“ວັນທີ 7–13 ເດືອນເມສາ: ‘ເປີດປາກປະກາດພຣະກິດຕິຄຸນຂອງເຮົາ’: ຄຳສອນ ແລະ ພັນທະສັນຍາ 30–36,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 30–36,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ວັນທີ 7–13 ເດືອນເມສາ: “ເປີດປາກປະກາດພຣະກິດຕິຄຸນຂອງເຮົາ”

ຄຳສອນ ແລະ ພັນທະສັນຍາ 30–36

ພາລີ ພີ ພະແຣັດ ເປັນສະມາຊິກຂອງສາດສະໜາຈັກໄດ້ປະມານໜຶ່ງເດືອນ ເມື່ອລາວໄດ້ຖືກເອີ້ນໃຫ້ “ເຂົ້າໄປຖິ່ນແຫ້ງແລ້ງກັນດານ” ເພື່ອສັ່ງສອນພຣະກິດຕິຄຸນ (ຄຳສອນ ແລະ ພັນທະສັນຍາ 32:2). ທອມມັສ ບີ ມາສ໌ ເປັນສະມາຊິກໃໝ່ກວ່ານັ້ນອີກ ເມື່ອລາວຖືກບອກວ່າ, “ຊົ່ວໂມງແຫ່ງພາລະກິດຂອງເຈົ້າມາເຖິງແລ້ວ” (ຄຳສອນ ແລະ ພັນທະສັນຍາ 31:3). ອໍສັນ ພະແຣັດ, ເອດເວີດ ພາດທຣິດ, ແລະ ຄົນອື່ນຫລາຍຄົນ ຫາກໍໄດ້ຮັບບັບຕິສະມາ ເມື່ອເຂົາເຈົ້າໄດ້ຮັບການເອີ້ນໃຫ້ໄປເຜີຍແຜ່. ບາງທີແບບແຜນນີ້ໄດ້ເປັນບົດຮຽນສຳລັບເຮົາ ໃນທຸກວັນນີ້: ຖ້າຫາກທ່ານຮູ້ພຽງພໍທີ່ຈະຮັບເອົາພຣະກິດຕິຄຸນທີ່ຖືກຟື້ນຟູໂດຍການບັບຕິສະມາ, ແລ້ວທ່ານກໍຮູ້ພຽງພໍທີ່ຈະແບ່ງປັນມັນໃຫ້ກັບຄົນອື່ນ. ແນ່ນອນ, ທີ່ເຮົາຢາກຈະມີຄວາມຮູ້ເລື່ອງພຣະກິດຕິຄຸນຫລາຍກວ່ານີ້, ແຕ່ພຣະເຈົ້າບໍ່ເຄີຍຢ້ານທີ່ຈະເອີ້ນບຸກຄົນທີ່ “ດ້ອຍການສຶກສາ” ເພື່ອໃຫ້ສັ່ງສອນພຣະກິດຕິຄຸນຂອງພຣະອົງ (ຄຳສອນ ແລະ ພັນທະສັນຍາ 35:13). ຕາມຈິງແລ້ວ, ພຣະອົງເຊື້ອເຊີນເຮົາທຸກຄົນໃຫ້, “ເປີດປາກປະກາດພຣະກິດຕິຄຸນຂອງເຮົາ” (ຄຳສອນ ແລະ ພັນທະສັນຍາ 30:5). ແລະ ເຮົາເຮັດສິ່ງນັ້ນໄດ້ດີທີ່ສຸດ ບໍ່ແມ່ນໂດຍສະຕິປັນຍາ ແລະ ປະສົບການຂອງເຮົາເອງ ແຕ່ “ໂດຍອຳນາດຂອງພຣະວິນຍານ” (ຄຳສອນ ແລະ ພັນທະສັນຍາ 35:13).

ເບິ່ງ “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” ໃນ Revelations in Context, 54–69 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ເຮົາຖືກເອີ້ນໃຫ້ເປັນພະຍານເຖິງພຣະເຢຊູຄຣິດ.

