14:9

Ang Imo Diosnon nga Kinaugali kag Walay Katapusan nga Kadangatan

Ni Elder Dale G. Renlund

Sang Korum sang Dose ka Apostoles

Ginaagda ko kamo nga ituon ang inyo kabuhi kay Jesucristo kag panumdumon ang panguna nga mga kamatuoran sa tema sang Young Women.

Pinalangga nga mga sisters, salamat sa inyo pagkari diri. Dungog ko ang magpartisipar sa sining sesyon sang kababayin-an sang pangkabilogan nga komperensya. Sing makapila nakahigayon ako nga magtambong sa mga klase sang Young Women. Apang isugid ko sa inyo ang hilmunon—Indi ako hubin, kag indi ako babayi! Apang natun-an ko, nga medyo nagahaganhagan ang akon pagkawala sa lugar kon masaulo ko ang tema sang Young Women upod sa mga young women. Ang madalom nga doktrina nga gintudlo sa tema sang Young Women¹ importante para sa mga young women, apang madapat ini sa tanan, lakip na sa aton nga indi mga young women.

Ang tema sang Young Women nagaumpisa, “Pinalangga ako nga anak nga babayi sang Langitnon nga mga Ginikanan, nga may diosnon nga kinaiya kag wala katapusan nga kapalaran.”² Ining pinamulong nagaunod sang apat ka importante nga kamatuoran. Una, pinalangga kamo nga anak nga babayi. Wala kamo sing may himuon—ukon indi himuon—nga makabag-o sina. Palangga kamo sang Dios tungod Iya kamo espiritu nga anak nga babayi. Kon kis-a mahimo nga indi naton mabatyagan ang Iya pagpalangga, pero ara lang ina dira pirme. Ang pagpalangga sang Dios himpit.³ Ang aton ikasarang nga mabatyagan inang pagpalangga, indi.

Ang Espiritu may importante kaayo nga bahin sa pagpahayag sang pagpalangga sang Dios sa aton.⁴ Apang, ang impluwensya sang Balaan nga Espiritu mahimo nga “mahinago sa mga mabaskog nga emosyon, kasubong sang kaakig, kainit, … [ukon] kahadlok, … pareho sa pagtinguha nga panaboran ang kanamit sang ubas samtang nagakaon sang katumbal nga paitan. … [Ang isa ka sabor] lubos nga nagapangibabaw sa isa.”⁵ Sa amo man, ang mga pamatasan nga nagapalayo sa aton sa Balaan nga Espiritu, lakip na ang sala,⁶ nagapabudlay nga mahangpan ang pagpalangga sang Dios para sa aton.

Sing kaanggid, ang aton igbalatyag sa pagpalangga sang Dios mahimo nga magpigaw tungod sang mga makahalangkat nga mga sirkumstansya kag pisikal ukon pang-kaisipan nga balatian, kalakip sang iban pa nga mga butang. Sa tanan sining mga sitwasyon, ang laygay sang mga sinaligan nga mga lideres ukon mga propesyunal masami nga makabulig. Pwede naton tinguhaan nga mapauswag ang aton pagkasensitibo sa pagpalangga sang Dios paagi sa pagpamangkot sang aton mga kaugalingon, “Dalayon bala ang akon pagpalangga sa Dios ukon ginapalangga ko lang bala Sia kon maayo ang akon mga adlaw, pero indi masyado kon indi maayo ang akon mga adlaw?”

Ang ika-duha nga kamatuoran amo nga may langitnon kita nga mga ginikanan, isa ka amay kag isa ka iloy.⁷ Ang doktrina parte sa isa ka Iloy nga Langitnon nagaabot paagi sa rebelasyon kag isa ka pinasahi nga pagtuluohan sa mga Santos-sa-Ulihing mga Adlaw. Si Pangulong Dallin H. Oaks nagpaathag sang importansya sining kamaturoan: “Ang aton teolohiya nagaumpisa sa aton langitnon nga mga ginikanan. Ang aton pinakamataas nga handum amo ang mangin pareho sa ila.”⁸

Diutay lang gid ang ginpahayag parte sa Iloy sa Langit, apang ang aton nahibal-an ginpalip-ot sa isa ka topiko sang ebanghelyo nga makita sa aton application nga Librarya sang Ebanghelyo.⁹ Kon mabasa na ninyo kon ano ang ara dira, mahibal-an ninyo ang tanan nga akon nahibal-an parte sa sina nga topiko. Luyag ko kuntani nga makahibalo sing dugang pa. Kamo man siguro may mga pamangkot kag luyag nga makaangkon sing dugang nga mga sabat. Ang pagpangita sing dugang nga paghangop importante nga bahin sang aton espirituhanon nga pag-uswag, pero palihog maghalong. Ang pagpangatarungan indi makabulos sa rebelasyon.

