12:15

Nabanhaw Sia nga may Pagpaayo sa Iya mga Pakpak

Sarang Kita nga Mangin Labaw Pa sa Mga Mandadaug

Ni Elder Patrick Kearon

Sang Pangulohan sang Kapitoan

Nalampuwasan ni Jesus ang mga pagpang-abuso sining kalibutan agud hatagan ka sing gahum indi lamang para mabuhi, kundi nga sa pila ka adlaw, paagi sa Iya, maglampuwas kag bisan magdaug.

Marin, ako si Elder Holland, kag ang mga bagay-bagay daw magalala pa.

Labaw Pa Kita sa Mga Mandadaug

Tanan kita naintriga sa mga istorya sang mga paglampuwas. Makabati kita sang mga istorya sang isganan nga mga biyahero kag amo man sang ordinaryo nga mga tawo nga nagpabilin nga buhi wala sapayan sang tanan nga kabudlayan kag ginapaabot nga mga resulta, kag indi naton mapunggan nga pamangkuton ang aton kaugalingon, “Mahimo ko ayhan ina?”

Madumduman ko dayon ang British explorer nga si Ernest Shackleton kag ang mga tripulante sang barko HMS Endurance, nga nalunod sa nagayelo nga tubig sang Antartika kag dayon nabara sila sa naligwin nga isla sing malapit sa duha ka tuig. Ang tumalagsahon nga pagkalider kag mabakod nga solusyon ni Shackleton nagluwas sang kabuhi sang iya mga tawo, wala sapayan sang tuman kabudlay nga mga sitwasyon.

Dayon madumduman ko man ang mga tripulante sang Apollo 13 nga nagbutyog pakadto sa kahawaan agud maghugpa sa bulan. Apang may natabo nga aksidente sang maglupok ang isa ka tangke sang oxygen, kag ang misyon gin-untat. Kay ginkulang sang oxygen, ang mga tripulante kag ang nagakontrol sang misyon maalamon nga nangita sang medyos kag gindala ang tatlo ka astronaut nga hilway pabalik sa duta.

Nagadayaw ako sa tumalagsahon nga mga paglampuwas sang mga indibidwal kag pamilya nga nabiktima sang giyera, napriso sa mga kampo, ukon sa ila nga nangin mga bakwit (refugees), nga mabaganihan kag maisog nga nagapasiga sang kalayo sang paglaum para sa kapareho nga mga nagaantos, nga nagahatag sang kaayohan sa tunga sang kapintas, kag bisan paano nagapadayon sa pagbulig sa iban nga magpadayon sa isa pa gid ka adlaw.

Malampuwasan bala nimo ukon nakon ang bisan isa sining tuman kabudlay nga mga sirkumstansya?

Ugaling, siguro may iban sa inyo, nga nagapamensar sang mga inagihan sang mga nakaluwas kag ang imo kalag nagasinggit nga ikaw nagakabuhi sang isa ka istorya sang paglampuwas sa karon bilang biktima sang pagpang-abuso, pagpatumbaya, pagpangdaugdaog, kapintas sa puluy-an, ukon bisan ano nga pag-antos kaangay sini. Ara ka sa tunga sang imo kaugalingon nga pagtinguha nga maglampuwas sa sitwasyon nga daw pareho gid kasubo sa paglugdang sang barko ukon isa ka maayo nga misyon nga gulpi lang nauntat. Masalbar ka ayhan; mabuhi ka ayhan sa imo kaugalingon nga istorya sang paglampuwas?

Ang sabat huo. Mahimo ka nga makaluwas. Ang matuod ginsalbar ka na; ginluwas ka na—sang Isa nga nag-antos sang kasakit nga imo mismo ginaantos kag nagbatas sang kasakit nga imo mismo ginabatas.¹ Nalampuwasan ni Jesus ang mga pagpang-abuso sining kalibutan² agud hatagan ka sing gahum indi lamang para mabuhi kundi nga sa pila ka adlaw, paagi sa Iya, makalampuwas kag bisan magdaug—agud lubos nga mangibabaw sa sakit, sa kapiutan, sa kasubo, kag makita ang mga ini nga nabuslan sang paghidaet.

