’ li sumwank” (Tzol’leb’ ut Sumwank 25:13), laa kok’al naru neke’xk’e xhoonal re te’xchap rib’ chi kaw chiru k’a’ruhaq. Chirix a’an, laa’at ut eb’ laa kok’al naru nekeye chan ru “nekechap eerib’” rik’ineb’ lee sumwank. Wi na’ajman ru, ka’sutiheb’ rik’ineb’ laa kok’al, li sumwank noko’ok wi’ (chi’ilmanq Mosiah 18:8–10; Tzol’leb’ ut Sumwank 20:37; ut li perel re kok’ k’anjel re li xamaan a’in).

• Re xch’olob’ankil chiruheb’ laa kok’al k’a’ru na’aatinak wi’ Tzol’leb’ ut Sumwank 25:13, naru nakaye reheb’ naq a’in jun na’leb’ kixk’e li Qaawa’ re xEmma Smith chirix naq kikub’e xha’. K’a’ut naq a’in jun chaab’il na’leb’ choq’ re junaq komon li toje’ xkub’e xha’?

Re xtawb’al xkomon chik li na’leb’, chi’ilmanq li hu Amigos re li po a’in.

Eb’ lix b’ich li xEmma, xb’aan li xLiz Lemon Swindle