Ibayaw ang Imo Tagipusuon kag Magkasadya
Natawo kita sa sining panahon para sa isa ka diosnon nga tinutuyo, ang pagtipon sang Israel.
Nga nagahambal kay Thomas B. Marsh, isa ka bag-ong hinaylo, ang Ginuo nagsiling sing may pagpaisog, “Ibayaw ang imo tagipusuon kag magkasadya, kay ang oras sang imo misyon nag-abot na” (Doktrina kag mga Kasugtanan 31:3).
Nagapati ako nga ining pangagda mahimo nga magserbe bilang inspirasyon para sa tanan nga miyembro sang Simbahan. Kay man, tanan kita nakabaton halin sa aton Amay nga Langitnon sang misyon sang pagtipon sang Israel sa magtimbang nga bahin sang belo.
“Inang pagtipon,” siling ni Pangulong Russell M. Nelson, “among pinakaimportante nga butang nga nagakatabo sa kalibutan sa karon. Wala sing makatupong sa kasangkad, wala sing makatupong sa importansya, wala sing makatupong sa katahum.”1
Sa pagkamatuod, may madamo nga maayo nga mga kawsa sa kalibutan. Imposible nga pangalanan ang tanan nga mga ina. Pero indi bala ninyo luyag nga magpartisipar sa sining dako nga kawsa nga inyo masarangan kag sa diin ang inyo kontribusyon magahimo sang importante nga kinalain? Ang pagtipon magahatag sang wala katapusan nga kinalain sa tanan. Ang katawhan sa bisan ano man nga pangidaron mahimo magpartisipar sa sining kawsa ano man ang ila mga sirkumstansya kag kon sa diin man sila nagapuyo. Wala na sang iban pa nga kawsa sa kalibutan nga mas nagalakip pa sangsa sini.
Nga nagahambal partikular sa mga lamharon, si Pangulong Nelson nagsiling: “Ang aton Amay nga Langitnon nagtigana sang madamo sang Iya pinakadungganon nga mga espiritu—ayhan … ang Iya pinakaali nga guban—para sa sining katapusan nga tion. Inang pinakadungganon nga mga espiritu—inang pinakaali nga guban , inang mga baganihan—amo kamo!”2
Huo, ginhanda kamo halin sang antes pa sining kabuhi kag natawo sa karon agud magpartisipar sa dako nga buluhaton sang pagtipon sang Israel sa magtimbang nga bahin sang belo sa sining ulihing mga adlaw (tan-awa sa Doktrina kag mga Kasugtanan 138:53–56).
Ngaa ining kawsa tuman ka importante? Tungod “ang bili sang mga kalag dako sa panulok sang Dios” (Doktrina kag mga Kasugtanan 18:10). Kag tungod “kon sin-o man ang magapati kay [Jesucristo], kag mabunyagan, ang amo man maluwas; kag … amo ini sila ang magapanubli sang ginharian sang Dios” (3 Nefi 11:33). Dugang pa, “ang tanan nga Iya [sang] Amay igahatag sa” ila nga nagabaton sang Iya mga ordinansa kag nagatipig sang ila mga kasugtanan (Doktrina kag mga Kasugtanan 84:38). Dugang pa, “pila lamang ang mamumugon” (Lucas 10:2).
Sa Ang Simbahan ni Jesucristo sang mga Santos sa Ulihing mga Adlaw lang naton makita ang gahum, ang awttoridad, kag ang pamaagi sa pagtanyag sinang bendisyon sa iban, buhi man ukon patay.
Subong sang ginsiling ni Pangulong Nelson: “Sa tagsa nga himuon ninyo ang bisan ano nga nagabulig sa bisan kay sin-o—sa bisan diin nga bahin sang kabuhi—nga magtikang padulong sa paghimo sang mga kasugtanan upod sa Dios kag pagbaton sang ila kinahanglanon nga mga ordinansa sang bunyag kag templo, nagabulig kamo sa pagtipon sang Israel. Amo lang sina kasimple.”3
Bisan pa nga may madamo nga pamaagi agud makabulig sa pagtipon, luyag ko maghambal parte sa isa sing partikular: ang pagserbisyo bilang isa ka misyonero. Para sa madamo sa inyo, ini magakahulugan sang pagka-misyonero nga nagatudlo. Para sa madamo nga iban, magakahulugan ini sang pagka-misyonero nga nagaserbisyo. Apang ang kalibutan nagatinguha sa pagtublag sang mga lamharon sa sining sagrado nga responsibilidad gamit ang kahadlok kag mga kawalay-pagsalig.
