“ວັນທີ 21–27 ເດືອນເມສາ: ‘ຖ້າຫາກພວກເຈົ້າບໍ່ເປັນອັນໜຶ່ງອັນດຽວກັນພວກເຈົ້າກໍບໍ່ແມ່ນຂອງເຮົາ’: ຄຳສອນ ແລະ ພັນທະສັນຍາ 37–40,” ຈົ່ງຕາມເຮົາມາ—ສຳລັບບ້ານ ແລະ ໂບດ: ຄຳສອນ ແລະ ພັນທະສັນຍາ 2025 (2025)

“ຄຳສອນ ແລະ ພັນທະສັນຍາ 37–40,” ຈົ່ງຕາມເຮົາມາ—ສຳລັບບ້ານ ແລະ ໂບດ: 2025

ລາຍລະອຽດຈາກ Saints Move to Kirtland [ໄພ່ພົນຍ້າຍໄປຢູ່ເມືອງເຄີດແລນ], ໂດຍ ແຊມ ລໍເລີ

ວັນທີ 21–27 ເດືອນເມສາ: “ຖ້າຫາກພວກເຈົ້າບໍ່ເປັນອັນໜຶ່ງອັນດຽວກັນພວກເຈົ້າກໍບໍ່ແມ່ນຂອງເຮົາ”

ຄຳສອນ ແລະ ພັນທະສັນຍາ 37–40

ຕໍ່ໄພ່ພົນລຸ້ນທຳອິດ, ສາດສະໜາຈັກໄດ້ເປັນບ່ອນທີ່ເກີນກວ່າບ່ອນໄປຟັງຄຳສັ່ງສອນໃນວັນອາທິດເທົ່ານັ້ນ. ການເປີດເຜີຍໄດ້ໃຊ້ຄຳເຊັ່ນ ອຸດົມການ, ອານາຈັກ, ຊີໂອນ, ແລະ, ຂ້ອນຂ້າງຕະຫລອດ, ວຽກງານ. ນັ້ນຄົງເປັນພາກສ່ວນໜຶ່ງທີ່ດຶງດູດຜູ້ຄົນໃຫ້ມາເຂົ້າຮ່ວມສາດສະໜາຈັກທີ່ຖືກຟື້ນຟູ. ເຖິງແມ່ນເຂົາເຈົ້າມັກຄຳສອນຫລາຍປານໃດກໍຕາມ, ແຕ່ເຂົາເຈົ້າກໍຍັງຕ້ອງການບາງສິ່ງສັກສິດທີ່ເຂົາເຈົ້າສາມາດອຸທິດຊີວິດຂອງຕົນໄວ້ໄດ້. ເຖິງຢ່າງໃດກໍຕາມ, ການເຊື່ອຟັງພຣະບັນຊາຂອງພຣະຜູ້ເປັນເຈົ້າໃນປີ 1830 ທີ່ໃຫ້ໄປເຕົ້າໂຮມກັນຢູ່ລັດໂອໄຮໂອ ບໍ່ໄດ້ເປັນເລື່ອງງ່າຍ. ສຳລັບຫລາຍຄົນ, ນັ້ນໝາຍຄວາມວ່າ ເຂົາຕ້ອງໄດ້ໜີຈາກບ້ານເຮືອນທີ່ຢູ່ສຸກສະບາຍ ໄປຫາບ່ອນທີ່ຕົນບໍ່ຮູ້ຈັກ (ເບິ່ງ “ສຽງຂອງການຟື້ນຟູ: ການເຕົ້າໂຮມຢູ່ລັດໂອໄຮໂອ”). ທຸກວັນນີ້ ເຮົາສາມາດເຫັນໄດ້ຢ່າງແຈ້ງຊັດເຖິງສິ່ງທີ່ໄພ່ພົນເຫລົ່ານັ້ນສາມາດເຫັນພຽງແຕ່ດ້ວຍຕາແຫ່ງສັດທາ ທີ່ວ່າ: ພຣະຜູ້ເປັນເຈົ້າມີພອນອັນຍິ່ງໃຫຍ່ລໍຖ້າເຂົາເຈົ້າຢູ່ທີ່ລັດໂອໄຮໂອ.

