24–30 marzo: “Chixjunil li k’a’aq re ru tento taab’aanumanq chi tustu”

Tzolʼlebʼ ut Sumwank 27–28

Xk’ulb’al li na’leb’ chi k’utb’esinb’il a’an jun ak’ na’leb’ choq’ reheb’ laj santil paab’anel naq yoo chaq chi k’ulmank li k’ojob’ank wi’chik. Eb’ li xb’eenil komon sa’ li Iglees ke’xnaw naq laj Jose Smith naru chixk’ulb’al li k’utb’esinb’il na’leb’ choq’ re li Iglees. A’b’an ma wankeb’ chik li neke’ru ajwi’ chixk’ulb’al a’an? Tz’aqal aajeleb’ ru li patz’om jo’ a’an naq laj Hiram Page, jun reheb’ li waqxaqib’ chi aj yehol nawom chirixeb’ li perel ch’iich’ oor, kixpaab’ naq wan li k’utb’esinb’il na’leb’ kixk’ul choq’ re li Iglees. Ke’wan naab’aleb’ aj santil paab’anel li ke’xk’oxla naq re li Dios li k’utb’esinb’il na’leb’ a’an. Li Qaawa’ kisumen rik’in xk’utb’al naq sa’ lix Iglees “chixjunil li k’a’aq re ru tento taab’aanumanq chi tustu” (Tzol’leb’ ut Sumwank 28:13). A’an naraj naxye naq taawanq jun ajwi’ li kristiaan “taaxaqab’amanq chixk’ulb’aleb’ li taqlahom ut k’utb’esinb’il na’leb’” choq’ re chixjunil li Iglees (Tzol’leb’ ut Sumwank 28:2). A’b’an, wankeb’ chik te’ruuq chixk’ulb’al li k’utb’esinb’il na’leb’ re xjuneseb’ xb’aan xtz’aqonikeb’ sa’ lix k’anjel li Qaawa’. Relik chi yaal, li raatin li Qaawa’ re laj Oliver Cowdery naxk’e chi jultiko’k qe chiqajunil: “Taak’eemanq aawe … k’a’ru taab’aanu” (Tzol’leb’ ut Sumwank 28:15).

Chi’ilmanq ajwi’ “Es preciso que todas las cosas se hagan con orden,” sa’ Revelaciones en contexto, 54–57.

Li na’leb’ re tzolok sa’ li ochoch ut sa’ li iglees

Tzol’leb’ ut Sumwank 27:1–4

Nintzeka li loq’laj wa’ak re xjultikankil li Jesukristo.

Li xSally Knight ut li xEmma Smith ke’kub’e xha’ sa’ li po junio re 1830, a’b’an kirame’ ru lix k’ojob’ankileb’ choq’ komon xb’aan jun ch’uut chi winq. Wiib’ po chirix a’an, li xSally ut lix b’eelom, laj Newel, kole’rula’ani li xEmma ut laj Jose, ut kisik’man ru naq sa’ li hoonal a’an te’k’ojob’aaq choq’ komon, ut sa’ komonil te’xk’ul li loq’laj wa’ak. Naq yoo chi xik chixtawb’al li viin choq’ re li loq’laj wa’ak, kixaqab’aak laj Jose xb’aan jun li anjel.

Il Tzol’leb’ ut Sumwank 27:1–4 re xk’eeb’al reetal k’a’ru kixk’ut li anjel chirix li loq’laj wa’ak. K’a’ru neke’xk’ut li raqal a’in chirix chan ru naq li Kolonel naraj naq tatwanq naq taak’ul li loq’laj wa’ak? K’a’ru naraj naxye tz’aqonk “chi junaj ru lix sa’ eeru sa’ lix loq’al”? K’oxlan chirix a’in—ut sik’ xkomon li na’leb’ chirix li loq’laj wa’ak—naq taawil Lukas 22:19–20 ut 3 Nefi 18:1–11. (Chi’ilmanq ajwi’ li video “La Última Cena,” “Jesucristo bendice el pan en memoria de Él,” ut “Jesucristo bendice el vuno en memoria de Él,” Biblioteca del Evangelio).