Si Apostoles Pablo nagpamangkot:

“Sin-o bala ang magapahamulag sa aton sa gugma ni Cristo? ang kangitngitan bala, ukon kasakit, ukon paghingabot, ukon tiggulutom, ukon kahubo, ukon katalagman, ukon espada? …

“Wala, sa tanan sing mga butang labi pa kita sa mga mandadaug paagi sa Iya nga nagahigugma sa aton.”³

Ang mga Promisa sa Nakapakighisugot nga Israel

Madumduman ninyo nga si Pangulong Russell M. Nelson nagpagwa sang masunod nga pangagda sa pangkabilogan nga komperensya. Nagsiling Sia: “Samtang inyo ginatun-an ang inyo balaan nga mga kasulatan … , ginapaisog ko kamo nga maghimo sang listahan sang tanan nga ginpromisa sang Ginuo nga Iya pagahimuon para sa nakapakighisugot nga Israel. Sa banta ko makibot gid kamo!”⁴

Ari ang pila lamang sa gamhanan kag makaulumpaw nga mga promisa nga nakita sang amon pamilya. Hunahunaa ang Ginuo nga nagahambal sining mga tinaga sa inyo—sa inyo nga nagalampuwas—tungod ang mga ini para sa inyo:

Indi magkahadlok.⁵

Nahibal-an ko ang inyo mga kasubo, kag nagpanaog ako sa pagluwas sa inyo.⁶

Indi ako magbiya sa inyo.⁷

Ang akon ngalan ara sa inyo, kag ang akon mga anghel magabantay sa inyo;⁸

Magabuhat ako sang mga kalatingalahan sa tunga ninyo.⁹

Maglakat upod sa akon; magtuon kamo sa akon; hatagan ko kamo sang kapahuwayan.¹⁰

Ara ako sa tunga ninyo.¹¹

Akon kamo.¹²

Sa Mga Nagalampuwas

Nga ginapanumdom inang mga pagpasalig, luyag ko maghambal direkta sa mga nagabatyag nga daw wala na gid sing kasalbaran sa ila kaugalingon nga sitwasyon bangod sang trauma nga gintuga sang mapintas nga mga ginahimo sang iban. Kon amo ini ang inyo istorya sang paglampuwas, nagahibi kami upod sa inyo. Handum namon nga inyo malampuwasan ang kagumon sang pamensaron, kahuy-anan, kag kahadlok, kag luyag gid namon nga, paagi kay Jesucristo magdaug kamo.

Halin sa Biktima pakadto sa Nakalampuwas pakadto sa Mandadaug

Kon nakaeskperiyensya kamo sang bisan ano nga klase sang pagpang-abuso, kapintas, ukon pagpamigos, mahimo nga nagapamensar kamo nga ining mga hitabo bisan paano inyo sala kag bagay lang nga batunon ninyo ang kahuy-anan kag kabasulanan nga inyo nabatyagan. Mahimo nga nakapamensar na kamo nga:

Kuntani nalikawan ko ini.
Indi na ako palangga sang Dios.
Wala gid sing may magpalangga sa akon.
Naguba na ako kag indi na makaayo.
Ang Pagbayad-Sala sang Manluluwas magamit sa iban pero indi sa akon.

Ining sala nga mga pamensaron kag balatyagon mahimo nga nangin sablag sa pagpangayo sang bulig sa pamilya, kaabyanan, mga lider, ukon mga propesyunal, gani isahanon ka nga naghimakas. Kon nagpangayo ka sang bulig sa imo mga ginasaligan, mahimo nga nagapakig-away ka sa gihapon sa panghunahuna sang kahuya kag bisan sa pagkangil-ad sa kaugalingon. Ang epekto sining mga hitabo mahimo nga magapabilin sa madamo nga tinuig. Nagalaum ka nga sa pila ka adlaw mangin mas maayo na ang imo pamatyag, pero ina nga adlaw wala pa mag-abot.