ຄວາມຈຳເປັນທີ່ຕ້ອງໄປເຕົ້າໂຮມກັນຢູ່ລັດໂອໄຮໂອ ນັບແຕ່ນັ້ນມາໄດ້ໝົດໄປແລ້ວ, ແຕ່ໄພ່ພົນໃນທຸກວັນນີ້ ຍັງຕ້ອງເປັນນ້ຳໜຶ່ງໃຈດຽວກັນ ໃນອຸດົມການຢ່າງດຽວກັນນັ້ນ: ເພື່ອ “ນຳຊີໂອນອອກມາ” (ຄຳສອນ ແລະ ພັນທະສັນຍາ 39:13). ເຊັ່ນດຽວກັນກັບໄພ່ພົນລຸ້ນທຳອິດເຫລົ່ານັ້ນ, ເຮົາໄດ້ຖືກເຊື້ອເຊີນໃຫ້ປະຖິ້ມ “ຄວາມເປັນຫ່ວງສິ່ງທາງໂລກ” (ຄຳສອນ ແລະ ພັນທະສັນຍາ 40:2) ແລະ ໄວ້ວາງໃຈໃນຄຳສັນຍາຂອງພຣະຜູ້ເປັນເຈົ້າ ທີ່ວ່າ: “ເຈົ້າຈະໄດ້ຮັບ … ພອນອັນຍິ່ງໃຫຍ່ທີ່ສຸດຢ່າງທີ່ເຈົ້າບໍ່ເຄີຍຮູ້ມາກ່ອນ” (ຄຳສອນ ແລະ ພັນທະສັນຍາ 39:10).

ເບິ່ງ Saints, 1:109–11 ນຳອີກ.

ແນວຄິດສຳລັບການຮຽນຮູ້ຢູ່ທີ່ບ້ານ ແລະ ຢູ່ທີ່ໂບດ

ຄຳສອນ ແລະ ພັນທະສັນຍາ 37–38

ພຣະເຈົ້າເຕົ້າໂຮມເຮົາ ເພື່ອໃຫ້ພອນແກ່ເຮົາ.

ສະມາຊິກຂອງສາດສະໜາຈັກໃນເມືອງເຟແອດ, ລັດນິວຢອກ, ຈຳຕ້ອງໄດ້ເຮັດການເສຍສະລະທີ່ຍາກລຳບາກເພື່ອຍົກຍ້າຍໄປລັດໂອໄຮໂອ (ຊຶ່ງມີໄລຍະທາງທີ່ໄກກວ່າ 250 ໄມ ຫລື 400 ກິໂລແມັດ) ໃນລະດູໜາວຂອງປີ 1831. ຂະນະທີ່ທ່ານອ່ານກ່ຽວກັບພຣະບັນຊາຂອງພຣະຜູ້ເປັນເຈົ້າໃນ ຄຳສອນ ແລະ ພັນທະສັນຍາ 37:3–4, ທ່ານອາດຈະຄິດກ່ຽວກັບວ່າພຣະຜູ້ເປັນເຈົ້າໄດ້ຂໍການເສຍສະລະຫຍັງແດ່ຈາກທ່ານ. ຈາກນັ້ນ, ຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 38:1–33, ໃຫ້ຊອກຫາຄວາມຈິງກ່ຽວກັບພຣະຜູ້ຊ່ວຍໃຫ້ລອດທີ່ມອບສັດທາໃຫ້ແກ່ທ່ານໃນການເຮັດຕາມຄຳແນະນຳຂອງພຣະອົງ. ທ່ານຮຽນຮູ້ຫຍັງແດ່ຈາກ ຂໍ້ທີ 11–33 ກ່ຽວກັບພອນຂອງການເຕົ້າໂຮມໃນຖານະຜູ້ຕິດຕາມຂອງພຣະເຢຊູຄຣິດ?

