11:29

Mga Leksyon sa Bubon

Ni Susan H. Porter

Unang Manuglaygay sa Pangkabilogan nga Pangulohan sang Primary

Makaliso kita sa Manluluwas para sa kusog kag pagpang-ayo nga magatugot sa aton nga himuon ang tanan nga ginpadala kita diri sa paghimo.

Daw ano nga kalipay nga magtipon upod sa kada isa sa inyo sa sining pangbabayi nga sesyon sang pangkabilogan nga komperensya!

Nagdako ako sa weste nga New York kag nagasimba sa gamay nga branch sang Simbahan mga 20 ka milya (32 km) halin sa amon balay. Samtang nagapungko ako sa klase sa Sunday School sa idalom nga panalgan sang amon daan, ginrentahan nga kapilya upod sa akon abyan nga si Patti Jo, wala ko gid mahunahuna nga mangin bahin ako sang pangkalibutanon nga pag-ululutod sang minilyon ka kababayin-an.

Lima ka tuig ang nagligad ang akon bana, si Bruce, nagmasakit sing malubha samtang nagaalagad kami upod sa debotado nga mga Santos sang Europe East Area. Nagpauli kami, kag napatay sia mga pila lang ka semana pagkatapos sina. Gulpi nga nabag-o ang akon kabuhi. Nagapangalisod ako kag nagapalangluya kag nabutang sa alang-alang. Nagpakitluoy ako sa Ginuo nga giyahan Niya ang akon dalanon: “Ano ang luyag Mo nga himuon ko?”

Pagkaligad sang pila ka semana, ginatan-aw ko ang mga sulat sa akon sang matalupangdan ko ang isa ka gamay nga litrato sa katalogo. Sang ginhimutaran ko, nakita ko nga larawan ini sang babayi nga Samariahanon upod si Jesus sa may bubon. Sa sina nga tion naghambal ang Espiritu sing klaro sa akon: “Ina ang dapat mo nga himuon.” Ang mapinalanggaon nga Amay nga Langitnon nagaagda sa akon nga magpalapit sa Manluluwas kag magtuon.

Gusto ko ipaambit sa inyo ang tatlo ka leksyon nga ginatun-an ko samtang padayon ako nga nagainom halin sa Iya bubon sang “tubig nga buhi.”¹

Una: Ang Aton mga Sirkumstansya sang Nagligad kag sa Karon Wala Nagadikta sang Aton Palaabuton

Mga sister, nakahibalo ako nga madamo sa inyo ang nakabatyag sang pareho sa akon, daw indi sigurado kon paano atubangon ang mabudlay nga mga hangkat kag kapaslawan—kapaslawan tungod ang direksyon sang inyo kabuhi indi suno sa inyo ginalauman, ginapangamuyo, kag ginaplano.

Bisan ano pa ang aton mga sirkumstansya, ang aton mga kabuhi sagrado kag may kahulugan kag katuyuan. Ang kada isa sa aton pinalangga nga anak nga babayi sang Dios, natawo nga may pagkadiosnon sa aton mga kalag.

Ang aton Manluluwas, nga si Jesucristo, paagi sa Iya nagatubos nga sakripisyo, naghimo nga posible nga matinluan kag mag-ayo kita, nga ginapatigayon nga matuman naton ang aton katuyuan sa duta wala sapayan sang mga desisyon sang mga miyembro sang pamilya, sang aton estado sa kasal, pisikal ukon mental nga ikaayo, ukon iban pa nga sitwasyon.

