Pauna nga Mensahe
Ginadayaw naton ang mga anak nga babayi sang Dios sa sining espesyal nga sesyon paagi sa pagtutok sa ila mga ginakabalak-an kag sang ila mga organisasyon.
Sa pagsugod naton sining pinasahi nga sesyon sang kababayin-an sa pangkabilogan nga komperensya, malipayon ako nga maghatag sining pauna nga mensahe halin sa Unang Pangulohan.
Ang aton Sabado nga mga sesyon nahibal-an na nga may lainlain nga katuyuan kag lainlain nga tumalambong. Sini nga gab-i dugangan naton inang kasaysayan sa pagsugod naton sang bag-o nga katuyuan kag proseso para sa kitaon na nga palaabuton. Ang ebanghelyo ni Jesucristo wala nagabag-o. Ang doktrina sang ebanghelyo wala nagabag-o. Ang aton personal nga mga kasugtanan wala nagabag-o. Pero sa mga tinuig, ang mga miting nga ginahiwat naton para ipalab-ot ang aton mga mensahe nagabag-o kag posible nga padayon nga magbag-o sa masunod nga mga tinuig.
Sa karon, ining Sabado sang gab-i nga miting isa ka sesyon sang pangkabilogan nga komperensya, indi sesyon sang bisan ano nga organisasyon. Pareho sang tanan nga sesyon sang pangkabilogan nga komperensya, ang pagplano, mga manughambal, kag ang musika ginapili sang Unang Pangulohan.
Ginpangabay namon si Pangulong Jean B. Bingham, pangulo sang Relief Society, nga magpamuno sining sesyon. Ang palaabuton nga mga Sabado sang gab-i nga sesyon mahimo nga pamunoan sang isa sa Pangkabilogan nga Opisyales sang Simbahan, pareho sang mga miyembro sang pangulohan sang Relief Society, Young Women, kag Primary, nga ginpili sang Unang Pangulohan.
Sini nga gab-i ining Sabado sang gab-i nga sesyon sang pangkabilogan nga komperensya magatutok sa mga ginakabalak-an sang mga babayi nga Santos sa Ulihing mga Adlaw. Magalakip ini sang doktrina sang Ang Simbahan ni Jesucristo sang mga Santos sa Ulihing mga Adlaw, mga polisa sang Simbahan nga nagatumod gid sa kababayin-an, kag ang pangkabilogan nga mga responsibilidad kag trabaho sang mga organisasyon nga nagalakip sang kababayin-an kag kabataan nga babayi sang Simbahan. Bisan hungod nga ginabrodkast sa bilog-kalibutan nga tumalambong pareho sa tanan nga mga sesyon sang pangkabilogan nga komperensya, ang mga gin-imbitar nga matambong sa Conference Center sa sining sesyon amo ang kababayin-an kag mga dalagita nga nagaedad 12 pataas. Ginlakip man namon ang pila ka mga lider sang priesthood nga magpanguna sa nagatambong nga mga organisasyon.
Ang gusto naton sugdan diri nasandig sa mga ikasarang sa komunikasyon nga mahimo gamiton sang bug-os-kalibutan nga liderato kag mga miyembro sang bug-os-kalibutan nga Simbahan sang Ginuo. Ang doktrina sang ebanghelyo ni Jesucristo para sa tanan, gani amo ina ang aton mayor nga motibo kag malab-utan sang pagpahibalo. Ginadayaw naton ang mga anak nga babayi sang Dios sa sining espesyal nga sesyon paagi sa pagtutok sa ila mga ginakabalak-an kag sa sinang iya sang ila mga organisasyon.
Nagapasalamat kami nga ang teknolohiya sa pagbrodkast sa karon nagahatag sa aton mga lider sa Simbahan sang ikasarang nga maghiwat sang detalyado nga paghanas paagi sa paghambal sa partikular nga mga tumalambong. Ginakalipay man naton nga ang mga oportunidad sa pagbiyahe sa karon nagadugang na. Ginapatigayon sini nga makapadala kita sang mga lider sang Simbahan sa paghiwat sang regular nga paghanas nga nagaatubangay.
Ini ang buluhaton sang Ginuong Jesucristo. Kita ang Iya mga alagad, nga ginagiyahan sang Iya Espiritu nga Balaan. Ginapangayo namon ang mga bugay sang aton Ginuo sa mga lider sining mga organisasyon kag sa matinuohon nga mga babayi kag mga lamharon nga babayi nga nagaserbisyo sa sining mga organisasyon kag sa ila indibidwal nga mga kabuhi. Sa ngalan ni Jesucristo, amen.