Ang haumhaom indi magdala sang mas dako nga espirituhanon nga ihibalo, kundi magaresulta sa pagpatalang ukon pagliso sang aton tutok halin sa kon ano ang napahayag na.¹⁰ Halimbawa, ang Manluluwas nagtudlo sa Iya mga sumulunod, “Gani kinahanglan gid kamo nga magpangamuyo sing dalayon sa Amay sa akon ngalan.”¹¹ Ginasunod naton ining sulundan kag ginapatuhoy ang aton pagsimba sa aton Amay nga Langitnon sa ngalan ni Jesucristo kag wala nagapangamuyo sa Iloy nga Langitnon.¹²

Sumugod sang ang Dios nagpili sang mga propeta, ginhatagan sila sing awtoridad sa paghambal tal-os Niya. Apang wala sila nagahambal sang mga doktrina nga ginhimo “sa [ila] kaugalingon nga hunahuna”¹³ ukon nagatudlo sang wala ginpahayag. Binagbinaga ang mga pulong sang propeta nga si Balaam sa Daan nga Katipan, nga ginpahamhaman agud pakamalauton ang mga Israelnon pabor sang Moab. Si Balaam nagsiling, “Bisan ihatag sa akon [sang hari sang Moab] ang iya balay nga puno sang pilak kag bulawan, indi ako makapalabaw sa pulong sang akon Ginuo nga Dios, sa paghimo sing kubos ukon kapin.”¹⁴ Ang mga propeta sa ulihing mga adlaw may kaangay nga mga pagdumili. Ang magpamilit sang rebelasyon halin sa Dios pareho nga arogante kag indi mabungahon. Sa baylo, nagahulat kita sa Ginuo kag sa Iya oras nga ipahayag ang Iya mga kamatuoran sa pamaagi nga Iya ginpahamtang.¹⁵

Ang ikatatlo nga kamatuoran sa pangbukas nga parapo sa tema sang Young Women amo nga may ara kita “isa ka diosnon nga kinaiya.” Importante ini sa aton nga pagkatawo. Espirituhanon naton ini nga “nakuha,” napanubli sa aton langitnon nga mga ginikanan,¹⁶ kag wala nagapangayo sang pagpaninguha sa aton bahin. Ini ang pinakaimportante nga pagkilala sa aton, wala sapayan kon paano naton ginapili nga ipakilala ang aton mga kaugalingon. Ang paghangop sining dako nga kamatuoran importante para sa tanan apang ilabi na gid sa mga indibidwal nga sa kasaysayan nalakip sa mga kubos, ginapigos, ukon ginadaugdaog. Panumduma nga ang inyo pinakaimportane nga pagkatawo nagaangot sa inyo diosnon nga kinaiya bilang anak sang Dios.

Ang ikaapat nga kamatuoran amo nga may ara kita sang “wala katapusan nga kapalaran.” Inang kapalaran indi pag-ipamilit sa aton. Pagkatapos sang kamatayon, pagabatonon naton kon ano ang nagakabagay para sa aton kag “magpangalipay [lang] sinang handa [naton] batonon.”¹⁷ Ang katumanan sang aton wala katapusan nga kapalaran nagadepende sa aton mga pagpili. Nagakinahanglan ini sang paghimo kag pagtuman sang sagrado nga mga kasugtanan. Ining dalan sang kasugtanan amo ang alagyan nga magkari kita kay Cristo kag nabase sa bug-os nga kamatuoran kag wala katapusan, wala nagabag-o nga layi. Indi kita makahimo sang aton kaugalingon nga dalan kag magpaabot sang ginpromisa sang Dios nga mga kadangatan. Ang magpaabot sang Iya mga bugay samtang wala nagasunod sa wala katapusan nga mga layi kon sa diin ang mga ini napasad¹⁸ sayop, pareho sang pagpamensar nga mahimo naton tandogon ang mainit nga kalan kag “mamat-od” nga indi mapaso.