Pamensara ang babayi sa bubon. Daw ano ayhan ang iya kabuhi? Nahibal-an ni Jesus nga lima na ang iya nangin bana kag sa sina nga tion indi kasado sa lalaki nga ginapuyo niya. Pero, wala sapayan sa mga kabudlayan sang iya kabuhi, isa sa una nga mga pahayag sang Manluluwas sa publiko nga Sia amo ang Mesias ginhambal sa iya. Siling Niya, “Ako nga nagapakighambal sa imo amo sia.”²

Nangin isa sia ka mabaskog nga saksi, nga nagadeklarar sa mga tawo sa iya siyudad nga si Jesus amo ang Cristo. “[Kag] madamo sang mga Samariahanon sa sadtong banwa ang nagtuo sa iya bangud sang pagpamatuod sang babayi.”³

Ang iya kahimtangan sang nagligad kag sa sina nga tion wala nagdikta sang iya palaabuton. Pareho sa iya, mahimo naton pilion nga magliso sa Manluluwas subong para mabaton ang kusog kag pagpang-ayo nga magatugot sa aton nga tumanon ang tanan nga ginapahimo sa aton diri sa kalibutan.

Ikaduha: Ang Gahum Yara sa Aton

Sa isa ka pamilyar nga bersikulo sa Doktrina kag mga Kasugtanan ang Ginuo nagapaisog sa kababayin-an kag kalalakin-an nga “dapat mangin mapisan sa pagpakigbahin sa maayo nga kawsa, kag maghimo sing madamo nga butang paagi sa ila kaugalingon nga pagbuot; kay ang gahum yara sa ila.”⁴

Mga sisters, ang gahum ari sa aton agud magpahanabo sing madamo nga pagkamatarong!

Si Pangulong Russell M. Nelson nagpamatuod, “Ang kada babayi kag kada lalaki nga nagahimo sang kasugtanan sa Dios kag nagatuman sining mga kasugtanan, kag nagapartisipar nga takos sa mga ordinansa sang priesthood, may direkta nga kinamatarong sa gahum sang Dios.”⁵

Natun-an ko nga samtang ginatinguhaan naton nga tahuron ang sagrado nga mga kasugtanan nga ginhimo naton sa bunyag kag sa balaan nga mga templo, bugayan kita sang Ginuo “sang Iya nagapang-ayo, nagapabakod nga gahum” kag sang “espirituhanon nga mga paghangop kag kaalam nga wala pa [naton] mabaton sadto.”⁶

Ikatatlo: “Halin sa Magagmay nga mga Butang Nagaluntad Inang mga Dalagko”⁷

Sa Wali sa Bukid, gintudlo ni Jesus sa Iya mga disipulo, “Kamo ang asin sang duta”⁸ kag “Kamo ang suga sang kalibutan.”⁹ Sang ulihi ginkumparar Niya ang pagdako sang ginharian sang langit sa tapay [leaven], “nga ginkuha sang isa ka babayi, kag gintago sa tatlo ka sukob sang harina, tubtob ang bug-os nalatom.”¹⁰

Asin
Tapay
Suga

Bisan sa ginagmay nga kantidad, ang kada isa nagaapekto sa tanan nga ara sa ila palibot. Ang Manluluwas nagaagda sa aton nga gamiton ang Iya gahum agud mangin pareho sang asin, tapay, kag suga.

Asin

Makatilingala kon ano nga kinalain ang mahimo sang isa ka wisik sang asin sa sabor sang aton ginakaon. Pero ang asin isa sa pinakabarato kag pinakasimple nga sangkap.

Sa libro nga 2 Mga Hari, mabasahan naton ang parte sa “diutay nga lin-ay,”¹¹ nga ginbihag sang mga Siriahanon kag nangin suluguon sang asawa ni Naaman, kapitan sang Sirianhon nga mga soldado. Sia daw kaangay sang asin; bata pa sia, wala sang importansya sa kalibutan, kag ang iya kabuhi bilang suluguon sa lain nga pungsod klaro nga wala niya ginhandum.

Ugaling, nagsambit sia sang duha ka pulong upod ang gahum sang Dios, nga nagapamatuod sa asawa ni Naaman: “Kabay kuntani nga ang akon ginuo makaatubang sa manalagna nga yara sa Samaria! Ayuhon niya sia sang iya aro.”¹²

Ang iya mga pulong sang pagtuo ginpalab-ot kay Naaman, nga nag-akto suno sa iya ginhambal, kag nagresulta sa iya pag-ayo pareho sa pisikal kag sa espiritwal.