Ang pagpang-abuso indi sadto, indi karon, kag indi gid mangin imo sala, bisan ano pa ang ginsiling sang nagpang-abuso ukon sang sin-o man. Kon nangin biktima ka sang kapintas, incest, ukon iban pa nga pagkabalingag, indi ikaw ang kinahanglan nga maghinulsol; indi ikaw ang responsable.

Indi menos ang imo katakos ukon menos ang balor ukon menos sa pagpalangga bilang tawo, ukon bilang anak nga babayi ukon anak nga lalaki sang Dios, tungod sang ginhimo sang iban sa imo.

Ang Dios wala gid sa karon, ukon bisan sang san-o, nagakabig sa imo bilang tawo nga dapat tamayon. Bisan ano ang natabo sa imo, wala Sia nahuya tungod sa imo, ukon napaslawan sa imo. Palangga ka Niya sa paagi nga wala mo pa madiskubrehi. Kag imo gid ini nga madiskubrehan samtang nagasalig ka sa Iya mga promisa kag samtang nagatuon ka nga magtuo sa Iya sang Sia nagasiling nga “bilidhon ka sa [Iya] panulukan.”¹³

Wala ikaw ginatakos paagi sa sining malaw-ay nga mga butang nga ginhimo sa imo. Ginalaragway ka, sa mahimayaon nga kamatuoran, paagi sa imo nagaluntad nga wala katapusan nga pagkatawo bilang anak nga lalaki ukon anak nga babayi sang Dios kag paagi sa perpekto, wala dulonan nga pagpalangga kag pangagda sang imo Tagtuga padulong sa bug-os kag kompleto nga pag-ayo.

Bisan nga daw ka imposible, imposible sa pamatyagan, ang pag-ayo pwede mag-abot paagi sa milagro sang nagatubos nga kusog sang Pagbayad-Sala ni Jesucristo nga nabanhaw nga “may pag-ayo sa iya mga pakpak.”¹⁴

Ang aton maluluy-on nga Manluluwas, madinalag-on batok sa kadulom kag pagpakahuya, may gahom sa pagtadlong sang tanan nga indi husto, isa ka nagahatag-kabuhi nga kamatuoran sa ila nga ginhimoan sang indi husto sang iban nga tawo.¹⁵

Palihog hibaloa nga ang Manluluwas nagpanaog sa idalom sang tanan nga mga butang, bisan pa sa sinang natabo sa imo. Bangod sina, nahibaluan gid Niya kon daw ano batyagon ang matuodtuod nga kahadlok kag kahuya kag kon ano ang balatyagon sang ginsikway kag nagakalisod.¹⁶ Halin sa kadadalman sang Iya pagbayad-sala nga pag-antos, nagahatag Sia sang paglaum nga sa pensar mo nadula na sa katubtoban, kusog nga sa pagpati mo indi mo maangkon, kag pagpaayo nga wala mo gid ginpensar nga posible.

Ang Mapang-abuso nga Pamatasan Maathag nga Ginapakamalaut sang Ginuo kag sang Iya mga Propeta

Wala sing lugar para sa bisan ano nga klase sang pagpang-abuso—pisikal, sekswal, emosyunal, ukon sa hambal—sa bisan diin nga panimalay, bisan diin nga pungsod, ukon bisan ano nga kultura. Wala sing isa ka asawa, bata ukon bana ang “nagakaangay” sakiton tungod sang iya ginhimo ukon ginhambal. Wala sing bisan sin-o, sa bisan ano nga pungsod ukon kultura, nga “nagapangayo” sang pagpang-atake ukon pagpamintas halin sa bisan sin-o nga ara sa awtoridad ukon sa tawo nga mas dako ukon mas makusog.

