Marso 31–Abril 6: “Si Jesukristo Mopundok sa Iyang mga Katawhan”

Doktrina ug mga Pakigsaad 29

Bisan og ang Simbahan ni Jesukristo naorganisar na niadtong 1830, daghang kamatuoran sa ebanghelyo ang gikinahanglan pa gihapon nga ipadayag, ug ang pipila sa mga miyembro sa Simbahan adunay mga pangutana. Nabasahan nila ang mga panagna diha sa Basahon ni Mormon mahitungod sa panagpundok sa Israel ug pagtukod sa Zion (tan-awa sa 3 Nephi 21). Sa unsang paagi nga kana mahitabo? Ang pagpadayag nga giangkon ni Hiram Page nga nadawat adunay pangagpas bahin nianang hisgotanan, nga nakapadugang lang sa kakuryoso sa mga miyembro (tan-awa sa Doktrina ug mga Pakigsaad 28). Ang ubang mga tawo naghunahuna kabahin sa Pagkapukan ni Adan ug ni Eva ug sa espirituhanon nga kamatayon. Ang Ginoo mihangop niini nga mga pangutana niadtong 1830, ug Siya mohangop sa atong mga pangutana karong panahona. “Bisan unsa ang inyong pangayoon pinaagi sa hugot nga pagtuo,” Siya misulti sa mga Santos, “samtang nagkahiusa sa pag-ampo sumala sa akong pagsugo, kamo makadawat” (Doktrina ug mga Pakigsaad 29:6). Gani, sama sa buhong sa doktrina nga pagpadayag nga makita diha sa Doktrina ug mga Pakigsaad 29, ang Ginoo usahay motubag sa atong mga pangutana pinaagi sa paghatag nato sa kamatuoran ug kahibalo lapas pa sa unsay atong gipangayo.

Mga Ideya alang sa Pagkat-on diha sa Panimalay ug sa Simbahan

Doktrina ug mga Pakigsaad 29

Ang Langitnong Amahan adunay plano alang sa kaluwasan sa Iyang mga anak.

Ang Doktrina ug mga Pakigsaad 29 nagtudlo og daghang kamatuoran mahitungod sa plano sa Dios alang nimo. Samtang magbasa ka, pangitaa ang mga kamatuoran nga imong makat-onan mahitungod sa matag usa sa mosunod nga mga bahin sa Iyang plano:

• Kinabuhi nga wala pa dinhi sa yuta (tan-awa sa mga bersikulo 36–37)

• Paglalang (tan-awa sa mga bersikulo 31–33)

• Ang Pagkapukan ni Adan ug ni Eva (tan-awa sa mga bersikulo 40–41)

• Mortal nga kinabuhi (tan-awa sa mga bersikulo 39, 42–45)

• Ang Pag-ula ni Jesukristo (tan-awa sa mga bersikulo 1, 42–43, 46–50)

• Ang Pagkabanhaw (tan-awa sa mga bersikulo 13, 26)

• Ang Kataposang Paghukom (tan-awa sa mga bersikulo 12–13, 27–30)

Unsa nga mga panabot ang imong naangkon? Kon kini makatabang nimo, mahimo nimo kining isulat sa luna nga gitagana uban sa mga hulagway diha sa kataposan niini nga latid. Sa unsang paagi nga kini nga mga kamatuoran makaimpluwensya sa imong kinabuhi?

Tan-awa usab sa Topics and Questions [Mga Hilisgotan ug mga Pangutana], “Plan of Salvation [Plano sa Kaluwasan],” Gospel Library.

Detalye gikan sa Come Unto Me [Duol Kamo Kanako], ni Jenedy Paige

Doktrina ug mga Pakigsaad 29:1–28

Si Jesukristo nagdapit nako nga motabang sa pagpundok sa Iyang mga katawhan sa dili pa ang Iyang Ikaduhang Pag-anhi.

Si Jesukristo namulong kabahin sa pagpundok sa Iyang mga katawhan “sama sa usa ka himongaan nga mopundok sa iyang mga piso sa ilawom sa iyang mga pako” (Doktrina ug mga Pakigsaad 29:2). Unsa ang gitudlo nganha nimo niining pagtandi mahitungod ni Jesukristo? Unsa ang dugang nga mga hunahuna o mga pagbati ang miabot nimo samtang nagtuon sa paghulagway sa usa ka himongaan ug mga piso niini nga latid? Hunahunaa unsa imong gibati nga si Jesukristo nagpundok ug nanalipod nimo.

Samtang magbasa ka sa Doktrina ug mga Pakigsaad 29:1–11, pangitaa ang mga ideya mahitungod:

• Kon kinsa ang pagapundokon.

• Kon unsay ipasabot sa “pundokon” ngadto kang Kristo.

• Kon nganong magpundok kita ngadto Kaniya.

Pamalandongi kon nganong gusto nimo nga ang ubang tawo magpundok ngadto kang Jesukristo. Unsa ang imong gibati nga nadasig nga buhaton aron motabang?

