“Mga Tingog sa Pagpahiuli: Nahaunang mga Kinabig,” Dali, Sunod Kanako—Alang sa Panimalay ug sa Simbahan: Doktrina ug mga Pakigsaad 2025 (2025)
“Nahaunang mga Kinabig,” Dali, Sunod Kanako—Alang sa Panimalay ug sa Simbahan: 2025
Mga Tingog sa Pagpahiuli
Nahaunang mga Kinabig
Bisan sa wala pa naorganisar ang Simbahan niadtong Abril 1830, ang Ginoo namayahag, “Ang umahan puti na ug andam na sa pag-ani” (Doktrina ug mga Pakigsaad 4:4). Kini nga pamahayag napamatud-an nga tinuod sa mga bulan nga misunod, tungod kay daghan ang nangita sa kamatuoran ang nagiyahan sa Espiritu sa Dios sa pagkaplag sa gipahiuli nga Simbahan ni Jesukristo.
Daghan niining nag-unang mga kinabig nahimong himan sa pagbutang og pundasyon sa Pagpahiuli, ug ang ilang mga sugilanon sa pagkakabig bililhon kanato karon. Ang pagtuo nga ilang gipakita mao gihapon nga pagtuo nga atong gikinahanglan aron makabig ngadto sa ebanghelyo ni Jesukristo.
Abigail Calkins Leonard
Sa dihang si Abigail Calkins Leonard mga traynta kapin ang pangidaron, gusto siya nga mapasaylo sa iyang mga sala. Mobasa siya panagsa sa Biblia, ug ang mga tawo nga gikan sa Kristiyano nga mga simbahan mibisita kaniya sa iyang panimalay, apan naglibog siya mahitungod sa unsay nakalahi sa usa ka simbahan gikan sa lain. “Usa ka buntag,” miingon siya, “akong gikuha ang Biblia ug gibasa ang matag pulong, sa dihang miluhod ako.” Bug-os siya nga nag-ampo sa Ginoo. “Sa kalit lang nakakita ako og panan-awon,” miingon siya, “ug lain-laing mga tinuohan usa ngadto sa lain ang akong giagian, ug usa ka tingog ang nagtawag kanako, nag-ingon: ‘Kini gitukod aron makakwarta.’ Unya, sa unahan, nakakita ko og usa ka dakong kahayag, ug ang usa ka tingog gikan sa ibabaw nagtawag: ‘Ako mopasanay og katawhan, kinsa ako mahimuot nga moangkon ug mopanalangin.’” Pagka taud-taod niana, si Abigail nakadungog mahitungod sa Basahon ni Mormon. Bisan og wala pa siya nakaangkon og kopya, nagtinguha siya nga “masayod sa kamatuoran niini nga basahon, pinaagi sa gasa ug gahom sa Espiritu Santo,” ug siya “dihadiha dayon mibati sa presensya niini.” Sa dihang nabasa na niya sa kataposan ang Basahon ni Mormon, siya “andam na sa pagdawat niini.” Siya ug ang iyang bana, si Lyman, nabunyagan niadtong 1831.
Si Thomas B. Marsh
Sa dihang si Thomas B. Marsh usa pa ka young adult, nagtuon siya sa Biblia ug mipasakop og usa ka Kristiyanong simbahan. Apan wala siya natagbaw, sa kataposan mipalayo gikan sa tanang simbahan. “Aduna koy diyotay nga diwa sa pagpanagna,” miingon siya, “ug misulti nga [usa ka relihiyoso nga lider] akong gilaoman nga usa ka bag-ong simbahan motumaw, nga adunay kaputli sa kamatuoran niini.” Wala magdugay human niini, si Thomas nakaangkon og espirituhanon nga pag-aghat sa pagbiya sa iyang panimalay didto sa Boston, Massachusetts, ug mibiyahe sa kasadpan. Human migahin og tulo ka bulan didto sa kasadpang bahin sa New York nga wala makit-i unsay iyang gipangita, misugod siya sa pagpauli. Sa iyang pagpadulong, usa ka babaye nangutana ni Thomas kon nakadungog na ba siya kabahin “sa Bulawan nga Basahon nga nakit-an sa usa ka batan-on nga ginganlan og Joseph Smith.” Nahingangha niini nga hunahuna, si Thomas mibiyahe dayon paingon sa Palmyra ug gikahimamat si Martin Harris diha sa printahanan, igo lang nga ang unang 16 ka mga pahina sa Basahon ni Mormon mogawas na sa printahanan. Gitugotan si Thomas nga mokuha og kopya niadtong 16 ka mga pahina, ug gidala niya kini ngadto sa iyang asawa, si Elizabeth. “Nahimuot siya” sa basahon, nahinumdom siya, “nagtuo nga kini ang buhat sa Dios.” Si Thomas ug si Elizabeth sa kadugayan mibalhin ngadto sa New York uban sa ilang mga anak ug nabunyagan. (Alang sa dugang impormasyon mahitungod ni Thomas B. Marsh, tan-awa sa Doktrina ug mga Pakigsaad 31.)