ຄຳສອນ ແລະ ພັນທະສັນຍາ 38:22

“ຈົ່ງຟັງສຽງຂອງເຮົາ ແລະ ຕາມເຮົາມາ.”

ທ່ານຈະສາມາດເຮັດໃຫ້ພຣະເຢຊູຄຣິດ ເປັນ “ຜູ້ໃຫ້ກົດ” ຂອງທ່ານໄດ້ແນວໃດ? ການເຮັດຕາມກົດຂອງພຣະອົງ ເຮັດໃຫ້ທ່ານເປັນ “ຄົນອິດສະລະ” ແນວໃດ?

ເບິ່ງ 2 ນີໄຟ 2:26–27 ນຳອີກ.

ຄຳສອນ ແລະ ພັນທະສັນຍາ 38:30

ຖ້າຫາກເຮົາຕຽມພ້ອມ, ເຮົາກໍບໍ່ຕ້ອງຢ້ານກົວ.

ເມື່ອໃດທີ່ທ່ານໄດ້ປະສົບກັບຫລັກທຳຂອງພຣະຜູ້ເປັນເຈົ້າທີ່ເປີດເຜີຍໃນ ຄຳສອນ ແລະ ພັນທະສັນຍາ 38:30 ທີ່ວ່າ: “ຖ້າຫາກພວກເຈົ້າຕຽມພ້ອມ ພວກເຈົ້າຈະບໍ່ຢ້ານກົວ”? ຂະນະທີ່ທ່ານສຶກສາ ພາກທີ 38, ໃຫ້ສັງເກດເບິ່ງວິທີທີ່ພຣະຜູ້ເປັນເຈົ້າໄດ້ຕຽມໄພ່ພົນຂອງພຣະອົງ ເພື່ອເຂົາເຈົ້າຈະສາມາດປະເຊີນໜ້າກັບອະນາຄົດດ້ວຍຄວາມກ້າຫານ. ພຣະອົງຕ້ອງການໃຫ້ທ່ານກຽມພ້ອມສຳລັບຄວາມທ້າທາຍແນວໃດເພື່ອທ່ານຈະໄດ້ບໍ່ຢ້ານ?

ເບິ່ງ David A. Bednar, “We Will Prove Them Herewith,” Liahona, Nov. 2020, 8–11 ນຳອີກ.

ຄຳສອນ ແລະ ພັນທະສັນຍາ 38:24–27

ພຣະເຈົ້າຕ້ອງການໃຫ້ເຮົາ “ເປັນໜຶ່ງດຽວກັນ.”

ໄພ່ພົນຜູ້ທີ່ໄດ້ໄປເຕົ້າໂຮມກັນຢູ່ລັດໂອໄຮໂອມາຈາກສະພາບການທີ່ຫລາກຫລາຍ. ມັນກໍຂ້ອນຂ້າງຈິງເຊັ່ນດຽວກັນກັບຜູ້ຄົນໃນຫວອດຂອງທ່ານ. ແຕ່ພຣະຜູ້ເປັນເຈົ້າບັນຊາຜູ້ຄົນຂອງພຣະອົງໃຫ້ເປັນ “ໜຶ່ງດຽວກັນ” (ຂໍ້ທີ 27). ພວກເຮົາຈະສາມາດບັນລຸຄວາມເປັນໜຶ່ງດຽວກັນແບບນີ້ໄດ້ແນວໃດ? ມີຄວາມຄິດຫຍັງແດ່ທີ່ເຂົ້າມາສູ່ຈິດໃຈ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 38: 24–27? ເປັນຫຍັງເຮົາຈຶ່ງຈຳເປັນຕ້ອງເປັນໜຶ່ງດຽວກັນເພື່ອຈະເປັນຜູ້ຄົນຂອງພຣະເຈົ້າ?