Mahimo nimong pangutan-on ang imong kaugalingon sa sama nga mga pangutana samtang magtan-aw sa bidyo nga “A Witness of God” (Gospel Library) o magbasa o maminaw sa usa ka himno mahitungod sa pagpundok, sama sa “Israel, Israel, Dios Nagtawag” (Mga Himno, nu. 7). Sa imong pamati unsa ang gustong itudlo sa Ginoo kanimo mahitungod sa buhat sa pagpundok?

A Witness of God

Elder Neil L. Andersen describes how all of God's children are pieces of a large puzzle in preparation for the Second Coming of Jesus Christ.

Si Presidente Russell M. Nelson miingon: “karon ang pagpundok nahitabo diha sa kada nasod. Ang Ginoo mimando sa pag-establisar sa Zion sa matag kayutaan diin Iyang gihatag sa Iyang mga Santos ang ilang natawhan ug nasyonalidad” (“Ang Pagpundok sa Nagkatibulaag nga Israel,” Liahona, Nob. 2006, 81). Unsaon nga ang pagpundok sa ingon niini nga paagi makatabang nato nga “makapangandam sa tanan nga mga butang” alang sa Ikaduhang Pag-anhi sa Manluluwas? (bersikulo 8; tan-awa usab sa mga bersikulo 14–28).

Tan-awa usab sa Russell M. Nelson ug Wendy W. Nelson, “Paglaom sa Israel” (tibuok kalibotan nga debosyonal, Hunyo 3, 2018), Gospel Library; D. Todd Christofferson, “Ang Doktrina sa Pagkasakop,” Liahona, Nob. 2022, 53–56; Topics and Questions [Mga Hilisgotan ug mga Pangutana], “Gathering of Israel [Pagpundok sa Israel],” Gospel Library.

Doktrina ug mga Pakigsaad 29:31–35

“Ang tanan nga mga butang ngari kanako mga espirituhanon.”

Samtang magtuon ka sa Doktrina ug mga Pakigsaad 29:31–35, pangutan-a ang imong kaugalingon, “Sa unsang paagi nga ang tanang sugo espirituhanon?” Mahimo kang maglista og pipila ka sugo ug ikonsiderar ang espirituhanon nga mga kamatuoran nga may kalabotan sa matag usa. Ang pagrebyo sa Alang sa Kalig-on sa mga Kabatan-onan: Usa ka Giya sa Paghimo og mga Pagpili mahimong makatabang—nagtudlo kini og pipila ka mahangtoron nga mga kamatuoran luyo sa pipila ka sugo sa Dios.

Sa unsang paagi nga ang pagkasayod nga ang “tanan nga mga butang … mga espirituhanon” makaapekto sa paagi sa imong pagtan-aw sa mga sugo sa Dios? Ikonsiderar usab ang pagpangita sa espirituhanong kahulogan o katuyoan diha sa ubang aspeto sa imong kinabuhi.

Tan-awa usab sa 2 Nephi 9:39.

Ipunting ang hunahuna ngadto ni Jesukristo. “Matag hilisgotan sa ebanghelyo [usa ka] oportunidad sa pagtudlo ug pagkat-on mahitungod ni Jesukristo” (Pagtudlo sumala sa Pamaagi sa Manluluwas, 6). Unsa ang imong nakat-onan mahitungod sa Iyang mga kinaiya, Iyang mga tahas, ug Iyang ehemplo samtang nagbasa ka sa Doktrina ug mga Pakigsaad 29?

Doktrina ug mga Pakigsaad 29:36–50

Si Jesukristo ang nagtubos kanato gikan sa pagkapukan.

Unsaon nimo sa paggamit ang Doktrina ug mga Pakigsaad 29:36–50 aron mapasabot kon nganong nagkinahanglan kita og katubsanan pinaagi ni Jesukristo?

Ang Pagkapukan ni Adan nagdala og kamatayon ug sala dinhi sa kalibotan, apan nag-andam usab kini og paagi alang sa katubsanan ug hingpit nga kalipay pinaagi ni Kristo. Naghunahuna niana, basaha ang mga bersikulo 39–43 ug timan-i ang mga pulong ug mga hugpong sa mga pulong nga naghatag nimo og hingpit nga kalipay. Unsa ang nakapadayeg nimo mahitungod sa gisulti ni Adan ug ni Eva mahitungod sa Pagkapukan diha sa Moises 5:10–12?

Tan-awa usab sa “Why We Need a Savior” (bidyo), Gospel Library.

Why We Need a Savior

What would life be like without a Savior? There would be no joy, no forgiveness, no hope for the future. This Christmas, learn more about the hope, peace and happiness our Savior Jesus Christ can bring into our lives at christmas.mormon.org.

Alang sa dugang nga mga ideya, tan-awa ang mga isyu karong bulana sa Liahona ug sa Alang sa Kalig-on sa mga Kabatan-onan nga mga magasin.