Si Parley ug Thankful Pratt
Sama nilang Thomas Marsh, sila si Parley ug Thankful Pratt mitubag sa espirituhanong pagbati sa pagbiya sa ilang mauswagon nga umahan sa Ohio sa tumong sa pagsangyaw sa ebanghelyo sumala sa ilang nasabtan niini gikan sa Biblia. Sumala sa gisulti ni Parley ngadto sa iyang igsoong lalaki, “Ang espiritu niining mga butanga nakaapekto kaayo sa akong panghunahuna sa hilabihan nga dili ko makapahulay.” Sa dihang miabot sila sa silangang New York, si Parley nakadawat og pag-aghat nga mopuyo lang una sa makadiyot diha sa dapit. Si Thankful, nakahukom sila, mopadayon nga wala siya. “Ako aduna pay buluhaton dinhi niining rehiyon sa nasod,” misulti si Parley kaniya, “ug kon unsa man kini, o kon unsa kini kadugay himoon, wala ko masayod; apan ako moabot kon kini pagahimoon.” Dinhi kadto nga unang nadungog ni Parley ang kabahin sa Basahon ni Mormon. “Lahi akong nabati nga kaikag diha sa basahon,” miingon siya. Nangayo siya og usa ka kopya ug gibasa sa tibuok gabii. Pagkabuntag, nakahibalo siya nga ang basahon tinuod, mihatag og bili niini “labaw pa sa tanang bahandi sa kalibotan.” Sulod sa pila ka adlaw si Parley nabunyagan. Unya mibalik siya ngadto ni Thankful, kinsa gibunyagan usab. (Alang sa dugang impormasyon mahitungod ni Parley P. Pratt, tan-awa sa Doktrina ug mga Pakigsaad 32.)
Parley P. Pratt Reads the Book of Mormon [Si Parley P. Pratt Nagbasa sa Basahon ni Mormon], ni Jeffrey Hein
Sidney ug Phebe Rigdon
Sa iyang pagpadulong gikan sa New York ngadto sa usa ka misyon sa Missouri, si Parley Pratt ug ang iyang isigka mamumuo mihapit sa Mentor, Ohio, diha sa panimalay nilang Sidney ug Phebe Rigdon—karaan nga mga higala nga nailhan ni Parley gikan sa iyang mga panahon didto sa Ohio. Si Sidney usa ka Kristiyano nga ministro, ug si Parley usa ka sakop sa iyang kongregasyon ug miisip kaniya nga usa ka espirituhanon nga tigmatuto. Matinguhaon kaayo si Parley nga mosulti sa iyang mga higala mahitungod sa Basahon ni Mormon ug sa Pagpahiuli sa ebanghelyo ni Jesukristo. Si Sidney mismo nangita alang sa pagpahiuli sa tinuod nga Simbahan nga iyang nakit-an nga gihulagway diha sa Bag-ong Tugon, bisan og nagduha-duha siya mahitungod sa Basahon ni Mormon sa sinugdanan. “Apan ako mobasa sa imong basahon,” gisultian niya ang iyang higala si Parley, “ug akong sutaon, kon kini ba usa ka pagpadayag gikan sa Dios o dili.” Human sa duha ka semana sa pagtuon ug pag-ampo, siya ug si Phebe nakombinser nga ang basahon tinuod. Apan si Sidney nasayod usab nga ang pagpasakop sa Simbahan mahimong dako nga sakripisyo alang sa iyang pamilya. Tataw nga mawad-an siya sa iyang trabaho isip usa ka ministro, lakip sa iyang kahimtang sa katilingban diha sa komunidad. Samtang siya ug si Phebe naghisgot niining posibilidad, namahayag si Phebe, “akong gikwentada ang mahimong sangpotanan, ug … akong tinguha nga buhaton ang kabubut-on sa Dios, mabuhi man o mamatay.”