Ang iban pa nga mga pagtublag mahimo nga amo ang pag-eksperiyensya sang pandemya, pagbiya sang maayo nga trabaho, pag-untat sa pag-eskwela, ukon may ara sing naluyagan. Ang kada isa may ara sing iya kaugalingon nga mga hangkat. Ang kasubong sina nga mga pagtublag mahimo mag-abot sa amo man nga tion sa pagsugod sang pagserbisyo sa Ginuo, kag ang mga pagpili nga dawsa maathag sa ulihi masami nga indi mahapos sa sina nga tion.
Nakahibalo ako halin sa akon inagihan sang magamo nga pamensaron sang amo sina nga pamatan-on. Sang nagahanda ako sa paglakat sa akon misyon, pila ka makakilibot nga mga pwersa ang nagtilaw sa pagpaluya sa akon. Ang isa amo ang akon dentista. Sang marealisar niya nga ang akon appointment para nga mangin misyonero ako, gintinguhaan niya nga punggan ako nga magserbisyo. Wala gid ako nagpamensar nga ang akon dentista batok gale sa Simbahan.
Ang temporaryo ko nga pag-untat sa pag-eskwela nangin komplikado man. Sang nagpangabay ako sang duha-ka-tuig nga bakasyon (leave of absence) halin sa akon programa sa unibersidad, ginpahibalo ako nga indi ini pwede. Madulaan ako sing lugar sa unibersidad kon indi ako makabalik pagkatapos sang isa ka tuig. Sa Brazil, seryuso ini kaayo tungod ang nagaisahanon nga kinahanglanon para mabaton sa isa ka programa sa unibersidad amo ang isa ka tama kabudlay kag paindisanay nga eksaminasyon.
Pagkatapos sang liwatliwat nga pagpamilit, may pagpangalag-ag nga ginpahibalo ako nga pagkatapos nga mag-absent ako sing isa ka tuig, mahimo ako nga mag-aplay para sa isa ka eksepsion sa espesyal nga mga kabangdanan. Mahimo nga mapahanugotan ini ukon indi. Hinadlokan ako sang ideya nga magkuha liwat sang mabudlay nga test para mabaton pagkatapos sang duha ka tuig nga mahilayo sa akon pagtuon.
Nangin interesado man ako kaayo sa isa ka young woman. Pila sang akon mga kaabyanan ang may amo man nga interes. Ginpamensar ko sa akon kaugalingon, “Kon maglakat ako sa misyon, nagarisgo ako .”
Apang ang Ginuong Jesucristo amo ang akon dako nga inspirasyon nga indi magkahadlok sa palaabuton kon nagtinguha ako nga magserbisyo sa Iya sa bug-os ko nga tagipusuon.
May misyon man sia nga dapat tumanon. Sa iya kaugalingon nga mga pulong, Sia nagpaathag, “Kay nagkari ako gikan sa langit, indi sa paghimo sang akon kabubut-on kundi sang nagpadala sa akon” (Juan 6:38). Kag ang Iya bala misyon mahapos? Siempre indi. Ang iya pag-antos, nga importante nga bahin sang iya misyon, nagtuga sa Iya kaugalingon, “bisan pa nga Dios, nga pinakagamhanan sa tanan, nga magkurog tungod sa kasakit, kag [magwa] ang dugo halin sa tagsa ka buho-buho sang panit, kag [mag-antos] sa lawas pati espiritu—kag luyag kuntani [Niya] nga indi na pag-imnon pa ang mapait nga ilimnan, kag mag-isol—
“Apang, sa Amay ang himaya, kag nag-ambit [Sia] kag natapos ang [Iya] mga pagpanghanda para sa mga anak sang katawhan.” (Doktrina kag mga Kasugtanan 19:18–19).
Ang magserbe sa isa ka full-time nga misyon mahimo nga daw mabudlay sa aton. Ayhan, ginapangayo sini nga buy-an naton ang importante nga mga bagay sing makadali. Ang Ginuo pat-od nga nakahibalo sini, kag mangin yara Sia pirme sa pagbulig kag pagsuporta sa aton.
Sa pagkamatuod, sa ila mensahe sa mga misyonero sa Preach My Gospel, ang Unang Panguluhan nagapromisa, “Ang Ginuo magapadya kag magapakamaayo sa inyo sing bugana kon kamo mapinaubuson kag mainampuon nga magserbisyo sa Iya.”4 Matuod nga ang tanan nga kabataan sang Dios ginapakamaayo sa bisan paano, pero may ara sing kinalain sa tunga sing ginpakamaayo kag sang ginpakamaayo sing bugana sa pagserbisyo sa Iya.
Madumduman ninyo ang mga hangkat nga sa pensar ko akon gin-atubang antes sang akon misyon? Ang akon dentista? Nakakita ako sang iban. Ang akon unibersidad? Ginhatagan nila ako sang eksepsion. Nadumduman ninyo ang young woman? Ginpamana niya ang isa sa akon maayong kaabyanan.