Mga Tawo, Mga Dapit, Mga Panghitabo

• Ang Pagpundok sa Israel

• Kapitulo 12: Doktrina ug mga Pakigsaad 29

Iklik dinhi aron makakita pa og dugang

Mga Ideya sa Pagtudlo sa mga Bata

Doktrina ug mga Pakigsaad 29

Ang Langitnong Amahan adunay plano alang sa kaluwasan sa Iyang mga anak.

• Sa pagsugod og panaghisgot mahitungod sa plano sa Langitnong Amahan alang nato, ikaw ug ang imong mga bata mahimong maghisgot mahitungod sa usa ka panahon diin naghimo kamo og plano, sama sa usa ka pagbiyahe o alang sa paghimo sa usa ka buluhaton. Mahimo usab ka nga mopakigbahin og mga ehemplo sa mga plano, sama sa usa ka kalendaryo nga may nakasulat niini nga mga kalihokan o mga instruksiyon sa paghimo sa usa ka butang. Nganong mapuslanon ang mga plano? Hisgotan dayon nimo ang mahitungod sa unsay gusto sa Langitnong Amahan nga atong mahimo ug kon sa unsang paagi nga ang Iyang plano makatabang nato nga mahimo kini.

• Mahimo nimong gamiton ang mga hulagway nga anaa sa kataposan niini nga latid aron matabangan ang imong mga bata sa pagpangita sa mga bersikulo diha sa Doktrina ug mga Pakigsaad 29 nga nagtudlo mahitungod sa lainlaing mga bahin sa plano sa Langitnong Amahan. Mahimo usab nimong guntingon ang mga hulagway ug hangyoon ang imong mga bata sa pagbutang niini sa saktong pagkahan-ay. Nganong mapasalamaton man kita nga masayod nga ang Langitnong Amahan adunay plano alang nato? Sa unsang paagi nga ang pagkahibalo mahitungod niini nakaimpluwensya sa atong inadlaw-adlaw nga kinabuhi?

Doktrina ug mga Pakigsaad 29:1–2, 7–8

Si Jesukristo mopundok sa Iyang mga katawhan sa dili pa Siya moanhi pag-usab.

• Ang hulagway sa ubos bahin sa usa ka himongaan nga nagpundok sa iyang mga piso o ang bidyo nga “Chicks and Hens” (ChurchofJesusChrist.org) mahimong makatabang sa imong mga bata nga mahanduraw ang pasumbingay diha sa Doktrina ug mga Pakigsaad 29:1–2. Dayon mahimo ninyong basahon og dungan kini nga mga bersikulo ug hisgotan sa usag usa kon unsaon sa usa ka himongaan sa pagpanalipod ang iyang mga piso ug sa unsang paagi nga kana susama sa unsay buhaton sa Manluluwas alang nato.

  Chicks and Hens

  

  I Would Gather Thee [Ako Mopundok Kaninyo], ni Liz Lemon Swindle

• Unsa ang makapadasig sa imong mga bata aron ganahan nga motabang sa Manluluwas sa pagpundok sa Iyang mga katawhan? Tingali ganahan sila nga makadungog og kasinatian sa usa ka tawo kinsa “mipundok” ngadto Kaniya pinaagi sa pagpasakop sa Iyang Simbahan. Pananglitan, kinsa ang mipaila sa inyong pamilya ngadto sa Simbahan? Sa unsang paagi nga kita napanalanginan pinaagi sa pagdawat sa panawagan sa Manluluwas nga magpundok ngadto Kaniya? Sa unsang paagi nga kita makatabang sa uban nga magpundok ngadto Kaniya? (Tan-awa sa “A Message for Children from President Russell M. Nelson” [bidyo], ChurchofJesusChrist.org.)

  Video: A Message for Children from President Russell M. Nelson

  In the 2021 Friend to Friend event, President Russell M. Nelson gave this message to children around the world.

Doktrina ug mga Pakigsaad 29:11

Si Jesukristo moanhi pag-usab.

• Usa ka hulagway sa Ikaduhang Pag-anhi sa Manluluwas (sama sa Pakete sa mga Hulagway sa Ebanghelyo, nu. 66) o usa ka awit mahitungod niini (sama sa “Kon Siya Moanhi Pag-usab,” Songbook sa mga Bata, 46–47) mahimong makatabang nimo ug sa imong mga anak nga maghisgot sa Doktrina ug mga Pakigsaad 29:11. Tabangi ang imong mga anak sa pagmatikod sa mga kapulongan diha sa kasulatan nga may kalabotan sa usa ka butang diha sa hulagway o sa awit. Mopakigbahin sa usag usa kon unsa ang inyong gibati mahitungod sa pag-anhi pag-usab ni Jesukristo dinhi sa yuta.

Alang sa dugang nga mga ideya, tan-awa ang isyu karong bulana sa Higala nga magasin.