ບໍ່ວ່າທ່ານຈະມີການເອີ້ນຢ່າງເປັນທາງການໃຫ້ເປັນຜູ້ສອນສາດສະໜາຫລືບໍ່ກໍຕາມ, ທ່ານສາມາດເປັນພະຍານເຖິງພຣະເຢຊູຄຣິດ “ຢືນເປັນພະຍານຂອງພຣະເຈົ້າ ໃນທຸກເວລາ ແລະ ໃນທຸກສິ່ງ, ແລະ ໃນທຸກບ່ອນ” (ໂມໄຊຢາ 18:9). ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 30–36, ໃຫ້ບັນທຶກສິ່ງທີ່ທ່ານຮຽນຮູ້ກ່ຽວກັບໂອກາດຂອງທ່ານທີ່ຈະແບ່ງປັນພຣະກິດຕິຄຸນ. ທ່ານສາມາດເຮັດລາຍການສິ່ງທີ່ພຣະຜູ້ເປັນເຈົ້າຮຽກຮ້ອງຈາກທ່ານ ແລະ ເຮັດອີກລາຍການໜຶ່ງກ່ຽວກັບຄຳສັນຍາຂອງພຣະຜູ້ເປັນເຈົ້າເຮັດ ເມື່ອທ່ານແບ່ງປັນພຣະກິດຕິຄຸນ (ຍົກຕົວຢ່າງ, ເບິ່ງ ຄຳສອນ ແລະ ພັນທະສັນຍາ 30:8; 31:3–5; 32:1, 5; 35:13–15, 24). ທ່ານກໍຍັງສາມາດຊອກຫາຫລັກທຳທີ່ສາມາດຊ່ວຍທ່ານແບ່ງປັນພຣະກິດຕິຄຸນນຳອີກ. ທ່ານພົບເຫັນຫຍັງແດ່ທີ່ດົນໃຈທ່ານໃຫ້ “ປະກາດຂ່າວອັນໜ້າຊື່ນຊົມແຫ່ງຄວາມສຸກອັນຍິ່ງໃຫຍ່”? (ຄຳສອນ ແລະ ພັນທະສັນຍາ 31:3).

ແອວເດີ ແກຣີ ອີ ສະຕີບເວັນສັນ ໄດ້ສິດສອນວ່າ ການປະກາດພຣະກິດຕິຄຸນ “ສາມາດສຳເລັດໄດ້ຜ່ານທາງຫລັກທຳທີ່ລຽບງ່າຍ, ເຂົ້າໃຈໄດ້ງ່າຍ ທີ່ຖືກສິດສອນໃຫ້ເຮົາແຕ່ລະຄົນຕັ້ງແຕ່ໄວເດັກວ່າໃຫ້: ຮັກ, ແບ່ງປັນ, ແລະ ເຊື້ອເຊີນ” (“Love, Share, Invite,” Liahona, May 2022, 85). ໃຫ້ພິຈາລະນາສຶກສາຂ່າວສານຂອງເພິ່ນຂະນະທີ່ຄິດເຖິງຄົນຮູ້ຈັກ, ໝູ່ເພື່ອນ, ແລະ ຄອບຄົວຂອງທ່ານ. ແນວຄິດໃດແດ່ທີ່ມາເຖິງທ່ານກ່ຽວກັບວິທີທີ່ທ່ານຈະແບ່ງປັນກັບເຂົາເຈົ້າກ່ຽວກັບ “ສິ່ງທີ່ [ທ່ານ] ມັກກ່ຽວກັບພຣະກິດຕິຄຸນຂອງພຣະເຢຊູຄຣິດ”? ທ່ານຈະສາມາດເຊື້ອເຊີນເຂົາເຈົ້າໃຫ້ “ມາເບິ່ງເອົາ,” “ມາຊ່ວຍເຫລືອ,” ແລະ “ມາເຂົ້າຮ່ວມ” ດ້ວຍວິທີໃດແດ່? ຂະນະທີ່ທ່ານຮ້ອງເພງ ຫລື ຟັງເພງ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50) ຫລື ເພງສວດທີ່ກ່ຽວຂ້ອງກັນ, ທ່ານອາດຖາມຕົວເອງວ່າ, “ພຣະເຈົ້າຕ້ອງການໃຫ້ເຮົາເວົ້າ ແລະ ເປັນແນວໃດ ເພື່ອແບ່ງປັນພຣະກິດຕິຄຸນຂອງພຣະອົງ?

