13:27

Pagbag-o uyon sa Pagbuot sang Dios

Ni Elder Quentin L. Cook

Sang Korum sang Dose ka Apostoles

Ang aton personal nga pagbag-o nagalakip sang responsibilidad nga ipaambit ang ebanghelyo ni Jesucristo sa kalibutan.

Nagapasalamat ako sa gamhanan nga panawagan sang propeta nga si Pangulong Russell M. Nelson nga magserbisyo sa misyon kag sa makainspirar nga pangmisyonaryo nga mga mensahe nanday Pangulong M. Russell Ballard kag Elder Marcos A. Aidukaiti.

Isa ka pangmisyonaryo nga alatendihon sa Gran Britanya sang nagligad nga tuig ang natugot sa akon nga magpamalandong sa malahalon nga espirituhanon nga mga hitabo nga nangin basehan sang akon desisyon nga mag-alagad bilang misyonero sadto.¹ Sang 15 anyos ako, ang pinalangga ko nga magulang, si Joe, 20 anyos—ang edad nga sadto pwede na mag-alagad sa misyon. Sa Estados Unidos, tungod sang inaway sa Korea, diutay lang gid ang ginatugotan nga mag-alagad. Isa lang ang pwede tawgon halin sa kada ward kada tuig.² Nasorpresa kami sang ang amon bishop nagpangabay kay Joe nga tun-an ini nga posibilidad upod sa amon amay. Si Joe nagahanda sang mga aplikasyon para mag-eskwela sa pagkadoktor. Ang amon amay, nga indi aktibo sa Simbahan, naghimo sang pinansyal nga mga pagpanghanda agud buligan sia sa pag-eskwela kag indi pabor nga magmisyon si Joe. Si Tatay naghambal nga mas madamo nga kaayohan ang mahimo ni Joe kon mag-eskwela sia sa pagkadoktor. Nangin dako ini nga isyu sa amon pamilya.

Sa tumalagsahon nga paghambalanay namon sang akon maalam kag huwaran nga magulang, nagpamat-od kami nga ang iya desisyon kon bala maalagad sia sa misyon kag ipaiway anay ang iya pag-eskwela nagasandig sa tatlo ka pamangkot: (1) Si Jesucristo bala diosnon? (2) Ang Libro ni Mormon bala pulong sang Dios? kag (3) Si Joseph Smith bala amo ang Propeta sang Pagpanumbalik? Kon ang sabat sa sining mga pamangkot, huo, maathag nga makahimo si Joe sing mas dako nga kaayohan sa pagdala sang ebanghelyo ni Jesucristo sa kalibutan sangsa mangin doktor sing mas temprano.³

Sadto nga gab-i, nagpangamuyo ako sing hugot kag may matuodtuod nga tinutuyo. Ang Espiritu, sa indi manegar ka gamhanan nga paagi, nagpamatuod sa akon nga ang sabat sa tanan sining tatlo ka mga pamangkot, huo. Dako kaayo ang impluwensya sining hitabo sa akon. Narealisar ko nga ang tagsa ka desisyon nga himuon ko sa bilog ko nga kabuhi pagaimpluwensyahan sining mga kamatuoran. Nahibal-an ko man nga magaalagad ako sa misyon kon may oportunidad. Sa bilog-kabuhi nga pag-alagad kag espirituhanon nga mga eksperiyensya, nahangpan ko nga ang matuodtuod nga pagbag-o resulta sang hungod nga pagbaton sang pagbuot sang Dios kag sarang kita magiyahan sa aton mga buhat sang Balaan nga Espiritu.

May testimonya na ako sang pagkadios ni Jesucristo bilang Manluluwas sang kalibutan. Sina nga gab-i nakabaton ako sang espirituhanon nga testimonya parte sa Libro ni Mormon⁴ kag sa Propeta nga si Joseph Smith.

