Abril 7–13: “Ipabati ang Inyong mga Tingog … sa Pagpadayag sa Akong Ebanghelyo”

Doktrina ug mga Pakigsaad 30–36

Si Parley P. Pratt nahimong miyembro sa Simbahan sulod pa sa usa ka bulan sa dihang gitawag “ngadto sa kamingawan” sa pagsangyaw sa ebanghelyo (Doktrina ug mga Pakigsaad 32:2). Si Thomas B. Marsh nahimong miyembro sa Simbahan sulod lang sa mas mubo nga panahon sa dihang siya gisultian nga, “Ang takna sa imong misyon miabot” (Doktrina ug mga Pakigsaad 31:3). Si Orson Pratt, Edward Partridge, ug daghan pa dili pa lang dugay nga nabunyagan sa dihang ang ilang tawag sa misyon miabot. Tingali adunay leksiyon dinhi niining panig-ingnan alang kanato karon: kon ikaw adunay igong nahibaloan nga gani modawat ka sa gipahiuli nga ebanghelyo pinaagi sa bunyag, igo na ang imong nahibaloan aron ipakigbahin kini sa uban. Siyempre, sa kanunay gusto nato nga madugangan ang atong kahibalo sa ebanghelyo, apan ang Dios wala gayod magpanuko sa pagtawag sa “walay nakat-onan” sa pagsangyaw sa Iyang ebanghelyo (Doktrina ug mga Pakigsaad 35:13). Gani, nagdapit Siya kanatong tanan, “Mobuka sa imong ba-ba sa pagpadayag sa akong ebanghelyo” (Doktrina ug mga Pakigsaad 30:5). Ug atong buhaton kanang labing maayo dili pinaagi sa atong kaugalingong kaalam ug kasinatian apan “pinaagi sa gahom [sa] Espiritu” (Doktrina ug mga Pakigsaad 35:13).

Tan-awa usab sa “The Faith and Fall of Thomas Marsh,” “Ezra Thayer: From Skeptic to Believer,” “Orson Pratt’s Call to Serve,” diha sa Konteksto sa mga Pagpadayag [Revelations in Context], 54–69.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 30–36

Ako gitawag nga mahimong usa ka saksi ni Jesukristo.

Kon ikaw aduna man o walay pormal nga tawag isip usa ka misyonaryo, ikaw mahimong usa ka saksi ni Jesukristo “sa tanan nga mga panahon, ug diha sa tanan nga mga butang, ug diha sa tanan nga mga dapit” (Mosiah 18:9). Samtang magtuon ka sa Doktrina ug mga Pakigsaad 30–36, isulat unsay imong nakat-onan mahitungod sa imong mga oportunidad sa pagpakigbahin sa ebanghelyo. Maghimo ka og lista sa mga butang nga gihangyo sa Ginoo nimo ug laing lista sa mga saad nga gihimo sa Ginoo kon ikaw mopakigbahin sa ebanghelyo (pananglitan, tan-awa sa Doktrina ug mga Pakigsaad 30:8; 31:3–5; 32:1, 5; 35:13–15, 24). Mahimo usab nga imong pangitaon ang mga baroganan nga makatabang nimo sa pagpakigbahin sa ebanghelyo. Unsa ang imong nakita nga makapadasig nimo nga “magpahayag sa maayo nga mga balita sa dako nga kalipay”? (Doktrina ug mga Pakigsaad 31:3).

Si Elder Gary E. Stevenson mitudlo nga ang pagsangyaw sa ebanghelyo “matuman pinaagi sa yano, sayon sabton nga mga baroganan nga gitudlo sa matag usa kanato gikan pa sa pagkabata: paghigugma, pagpaambit, ug pagdapit” (“Paghigugma, Pagpaambit, Pagdapit,” Liahona, Mayo 2022, 85). Ikonsiderar ang pagtuon sa iyang mensahe samtang maghunahuna mahitungod sa imong mga kaila, mga higala, ug mga pamilya. Unsa nga mga ideya ang miabot nimo mahitungod kon unsaon nimo sa pagpakigbahin ngadto nila ang “unsa ang [imong] ganahan mahitungod sa ebanghelyo ni Jesukristo”? Sa unsang mga paagi nga ikaw makadapit nila sa “pagduol ug pagtan-aw,” sa “pagduol ug pagserbisyo,” ug sa “pagduol ug pagpasakop”? Samtang mokanta o maminaw ka sa “Moadto Ako Bisan Asa sa Pagbuot Mo” (Mga Himno, nu. 168) o may kalabotan nga himno, mahimo ka nga mangutana sa imong kaugalingon, “Unsa man ang gusto sa Ginoo nga ako mosulti ug mamahimo aron mapakigbahin ang Iyang ebanghelyo?”