ການອ່ານຂໍ້ພຣະຄຳພີເຫລົ່ານີ້ຍັງອາດສ້າງແຮງບັນດານໃຈໃຫ້ກັບທ່ານໃນການຄິດກ່ຽວກັບຄວາມສຳພັນຕ່າງໆຂອງທ່ານ—ຍົກຕົວຢ່າງ, ກັບສະມາຊິກໃນຄອບຄົວ, ສະມາຊິກຫວອດ, ແລະ ສະມາຊິກກຸ່ມຫລື ສະມາຊິກໃນຫ້ອງຮຽນ. ແມ່ນຫຍັງທີ່ຈະຂັດຂວາງທ່ານຈາກການເປັນໜຶ່ງດຽວກັນໃນພຣະຄຣິດ? ພຣະຜູ້ຊ່ວຍໃຫ້ລອດສາມາດຊ່ວຍເຫລືອທ່ານໃຫ້ເປັນ “ໜຶ່ງດຽວກັນ” ໄດ້ແນວໃດ? ວິດີໂອ “A Friend to All” ຫລື “Love in Our Hearts” (ຫ້ອງສະໝຸດພຣະກິດຕິຄຸນ) ສາມາດຊ່ວຍທ່ານຕອບຄຳຖາມເຫລົ່ານີ້. ທ່ານອາດພົບແນວຄິດຕ່າງໆໄດ້ໃນຂ່າວສານຂອງ ແອວເດີ ແດວ ຈີ ເຣັນລັນ “The Peace of Christ Abolishes Enmity,” Liahona, Nov. 2021, 83–85 ເຊັ່ນກັນ.

A Friend to All
Elder Ulisses Soares talks of the need for kindness and acceptance.

Love in Our Hearts
Sister Christina B. Franco discusses the importance of inclusion and respect.

ທ່ານຈະສາມາດຊ່ວຍເຫລືອກຸ່ມຄົນເຫລົ່ານີ້ໃຫ້ເປັນໜຶ່ງດຽວຫລາຍຂຶ້ນໄດ້ແນວໃດ? ຍົກຕົວຢ່າງ, ໃຫ້ພິຈາລະນາສົ່ງ ຫລື ຂຽນຂໍ້ຄວາມໃຫ້ກຳລັງໃຈສະມາຊິກກຸ່ມ, ຫ້ອງຮຽນ, ຫລື ຄອບຄົວຂອງທ່ານ. ແມ່ນໃຜທີ່ທ່ານຮູ້ສຶກໄດ້ຮັບການດົນໃຈໃຫ້ຕິດຕໍ່ຫາ?

ສິ່ງໃດທີ່ດົນໃຈທ່ານກ່ຽວກັບຕົວຢ່າງຂອງພຣະຜູ້ຊ່ວຍໃຫ້ລອດໃນ ເອເຟໂຊ 2:14, 18–22; 2 ນີໄຟ 26:24–28?

ເບິ່ງ Quentin L. Cook, “Hearts Knit in Righteousness and Unity,” Liahona, Nov. 2020, 18–21; “Love One Another,” Hymns, no. 308; Topics and Questions, “Belonging in the Church of Jesus Christ,” ຫ້ອງສະໝຸດພຣະກິດຕິຄຸນ ນຳອີກ.

ຄຳສອນ ແລະ ພັນທະສັນຍາ 38:39; 39–40

ພຣະບິດາເທິງສະຫວັນຕ້ອງການມອບຄວາມຮັ່ງມີແຫ່ງຊົ່ວນິລັນດອນໃຫ້ເຮົາ.

ໃນຄວາມຄິດເຫັນຂອງທ່ານ, ຄວາມແຕກຕ່າງລະຫວ່າງ “ຄວາມຮັ່ງມີຂອງແຜ່ນດິນໂລກ” ແລະ “ຄວາມຮັ່ງມີແຫ່ງຊົ່ວນິລັນດອນ” ແມ່ນຫຍັງ? (ຄຳສອນ ແລະ ພັນທະສັນຍາ 38:39). ມີປະສົບການຢ່າງໃດແດ່ທີ່ສິດສອນທ່ານໃຫ້ເຫັນຄຸນຄ່າຂອງຄວາມຮັ່ງມີແຫ່ງຊົ່ວນິລັນດອນ?