Siguro nakahibalo na kamo nga nagapamulong ako sang-una sang mga pasyente nga may balatian sa tagipusuon. Ang ila pinakaayo nga resulta naangkon sa pagsunod sang mga plano sa pagbulong nga napamatud-an na, base-sa-ebidensya [kag eksperiyensya]. Bisan pa nakahibalo sini, ang iban nga mga pasyente nagtilaw sa pagpili sang lain nga plano sang pagbulong. Hambal nila, “Indi ako luyag nga mag-inom sang tama kadamo nga bulong” ukon “Indi ako luyag sang tama kadamo nga dugang nga mga pag-eksamen.” Siyempre, ang mga pasyente libre nga maghimo sang ila kaugalingon nga mga desisyon, apang kon magsipak sila sa pinakamaayo nga mga plano sang pagbulong, ang ila mga resulta indi mangin maayo. Ang mga pasyente nga may balatian sa tagipusuon indi pwede magpili sang pigaw nga paagi kag dayon basulon ang ila doktor sa pigaw nga mga kadangatan.

Matuod man ini sa aton. Ang alagyan nga ginhatag sang Langitnon nga Amay nagadala sa pinakamaayo nga mga kadangatan sa wala katapusan. Hilway kita nga magpili, apang indi kita makapili sang mga konsikwensya sa indi pagsunod sa ginpahayag nga alagyan.¹⁹ Ang Ginuo nagsiling, “Inang nagalapas sang layi, kag wala nagatuman sang layi kundi nagatinguha nga mangin layi sa iya sini kaugalingon, … indi matinloan sang layi, ni sang kaluoy, hustisya, ukon paghukom.”²⁰ Indi kita pwede magsipak sa dalanon sang Amay nga Langitnon kag dayon basulon Sia sang pigaw nga mga kadangatan.

Ang ikaduha nga parapo sa tema sang Young Women mabasa: “Bilang isa ka disipulo ni Jesucristo, nagatinguha ako nga mangin pareho sa Iya. Nagahandum ako kag nagaakto sa personal nga rebelasyon kag nagaalagad sa iban sa Iya balaan nga ngalan.” Mahimo kita magpalambo sang panaksihon kay Jesucristo paagi sa pag-akto sa pagtuo.²¹ Mahimo naton angkonon ang espirituhanon nga bugay “nga makahibalo nga si Jesucristo ang Anak sang Dios, kag ginlansang sia para sa mga sala sang kalibutan.” Ukon mahimo naton batonon ang bugay agud magpati sa mga pulong sang mga nakahibalo,²² tubtob mahibaloan naton sa aton mga kaugalingon. Sarang naton sundon ang pinanudlo sang Manluluwas kag magbulig sa iban sa pagpalapit sa Iya. Sa sini nga paagi, nagaupod kita sa Iya sa Iya buluhaton.²³

Ang tema sang Young Women nagapadayon, “Magatindog ako bilang saksi sang Dios sa tanan nga oras kag sa tanan nga butang kag sa tanan nga lugar.” Ang tanan nga miyembro sang Simbahan kinahanglanon bilang mga saksi sang Dios,²⁴ bisan pa nga ang mga Apostoles kag Sitenta ginsugo nga mangin espesyal nga mga saksi sa ngalan ni Cristo.²⁵ Hunahunaa ang hampang nga soccer sa diin ang goalie amo lamang ang nagaprotekta sang goal. Kon wala sing bulig halin sa iban nga mga miyembro sang team, ang goalie indi makadepense sing maayo sa goal kag ang team pirme lang mapierde. Amo man, ang kada isa kinahanglanon sa team sang Ginuo.²⁶

Ang katapusan nga parapo sa tema sang Young Women nagaumpisa, “Samtang ginatinguhaan ko nga mangin bagay sa pangkahitaasan, pakamahalon ko ang regalo sang paghinulsol kag magtinguha sa pag-uswag kada adlaw.” Tungod sang nagatubos nga pagsakripisyo sang Manluluwas, sarang kita maghinulsol, manuto sa aton mga sala, kag indi pagpakamalauton tungod sang mga ini. Si Pangulong Russell M. Nelson nagtudlo: “Tuman kadamo sang tawo nga nagakabig sang paghinulsol nga isa ka silot. … Apang ini nga pamatyagan nga ginasilotan gintuga ni Satanas. Ginatinguhaan niya nga punggan kita sa pagtulok kay Jesucristo, nga nagatindog nga bukas ang mga butkon, nagalaum kag handa mag-ayo, magpatawad, magtinlo, magpabakod, magpaputli, kag magpakabalaan sa aton.”²⁷

