10:0

Kita Ang Simbahan ni Jesucristo sang mga Santos sa Ulihing mga Adlaw

Ni Reyna I. Aburto

Ikaduha nga Manuglaygay sa Pangkabilogan nga Pangulohan sang Relief Society

Ang Simbahan labaw pa sangsa mga bilding kag istraktura sang pagtuluohan; ang Simbahan amo kita, ang mga miyembro, upod si Cristo sa una kag ang propeta bilang Iya manughambal.

Pagkatapos nga makabaton sang imbitasyon nga “dali kag tan-awa,”¹ nagtambong ako sa Ang Simbahan ni Jesucristo sang mga Santos sa Ulihing mga Adlaw sa una nga beses sa edad nga 26. Bag-o lang ako nagbulag sa una ko nga bana. May tatlo ako ka tuig nga anak nga lalaki Kag daw nagakaupos ako sa kakulba. Sang pagsulod ko sa bilding, napuno ako sang manami nga balatyagon sang makita ko ang pagtuo kag kalipay sang mga tawo nga nagapalibot sa akon. Isa matuod ka “dalangpan gikan sa unos.”² Tatlo ka semana ang nagligad, naghimo ako sang kasugtanan sa bunyag upod sa Amay nga Langitnon kag nagsugod sa akon pagpanglakaton bilang disipulo ni Cristo, bisan pa nga ang akon kabuhi indi perpekto sa tion sinang pagpanglakaton.

Para mabaton ko inang wala katapusan nga mga bugay, madamo nga pisikal kag espiritwal nga mga elemento ang dapat ara. Ang ebanghelyo ni Jesucristo ginpanumbalik na kag ginapangwali; inang simbahan ginpatindog kag ginamentinar; may istraktura sang pagtuluohan, halin sa propeta pakadto sa lokal nga mga lider; kag isa ka branch nga puno sang mga miyembro sa kasugtanan nga handa sa pagbaton sa akon kag sa akon anak samtang ginadala kami padulong sa Manluluwas, “[ginabusog] sang maayo nga pulong sang Dios,”³ kag ginahatagan sang mga oportunidad nga magserbisyo.⁴

Halin sang primero, tuyo sang Dios nga tipunon kag organisahon ang Iya mga anak⁵ “ang ipahanabo ang [aton] pagkawala’y kamatayon kag kabuhi nga wala’y katapusan.”⁶ Nga ginapanumdom inang katuyuan, ginsugo Niya kita nga magpatindog sang mga lugar nga masimbahan⁷ kon sa diin kita makabaton sang kaalam kag mga ordinansa sang kaluwasan kag pangkahitaasan; makahimo kag magtuman sang mga kasugtanan nga nagahigot sa aton kay Jesucristo;⁸ mahatagan sang “gahum sang pagkadiosnon”;⁹ kag magtililipon pirme para panumdumon si Jesus kag pabakuron ang kada isa sa Iya.¹⁰ Ang organisasyon sang Simbahan kag ang mga bilding sini gintigana para sa aton espirituhanon nga kaayuhan. “Ang Simbahan … amo ang balayan kon diin nagatukod kita sang mga pamilya nga wala katapusan.”¹¹

Samtang nagaistorya sa isa ka abyan nga nagaeksperiyensya sang kabudlayan, ginpamangkot ko sia kon paano sia nagakatibawas sa pinansyal. Nga nagahibi, nagsabat sia nga ginabuligan sia sang iya bishop gamit ang pondo sang fast-offering. Dugang niya, “Ambot kon diin kami puluton sang akon pamilya kon indi tungod sa Simbahan.” Sabat ko, “Ang Simbahan amo ang mga miyembro. Sila ang hugot sa buot kag malipayon nga nagahatag sang fast offering para makabulig sa mga nagakinahanglan sa aton. Nagabaton ka sang bunga sang ila pagtuo kag determinasyon nga sundon si Jesucristo.”

Akon mga isigka-disipulo kay Cristo, indi naton pagpakanubuon ang makahalawhaw nga buluhaton nga ginahimo sang Ginuo paagi sa aton, nga Iya Simbahan, sa likod sang aton mga kapaltahan. Kon kaisa kita ang nagahatag kag kon kaisa kita ang nagabaton, pero tanan kita isa ka pamilya kay Cristo. Ang Iya Simbahan amo ang istraktura nga Iya ginhatag para giyahan kag bugayan kita samtang nagasimba kita sa Iya kag nagaserbisyo sa kada isa.