Tan-awa usab sa Marcos A. Aidukaitis, “Ipataas ang Imong Kasingkasing ug Pagmaya,” Liahona, Mayo 2022, 40–43; Topics and Questions [Mga Hilisgotan ug mga Pangutana], “Inviting All to Receive the Gospel of Jesus Christ [Pagdapit sa Tanan sa Pagdawat sa Ebanghelyo ni Jesukristo],” “Ministering as the Savior Does [Pagpangalagad sama sa Gibuhat sa Manluluwas],” Gospel Library; “Inviting All to Come unto Christ: Sharing the Gospel” (bidyo), Gospel Library.

Inviting All to Come unto Christ: Sharing the Gospel

When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

Doktrina ug mga Pakigsaad 31:1–2, 5–6, 9, 13

Ang Ginoo makatabang kanako sa akong mga relasyon sa pamilya.

Ang mga pamilya niadtong 1830 nanglimbasog sa daghang sama nga mga problema nga giatubang sa mga pamilya karon. Unsa nga giya ug mga saad ang gihatag sa Ginoo ngadto ni Thomas B. Marsh mahitungod sa iyang pamilya diha sa Doktrina ug mga Pakigsaad 31? (tan-awa ilabi na sa mga bersikulo 1–2, 5–6, 9, 13). Sa unsang paagi nga ang Iyang mga pulong makatabang kanimo diha sa imong mga relasyon sa pamilya?

Alang sa dugang impormasyon mahitungod ni Thomas B. Marsh, tan-awa sa Mga Santos, 1:88–89, 136–38.

Doktrina ug mga Pakigsaad 32–33; 35

Ang Ginoo nag-andam kanako alang sa buhat nga gusto Niya nga akong buhaton.

Ang pagtuon sa mga kinabuhi sa mga tawo nga gihisgotan diha sa Doktrina ug mga Pakigsaad 32–33; 35 makatabang nimo sa pag-ila kon sa unsang paagi nga ang Ginoo nag-andam nimo alang sa Iyang buhat. Pananglitan, mahimo nimong basahon ang mahitungod sa relasyon tali ni Parley P. Pratt ug ni Sidney Rigdon diha sa “Mga Tingog sa Pagpahiuli: Nahaunang mga Kinabig.” Sa unsang paagi nga kini nga relasyon nakapanalangin sa mga anak sa Dios? (tan-awa sa Doktrina ug mga Pakigsaad 35).

Ania ang laing ehemplo: Si Ezra Thayer misulat nga sa wala pa siya mabunyagi, aduna siyay panan-awon diin “dunay miabot nga tawo ug midala kanako og linukot nga papel ug mipresentar niini kanako, ug usa usab ka trumpeta ug misulti nako sa [pagtugtog] niini. Giingnan nako siya nga wala pa gyod ko [makatugtog] og trumpeta sukad. Miingon siya nga [makatugtog] ka niini, sulayi lang. … Mihimo kini sa labing nindot nga tunog nga akong nadungog sukad” (“Revelation, October 1830–B, Revelation Book 1,” makasaysayanon nga pasiuna, josephsmithpapers.org). Sa dihang si Joseph Smith sa wala madugay nakadawat og pinadayag alang ni Ezra Thayer ug Northrop Sweet, nga karon narekord diha sa Doktrina ug mga Pakigsaad 33, gisabot ni Ezra ang pinadayag nga mao ang linukot nga papel sa iyang panan-awon. Sa unsang paagi nga ang Ginoo miandam ni Ezra alang sa misyon nga Iyang gihatag diha sa Doktrina ug mga Pakigsaad 33:1–13?

Unsa nga ebidensya ang imong makita nga ang impluwensya sa Ginoo anaa sa kinabuhi niining nahauna nga mga miyembro sa Simbahan? Kinsa ang gibutang sa Ginoo diha sa imong kinabuhi aron motabang nimo sa pagduol ngadto ni Kristo? Sa unsang paagi nga Siya nag-andam nimo sa pagpanalangin sa uban pinaagi sa imong pagkamatinud-anon, paghigugma, o pagdapit?

Tan-awa usab sa “A Mission to the Lamanites,” diha sa Konteksto sa mga Pagpadayag [Revelations in Context], 45–49.

Doktrina ug mga Pakigsaad 33:12–18

Kon akong itukod ang akong kinabuhi diha sa ebanghelyo sa Manluluwas, ako dili mapukan.

Ang Doktrina ug mga Pakigsaad 33 gipamulong ngadto ni Northrop Sweet ug ni Ezra Thayer, duha ka bag-ong mga miyembro sa Simbahan. Si Northrop mibiya sa Simbahan sa wala madugay pagkahuman nahatag kini nga pagpadayag. Si Ezra matinud-anon nga miserbisyo sulod sa pipila ka panahon, apan sa kaulahian nawala ra usab. Ang pagbasa bahin nila niini nga seksiyon tingali makaaghat nimo sa pagkonsiderar kon unsa ka kalig-on nga natukod “ibabaw [sa] lig-on nga sukaranan” (bersikulo 13) sa ebanghelyo. Unsa nga mga kamatuoran niining mga bersikulo ang makatabang nimo nga magpabilin nga matinud-anon ngadto sa Manluluwas?