Kon sinsero kita nga nagahinulsol, wala sing espirituhanon nga pinalian ang magapabilin, wala sapayan kon ano man ang aton nahimo, kon ano yadto ka seryoso, ukon bisan pila ka beses naton yadto ginsulit.²⁸ Kon daw ano kasunson sang aton paghinulsol kag hugot nga pagpangayo sang kapatawaran, sarang kita nga mapatawad.²⁹ Kanami kaayo nga bugay halin sa aton Manluluwas nga si Jesucristo!³⁰ Ang Balaan nga Espiritu makapasalig sa aton nga ginpatawad na kita. Kon aton mabatyagan ang kalipay kag paghidaet,³¹ ang kabasolanan madula sing lubos,³² kag wala na kita ginapaantos sang aton sala.³³

Bisan pa pagkatapos sang hugot nga paghinulsol, mahimo kita masandad. Ang pagkasandad wala nagakahulugan nga kulang ang paghinulsol kundi mahimo nga tungod lang sa kahuyang sang tawo. Daw ano ka makaulumpaw ang mahibal-an nga “lain ang [pagtan-aw] sang Ginuo sa mga kahuyang sangsa rebelyon.” Indi kita dapat magpangduhaduha sa ikasarang sang Manluluwas nga buligan kita sa aton mga kahuyang tungod “kon ang Ginuo nagahambal parte sa mga kahuyang, masami ini nga may upod nga kaluoy.”³⁴

Ang tema sang Young Women nagahingapos, “Nga may pagtuo, pabakuron ko ang akon puluy-an kag panimalay, maghimo kag magtuman sang sagrado nga mga kasugtanan, kag magbaton sang mga ordinansa kag mga bugay sang balaan nga templo.” Ang pagpabakod sang puluy-an kag panimalay mahimo nga nagakahulugan sang paghimo sang una nga kaw-id sa kadena sang pagkatutom, nga nagapadayon sang palanublion sang pagtuo, ukon nagapanumbalik sini.³⁵ Walay sapayan, ang kabakod nagahalin sa pagtuo kay Jesucristo kag paagi sa paghimo sang sagrado nga mga kasugtanan.

Sa templo, aton matun-an kon sin-o kita kag ko diin kita naghalin. Ang Romano nga mangin-alamon nga si Cicero nagsiling, “Ang pagkawalay hinalung-ong sang kon ano ang natabo antes ka matawo amo ang pagpabilin pirme nga kasubong sang isa ka bata.”³⁶ Sia siyempre, nagatumod sa sekular nga kasaysayan, pero ang iya maalam nga obserbasyon sarang mapasangkad. Nagapangabuhi kita sa gihapon bilang mga kabataan kon wala kita makahibalo sang wala katapusan nga panan-aw nga maangkon sa mga templo. Didto nagatubo kita sa Ginuo, “nagabaton sang kabug-osan sang Balaan nga Espiritu,”³⁷ kag mangin lubos nga dedikado nga mga disipulo sang Manluluwas.³⁸ Kon tumanon naton ang aton mga kasugtanan, mabaton naton ang gahum sang Dios sa aton mga kabuhi.³⁹

Ginaagda ko kamo nga ituon ang inyo kabuhi kay Jesucristo kag panumdumon ang panguna nga mga kamatuoran sa tema sang Young Women. Kon handa kamo, ang Balaan nga Espiritu magagiya sa inyo. Luyag sang aton Amay nga Langitnon nga kamo mangin manunubli Niya kag mabaton ang tanan nga ara sa Iya.⁴⁰ Wala na Sia sing matanyag sa inyo nga labaw pa. Wala na Sia sing mapromisa sa inyo nga labaw pa. Palangga Niya kamo sing labaw pa sa inyo nahibal-an kay luyag Niya nga mangin malipayon kamo sa sining kabuhi kag sa kabuhi nga magaabot. Sa ngalan ni Jesucristo, amen.