The Last Supper

Jesus Christ Blesses Bread in Remembrance of Him | 3 Nephi 18:1-7

Jesus Christ Blesses Wine in Remembrance of Him | 3 Nephi 18:8-11

Re xtzolb’al chan ru tz’aqonk sa’ li loq’laj wa’ak sa’ jun loq’onink, naru taatzol li raatin li Elder D. Todd Christofferson, “Li yo’yookil wa li kikub’e chaq sa’ choxa” (Jolomil ch’utub’aj-ib’ re octubre 2017). K’a’ru kixk’ut li Elder Christofferson li naru nakatxtenq’a chireek’ankil chi us wi’chik li Kolonel rik’in li loq’laj wa’ak? Tz’il rix k’a’ru naru nakab’aanu re xkawresinkil aawib’ re tz’aqonk chixtzekankil li reetalil lix tojb’al rix li maak xb’aan li Kolonel ut roxloq’inkil chik chi us tu rilb’al naq wan rajom.

Naru nakab’icha, nakawab’i, malaj nakawil raatinul jun li b’ich chirix li loq’laj wa’ak, jo’ “Naq naqakʼul li eetalil” (Eb’ li B’ich, 103), ut taatz’iib’a li nakaweek’a chirix xk’ulb’al li loq’laj wa’ak.

Oksiheb‘ li b‘ich. Li loq’laj b’ich naxb’oq li Musiq’ej chixch’olob’ankil xyaalal li yaal re li evangelio. Naru nakate’xtenq’a chixtawb’al ru ut chireek’ankileb’ li yaal a’in chi nim wi’chik ru. Li b’ich natenq’an ajwi’ chi tzolok chi chaab’il wi’chik.

Chi’ilmanq ajwi’ Tzol’leb’ ut Sumwank 20:77, 79; 59:9–13; Temas y preguntas, “Santa Cena,” Biblioteca del Evangelio; “Xk’ulb’al ut xk’uulankil jun risinkil li maak rik’ineb’ li k’ojob’anb’il k’anjel,” sa’ David A. Bednar, “Junelik taakanaaq eerik’in li risinkil lee maak,” Jolomil ch’utub’aj-ib’ re abril 2016.

Junelik taakanaaq eerik’in li risinkil lee maak

Tzolʼlebʼ ut Sumwank 27:5–14

Li Qaawa’ naxk’e reheb’ lix moos lix laawil li tijonelil re xb’eresinkil lix k’anjel.

K’a’ru nakanaw chirixeb’ li profeet yeeb’ileb’ resil sa’ li raqal a’in? Naru nakasik’ aana’leb’ chirixeb’ a’an sa’ li K’utul Raqal reheb’ li Loq’laj Hu. K’a’ruheb’ li osob’tesink li teeb’ileb’ chawu xb’aaneb’ li laaw neke’xk’am li profeet a’an?

Tzol’leb’ ut Sumwank 27:15–18

Lix kolb’a-ib’ aq’ej li Dios tinixtenq’a chi numtaak chiru li maa’usilal.

Li Awa’b’ej M. Russell Ballard kixye: “Maak’a’ junaq xnimal ru b’aanuhom naru taqab’aanu re xk’eeb’al chiqix li qamusiq’ejil kolb’a-ib’ aq’ej. Li tz’aqal musiq’ejil wankilal natawman sa’ k’iila kok’ b’aanuhom li kemb’ileb’ rib’ jo’ xt’ikrul li musiq’ejil kawilal li naxkol qix chiru chixjunil li maa’usilal” (“Be Strong in the Lord,” Ensign, julio 2004, 8).

Naq yooqat chi tzolok chirix lix kolb’a-ib’ aq’ej li Dios sa’ Tzol’leb’ ut Sumwank 27:15–18, naru nakatz’iib’aheb’ li na’leb’ jo’eb’ a’in. K’a’ru yookat chixb’aanunkil re xk’eeb’al chawix li junjunq xcha’al lix kolb’a-ib’ aq’ej li Dios?

