“Mga Tingug sang Pagpanumbalik: Una nga mga Hinaylo,” Dali, Magsunod sa Akon—Para sa Puluy-an kag Simbahan: Doktrina kag mga Kasugtanan 2025 (2025)
“Una nga mga Hinaylo,” Dali, Magsunod sa Akon—Para sa Puluy-an kag Simbahan: 2025
Mga Tingug sang Pagpanumbalik
Una nga mga Hinaylo
Bisan antes pa nga gin-organisar ang Simbahan sang Abril 1830, nagsiling ang Ginuo, “Ang uma puti na para anihon” (Doktrina kag mga Kasugtanan 4:4). Napamatud-an ining pahayag sa binulan nga nagsunod, sang madamo sa mga nagapangita sang kamatuoran ang gingiyahan sang Espiritu sang Dios para makita ang ginpanumbalik nga Simbahan ni Jesucristo.
Madamo sining una nga mga hinaylo ang nangin instrumento sa pagpasad sang pundasyon sang Pagpanumbalik, kag ang ila mga istorya sang pagkahaylo malahalon para sa aton sa karon. Ang pagtuo nga ila ginpakita amo man ang pagtuo nga kinahanglan naton para mahaylo sa ebanghelyo ni Jesucristo.
Abigail Calkins Leonard
Sang si Abigail Calkins Leonard ara sa tunga-tunga sang edad nga trayntahon, gusto niya nga mapatawad sang iya mga sala. Panalagsa nagabasa sia sang Biblia, kag may mga tawo halin sa Kristiyano nga mga simbahan nga nagabisita sa iya, pero nagalibog ang iya ulo kon ano ang kinalain sang isa ka simbahan sa isa. “Isa ka aga,” siling niya, “Ginkuha ko ang akon Biblia kag nagkadto sa kakahuyan, kag nagluhod.” Nangamuyo sia sing hugot sa Ginuo. “Sa gilayon isa ka panan-awon ang nag-abot sa akon panulok,” siling niya, “kag ang lainlain nga mga sekta naglabay sing tag-isaisa sa akon, kag isa ka tingug ang nagtawag sa akon, nga nagasiling: ‘Ini sila gintukod para sa kita.’ Dayon, sa unhan, may makita ako nga dako nga kasanag, kag may tingug halin sa ibabaw nga naghambal: ‘Magabangon ako sang isa ka katawhan, nga ikalipay ko ang pag-angkon kag pagbugay.’” Wala magdugay, nabatian ni Abigail ang parte sa Libro ni Mormon. Bisan nga wala pa sia sing kopya, ginpangayo niya nga “mahibal-an ang kamatuoran sining libro, paagi sa dulot kag gahum sang Balaan nga Espiritu,” kag iya “gilayon nga nabatyagan ang iya presensya.” Sang ulihi nga iya na nga nabasa ang Libro ni Mormon, sia “handa na sa pagbaton sini.” Sia kag ang iya bana, nga si Lyman, ginbunyagan sang 1831.
Thomas B. Marsh
Sang si Thomas B. Marsh lamharon pa nga hamtong, gintun-an niya ang Biblia kag nangin miyembro sang isa ka Kristiyano nga simbahan. Pero wala sia makontento, nga sang ulihi nagpalayo sa tanan nga mga simbahan. “May diutay ako nga espiritu sang pagpropesiya,” siling niya, “kag ginhambalan [ang isa ka lider sang relihiyon] nga may ginapaabot ako nga bag-o nga simbahan nga magatuhaw, nga magadala sang kamatuoran nga puro.” Wala magdugay pagkatapos sini, may espirituhanon nga pagpabatyag si Thomas nga bayaan ang iya balay sa Boston, Massachusetts, kag magbiyahe pa-weste. Pagligad sang tatlo ka bulan nga pagtiner sa weste sang New York nga napaslawan nga makita ang iya ginapangita, nagbiyahe sia papuli. Sa dalan, may babayi nga namangkot kay Thomas kon bala nakabati na sia parte sa “Bulawan nga Libro nga nakita sang lamharon nga ang ngalan Joseph Smith.” Nakuha ang iya atensyon sang sining panghunahuna, gilayon si Thomas nga nagbiyahe pakadto sa Palmyra kag nakilala si Martin Harris sa imprintahan, sang ang una nga 16 ka mga pahina sang Libro ni Mormon manuggwa pa lang sa imprintahan. Ginpasugtan si Thomas nga magdala sang kopya sadtong 16 ka mga pahina, kag iya ini gindala pauli sa iya asawa, nga si Elizabeth. “Nalipay sia kaayo” sa libro, siling niya, “nga nagapati nga buhat ini sang Dios.” Si Thomas kag Elizabeth sang ulihi nagsaylo sa New York upod ang ila mga kabataan kag ginbunyagan. (Para sa dugang nga impormasyon parte kay Thomas B. Marsh, tan-awa sa Doktrina kag mga Kasugtanan 31.)