Ang mga nagapang-abuso kag nagatago sang ila mabug-at nga mga sala mahimo nga makalusot sa malip-ot nga tinion. Pero ang Ginuo nga makakita sang tanan, nakahibalo sang mga binuhatan kag mga panghunahuna kag mga tinutuyo sang tagipusuon.¹⁷ Sia ang Dios sang hustisya, kag ang Iya diosnon nga hustisya igapatuman.¹⁸

Milagroso, ang Ginuo Dios man sang kaluoy sa matuodtuod nga nagahinulsol. Ang mga abusador—lakip na ang mga sadto ginpang-abusohan man mismo—nga nagaako, nagasikway sang ila mga sala, kag nagahimo sang tanan nga ila masarangan para magbayad kag mag-uli, makakuha sang kapatawaran paagi sa milagro sang Pagbayad-Sala ni Cristo.

Para sa mga ginbutangbutangan, ang indi malaragway nga kabug-at sining mga akusasyon nagadala sang kaugalingon nga kasakit. Apang sila man ginapakamaayo sang kasakit nga ginhimo sang Manluluwas para sa ila kag sang ihibalo nga sa katapusan ang kamatuoran magapangibabaw.

Apang ang mga walay-paghinulsol nga mga manug-abuso magaatubang sa Ginuo sa pagsabat sang ila makangilil-ad nga mga krimen.

Ang Ginuo Mismo maathag kaayo sa Iya pagpakamalaut sang pagpang-abuso sa bisan ano nga klase: “Apang ang bisan sin-o nga nagapasandad sa isa sining mga magamay … , maayo pa sa iya nga bitayan sa liog sing dako nga bato sang galingan, kag itunod sia sa kadadalman sang dagat.”¹⁹

Konklusyon

Pinalangga kong kaabyanan nga napilasan sing dako ang balatyagon—kag sa sina nga bagay, ang sin-o man nga nagbatas sang mga inhustisya sang kabuhi—mahimo kamo makaangkon sang bag-o nga panugod. Sa Getsemani kag sa Kalbaryo, si Jesus “[nag-ako sa Iya Kaugalingon sang] … tanan nga kalisud kag pag-antos nga wala mo kag nakon maeksperiyensyahan,”²⁰ kag Iya ini tanan nalampuwasan! Nga nagauntay ang mga butkon, ang Manluluwas nagatanyag sang regalo sang pagpang-ayo sa imo. Upod ang kaisog, pasensya, kag matutom nga pagtutok sa Iya, indi magdugay mahimo mo mabaton sing bug-os ining regalo. Mahimo mo buy-an ang imo kasakit kag ibilin ini sa Iya tiilan.

Ang inyo malulo nga Manluluwas nagsiling, “Ang makawat wala nagakari, kundi sa pagpangawat, kag pagpamatay, kag pagpanglaglag: Ako nagkari agud nga may kabuhi [kamo], kag may kabugana [kamo] sini.”²¹ Isa ikaw sa nakalampuwas, mahimo ka mag-ayo, kag makasalig ka nga sa gahum kag grasya ni Jesucristo, makalampuwas ka kag magdaog.

Si Jesus eksperto sa mga daw imposible. Nagkari Sia diri agud himuon ang imposible nga posible, tuboson ang indi matubos, ayuhon ang indi mag-ayo, tadlungon ang indi matadlong, ipromisa ang indi mapromisa.²² Kag maayo gid Sia kaayo sa sini. Sa matuod, perpekto gid Sia sa sini. Sa ngalan ni Jesucristo, ang aton Manugbulong, amen.

Para sa dugang nga impormasyon kag kagamitan, tan-awa sa “Abuse” sa Life Help section sang ChurchofJesusChrist.org kag sa Gospel Library app.