ຈົ່ງຈື່ຈຳສິ່ງນີ້ໄວ້ໃນຂະນະທີ່ທ່ານອ່ານກ່ຽວກັບເຈມສ໌ ໂຄແວວ ໃນ ພາກທີ 39–40 (ລວມທັງເບື້ອງຫລັງຄວາມເປັນມາທາງປະຫວັດສາດໃນຫົວຂໍ້ພາກ). ໃຫ້ພິຈາລະນາວ່າປະສົບການຂອງລາວອາດກ່ຽວຂ້ອງກັບທ່ານແນວໃດ. ຍົກຕົວຢ່າງ, ໃຫ້ຄິດກ່ຽວກັບເວລາທີ່ “ຫົວໃຈ [ຂອງທ່ານ] … ເຄີຍຖືກຕ້ອງຕໍ່ [ພຣະເຈົ້າ]” (ຄຳສອນ ແລະ ພັນທະສັນຍາ 40:1). ທ່ານໄດ້ຮັບພອນແນວໃດແດ່ ສຳລັບຄວາມຊື່ສັດຂອງທ່ານ? ພ້ອມນີ້ ກໍໃຫ້ຄິດກ່ຽວກັບ “ຄວາມເປັນຫ່ວງສິ່ງທາງໂລກ” ໃດແດ່ທີ່ທ່ານປະເຊີນຢູ່. ແລ້ວມັນອາດກີດກັ້ນທ່ານຈາກການໄດ້ຮັບພຣະຄຳຂອງພຣະເຈົ້າ “ດ້ວຍຄວາມຍິນດີ” ແນວໃດ? (ຄຳສອນ ແລະ ພັນທະສັນຍາ 39:9; 40:2). ທ່ານພົບເຫັນສິ່ງໃດແດ່ຢູ່ໃນພາກເຫລົ່ານີ້ ທີ່ດົນໃຈທ່ານໃຫ້ມີຄວາມເຊື່ອຟັງພຣະເຈົ້າຢ່າງສະໝ່ຳສະເໝີຫລາຍກວ່າເກົ່າ?

ເບິ່ງ ມັດທາຍ 13:3–23 ນຳອີກ.

ການນຳໃຊ້ພຣະຄຳພີກັບຊີວິດຂອງທ່ານ. “ວິທີໜຶ່ງທີ່ທ່ານສາມາດຊ່ວຍໃຫ້ຜູ້ຮຽນເຫັນຄວາມກ່ຽວຂ້ອງກັບ [ພຣະຄຳພີ] ແມ່ນໂດຍການຖາມຄຳຖາມເຊັ່ນ ‘ສິ່ງນີ້ສາມາດຊ່ວຍພວກເຈົ້າກັບບາງສິ່ງທີ່ພວກເຈົ້າກຳລັງປະເຊີນຢູ່ໃນເວລານີ້ແນວໃດ?’ ‘ເປັນຫຍັງມັນຈຶ່ງສຳຄັນສຳລັບພວກເຈົ້າທີ່ຈະຮູ້ສິ່ງນີ້?’ ‘ສິ່ງນີ້ສາມາດສ້າງຄວາມແຕກຕ່າງແນວໃດແດ່ໃນຊີວິດຂອງພວກເຈົ້າ?’” (ການສິດສອນໃນວິທີຂອງພຣະຜູ້ຊ່ວຍໃຫ້ລອດ, 23). ຄຳຖາມຕ່າງໆໃນກິດຈະກຳນີ້ກ່ຽວກັບ ຄຳສອນ ແລະ ພັນທະສັນຍາ 39–40 ຄືຕົວຢ່າງອື່ນຂອງຄຳຖາມທີ່ສາມາດຊ່ວຍເຮົານຳໃຊ້ການເປີດເຜີຍເຫລົ່ານີ້ກັບຊີວິດຂອງເຮົາ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Liahona ແລະ For the Strength of Youth ສະບັບຂອງເດືອນນີ້.