Li paay chi kolb’a-ib’ aq’ej	Lix cha’al li tib’elej li kolb’il rix b’aan	K’a’ru nareetali li cha’alej a’an
Li paay chi kolb’a-ib’ aq’ej Li ramb’al ru ch’oolej re tiikilal	Lix cha’al li tib’elej li kolb’il rix b’aan Li ch’oolej	K’a’ru nareetali li cha’alej a’an Li rajom inch’ool ut li reek’ob’aal inch’ool
Li paay chi kolb’a-ib’ aq’ej Li xramb’al jolomej re li kolb’a-ib’	Lix cha’al li tib’elej li kolb’il rix b’aan Li jolom malaj li ulul	K’a’ru nareetali li cha’alej a’an
Li paay chi kolb’a-ib’ aq’ej	Lix cha’al li tib’elej li kolb’il rix b’aan	K’a’ru nareetali li cha’alej a’an
Li paay chi kolb’a-ib’ aq’ej	Lix cha’al li tib’elej li kolb’il rix b’aan	K’a’ru nareetali li cha’alej a’an

Chi’ilmanq ajwi’ Efesios 6:11–18; Jorge F. Zeballos, “Xkab’lankil jun yu’am kaw rib’ chiru li ch’a’ajkilal,” Jolomil ch’utub’aj-ib’ re octubre 2022.

Tzolʼlebʼ ut Sumwank 28

Li Jesukristo naxb’eresi lix Iglees rik’in lix yo’yookil profeet.

K’oxla chan raj ru toowanq wi ta yalaq ani taaruuq chixk’ulb’aleb’ li taqlahom ut k’utb’esinb’il na’leb’ choq’ re chixjunil li Iglees. Naq laj Hiram Page kixye naq kixk’ul li k’utb’esinb’il na’leb’ a’an, naab’aleb’ li komon ke’sach’ xna’leb’. Sa’ Tzol’leb’ ut Sumwank 28, li Qaawa’ kixk’utb’esi chan ru naq taak’ule’q li k’utb’esinb’il na’leb’ sa’ lix Iglees. K’a’ru nakatzol sa’ li tasal a’in chirix lix k’anjel li Awa’b’ej re li Iglees? K’a’ru nakatzol chirix chan ru naru nakatxb’eresi li Dios?

Chi’ilmanq ajwi’ Dale G. Renlund “Jun k’uub’anb’il eetalil re xk’ulb’al li k’utb’esinb’il na’leb’,” Jolomil ch’utub’aj-ib’ re octubre 2022.

Tzolʼlebʼ ut Sumwank 28:8–9

K’a’ut naq aajel ru jun k’anjel sa’ xyanqeb’ laj Lamanita?

Jun rajom lix Hu laj Mormon, a’an “naq eb’ laj Lamanita te’k’ame’q chixnawb’al chirixeb’ lix yuwa’eb’, ut re naq te’xnaw lix yeechi’ihom li Qaawa’ ” (Tzolʼlebʼ ut Sumwank 3:20). A’in naxk’am rib’ rik’ineb’ lix yeechi’ihom li Qaawa’ reheb’ li profeet sa’ lix Hu laj Mormon (chi’ilmanq, jo’ eetalil, 1 Nefi 13:34–41; Enos 1:11–18; Helaman 15:12–13). Eb’ laj paab’anel sa’ xtiklajik li Iglees ke’xk’oxla naq eb’ laj ral ch’och’ sa’ li ch’och’ America a’aneb’ li riyajileb’ li tenamit ke’wan sa’ lix Hu laj Mormon. (Lix na’leb’ li Iglees sa’ li kutan a’in, a’an naq eb’ laj Lamanita “aʼanebʼ xkomon lix xeʼtoonilebʼ li ral chʼochʼ saʼ li chʼochʼ America” [Xtikib’ankil re lix Hu laj Mormon].)

Re rilb’al ru xkomon chik li na’leb’ chirix lix mision laj Oliver rik’ineb’ li teep chi aj ral ch’och’ re America, chi’ilmanq “Una misión a los lamanitas,” Revelaciones en contexto, 49–53. K’a’ru naxk’ut li mision a’in chawu chirix li Qaawa’ ut lix k’anjel?

Re xtawb’al xkomon chik li na’leb’, chi’ilmanq li hu Liahona ut li hu Para la Fortaleza de la Juventud re li po a’in.

Li na’leb’ re xtzolb’aleb’ li kok’al

Tzol’leb’ ut Sumwank 27:1–2

Li loq’laj wa’ak nikinixtenq’a chixjultikankil li Jesukristo.

• Li kok’al naru neke’xpatz’ k’a’ut naq naqoksi li ha’ choq’ re li loq’laj wa’ak ut li Jesus kiroksi li viin (chi’ilmanq Lukas 22:19–20; 3 Nefi 18:1–11). Naru nekeril Tzol’leb’ ut Sumwank 27:1–2 ut teeye k’a’ru naraj naxye xk’ulb’al li loq’laj wa’ak “chi junaj ru lix sa’ eeru sa’ lix loq’al [li Dios]” (raqal 2). K’a’ru naru naqab’aanu re xjayalinkil qib’ rik’in li Kolonel naq nokotz’aqon sa’ li loq’laj wa’ak?