Tan-awa usab sa Helaman 5:12.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Mga Kapanguhaan sa Kasaysayan sa Doktrina ug mga Pakigsaad: Parley P. Pratt

• Si Sidney Rigdon

• Ang Hubad ni Joseph Smith sa Biblia

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 30:1–2

Kinahanglan ko nga mas motutok sa mga butang sa Dios kaysa mga butang sa yuta.

• Tingali malingaw ang mga bata nga mosulay sa pagbuhat og duha ka buluhaton sa usa ka higayon, sama sa pagsulti sa mga pulong sa usa ka paboritong awit samtang nagsulat sa mga ngalan sa mga sakop sa ilang pamilya. Nganong lisod man ang pagdungan og buhat sa duha ka butang? Dayon mahimo ninyong basahon og dungan ang Doktrina ug mga Pakigsaad 30:1–2. Unsa ang pipila sa “mga butang sa yuta” nga makapalinga nato gikan sa paghinumdom ni Jesukristo ug sa Iyang ebanghelyo? Sa unsang paagi nga kita magpabiling nakatutok diha Kaniya?

Doktrina ug mga Pakigsaad 33:2–3, 6–10

Makahimo ako sa pagpakigbahin sa ebanghelyo ni Jesukristo.

• Aron matabangan ang imong mga bata nga masabtan ang Doktrina ug mga Pakigsaad 33:8–10, mahimo nimo silang dapiton sa pagsulti og hugpong sa mga pulong nga ang ilang ba-ba nagtak-om samtang ikaw o ang ubang mga bata motag-an sa unsay ilang gisulti. Basaha ang mga bersikulo 8–10 ug hangyoa sila sa pag-abli sa ilang mga ba-ba sa matag higayon nga ang kapulongan nga “ablihi ang inyong mga ba-ba” gibalikbalik og sulti. Ngano nga ang Langitnong Amahan gusto kanato nga moabli sa atong mga ba-ba ug mopakigbahin sa ebanghelyo ngadto sa uban? Unsa ang atong mahimong isulti sa atong pamilya ug mga higala mahitungod sa Manluluwas ug sa Iyang ebanghelyo? Mahimo usab kamo nga manganta og usa ka awit mahitungod sa pagpakigbahin sa ebanghelyo, sama sa “Among Dad-on sa Kalibotan ang Iyang Kamatuoran” (Songbook sa mga Bata, 92–93).

• Ikonsiderar ang pagpakigbahin og mga kasinatian nga imong nasinati nga may kalabotan ngadto sa mga baroganan o mga saad diha sa Doktrina ug mga Pakigsaad 30–34. Unsa ang imong nakat-onan o gibati mahitungod sa imong Manluluwas ug sa Iyang buhat samtang nagserbisyo ka Kaniya?

Adunay daghang paagi sa pagpakigbahin sa ebanghelyo.

Pagpamatuod sa gisaad nga mga panalangin. Kon dapiton nimo ang mga bata sa pagsunod sa usa ka baroganan sa ebanghelyo, mahimo nimong ipakigbahin ang mga saad nga gihimo sa Dios ngadto sa mga tawo nga nagsunod niana nga baroganan. Pananglitan, mahimo ka nga mopamatuod sa mga panalangin nga Iyang ihatag kanato kon kita moabli sa atong mga ba-ba ug mopakigbahin sa ebanghelyo.

Doktrina ug mga Pakigsaad 33:12–13

Ako makatukod sa akong kinabuhi diha sa ebanghelyo ni Jesukristo.

• Mahimo nimong dad-on ang mga bata sa gawas aron makita ang pundasyon sa ilang balay o gambalay sa Simbahan ug mohangyo nila nga ihulagway kini. Ngano nga ang usa ka gambalay nanginahanglan og lig-on, solido nga pundasyon? Basaha dungan nila ang Doktrina ug mga Pakigsaad 33:12–13, ug mopakigbahin sa usag-usa sa inyong mga pagbati mahitungod kon ngano nga ang Ginoo gusto nga kita motukod sa atong mga kinabuhi diha sa Iyang ebanghelyo. Ngano nga ang “lig-on nga sukaranan” usa ka maayo nga pulong sa paghulagway sa ebanghelyo? Sa unsang paagi nga atong matukod ang atong mga kinabuhi diha sa lig-on nga sukaranan sa ebanghelyo? (tan-awa usab sa Mateo 7:24–29).

Alang sa dugang nga mga ideya, tan-awa ang isyu karong bulana sa Higala nga magasin.

Go into the Wilderness [Lakaw ngadto sa Kamingawan], ni Robert T. Barrett