May mga sister nga nagapangayo pasensya sa akon, kay abi nila indi sila aktibo nga mga miyembro sang Relief Society tungod nagaalagad sila sa Primary ukon Young Women. Ining mga sister amo ang pinakaaktibo nga mga miyembro sang Relief Society tungod ginabuligan nila ang aton bilidhon nga kabataan kag mga lamharon nga pabakuron ang ila pagtuo kay Jesucristo.

Ang Relief Society indi limitado sa kuwarto sa isa ka bilding, sa leksyon kon Domingo, sa kahiwatan, ukon pangulohan sa lokal ukon pangkabilogan nga lebel. Ang Relief Society amo ang mga babayi sang kasugtanan sa Simbahan; ini amo kita—ang tagsa sa aton kag tanan sa aton. Ini ang aton “pangkalibutanon nga komunidad sang kaluoy kag serbisyo.”¹² Bisan diin kita magkadto, bahin gid kita sang Relief Society samtang nagatinguha kita nga tumanon ang diosnon nga katuyuan sini, nga ang kababayin-an magatuman sang buluhaton sang Dios sing indibidwal amo man sing ululupod¹³ paagi sa paghatag sang kaumpawan: “kaumpawan sa kapigaduhon, kaumpawan sa balatian; kaumpawan sa pagpangduhaduha, kaumpawan sa kakulang sang ihibalo—kaumpawan sa tanan nga nagapugong … sang kalipay kag pag-uswag.”¹⁴

Ang pareho sini nga pagkalakip ara man sa mga elders quorum kag sa mga organisasyon sa Simbahan para sa tanan nga mga edad, lakip na ang aton kabataan kag mga lamharon. Ang Simbahan labaw pa sangsa mga bilding kag istraktura sang pagtuluohan; ang Simbahan amo kita, ang mga miyembro. Kita amo Ang Simbahan ni Jesucristo sang mga Santos sa Ulihing mga Adlaw, upod si Cristo sa una kag ang propeta bilang Iya manughambal. Ang Ginuo nagsiling:

“Tan-awa, ini ang akon doktrina—kon sin-o man ang maghinulsol kag magkari sa akon, ang amo man naisip sa akon simbahan. …

“Kag … kon sin-o man ang naisip sa akon simbahan, kag nagapabilin nga matutum sa akon simbahan tubtob sa katapusan, ipahamtang ko sia sa akon bato.”¹⁵

Mga kauturan, hunahunaon naton kon daw ano nga pribelihiyo nga miyembro kita sang Simbahan ni Jesucristo, sa diin sarang kita mag-isa sa aton pagtuo, mga tagipusuon, mga kusog, mga kaisipan, kag mga kamot para sa Iya sa paghikot sang Iya dalagko nga mga milagro. “Kay ang lawas [sang Simbahan ni Cristo] indi isa ka bahin kundi madamo.”¹⁶

Isa ka tin-edyer nga lalaki ang nagsiling sa iya nanay, “Sang gamay pa ko, kada hatag ko sang isa ka dolyar bilang ika-pulo, ginapamensar ko nga sa sinang isa ka dolyar ang bilog nga simbahan mapatindog. Indi bala daw kahalam-utan?”

Nga natandog, nagsabat sia, “Kanami sina! Nahunahuna mo man ang ila hitsura?”

“Huo!” siling niya. “Ka mga tahum sa ila, kag minilyon ini sila!”¹⁷

Pinalangga ko nga kaabyanan, mag-angkon kita sang pagtuo pareho sang bata kag magkalipay sa ihibalo nga bisan ang pinakagamay naton nga mga pagpaninguha may matuga nga dako nga kinalain sa ginharian sang Dios

Ang aton katuyuan sa Iya ginharian amo dapat ang dalhon ang kada isa kay Cristo. Sa mabasa naton sa balaan nga mga kasulatan, ang Manluluwas nagpalab-ot sining imbitasyon sa mga Nefinhon:

“May mga masakiton bala dira sa inyo? Dalha sila diri. May … kon ano man nga sari sang ginaantos? Dalha sila diri kag paayuhon ko sila, kay naluoy ako sa inyo; ang akon tagipusuon napuno sang kaawa.