ເບິ່ງ Marcos A. Aidukaitis, “Lift Up Your Heart and Rejoice,” Liahona, May 2022, 40–43; Topics and Questions, “Inviting All to Receive the Gospel of Jesus Christ,” “Ministering as the Savior Does,” ຫ້ອງສະໝຸດພຣະກິດຕິຄຸນ; “Inviting All to Come unto Christ: Sharing the Gospel” (ວິດີໂອ), ຫ້ອງສະໝຸດພຣະກິດຕິຄຸນ ນຳອີກ.

Inviting All to Come unto Christ: Sharing the Gospel
When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

ຊິດສະເຕີຜູ້ສອນສາດສະໜາກຳລັງສິດສອນກຸ່ມແມ່ຍິງ

ຄຳສອນ ແລະ ພັນທະສັນຍາ 31:1–2, 5–6, 9, 13

ພຣະຜູ້ເປັນເຈົ້າສາມາດຊ່ວຍເຮົາ ກ່ຽວກັບຄວາມສຳພັນໃນຄອບຄົວຂອງເຮົາ.

ຄອບຄົວໃນຊ່ວງໄລຍະປີ 1830 ກໍໄດ້ປະເຊີນກັບບັນຫາຫລາຍຢ່າງ ຄືກັນກັບຄອບຄົວໃນປະຈຸບັນນີ້ປະເຊີນ. ການຊີ້ນຳ ແລະ ຄຳສັນຍາໃດແດ່ ທີ່ພຣະຜູ້ເປັນເຈົ້າໄດ້ມອບໃຫ້ແກ່ ທອມມັສ ບີ ມາສ໌ ກ່ຽວກັບຄອບຄົວຂອງລາວ ຄຳສອນ ແລະ ພັນທະສັນຍາ 31? (ເບິ່ງ ໂດຍສະເພາະ ຂໍ້ທີ 1–2, 5–6, 9, 13). ພຣະຄຳຂອງພຣະອົງສາມາດຊ່ວຍທ່ານ ກ່ຽວກັບຄວາມສຳພັນໃນຄອບຄົວຂອງທ່ານແນວໃດ?

ສຳລັບຂໍ້ມູນເພີ່ມເຕີມກ່ຽວກັບທອມມັສ ບີ ມາສ໌, ໃຫ້ເບິ່ງ Saints, 1:79–80, 119–20.

ຄຳສອນ ແລະ ພັນທະສັນຍາ 32–33; 35

ພຣະຜູ້ເປັນເຈົ້າກະກຽມເຮົາສຳລັບວຽກງານທີ່ພຣະອົງຕ້ອງການໃຫ້ເຮົາເຮັດ.

ສຶກສາຊີວິດຂອງຜູ້ຄົນທີ່ກ່າວເຖິງໃນ ຄຳສອນ ແລະ ພັນທະສັນຍາ 32–33; 35 ສາມາດຊ່ວຍໃຫ້ທ່ານຮັບຮູ້ວ່າ ພຣະເຈົ້າກຳລັງກະກຽມທ່ານສຳລັບວຽກງານຂອງພຣະອົງແນວໃດ. ຍົກຕົວຢ່າງ, ທ່ານສາມາດອ່ານກ່ຽວກັບຄວາມສຳພັນລະຫວ່າງພາລີ ພີ ພະແຣັດ ແລະ ຊິດນີ ຣິກດອນ ໃນ “Voices of the Restoration: Early Converts.” ຄວາມສຳພັນນີ້ເປັນພອນໃຫ້ແກ່ລູກໆຂອງພຣະເຈົ້າແນວໃດ? (ເບິ່ງ ຄຳສອນ ແລະ ພັນທະສັນຍາ 35).

