Abril 7– 13: “Ibayaw ang Inyo mga Tingug … sa Pagpahayag sang Akon Ebanghelyo”

Doktrina kag mga Kasugtanan 30–36

Mga isa pa lang ka bulan si Parley P. Pratt nga miyembro sang Simbahan sang gintawag sia sa “kamingawan” sa pagwali sang ebanghelyo (Doktrina kag mga Kasugtanan 32:2). Si Thomas B. Marsh nangin miyembro sa mas manubo pa gid sina nga kalawigon sang sia ginsilingan, “Ang oras sang imo misyon nag-abot na” (Doktrina kag mga Kasugtanan 31:3). Si Orson Pratt, Edward Partridge, kag madamo nga iban pa ang bag-o lang gid mabunyagan sang mag-alabot ang ila mga tawag nga mag-misyon. Siguro may leksyon para sa aton karon sa sining sulundan: kon hustuhan na ang imo nahibal-an para batunon ang ginpanumbalik nga ebanghelyo paagi sa bunyag, hustuhan na ang imo nahibal-an para ipakigbahin ini sa iban. Siyempre, gusto gid naton nga madugangan ang aton ihibalo sa ebanghelyo, pero wala gid nagpang-alang-alang ang Dios sa pagtawag sa “wala’y tinun-an” nga magwali sang Iya ebanghelyo (Doktrina kag mga Kasugtanan 35:13). Ang matuod, ginaimbitar Niya kita tanan, “Buksan mo ang imo baba agud nga ipahayag ang akon ebanghelyo” (Doktrina kag mga Kasugtanan 30:5). Kag mahimo gid naton ina indi paagi sa aton kaugalingon nga kaalam kag eksperiyensya kundi “paagi sa gahum sang Espiritu” (Doktrina kag mga Kasugtanan 35:13).

Mga Ideya sa Pagtuon sa Puluy-an kag sa Simbahan

Doktrina kag mga Kasugtanan 30–36

Gintawag ako nga mangin saksi ni Jesucristo.

Pormal ukon indi pormal man ang imo calling bilang misyonero, pwede ka mangin saksi ni Jesucristo “sa tanan nga tinion kag sa tanan nga mga butang, kag sa tanan nga mga duog” (Mosias 18:9). Samtang ginatun-an mo ang Doktrina kag mga Kasugtanan 30–36, isulat ang imo natun-an parte sa mga oportunidad mo sa pagpakigbahin sang ebanghelyo. Pwede mo ilista ang mga butang nga ginapangayo sa imo sang Ginuo kag ilista sing lain ang mga ginapromisa sang Ginuo samtang ginapakigbahin mo ang ebanghelyo (halimbawa, tan-awa sa Doktrina kag mga Kasugtanan 30:8; 31:3–5; 32:1, 5; 35:13–15, 24). Pwede mo man pangitaon ang mga prinsipyo nga makabulig sa imo sa pagpakigbahin sang ebanghelyo. Ano ang nakita mo nga nagainspirar sa imo nga “[ipahayag] ang maayong balita sang dako nga kalipay”? (Doktrina kag mga Kasugtanan 31:3).

Si Elder Gary E. Stevenson nagtudlo nga ang pagwali sang ebanghelyo “pwede himuon paagi sa simple, mahapos maintiendihan nga mga prinsipyo nga gintudlo sa aton halin sang gamay pa kita: magpalangga, magpakigbahin, kag mag-imbitar” (“Love, Share, Invite,” Liahona, Mayo 2022, 85). Pamensara nga tun-an ang iya mensahe samtang ginahunahuna ang imo nga kilala, mga abyan, kag pamilya. Ano nga mga ideya ang nagaabot sa imo kon paano ipakigbahin sa ila ang “mga nanamian [mo] parte sa ebanghelyo ni Jesucristo? Ano nga mga paagi nga pwede mo sila hagaron nga “magkari kag magtan-aw,” “magkari kag magbulig,” kag “magkari kag magbuylog”?

Tan-awa man sa Marcos A. Aidukaitis, “Ibayaw ang Imo Tagipusuon kag Magkasadya,” Liahona, Mayo 2022, 40–43.