• Eb’ li jalam-uuch, raqal sa’ li loq’laj hu, malaj raatinul li b’ich chirix li Kolonel naru naxtenq’aheb’ li kok’al chixjultikankil a’an naq neke’tz’aqon sa’ li loq’laj wa’ak. Maare naru teeyiib’ junaq ch’ina tasal hu rik’ineb’ li jalam-uuch a’an, li raqal, ut li raatinul li b’ich. Naru neke’xyiib’ xjalam-uucheb’ malaj te’xsik’ sa’ li hu Amigos.

Jalam-uuch re La Ultima Cena, xb’aan laj Simon Dewey

Tzol’leb’ ut Sumwank 27:15–18

Li kolb’a-ib’ aq’ej re li Dios naxkol wix.

• Naru nakak’ut chiruheb’ laa kok’al xjalam-uuch jun kolb’a-ib’ aq’ej jo’ li wan sa’ li tusleb’ aatin a’in malaj sa’ li perel re kok’ k’anjel sa’ li tusleb’ aatin re Efesios sa’ Kim, Taaqehin—Choq’ re li Tzoleb’aal reheb’ li Kok’al: Li Ak’ Chaq’rab’ 2023. Naq taawil Tzol’leb’ ut Sumwank 27:15–18, tenq’aheb’ chixtawb’aleb’ lix cha’alil li kolb’a-ib’ aq’ej sa’ li jalam-uuch. Chan ru naq lix kolb’a-ib’ aq’ej li Dios naru nokoxtenq’a “chixkuyb’al li rahil kutan”? (raqal 15).

Tzol’leb’ ut Sumwank 28:2, 6–7

Li profeet naxk’ul li k’utb’esinb’il na’leb’ choq’ re li Iglees; laa’in naru nink’ul li k’utb’esinb’il na’leb’ choq’ re lin yu’am.

• Wi naab’aleb’ laa kok’al, naru nakak’eheb’ chi b’atz’unk “chixtaaqenkil laj jolominel,” a’b’an patz’ reheb’ wiib’ malaj wiib’ oxib’ li kok’al naq te’wanq choq’ aj jolominel sa’ jun ajwi’ li hoonal. K’a’ru nak’ulman naq moko jun aj ta wi’ laj jolominel? Chirix a’an naru nakataw xkomon li na’leb’ chirix laj Hiram Page (chi’ilmanq “Ch’ol 14: Li Profeet ut eb’ li k’utb’esinb’il na’leb’ choq’ re li Iglees,” sa’ Eb’ li Esilal sa’ li Tzol’leb’ ut Sumwank, 56–57, malaj li video sa’ li Biblioteca del Evangelio; malaj li xjolomil li tasal Tzol’leb’ ut Sumwank 28). Chan ru naq li qaChoxahil Yuwa’ kixtuqub’ ru lix sachikeb’ xna’leb’ li komon re li Iglees? Chan ru naq naxb’eresi lix Iglees anajwan? (chi’ilmanq Tzol’leb’ ut Sumwank 28:2). Wotz lix nawom aach’ool chirix naq li profeet wan anajwan b’oqb’il xb’aan li Qaawa’ chixb’eresinkil lix Iglees sa’eb’ li kutan a’in.

  Chapter 14: The Prophet and Revelations for the Church: September 1830

• Us ta li k’utb’esinb’il na’leb’ choq’ re li Iglees junelik taak’eemanq re li profeet, chiqajunilo naru nokob’eresiik xb’aan li Santil Musiq’ej. Naru nakatenq’aheb’ laa kok’al chixsik’b’aleb’ li raqal a’in re naq te’xtz’iib’a chan ru naru nokob’eresiik xb’aan li Santil Musiq’ej: Tzol’leb’ ut Sumwank 28:1, 4, 15; Jwan 14:26; Moroni 8:26; 10:4–5. Wotzomaq cherib’il eerib’ chan ru naq nekexb’eresiik xb’aan li Santil Musiq’ej.

Re xtawb’al xkomon chik li na’leb’, chi’ilmanq li hu Amigos re li po a’in.