ແນວຄິດສຳລັບການສິດສອນເດັກນ້ອຍ

ຄຳສອນ ແລະ ພັນທະສັນຍາ 37; 38:31–33

ພຣະເຈົ້າເຕົ້າໂຮມເຮົາ ເພື່ອໃຫ້ພອນແກ່ເຮົາ.

ແຜນທີ່ ແລະ ໜ້າກິດຈະກຳ ທີ່ຢູ່ທ້າຍໂຄງຮ່າງນີ້ສາມາດຊ່ວຍລູກໆຂອງທ່ານໃຫ້ເຂົ້າໃຈສິ່ງທີ່ພຣະເຈົ້າໄດ້ບັນຊາໃນ ຄຳສອນ ແລະ ພັນທະສັນຍາ 37:3. ບາງທີທ່ານອາດຊ່ວຍເຫລືອພວກເຂົາຊອກຫາສະຖານທີ່ຕ່າງໆທີ່ໄດ້ກ່າວໄວ້ໃນການເປີດເຜີຍເຫລົ່ານີ້. ທ່ານຍັງສາມາດຊ່ວຍພວກເຂົາຊອກຫາວະລີຈາກ ຄຳສອນ ແລະ ພັນທະສັນຍາ 38:31–33 ນຳອີກ ທີ່ອະທິບາຍວ່າເປັນຫຍັງພຣະເຈົ້າຈຶ່ງຕ້ອງການໃຫ້ຜູ້ຄົນຂອງພຣະອົງເຕົ້າໂຮມກັນ.

ຄຳສອນ ແລະ ພັນທະສັນຍາ 38:24–27

ພຣະເຈົ້າຕ້ອງການໃຫ້ເຮົາ “ເປັນໜຶ່ງດຽວກັນ.”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 38:24–25 ກັບລູກໆຂອງທ່ານ, ຈົ່ງເວົ້າກ່ຽວກັບຄວາມໝາຍຂອງການນັບຖືອ້າຍນ້ອງ ຫລື ເອື້ອຍນ້ອງຂອງທ່ານເໝືອນດັ່ງຕົນເອງ (ເບິ່ງ ມັດທາຍ 7:12 ນຳອີກ). ຊ່ວຍພວກເຂົາໃຫ້ກ່າວຂໍ້ພຣະຄຳພີຂໍ້ນີ້ຊ້ຳຄືນ, ແລ້ວແທນຄຳວ່າ “ອ້າຍນ້ອງຂອງຕົນ” ດ້ວຍຊື່ຂອງແຕ່ລະຄົນ.
ເພື່ອສິດສອນລູກໆຂອງທ່ານເຖິງຄວາມໝາຍຂອງການ “ເປັນໜຶ່ງດຽວກັນ” (ຄຳສອນ ແລະ ພັນທະສັນຍາ 38:27), ທ່ານສາມາດຊ່ວຍພວກເຂົາໃຫ້ແຕ້ມເລກ 1 ຂະໜາດໃຫຍ່ ແລະ ປະດັບປະດາມັນດ້ວຍຊື່ຕ່າງໆ ແລະ ຮູບແຕ້ມ ຫລື ຮູບຖ່າຍ ຂອງແຕ່ລະຄົນໃນຄອບຄົວ ຫລື ຫ້ອງຮຽນຂອງທ່ານ. ຢູ່ໃກ້ເລກ 1, ທ່ານສາມາດຂຽນສິ່ງທີ່ທ່ານຈະເຮັດ ເພື່ອໃຫ້ເປັນໜຶ່ງດຽວຫລາຍຂຶ້ນກວ່າເກົ່າ.
ໃຫ້ພິຈາລະນາການແປ່ງປັນບົດຮຽນທີ່ໃຊ້ສິ່ງຂອງ ໃນການສາທິດກ່ຽວກັບສິ່ງທີ່ສາມາດນຳມາໃສ່ກັນ ຫລື ລວມເປັນໜຶ່ງດຽວ ເພື່ອຈະກາຍມາເປັນອັນໜຶ່ງອັນດຽວກັນ, ເຊັ່ນຜ້າຫລາຍໆຕ່ອນທີ່ເຮັດເປັນຜ້າຫົ່ມໜຶ່ງຜືນ ຫລື ເຄື່ອງປຸງຕ່າງໆທີ່ນຳມາເຮັດເປັນເຂົ້າຈີ່ໜຶ່ງກ້ອນ. ຕົວຢ່າງເຫລົ່ານີ້ສິດສອນເຮົາຫຍັງແດ່ ກ່ຽວກັບການກາຍເປັນໜຶ່ງດຽວກັນໃນຖານະຜູ້ຄົນຂອງພຣະເຈົ້າ?