Inviting All to Come unto Christ: Sharing the Gospel

When Junior, a young man in a small Florida branch, decided he didn’t want to be alone in his belief in Christ, he invited a friend. One friend joined, then another, and another . . .

Doktrina kag mga Kasugtanan 31:1–2, 5–6, 9, 13

Mabuligan ako sang Ginuo sa akon mga kaangtanan sa pamilya.

Ang mga pamilya sang tinuig 1830 nagpangatubang sang madamo sa pareho nga mga isyu nga ginapangatubang sang mga pamilya sa karon nga panahon. Ano nga giya kag mga promisa ang ginhatag sang Ginuo kay Thomas B. Marsh parte sa iya pamilya sa Doktrina kag mga Kasugtanan 31? (ilabi na gid sa mga bersikulo 1–2, 5–6, 9, 13).? Paano makabulig sa imo ang Iya mga pulong sa imo mga kaangtanan sa pamilya?

Doktrina kag mga Kasugtanan 32–33; 35

Ginahanda ako sang Ginuo para sa buluhaton nga Iya ipahimo sa akon.

Ang pagtuon sang mga kabuhi sang mga tawo nga ginatumod sa Doktrina kag mga Kasugtanan 32–33; 35 makabulig sa imo nga mahibal-an kon paano ka ginahanda sang Ginuo para sa Iya buluhaton. Halimbawa, pwede mo basahon ang parte sa kaangtanan ni Parley P. Pratt kag Sidney Rigdon sa “Mga Tingug sang Pagpanumbalik: Ang Una nga mga Hinaylo.” Paano ginbugayan sining kaangtanan ang mga anak sang Dios? (tan-awa sa Doktrina kag mga Kasugtanan 35).

Ari ang isa pa ka halimbawa: Ginsulat ni Ezra Thayer nga antes sia mabunyagan, may panan-awon sia nga “isa ka tawo ang nag-abot kag gindalhan ako sang isa ka rolyo sang papel kag ginpakita ini sa akon, kag trumpeta pa gid kag ginhambalan ako nga [tukaron] ko ini. Ginsiling ko sa iya nga wala pa ako nakaagi [tukar] sang trumpeta bilog ko nga kabuhi. Siling niya pwede mo ina [tukaron], tilawi. … Naghuni ini sang pinakatahum nga tunog nga nabatian ko” (“Revelation, October 1830–B, Revelation Book 1,” historical introduction, josephsmithpapers.org). Sang makabaton si Joseph Smith sang rebelasyon para kay Ezra Thayer kag Northrop Sweet, nga nasulat karon bilang Doktrina kag mga Kasugtanan 33, gin-interpretar ni Ezra ang rebelasyon nga ang rolyo sang papel sa iya panan-awon. Paano ginpreparar sang Ginuo si Ezra para sa misyon nga Iya ginhatag sa iya sa Doktrina kag mga Kasugtanan 33:1–13?

Ano ang nakita mo nga ebidensya sa impluwensya sang Ginuo sa mga kabuhi sining nauna nga mga miyembro sang Simbahan? Sin-o ang ginbutang sang Ginuo sa imo kabuhi para buligan ka nga magpalapit kay Cristo? Paano ka Niya ginhanda para bugayan ang iban paagi sa imo pagkamatinuohon, pagpalangga, ukon imbitasyon?

Doktrina kag mga Kasugtanan 33:12–18

Kon tukuron ko ang akon kabuhi sa ebanghelyo sang Manluluwas, indi ako matumba.

Ang Doktrina kag mga Kasugtanan 33 ginpatungod kanday Northrop Sweet kag Ezra Thayer, duha ka bag-o nga mga miyembro sang Simbahan. Nagbiya si Northrop sa Simbahan wala madugayi pagkatapos nga ginhatag ining rebelasyon. Si Ezra nagserbisyo sing matutom sing madugay-dugay gawa, pero sang ulihi nagtalikod man sia. Ang pagbasa parte sa ila sa sining seksyon mahimo nga magtulod sa imo nga pamensaron kon ano ka kabakod nga natukod “sa bato” (bersikulo 13) sang ebanghelyo. Ano nga mga kamatuoran sa sining mga bersikulo ang makabulig sa imo nga magpadayon nga matinuohon sa Manluluwas?