ນີ້ແມ່ນຕົວຢ່າງໜຶ່ງອີກ: ເອຊະຣາ ແຕ ໄດ້ຂຽນວ່າ ບາງຄັ້ງກ່ອນລາວຮັບບັບຕິສະມາ, ລາວໄດ້ມີພາບນິມິດໜຶ່ງ ຊຶ່ງໃນນັ້ນ “ຜູ້ຊາຍຄົນໜຶ່ງໄດ້ມາ ແລະ ມອບມ້ວນກະດາດໃຫ້ຂ້າພະເຈົ້າ, ແລະ ມີແກນຳອີກ ແລະ ບອກໃຫ້ຂ້າພະເຈົ້າ [ຫລິ້ນ]. ຂ້າພະເຈົ້າໄດ້ບອກລາວວ່າ ຂ້າພະເຈົ້າບໍ່ເຄີຍ [ຫລິ້ນ] ມັນຈັກເທື່ອໃນຊີວິດຂອງຂ້າພະເຈົ້າ. ລາວເວົ້າວ່າ ເຈົ້າ [ຫລິ້ນ] ມັນໄດ້, ລອງເບິ່ງ. … ສຽງແກນັ້ນມ່ວນທີ່ສຸດທີ່ຂ້າພະເຈົ້າເຄີຍໄດ້ຍິນມາ” (“Revelation, October 1830–B, Revelation Book 1,” ຄຳນຳທາງປະຫວັດສາດ, josephsmithpapers.org). ເມື່ອໂຈເຊັບ ສະມິດ ໄດ້ຮັບການເປີດເຜີຍໃນເວລາຕໍ່ມາສຳລັບ ເອຊະຣາ ແຕ ແລະ ນອດທະໂຣບ ສະວີດ, ຊຶ່ງປະຈຸບັນໄດ້ຖືກບັນທຶກໄວ້ໃນ ຄຳສອນ ແລະ ພັນທະສັນຍາ 33, ເອຊະຣາໄດ້ຕີຄວາມໝາຍການເປີດເຜີຍວ່າເປັນມ້ວນກະດາດໃນພາບນິມິດຂອງລາວ. ພຣະຜູ້ເປັນເຈົ້າໄດ້ກະກຽມເອຊະຣາສຳລັບພາລະກິດທີ່ພຣະອົງໄດ້ປະທານໃຫ້ແກ່ລາວແນວໃດ ຄຳສອນ ແລະ ພັນທະສັນຍາ 33:1–13?

ທ່ານເຫັນຫລັກຖານອັນໃດແດ່ວ່າ ພຣະຫັດຂອງພຣະຜູ້ເປັນເຈົ້າໄດ້ຢູ່ໃນຊີວິດຂອງສະມາຊິກຂອງສາດສະໜາຈັກລຸ້ນທຳອິດເຫລົ່ານີ້? ໃຜແດ່ທີ່ພຣະຜູ້ເປັນເຈົ້າໄດ້ວາງໄວ້ໃນຊີວິດຂອງທ່ານເພື່ອຊ່ວຍໃຫ້ທ່ານມາຫາພຣະຄຣິດ? ພຣະອົງໄດ້ກະກຽມທ່ານແນວໃດທີ່ຈະເປັນພອນໃຫ້ແກ່ຄົນອື່ນ ຜ່ານທາງຄວາມຊື່ສັດ, ຄວາມຮັກ, ຫລື ການເຊື້ອເຊີນຂອງທ່ານ?

ເບິ່ງ “A Mission to the Lamanites,” ໃນ Revelations in Context, 45–49 ນຳອີກ.

ຄຳສອນ ແລະ ພັນທະສັນຍາ 33:12–18

ຖ້າຫາກເຮົາສ້າງຊີວິດຂອງເຮົາໄວ້ເທິງພຣະກິດຕິຄຸນຂອງພຣະຜູ້ຊ່ວຍໃຫ້ລອດ, ແລ້ວເຮົາ ຈະບໍ່ຕົກໄປ.

ຄຳສອນ ແລະ ພັນທະສັນຍາ 33 ແມ່ນກ່າວກັບນອດທະໂຣບ ສະວີດ ແລະ ເອຊະຣາ ແຕ, ສະມາຊິກໃໝ່ສອງຄົນ. ນອດທະໂຣບໄດ້ອອກຈາກສາດສະໜາຈັກ ບໍ່ດົນຫລັງຈາກທີ່ລາວໄດ້ຮັບການເປີດເຜີຍນີ້. ເອຊະຣາໄດ້ຮັບໃຊ້ຢ່າງຊື່ສັດຊົ່ວໄລຍະໜຶ່ງ, ແຕ່ໃນທີ່ສຸດ ລາວກໍໄດ້ໜີໄປ. ການອ່ານກ່ຽວກັບເຂົາເຈົ້າໃນພາກນີ້ອາດກະຕຸ້ນໃຫ້ທ່ານພິຈາລະນາວ່າ ທ່ານຖືກສ້າງໄວ້ “ເທິງດານຫີນ” (ຂໍ້ທີ 13) ຂອງພຣະກິດຕິຄຸນຢ່າງໝັ້ນຄົງພຽງໃດ. ມີຄວາມຈິງໃດແດ່ຢູ່ໃນຂໍ້ເຫລົ່ານີ້ ທີ່ສາມາດຊ່ວຍໃຫ້ທ່ານຍັງຄົງຊື່ສັດ ຕໍ່ພຣະຜູ້ຊ່ວຍໃຫ້ລອດ?