Parley kag Thankful Pratt
Pareho kay Thomas Marsh, sanday Parley kag Thankful Pratt nag-akto sa espirituhanon nga mga pagpabatyag nga bayaan ang ila mauswagon nga uma sa Ohio sa tuyo nga iwali ang ebanghelyo suno sa ila naintiendihan sa Biblia. Sa ginhambal ni Parley sa iya utod nga lalaki, “Ang epekto sining mga butang tama kabaskog sa akon kaisipan sining nagliligad nga indi ako makapahuway.” Sang pag-abot nila sa este sang New York, ginpabatyag si Parley nga magtiner anay sa lugar. Si Thankful, nadesisyunan nila, magapadayon nga wala sia. “May kinahanglan ako obrahon sa sining bahin sang pungsod,” siling ni Parley sa iya, “kon ano ini, ukon ano kalawig ini dapat obrahon, wala ako makahibalo; pero mapuli ako kon natapos na ini.” Didto ni Parley una nga nabatian ang parte sa Libro ni Mormon. “Nakabatyag ako sang pinasahi nga interes sa libro,” siling niya. Nagpangayo sia sang kopya kag nagbasa sa bilog nga gab-i. Pagkaaga, nahibal-an niya nga ang libro matuod, nga ginahatagan ini sing bili nga “labaw pa sangsa tanan nga manggad sa kalibutan.” Sa sulod sang pila ka adlaw ginbunyagan si Parley. Dayon nagbalik sia kay Thankful, nga ginbunyagan man. (Para sa dugang nga impormasyon parte kay Parley P. Pratt, tan-awa sa Doktrina kag mga Kasugtanan 32.)
Parley P. Pratt Reads the Book of Mormon [Si Parley P. Pratt Nagabasa sang Libro ni Mormon], ni Jeffrey Hein
Sidney kag Phebe Rigdon
Samtang nagapanglakaton halin sa New York pakadto sa misyon sa Missouri, si Parley Pratt kag ang iya kaupod nga mga manugpangabudlay nagpundo sa Mentor, Ohio, sa balay nanday Sidney kag Phebe Rigdon—madugay na nga mga abyan ni Parley sang ara pa sia sa Ohio. Si Sidney isa ka Kristiyano nga ministro, kag si Parley isa sadto ka miyembro sang iya kongregasyon kag ginkabig sia nga espirituhanon nga manunudlo. Nalangkag nga gin-istorya ni Parley sa iya mga abyan ang parte sa Libro ni Mormon kag ang Pagpanumbalik sang ebanghelyo ni Jesucristo. Si Sidney mismo nagapangita sang pagpanumbalik sang matuod nga Simbahan nga iya natukiban ginlaragway sa Bag-ong Katipan, bisan pa nga nagaduda sia sa Libro ni Mormon sang primero. “Pero basahon ko ang imo nga libro,” siling niya sa iya abyan nga si Parley, “kag tinguhaan ko nga siguraduhon, kon bala rebelasyon ini halin sa Dios ukon indi.” Pagkatapos sang duha ka semana sang pagtuon kag pagpangamuyo, sia kag si Phebe pareho nga nakumbinsi nga ang libro matuod. Pero nahibal-an man ni Sidney nga ang pagsulod sa Simbahan mangin daku kaayo nga sakripisyo para sa iya pamilya. Sigurado gid nga mawad-an sia sing trabaho bilang ministro, upod ang iya sosyal nga estado sa ila komunidad. Samtang ginhambalan nila ni Phebe ang ini nga posibilidad, nagsiling si Phebe, “Ginpamensar ko na ang konsikwensya, kag … handum ko nga sundon ang pagbuot sang Dios, sa kabuhi man ukon sa kamatayon.”