Tan-awa man sa Helaman 5:12.

Para sa dugang nga mga ideya, tan-awa sa mga isyu sang Liahona kag Para sa Kusog sang mga Lamharon nga mga magasin sini nga bulan.

Mga Ideya para sa Pagtudlo sang mga Kabataan

Doktrina kag mga Kasugtanan 30:1–2

Dapat ako nga mas magtutok sa mga butang sang Dios sangsa mga butang sang kalibutan.

• Basi masadya para sa imo kabataan nga tilawan nga obrahon ang duha ka buluhaton nga dungan, pareho sang paglawag sang mga tinaga sang paborito nila nga kanta samtang ginasulat ang mga ngalan sang tanan nga miyembro sang ila pamilya. Ngaa mabudlay nga himuon ang duha ka butang sing dungan? Dayon pwede ninyo basahon ang Doktrina kag mga Kasugtanan 30:1–2 sing ululupod. Ano ang pila ka “butang sang kalibutan” nga nagaagaw sang aton atensyon sa pagdumdom kay Jesucristo kag sa Iya ebanghelyo? Paano naton padayunon ang aton pagtutok sa Iya?

Doktrina kag mga Kasugtanan 33:2–3, 6–10

Pwede ko ipakigbahin ang ebanghelyo ni Jesucristo.

• Para buligan ang imo kabataan nga maintiendihan ang Doktrina kag mga Kasugtanan 33:8–10, pwede mo sila hagaron nga tilawan nga maghambal nga nagakipot ang ila baba samtang ginapakot ninyo sang iban mo nga kabataan kon ano ang ila ginahambal. Basaha ang mga bersikulo 8–10 kag hambala sila nga buksan ang ila baba tagsa nga mitlangon ang dinalan nga “buksi ang inyo mga baba”. Ngaa gusto sang Amay nga Langitnon nga buksan naton ang aton mga baba kag ipakigbahin ang ebanghelyo sa iban? Ano ang pwede naton ihambal sa aton pamilya kag mga abyan parte sa Manluluwas ukon sa Iya ebanghelyo? Pwede man kamo magkanta sang parte sa pagpakigbahin sang ebanghelyo.

• Pamensara nga iistorya ang imo mga eksperiyensya may angot sa mga prinsipyo kag mga promisa sa Doktrina kag mga Kasugtanan 30–34. Ano ang imo natun-an ukon nabatyagan parte sa imo Manluluwas kag sa Iya buluhaton samtang ginaserbisyohan mo Sia?

Kadamo sang mga paagi para ipakigbahin ang ebanghelyo.

Magpamatuod sa ginpromisa nga mga bugay. Kon hagaron mo ang kabataan nga ipangabuhi ang isa ka prinsipyo sang ebanghelyo, pwede mo ihambal ang mga promisa nga ginhatag sa mga tawo nga nagapangabuhi sina nga prinsipyo. Halimbawa, pwede ka magpamatuod sa mga bugay nga Iya ginahatag sa aton kon buksan naton ang aton mga baba kag ipakigbahin ang ebanghelyo.

Doktrina kag mga Kasugtanan 33:12–13

Pwede ko tukuron ang akon kabuhi sa ebanghelyo ni Jesucristo.

• Pwede mo dalhon ang imo kabataan sa gwa para makita ang pundasyon sang ila balay ukon bilding sang Simbahan kag ipalaragway ini sa ila. Ngaa kinahanglan sang isa ka bilding sang mabakod, solido nga pundasyon? Basaha upod sa ila ang Doktrina kag mga Kasugtanan 33:12–13, kag iistorya sa isa kag isa ang inyo mga nabatyagan kon ngaa gusto sang Ginuo nga tukuron naton ang aton mga kabuhi sa Iya ebanghelyo. Ngaa ang “bato” maayo nga tinaga para ilaragway ang ebanghelyo? Paano naton tukuron ang aton mga kabuhi sa bato sang ebanghelyo? (tan-awa man sa Mateo 7:24–29).

Para sa dugang nga mga ideya, tan-awa sa isyu sang Abyan nga magasin sini nga bulan.

Go into the Wilderness [Maglakat sa Kamingawan], ni Robert T. Barrett