ເບິ່ງ ຮີລາມັນ 5:12 ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 30:1–2

ເຮົາຄວນໃຫ້ຄວາມສຳຄັນກັບເລື່ອງຂອງພຣະເຈົ້າ ຫລາຍກວ່າເລື່ອງຂອງແຜ່ນດິນໂລກ.

ມັນອາດຈະເປັນຄວາມມ່ວນຊື່ນສຳລັບລູກໆຂອງທ່ານທີ່ຈະພະຍາຍາມເຮັດສອງຢ່າງໃນເວລາດຽວກັນ, ເຊັ່ນການທ່ອງຈຳເນື້ອເພງທີ່ມັກ ໃນຂະນະທີ່ຂຽນຊື່ສະມາຊິກຄອບຄົວທັງໝົດຂອງເຂົາເຈົ້າ. ເປັນຫຍັງມັນຈຶ່ງຍາກທີ່ຈະເຮັດສອງຢ່າງໃນເວລາດຽວກັນ? ແລ້ວພວກທ່ານສາມາດອ່ານ ຄຳສອນ ແລະ ພັນທະສັນຍາ 30:1–2 ນຳກັນ. ມີ “ເລື່ອງຂອງແຜ່ນດິນໂລກ” ຢ່າງໃດແດ່ທີ່ສາມາດລົບກວນເຮົາຈາກການລະນຶກເຖິງພຣະເຢຊູຄຣິດ ແລະ ພຣະກິດຕິຄຸນຂອງພຣະອົງ? ເຮົາຈະສາມາດສຸມໃຈໃສ່ທີ່ພຣະອົງໄດ້ແນວໃດ?

ຄຳສອນ ແລະ ພັນທະສັນຍາ 33:2–3, 6–10

ເຮົາສາມາດແບ່ງປັນພຣະກິດຕິຄຸນຂອງພຣະເຢຊູຄຣິດ.

ເພື່ອຊ່ວຍລູກໆຂອງທ່ານໃຫ້ເຂົ້າໃຈ ຄຳສອນ ແລະ ພັນທະສັນຍາ 33:8–10, ທ່ານສາມາດເຊື້ອເຊີນພວກເຂົາໃຫ້ພະຍາຍາມກ່າວວະລີໂດຍປິດປາກ ຂະນະທີ່ທ່ານ ຫລື ລູກຄົນອື່ນໆຂອງທ່ານເດົາວ່າເຂົາກຳລັງເວົ້າຫຍັງ. ອ່ານ ຂໍ້ທີ 8–10 ແລະ ຂໍໃຫ້ພວກເຂົາເປີດປາກທຸກເທື່ອທີ່ພວກເຂົາໄດ້ຍິນວະລີທີ່ວ່າ “ເປີດປາກຂອງເຈົ້າ”. ເປັນຫຍັງພຣະບິດາເທິງສະຫວັນຈຶ່ງຕ້ອງການໃຫ້ເຮົາເປີດປາກ ແລະ ແບ່ງປັນພຣະກິດຕິຄຸນກັບຄົນອື່ນ? ເຮົາຈະບອກຫຍັງແດ່ກັບຄອບຄົວ ແລະ ໝູ່ເພື່ອນຂອງເຮົາກ່ຽວກັບພຣະຜູ້ຊ່ວຍໃຫ້ລອດ ຫລື ພຣະກິດຕິຄຸນຂອງພຣະອົງ? ພວກທ່ານກໍສາມາດຮ້ອງເພງໜຶ່ງກ່ຽວກັບການແບ່ງປັນພຣະກິດຕິຄຸນນຳອີກ, ເຊັ່ນ “ເຮົາຈະໄປທີ່ພຣະອົງບັນຊາ” (ເພງສວດ ແລະ ເພງຂອງເດັກນ້ອຍ, 50).
ໃຫ້ພິຈາລະນາແບ່ງປັນປະສົບການທີ່ທ່ານເຄີຍມີກ່ຽວກັບຫລັກທຳ ຫລື ຄຳສັນຍາໃນ ຄຳສອນ ແລະ ພັນທະສັນຍາ 30–34. ທ່ານໄດ້ຮຽນຮູ້ ຫລື ຮູ້ສຶກຫຍັງແດ່ກ່ຽວກັບພຣະຜູ້ຊ່ວຍໃຫ້ລອດຂອງທ່ານ ແລະ ວຽກງານຂອງພຣະອົງ ຂະນະທີ່ທ່ານຮັບໃຊ້ພຣະອົງ?