Si Joseph Smith Instrumento sa mga Kamot sang Ginuo

Ang inyo testimonya mapabakod kon sinsero ninyo nga nahibal-an sa inyo tagipusuon paagi sa inyo mga pangamuyo nga ang Propetang si Joseph Smith instrumento sa mga kamot sang Ginuo. Sang nagligad nga walo ka tuig, isa sang akon mga alatendihon sa Dose ka Apostoles amo ang pagrepaso kag pagbasa sang tanan nga talalupangdon nga papeles kag mga dokumento ni Joseph Smith kag ang panalawsaw nga nagresulta sa pagbantala sang mga libro nga Saints.⁵. Ang akon testimonya kag pagdayaw sa Propeta nga si Joseph Smith tuman nga nagbakod kag nagdugang pagkatapos nga mabasa ang makainspirar nga mga detalye sang iya kabuhi kag gintalana nga pag-alagad bilang propeta.

Ang paglubad ni Joseph sang Libro ni Mormon paagi sa hiyas kag gahum sang Dios sadsaran sang Pagpanumbalik.⁶ Ang Libro ni Mormon nagahisanto sa iya kaugalingon, matahum ang pagkasulat, kag nagaunod sang mga sabat sa dalagko nga mga pamangkot sang kabuhi. Isa pa ini ka katipan nahanungod kay Jesucristo. Nagasaksi ako nga si Joseph Smith matarong, puno sang pagtuo, kag instrumento sa mga kamot sang Ginuo sa pagpagwa sang Libro ni Mormon.

Ang mga rebelasyon kag mga hitabo nga narekord sa Doktrina kag mga Kasugtanan nagaaman sang mga yabi, ordinansa, kag kasugtanan nga kinahanglanon para sa kaluwasan kag pangkahitaasan. Ginapahamtang sang mga ini indi lang ang kinahanglanon nga mga butang agud itukod ang Simbahan kundi ginaaman man ang dako nga doktrina nga nagatugot sa aton nga mahangpan ang katuyuan sang kabuhi kag nagahatag sa aton sang wala katapusan nga panan-aw.

Isa sang madamo nga halimbawa sang papel ni Joseph Smith bilang propeta makita sa ika-76 nga seksyon sang Doktrina kag mga Kasugtanan. Maathag ini nga rekord sang palanan-awon sang langit, lakip na ang mga ginharian sang himaya, nga ang Propetang si Joseph kag si Sidney Rigdon ginpakamaayo nga makabaton sang Pebrero 16, 1832. Sa sina nga tion, ang dako nga kadam-an sang mga simbahan nagatudlo nga ang Pagbayad-Sala sang Manluluwas indi maghatag sang kaluwasan sa kalabanan sang mga tawo. Ginapatihan sadto nga pila lang ang maluwas kag ang dako nga kadam-an natalana sa impiyerno kag kalaglagan, lakip na ang wala untat nga pagpaantos “sing pinakamakahaladlok kag indi malaragway nga puwersa.”⁷

Ang rebelasyon nga naunod sa ika-76 nga seksyon nagahatag sang mahimayaon nga palanan-awon sang mga halintang sang himaya nga sa diin ang dako nga kadam-an sang mga anak sang Amay nga Langitnon nga isganan sa kabuhi antes sa duta ginapakamaayo sing dako kasunod sang katapusan nga paghukom.⁸ Ang palanan-awon sang tatlo ka halintang sang himaya, nga ang pinakanubo sini “labaw sa tanan nga paghangop”,⁹ direkta nga pagbali sa sadto mabaskog pero sayop nga doktrina nga ang kalabanan natalana sa impiyerno kag kalaglagan.

Kon marealisar mo nga si Joseph Smith 26 anyos lang, limitado ang edukasyon, kag diutay lang ukon wala sing nahibal-an sa dumaan nga mga hinambalan kon sa diin ang Biblia ginlubad, matuod sia nga instrumento sa mga kamot sang Ginuo. Sa ika-17 nga bersikulo sang seksyon 76, nainspirar sia sa paggamit sang tinaga nga di-matarong imbes sang pagkalaglag nga gingamit sa Ebanghelyo suno kay Juan.¹⁰

Interesante nga pagligad sang 45 ka tuig isa ka lider sang simbahan Anglikano kag iskolar sa klasiko nga pagtulun-an,¹¹ si Frederic W. Farrar, nga nagsulat sang The Life of Christ,¹² nagsiling nga ang kahulugan sang pagkalaglag sa King James Version sang Biblia resulta sang mga sayop sa paglubad halin sa Hebreo kag Griego pa-Ingles.¹³