“… Nakita ko nga igo ang inyo pagtuo agud paayuhon ko kamo.”¹⁸

Indi bala kita tanan may mga ginaantos nga sarang dalhon sa tiilan sang Manluluwas? Ang iban sa aton may pisikal nga mga kabudlayan, madamo pa gid ang nagapakigbato sa emosyonal nga problema, ang iban nabudlayan sa pagpakigsimpon sa iban nga tawo, kag tanan kita nagapangita sang kapahuwayan kon ang aton mga espiritu ginabudlayan. Kita tanan nagaantos sa lainlain nga paagi.

Mabasa naton nga “ang bug-os nga kadam-an, dulungan nga nagpalapit, upod ang ila masakiton kag … upod sila tanan nga may kon ano man nga sari sang ginaantos; kag ginpaayo Niya sila ang tagsa-tagsa nga gindala palapit sa iya.

“Kag sila tanan, alangay sila nga mga ginpaayo kag sila nga mga wala sing masakit, nagyaub sa iya tiilan, kag nagsimba sa iya.”¹⁹

Halin sa bata nga gamay nga nagabayad sang ika-pulo nga may pagtuo, pakadto sa solo nga iloy nga nagakinahanglan sang nagapabakod nga grasya sang Ginuo, pakadto sa tatay nga ginabudlayan sa paghatag sang kinahanglanon sang iya pamilya, pakadto sa aton nga katigulangan nga nagakinahanglan sang mga ordinansa sang kaluwasan kag pangkahitaasan, pakadto sa kada isa sa aton nga nagapabakod sang aton mga kasugtanan sa Dios tagsa ka semana, kinahanglan naton ang kada isa, kag sarang naton dalhon ang kada isa sa nagatubos nga pagpang-ayo sang Manluluwas.

Pinalangga kong mga kauturan, sundon naton ang imbitasyon ni Jesucristo nga dalhon naton ang aton mga kaugalingon kag ang aton mga ginaantos sa Iya. Kon magpalapit kita sa Iya kag dalhon ang aton mga pinalangga sa Iya, makita Niya ang aton pagtuo. Paayuhon Niya sila, kag paayuhon Niya kita.

Bilang “mga mahidaeton nga mga sumulunod ni Cristo,”²⁰ nagatinguha kita nga mangin “isa sing tagipusuon kag isa sing panghunahuna”²¹ kag mangin mapainubuson; masinulundon; malulo; mahapos palugpayan; puno sang pagpaumod kag pagkamainantuson; nga may pagpugong sa kaugalingon sa tanan nga mga butang; maukod sa pagtuman sang mga kasuguan sang Dios sa tanan nga mga tinion; puno sang pagtuo, paglaum, kag putli nga pagmahal; kag bugana sa maayong binuhatan.²² Nagatinguha kita nga mangin pareho kay Jesucristo.

Nagapamatuod ako nga bilang Simbahan ni Cristo, kita ang paagi nga, suno sa gintudlo ni Pangulong, Russell M. Nelson, ang “aton Manluluwas kag Manunubos, nga si Jesucristo, makahikot sang pila sang Iya pinakadalagko nga mga buluhaton halin karon tubtob sa Iya pagbalik liwat.”²³

Ang Ginuo nagsiling:

“Tan-awa, padalion ko ang akon buluhaton sa iya sini panahon.

“Kag ginahatag ko sa inyo … ang kasugoan nga tiponon ninyo ang inyo mga kaugalingon, kag i-organisar ang inyo mga kaugalingon, kag ihanda ang inyo mga kaugalingon, kag pakabalaanon ang inyo mga kaugalingon; huo, tinloi ang inyo mga tagipusuon, kag hugasi ang inyo mga kamot kag inyo mga tiil sa akon atubang, agud mahimo ko kamo nga matinlo.”²⁴

Kabay nga aktuhan naton ining diosnon nga imbitasyon kag magtipon sing malipayon, mag-organisar, maghanda, kag pakabalaanon ang aton mga kaugalingon amo ang akon mapainubuson nga pangamuyo sa ngalan ni Jesucristo, amen.