ຄຳສອນ ແລະ ພັນທະສັນຍາ 38:30

ຖ້າຫາກເຮົາຕຽມພ້ອມ, ເຮົາກໍບໍ່ຕ້ອງຢ້ານກົວ.

ຂະນະທີ່ພວກທ່ານອ່ານ ຄຳສອນ ແລະ ພັນທະສັນຍາ 38:30 ນຳກັນ, ທ່ານ ແລະ ລູກໆຂອງທ່ານສາມາດເວົ້າລົມກັນກ່ຽວກັບປະສົບການເມື່ອບໍ່ດົນມານີ້ທີ່ຕ້ອງມີການກຽມພ້ອມ. ແລ້ວທ່ານສາມາດຖາມລູກໆຂອງທ່ານກ່ຽວກັບສິ່ງທີ່ພຣະບິດາເທິງສະຫວັນຕ້ອງການໃຫ້ເຮົາກຽມພ້ອມ. ແບ່ງປັນກັບລູກໆຂອງທ່ານກ່ຽວກັບປະສົບການ ຊຶ່ງການກຽມພ້ອມໄດ້ຊ່ວຍໃຫ້ທ່ານບໍ່ຕ້ອງຢ້ານກົວ. ພວກທ່ານກໍສາມາດເບິ່ງວິດີໂອ “Men’s Hearts Shall Fail Them” ນຳກັນ (ຫ້ອງສະໝຸດພຣະກິດຕິຄຸນ) ນຳອີກ.

Men's Hearts Shall Fail Them
Elder Russell M. Nelson shares a personal story to give encouragement for when we feel "weak in the heart."

ຄຳສອນ ແລະ ພັນທະສັນຍາ 39:6, 23

ເຮົາໄດ້ຮັບຂອງປະທານແຫ່ງພຣະວິນຍານບໍລິສຸດເມື່ອເຮົາໄດ້ຮັບການຢືນຢັນ.

ໃຫ້ຄິດທີ່ຈະສະແດງຮູບພາບຂອງບາງຄົນທີ່ໄດ້ຮັບການຢືນຢັນ. ຂໍໃຫ້ລູກໆຂອງທ່ານອະທິບາຍວ່າແມ່ນຫຍັງເກີດຂຶ້ນຢູ່ໃນຮູບພາບນັ້ນ. ທ່ານຍັງສາມາດເຊື້ອເຊີນພວກເຂົາໃຫ້ຊີ້ໃສ່ຮູບພາບເວລາທີ່ພວກເຂົາໄດ້ຍິນຄຳວ່າ ພຣະວິນຍານບໍລິສຸດ ໃນ ຄຳສອນ ແລະ ພັນທະສັນຍາ 39:6, 23 ນຳອີກ (ຫລື ໃນເນື້ອເພງເຊັ່ນ “The Holy Ghost,” Children’s Songbook, 105). ແບ່ງປັນນຳກັນກ່ຽວກັບຂອງປະທານແຫ່ງພຣະວິນຍານບໍລິສຸດໄດ້ເປັນພອນໃຫ້ແກ່ພວກທ່ານແນວໃດ.

ສຳລັບແນວຄິດເພີ່ມເຕີມ, ໃຫ້ເບິ່ງວາລະສານ Friend ສະບັບຂອງເດືອນນີ້.