Sa aton panahon, madamo ang nagasunod sa konsepto nga wala dapat sing silot ang sala. Ginasakdag nila ang wala-pili nga pagpatawad sa sala nga wala sing paghinulsol. Ang aton doktrina nga ginpahayag wala lang nagabali sang ideya nga kalabanan sang katawhan wala katapusan nga pagakondenahon sa impiyerno kag pagkalaglag kundi nagakilala man nga ang personal nga paghinulsol ginmando nga panguna nga kinahanglanon agud mag-ambit sang Pagbayad-Sala sang Manluluwas kag magpanubli sang selestiyal nga ginharian.¹⁴ Nagapamatuod ako nga si Joseph Smith matuod gid nga instrumento sa mga kamot sang Ginuo sa paghanabo sang Pagpanumbalik sang Iya ebanghelyo!

Tungod sang Pagpanumbalik sang ebanghelyo ni Jesucristo, nahangpan naton ang importansya sang pareho paghinulsol kag “mga binuhatan sang pagkamatarong.”¹⁵ Nahangpan naton ang dako kaayo nga importansya sang Pagbayad-Sala sang Manluluwas kag Iya nagaluwas nga mga ordinansa kag mga kasugtanan, lakip na inang ginahikot sa mga templo.

Ang “mga binuhatan sang pagkamatarong” nagahalin sa kag mga bunga sang pagbag-o. Ang matuodtuod nga pagbag-o ginadala sang hungod nga pagbaton kag pangako nga sundon ang pagbuot sang Dios.¹⁶ Ang madamo nga mga resulta kag bugay nga nagahalin sa pagbag-o amo ang matuod kag nagapabilin nga paghidaet kag personal nga pasalig sang lubos nga kalipay¹⁷—sa pihak sang mga kabudlayan sang ini nga kabuhi.

Ang pagbag-o padulong sa Manluluwas nagabag-o sang kinaugali nga tawo sa isa ka ginpakabalaan, nabun-ag-liwat, natinloan nga tawo—isa ka bag-o nga tinuga kay Cristo Jesus.¹⁸

Madamo ang Wala Nakahibalo sang Kamatuoran Bangod Wala Sila Nakahibalo kon Diin Ini Pangitaon

Ano ang mga obligasyon nga resulta sang pagbag-o? Sa Liberty Jail, ang Propeta nga si Joseph nagsiling nga madamo “ang wala lang nakahibalo sang kamatuoran bangod wala sila kahibalo kon diin ini pangitaon.”¹⁹

Sa introduksyon sang Ginuo sa Doktrina kag mga Kasugtanan, isa ka kabilogan nga pahayag sang katuyoan sang Ginuo para sa aton ang ginpahamtang. Nagsiling Sia, “Karon, Ako nga Ginuo, nga nakahibalo sang mga kalamidad nga magaabot sa mga pumuIuyo sang duta, nagtawag sa akon alagad nga si Joseph Smith, Jr., kag naghambal sa iya halin sa langit, kag naghatag sa iya sang mga kasugoan.” Dugang niya nga panudlo, “Agud nga ang kabug-osan sang akon ebanghelyo mabantala sang mga mahuyang kag sang mga simple tubtob sa mga punta sang kalibutan.”²⁰ Nagalakip ina sang full-time nga mga misyonero. Nagalakip ina sang tagsa sa aton. Dapat ini hatagan sing tuman nga pagtutok sang tanan nga nabugayan sang pagbag-o ayon sa pagbuot sang Dios. Ang Manluluwas maalwan nga nagaagda sa aton nga mangin Iya tingug kag Iya mga kamot.²¹ Ang pagpalangga sang Manluluwas mangin aton nagagiya nga kasanag. Ang Manluluwas nagtudlo sa Iya mga disipulo, “Busa, lakat kamo kag himuon nga gintutun-an ang tanan nga mga kapungsuran.”²² Kag kay Joseph Smith, nagsiling Sia, “Iwali ang akon ebanghelyo sa tagsa ka tawo nga wala nakabaton sini.”²³