Apang ang Dios matuodtuod nga nagpakamaayo sa akon sing bugana. Kag akon natun-an nga ang mga bugay sang Ginuo mahimo mag-abot sa pamaagi nga lain sa aton nga ginapaabot. Matuod gid, nga ang Iya mga hunahuna indi aton mga hunahuna (tan-awa sa Isaias 55:8–9).
Lakip sa madamo nga bugana nga mga pagpakamaayo nga Iya ginhatag sa akon sa serbisyo ko sa Iya bilang isa ka full-time nga misyonero amo ang mas dako nga pagtuo kay Jesucristo kag sa Iya Pagbayad-Sala kag mas mabaskog nga ihibalo kag testimonya sang Iya mga pinanundlo, agud nga indi ako madali nga mapalidpalid sang “tagsa ka hangin sang doktrina” (Mga Taga-Efeso 4:14). Nadula ang akon kahadlok sa pagtudlo. Nagdugang ang akon ikasarang sa positibo nga pag-atubang sang mga hangkat. Sa pagpanilag sa mga indibidwal kag mga pamilya nga akon nakilala ukon gintudloan bilang isa ka misyonero, akon natun-an nga ang pinanudlo sang Dios matuod sang Sia nagsiling nga ang sala wala nagadala sang matuodtuod nga kalipay kag ang pagtuman sang mga kasuguan sang Dios magabulig sa aton nga mag-uswag alangay sa temporal kag espirituhanon (tan-awa sa Mosias 2:41; Alma 41:10). Kag akon natun-an sa akon kaugalingon nga ang Dios isa ka Dios sang mga milagro (tan-awa sa Mormon 9).
Ining tanan nga mga butang nangin mga instrumento sa akon paghanda para sa hamtong nga kabuhi, lakip na ang posible nga pagpangasawa kag pagkaginikanan, pagserbisyo sa Simbahan, kag pagtrabaho kag pagpangabuhi sa komunidad.
Pagkatapos sang akon misyon, nagbenepisyo ako gikan sa akon nagbaskog nga kaisog sa pagpresentar sang akon kaugalingon bilang isa ka matutom nga sumulunod ni Jesucristo kag sang Iya Simbahan sa tanan nga mga sirkumstansya kag sa tanan nga tawo, bisan ang pagpaambit sang ebanghelyo sa isa ka matahom nga babayi nga akon nangin maligdong, maalam, masinadyahon kag pinalangga nga wala katapusan nga kaupod, ang nagapalipay sang akon kabuhi.
Matuod, ang Dios nagpakamaayo sa akon sing bugana, labaw sang sa akon ginhandom, subong nga Iya pagahimuon sa ila nga “mapinaubuson kag mapinangamuyuon nga nagaserbisyo sa Iya.” Walay katapusan ako nga mapinasalamaton sa Dios kag sa Iya kaayo.
Ang akon misyon lubos nga nag-impluwensya sang akon kabuhi. Akon natun-an nga takus sa panikasog ang magsalig sa Dios, ang magsalig sa Iya kaalam kag kaluoy kag sa Iya mga promisa. Kay man, Sia ang aton nga Amay, kag wala sing pagpangduhaduha, luyag Niya ang pinakamaayo para sa aton.
Mahal kong mga lamharon sa bug-os nga kalibutan, ginapalab-ot ko sa inyo ang amo man nga pangagda nga ginhatag sang aton propeta, nga si Pangulong Nelson sa tanan sa inyo “nga magpalista sa batalyon sang mga lamharon sang Ginuo agud magbulig tipon sang Israel.” Si President Nelson nagsiling:
“Wala sing mas dako pa nga kadangatan. Pat-od nga wala gid
“Ang ining pagtipon dapat nga mangin tanan para sa inyo. Ang ini amo ang misyon nga para sa sini ginpadala kamo sa duta.”5
Natawo kita sa sining panahon para sa isa ka diosnon nga tinutuyo, ang pagtipon sang Israel. Kon magserbisyo kita bilang full-time nga mga misyonero, mahimo nga pagahangkaton kita sa panalagsa, apang ang Dios Mismo amo ang aton himpit nga ehemplo, kag giya sa kasubong sina nga mga sirkumstansya. Nahangpan Niya kon ano ang mabudlay nga misyon. Paagi sa Iya bulig, mahimo naton ang tanan. Mangin yara Sia sa aton tupad (tan-awa sa Doktrina kag mga Kasugtanan 84:88), kag pagapakamaayohon Niya kita sing tuman kon mapainubuson kita nga magserbisyo sa Iya.
Tungod sa sining mga rason, wala ako nasorpresa nga ang Ginuo naghambal kay Thomas B. Marsh kag sa aton tanan, “Ibayaw ang imo tagipusuon kag magkasadya kay ang oras sang imo misyon nag-abot na.” Sa ngalan ni Jesucristo, amen.