Masami kita nagatutok sa mga suluguon nga nagkumbinsi kay Naaman nga maligo sa suba sang Jordan, suno sa ginsugo sang propeta nga si Eliseo, pero wala kuntani makalab-ot si Naaman sa puluy-an ni Eliseo kon indi tungod sa “diutay nga lin-ay.”

Mahimo nga bata pa kamo ukon pamatyag ninyo indi kamo importante, pero sarang kamo mangin pareho sang asin sa inyo pamilya kag sa inyo komunidad.

Tapay

Nakakaon na bala kamo sang tinapay nga wala ginpaalsa? Paano ninyo ini ilaragway? Madasok? Mabug-at? Matig-a? Sa gamay lang nga tapay, nagahabok ang tinapay, nagainat para mangin mas mamag-an kag mahumok.

Kon agdahon naton ang gahum sang Dios sa aton mga kabuhi, mahimo naton buslan ang “espiritu sang kasubo”¹³ sang inspirado nga mga perspektibo nga nagaalsa sang iban kag nagahatag ligwa nga mag-ayo ang mga tagipusuon.

Sang nagligad lang isa ko ka abyan ang nagahigda sang aga sang Paskwa, nga puno sing kasubo. Nagpakitluoy ang iya kabataan nga magbangon sia; ugaling, puno sia sing kasakit tungod sa palaabuton niya nga diborsyo. Nagahigda nga nagahibi, ginbubo niya ang iya kalag sa pagpangamuyo sa iya Amay nga Langitnon, nga ginasugid sa Iya ang iya kalisod.

Sang matapos ang iya pangamuyo, ang Espiritu naghutik sa iya nga nahibal-an sang Dios ang iya kasakit. Napuno sia sing Iya kaluoy para sa iya. Ining sagrado nga eksperiyensya nagpabakod sang iya mga emosyon kag naghatag sa iya sang paglaum nga wala sia nagakasubo nga isahanon. Nagbangon sia, naggwa, kag naghimo sang snowman upod sa iya kabataan, nga ginabuslan ang kasubo sang aga sang kinadlaw kag kalipay.

Suga

Ano kadako nga kasanag ang kinahanglan para matunga ang kadulom sang isa ka kuwarto? Isa lang ka silak. Kag ang inang silak sang kasanag sa madulom nga lugar mahimo nga maghalin sa gahum sang Dios sa sulod ninyo.

Bisan nga pamatyag ninyo nagaisahanon kamo samtang nagawaswas ang mga unos sang kabuhi, sarang kamo nga magpasilak sang kasanag sa kadulom sang indi paghinangpanay, kagamo, kag kawala sing pagtuo. Ang kasanag sang inyo pagtuo kay Cristo sarang nga mangin padayon kag sigurado, nga nagagiya sinang ara sa inyo palibot padulong sa kahilwayan kag paghidaet.

Mga sisters, mahimo bag-uhon ang mga tagipusuon kag mabugayan ang mga kabuhi kon magtanyag kita sang isa ka piknit sang asin, isa ka kutsara sang tapay, kag isa ka silak sang kasanag.

Napamatuod ako nga ang Manluluwas amo ang asin sang aton mga kabuhi, nga nagaagda sa aton nga tilawan ang Iya kalipay kag pagpalangga.¹⁴ Sia amo ang tapay kon ang aton mga kabuhi mabudlay, nga nagadala sa aton sang paglaum¹⁵ kag nagaalsa sang aton mga palas-anon¹⁶ paagi sa Iya indi matupungan nga gahum kag nagatubos nga gugma.¹⁷ Sia ang aton suga,¹⁸ nga nagaiwag sang aton dalanon papauli.

Ginapangamuyo ko nga magpalapit kita sa Manluluwas, pareho sang babayi sa bubon, kag mag-inom sang Iya tubig nga buhi. Upod ang katawhan sang Samaria, sarang naton masiling sa ulihi, “Karon nagatuo kami, … kay kami gid nakabati, kag nakakilala nga ini amo gid [ang Cristo], ang Manluluwas sang kalibutan.”¹⁹ Sa ngalan ni Jesucristo, amen.