Isa ka semana pagkatapos sang pagdedikar sang Templo sa Kirtland sang Abril 3, 1836, nga isa man ka Domingo sang Pagkabanhaw kag Pascua, ang Ginuo nagpakita sa isa ka halangdon nga palanan-awon kay Joseph kag Oliver Cowdery. Ginbaton sang Ginuo ang templo kag nagpahayag, “Ini ang pagsugod sang bugay nga igabubo sa mga ulo sang akon katawhan.”²⁴

Pagkatapos sining panan-awon, nagpakita si Moises “kag gintugyan … ang mga yabi sang pagtipon sang Israel halin sa apat ka bahin sang kalibutan, kag sang pagpanguna sing napulo ka tribo halin sa duta sa norte.”²⁵

Si Pangulong Russell M. Nelson, ang aton pinalangga nga propeta sa karon nga nagakapot sining amo man nga mga yabi, nagtudlo sang sini nga aga: “Kamo nga mga pamatan-on gintigana para sa sini nga panahon nga ang promisa sang pagtipon sang Israel nagatakabo. Sa inyo pag-alagad sa mga misyon, ginatungdan ninyo ang isa ka importante nga papel sa sining wala-tupong nga hitabo!”²⁶

Agud nga ang mando sang Manluluwas sa pagpaambit sang ebanghelyo mangin kabahin sang kon sin-o kita, kinahanglan naton nga magbag-o uyon sa pagbuot sang Dios; kinahanglan naton palanggaon ang aton isigkatawo, ipaambit ang ginpanumbalik nga ebanghelyo ni Jesucristo, kag agdahon ang iban nga magkari kag magtan-aw. Bilang mga miyembro sang Simbahan, ginapakamahal naton ang sabat sang Propetang si Joseph kay John Wentworth, ang editor sang Chicago Democrat, sang 1842. Nagpangayo sia sang impormasyon parte sa Simbahan. Si Joseph naghingapos sang iya sabat sa paggamit sang “Standard of Truth (Bandera sang Kamatuoran)” bilang introduksyon sa trese ka Mga Artikulo sang Pagtuo. Ang bandera (standard) nagapahayag, sa paagi nga malip-ot kag sa punto, kon ano ang dapat matigayon:

“Wala sing mahigko nga kamot nga makapugong sining buluhaton sa pagsulong; mahimo ang pagpanghingabot magsingkal, ang nagapanggamo nga guban magtingob, mga kasoldadohan magtipon, mga pagbutangbutang magpakalain, apang ang kamatuoran sang Dios magasulong sing mabaskog, dalayawon, kag hilway tubtob makasulod ini sa tagsa kag kontinente, makaabot sa tagsa ka lugar, makalabay sa tagsa ka pungsod, kag mabatian sang tagsa ka dulunggan tubtob nga ang mga katuyoan sang Dios matuman, kag ang Dakung Jehova magasiling ang buluhaton tapos na.”²⁷

Amo ini halin sadto ang panawagan sa mga henerasyon sang mga Santos sa Ulihing mga Adlaw, labi na gid sa mga misyonero. Sa espiritu sang “Bandera sang Kamatuoran” (Standard of Truth), nagapasalamat kita nga sa tunga sang kalibutanon nga pandemya, ang matutom nga mga misyonero nagpaambit sang ebanghelyo. Mga misyonero, palangga namon kamo! Ang Ginuo nagapangabay sa tagsa sa inyo nga ipaambit ang Iya ebanghelyo sa pulong kag sa buhat. Ang aton personal nga pagbag-o nagalakip sang responsibilidad nga ipaambit ang ebanghelyo ni Jesucristo sa kalibutan.

Ang mga bugay sa pagpaambit sang ebanghelyo nagalakip sang pagdugang sang aton pagbag-o uyon sa pagbuot sang Dios kag pagtugot sa Dios nga magpangibabaw sa aton mga kabuhi.²⁸ Ginabugayan naton ang iban nga makaeksperiyensya sing “dako nga pagbag-o” sang tagipusuon.”²⁹ May ara gid matuod sing wala katapusan nga kalipay sa pagbulig dala sang mga kalag kay Cristo.³⁰ Ang pagpangabudlay para sa pagbag-o sang kaugalingon kag sang iban amo ang dungganon nga buluhaton.³¹ Nagasaksi ako sini sa ngalan ni Jesucristo, amen.