ເດັກນ້ອຍກຸ່ມໜຶ່ງກຳລັງເບິ່ງວາລະສານ — ມີຫລາຍວິທີທາງໃນການແບ່ງປັນພຣະກິດຕິຄຸນ.

ເປັນພະຍານເຖິງພອນທີ່ສັນຍາໄວ້. ເມື່ອທ່ານເຊື້ອເຊີນລູກໆໃຫ້ດຳລົງຊີວິດຕາມຫລັກທຳພຣະກິດຕິຄຸນ, ທ່ານສາມາດແບ່ງປັນຄຳສັນຍາທີ່ພຣະເຈົ້າໄດ້ເຮັດໄວ້ກັບຜູ້ຄົນທີ່ດຳລົງຊີວິດຕາມຫລັກທຳນັ້ນ. ຍົກຕົວຢ່າງ, ທ່ານສາມາດແບ່ງປັນປະຈັກພະຍານເຖິງພອນທີ່ພຣະອົງໄດ້ປະທານໃຫ້ເຮົາ ເມື່ອເຮົາເປີດປາກ ແລະ ແບ່ງປັນພຣະກິດຕິຄຸນ.

ຄຳສອນ ແລະ ພັນທະສັນຍາ 33:12–13

ເຮົາສາມາດສ້າງຊີວິດຂອງເຮົາເທິງພຣະກິດຕິຄຸນຂອງພຣະເຢຊູຄຣິດ.

ທ່ານສາມາດພາລູກໆຂອງທ່ານອອກໄປຂ້າງນອກ ເພື່ອເບິ່ງຮາກຖານຂອງເຮືອນຂອງເຂົາເຈົ້າ ຫລື ຕຶກໂບດ ແລະ ຂໍໃຫ້ເຂົາເຈົ້າບັນຍາຍກ່ຽວກັບມັນ. ເປັນຫຍັງອາຄານຈຶ່ງຕ້ອງມີຮາກຖານທີ່ແຂງແກ່ນ ແລະ ໝັ້ນຄົງ? ອ່ານ ຄຳສອນ ແລະ ພັນທະສັນຍາ 33:12–13 ຮ່ວມກັບພວກເຂົາ, ແລະ ແບ່ງປັນຄວາມຮູ້ສຶກຂອງພວກທ່ານໃຫ້ກັນວ່າ ເປັນຫຍັງພຣະຜູ້ເປັນເຈົ້າຈຶ່ງຕ້ອງການໃຫ້ເຮົາສ້າງຊີວິດຂອງເຮົາເທິງພຣະກິດຕິຄຸນຂອງພຣະອົງ. ເປັນຫຍັງ “ດານຫີນ” ຈຶ່ງເປັນຄຳທີ່ດີໃນການບັນຍາຍກ່ຽວກັບພຣະກິດຕິຄຸນ? ເຮົາຈະສາມາດສ້າງຊີວິດຂອງເຮົາເທິງດານຫີນຂອງພຣະກິດຕິຄຸນໄດ້ແນວໃດ? (ເບິ່ງ ມັດທາຍ 7:24–29) ນຳອີກ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.

ຜູ້ສອນສາດສະໜາລຸ້ນທຳອິດກຳລັງເດີນທາງໃນຫິມະ — Go into the Wilderness [ໄປໃນຖິ່ນແຫ້ງແລ້ງກັນດານ], ໂດຍ ຣໍເບີດ ທີ ບາແຣັດ